1, 2. ¿Imamantataj mana iskayrayanachu kanman? (Patapi kaj dibujota qhawariy).

YACHAKORQANCHEJ jina Kuraj Supayqa nerqa, Jehová tukuyta kamachinanpaj mana derechoyojchu kasqanta. Runaspura kamachinakojtinkutaj aswan allin rinanta. Chaytaj, ¿jinapunichu? Runaspura wiñaypaj kamachinakunkuman chay, ¿aswan allintachu kausakunkuman? Ni pí kamachiwajtinchej, wiñaypajtaj kausakojtinchej, ¿aswan kusisqachu kausakusunman?

² Sapa ujninchej chay tapuykunapi tʼukurinanchej kanman. Manapuni iskayrayananchejchu tiyan, Jehovalla tukuyta kamachinanpaj derechoyoj kasqanmanta, kamachiynintaj may allinpuni kasqanmanta. Nillataj iskayrayananchejchu tiyan Payllata kasukuna kasqanmanta. Chaykunamanta mana iskayrayanapajtaj Biblia yanapawanchej. Kunantaj qhawarina, imatachus Biblia nisqanta Jehovalla kamachinanpaj derechoyoj kasqanmanta.

3. ¿Imaraykutaj Jehovalla tukuyta kamachinanpaj derechoyoj?

³ Jehová Diosqa may atiyniyoj, tukuy imatataj ruwarqa. Chayrayku Paylla kamachinanpaj derechoyoj (1 Cró. 29:11; Hech. 4:24). Apóstol Juanqa, mosqoypi jina cielopi 144.000 runasta  rikorqa, pikunachus Jesuswan kamachimonqanku chaykunata. Paykunaqa nisharqanku: “Atiyniyoj Jehová Diosniyku, qanllamin jatunchanapaj jina, yupaychanapaj jinataj kanki, imaraykuchus qanmin tukuy imata ruwarqanki, munayniykiraykutaj tukuy imapis rikhurerqa, ruwasqataj karqa”, nispa (Apo. 4:11). Jehovaqa tukuy imata ruwarqa, chayrayku paylla angelesta, runastapis kamachinanpaj derechoyoj.

4. Jehovaj kamachiyninman churanakuyta ajllaspa, ¿allintachu ajllashasunman?

⁴ Jehová Dioslla tukuy imata ruwarqa, manataj Kuraj Supaychu. Chayrayku Kuraj Supayqa mana derechoyojchu kamachinanpaj. Kuraj Supaywan ñaupa tatasninchejwan Jehová Diospa contranta oqharikushajtinku, may kasqankuta yuyakorqanku (Jer. 10:23). Paykunaqa Jehová Diosta kasukunankutachus manachus ajllayta atinkuman karqa, jinapis contranpi oqharikunankupaj mana derechoyojchu karqanku. Noqanchejpis allin kajta ruwayta, mana allin kajtapis ajllayta atinchej, jinapis mana derechoyojchu kanchej Jehovaj contranpi oqharikunapaj. Jehovaj kamachiyninman churanakuyta ajllasunman chayqa, nipuni allinchu kanman. Imaraykuchus runasqa necesitanchejpuni Jehová kamachinawanchejta.

5. ¿Imaraykú mana iskayrayasunmanchu Jehovaj leyesnin cheqan kajman jinapuni kasqanmanta?

⁵ Chantapis Jehovaqa, cheqan kajman jinapuni kamachin. Chayrayku Paylla kamachinawanchejpaj derechoyoj. Jehovallataj nerqa: “Noqaqa kay pachapi imatapis ruwani khuyakuywan, justiciawan, cheqa kaywantaj, imaraykuchus chaymin kusichiwan”, nispa (Jer. 9:24). Jehová Diosqa leyesta churapuwajninchej. Payqa mana runaspa leyesninkuta valechinchu, imachus cheqan kasqanta ninanpaj. Runasman leyesta qosqantaj, cheqan kajman jinapuni kashan. Bibliaqa nin: “Kamachina tiyanaykeqa justicia patapi, cheqan kaj patapi ima sayachisqa”, nispa. Chayrayku mana iskayrayasunmanchu paypa leyesnin, yuyaychaykunasninpis cheqan kajman jinapuni kasqanmanta (Sal. 89:14; 119:128). Satanastajrí mana atinchu cheqan kausayta apamuyta. Uyanpis kanraj, Jehová Dios mana allintachu kamachisqanta ninanpaj.

6. ¿Imaraykutaj nisunman Jehovalla tukuyta kamachinanpaj derechoyoj kasqanta?

⁶ Chantapis Jehová Diosqa, may yachayniyoj, yuyayniyojtaj. Chayrayku Paylla tukuyta kamachinanpaj derechoyoj. Payqa Wawanman atiyta qorqa mana jampiy atina onqoykunamanta runasta sanoyachinanpaj (Mat. 4:23, 24; Mar. 5:25-29). Jehovapajqa Jesuspa ruwasqan mana tʼukunanpaj jinachu karqa. Imaraykuchus Jehovaqa yachan runaj cuerpon imayna ruwasqachus kasqanta, sanoyachiytataj atin. Yachallantaj imaynatachus wañusqasta kausarichinanta, imaynatachus jatuchej ñakʼariykunatapis chinkachinanta.

7. ¿Imaraykutaj Jehová Dioslla allin kausayta apamuyta atin?

