Uj domingo tarden Curazao nisqapi tiyakoj Kenneth, Filomena ima uj qhariwarmiman Bibliamanta yachachej rerqanku.

Kenneth nin: “Chay qhariwarmej wasinkuman chayajtiyku waseqa llavesqa kasharqa, ni autonkupis chaypichu kasharqa. Niraj ripushaspataj celularnejta wajyariytapuni munarqayku”, nispa.

Warmitaj uyarispa nerqa qosan trabajaj risqanta. Punkunpi Kenneth, Filomena ima kashasqankuta reparaspa wasinman pasaykucherqa.

Kennethwan Filomenawanqa chay warmi waqashasqanta repararqanku. Kenneth Bibliamanta yachachinankupaj Diosmanta mañakojtin chay warmeqa waqallarqataj. Chayraykutaj tapurerqanku imaraykuchus waqashasqanta.

Chay warmitaj nerqa chay tarde wañuchikuyta munashasqanta, chaytataj qosanman uj cartapi qhelqashasqanta. Chayllapitaj Kenneth wajyarispa pantachisqa. Chay warmeqa paykunaman nerqa sinchʼi llakisqa kashasqanta, paykunataj sonqochananpaj jina textosta leeriporqanku. Chaytaj mana wañuchikunanpaj yanaparqa.

Kenneth nin: “Jehová Diosman mayta agradecekuyku chay warmiman celularnejta wajyanaykupaj uj angelnejta chayri atiyninnejta yanapawasqaykumanta”, * nispa.

Kennethwan Filomenawan chay warmita yanapanankupaj Dios atiyninnejta chayri uj angelnejta yanapasqanta yuyaspa, ¿pantasharqankuchu? Chayrí, ¿jinallamantachu Kenneth wajyarerqa?

Mana niyta atisunmanchu Diospuni yanapasqanta. Yachanchej jina Diosqa angelesnejta runasta yanapan paymanta yachakunankupaj. Bibliaqa nin Dios uj angelninta Felipeman kachasqanta, etiopiamanta uj runaman yachachimunanpaj, imaraykuchus chay runaqa Diosmanta mayta yachakuyta munasharqa (Hechos 8:26-31).

Ashkha religiones yachachinku ángeles kasqankutapuni. Yachachillankutaj chay angelesmanta wakin kʼachas kasqankuta, Diospa munayninta ruwasqankuta, chayri runasta jarkʼasqankuta. Ashkha runas ángeles kasqankupi creespapis, kausayninkupi yanapasqanta chayri ñakʼarichisqanta creellankutaj. Wakin runastaj mana creenkuchu ángeles kasqankuta.

¿Ángeles kankupunichu? ¿Pitaj paykunata ruwarqa? ¿Imatá paykunamanta Biblia nin? ¿Yanapawasunmanchu chayri ñakʼarichiwasunmanchu? Chayta qhepan yachaqanapi yachakusun.