⁷ Kay sajra mundopi gobiernosqa, chʼajwasta, guerrastapis imaynatachus chinkachinankuta mana yachankuchu. Jehovalla may yachayniyoj allin kausayta apamunanpaj (Isa. 2:3, 4; 54:13). Diospa yachayninmanta astawan yachakuspaqa, apóstol Pablo jina nisunchej: “Diospa bendicionesnenqa may chhikapuni, jinallataj yachayninpis, rejsiyninpis. Imatachus ruwayta yuyasqanpis mana yachay atina, jinallataj ñankunasninpis mana rejsiy atina”, nispa (Rom. 11:33).

8. ¿Imayna kamachejtaj Jehová Diosninchej?

⁸ Bibliaqa, Jehovalla kamachinanpaj derechoyoj  kasqanta nin. Chantá nillantaj ni pí pay jina kamachisqanta. Imaraykuchus payqa munakuywan kamachin. Chaytaj mayta sonqochawanchej. Jehovaqa “khuyakuyniyoj, kʼacha sonqoyoj, llampʼu sonqo, imamantapis mana usqhayta phiñarparikojlla, manachayqa khuyakuypeqa jatun, jinallataj cheqa kaypipis” (Éxo. 34:6). Payqa mana kʼumuykachachiwanchejchu, astawanqa sumajta cuidawanchej. Kuraj Supay nin Jehová Dios allin imasta pakawasqanchejta. Chayqa mana jinachu, imajtinchus Jehovaqa tukuy ima allin kajta qowanchej. Astawanpis Payqa munasqa Wawanta qorqa wiñay kausayta tarinanchejpaj (Salmo 84:11; Romanos 8:32 leey).

9. ¿Jehová Dios llakikunchu sapa ujninchejmanta?

⁹ Jehová Diosqa llajtanmanta llakikun, allinnintataj munan. Chantá sapa ujninchejmantapis llakikullantaj. Unay tiempopi Jehová Diosqa, 300 watasta jina juezkunanejta llajtanta enemigosninkumanta librarqa. Chay tiempopi, Jehovaqa Rut sutiyoj warmimanta khuyakorqa. Payqa mana israelitachu karqa. Jinapis tukuy imata ruwarqa israelitaswan khuska Jehovata yupaychananpaj. Jehovataj Rutta bendicerqa uj qosawan, uj wawitawan ima. Rut kausarimojtin, wawanpa mirayninmanta Jesucristo jamusqanta yachanqa. Yachallanqataj paypa kausayninmanta uj libro qhelqakusqanta. Chay librotaj sutinwan Bibliapi kashasqanta. Chaykunata yachaspataj maytachá sonqon qhallallarenqa (Rut 4:13; Mat. 1:5, 16).

10. ¿Imaynatá Jehová Dios kamachin?

¹⁰ Jehovaqa, mana uj sajra capataz jinachu kamachin. Paypa kamachisnenqa mana watasqa jinachu kanku, astawanqa kusisqas kanku (2 Cor. 3:17). Davidqa Jehovamanta nerqa: “Ñawpaqempeqa jatun kaynin kʼancharishan. Atiywan, kusiywan ima tiyakunampeqa kashan”, nispa (1 Cró. 16:7, 27). Uj salmista Etán sutiyoj nerqa: “Sutiykita yupaychaj aylloqa kusikuyniyojmin, Tata Dios, pikunachus uyaykej kʼanchasqampi purinku, chaykuna. Sutiykipi tukuy pʼunchay kusikonqanku; cheqan kasqaykiwan pataman oqharisqa kanku”, nispa (Sal. 89:15, 16).

11. ¿Imapí tʼukurisunman Jehovaj kamachisqan may sumajpuni kasqanta reparanapaj?

¹¹ Jehová Dios may kʼacha kasqanpi astawan tʼukurisun chayqa, astawan reparasun paypa kamachisqan may sumajpuni kasqanta. Uj salmista jinataj nisun: “Uj pʼunchayllapis patiosniykipi kayqa aswan sumaj, waranqa pʼunchaykunata karupi kanamanta nisqaqa”, nispa (Sal. 84:10). Jehovaqa ruwawarqanchej. Chayrayku payqa allinta yachan kusisqa kanapaj imatachus necesitasqanchejta. Chaykunatataj mana michʼakuspa qowanchej. Jehová tukuy ima kamachiwasqanchejqa allinninchejpajpuni. Chayrayku payta tukuy imapi kasukunapaj kallpachakuspaqa, kusisqapuni kasunchej (Isaías 48:17 leey).

12. ¿Imaraykutaj Jehová Diosta tukuy sonqo sirvinchej?

¹² Bibliaqa nin, Jesús waranqa watasta kamachisqanmantawan, Satanás presochasqa kasqanmanta kacharisqa kananta. Ashkha runastataj pantachinanta, paykunallapi yuyanankupaj, Jehovaj kamachiyninmantaj churanakunankupaj (Apo. 20:7, 8). Satanasqa ichapis runasta yuyachenqa, Jehovata mana kasukuspa wiñaypaj kausakuyta atinankuta. Noqanchejqa Satanaspa nisqan llulla kasqanta yachaspapis, qhawarikunanchej kanqa, mana engañachikunapaj. Satanaspa nisqanta qhesachanapaj, Jehovata tukuy sonqo sirvina, kʼacha kasqanrayku, payta munakusqanchejrayku, paylla kamachinanpaj derechoyoj kasqanrayku ima. Noqanchejqa wiñaypaj Jehová kamachinallawanchejtapuni munanchej.

13. ¿Imasta ruwaspataj Jehová Diosta kamachejninchejta jina qhawasqanchejta rikuchisunman?

¹³ Jehovalla kamachinanpaj derechoyoj. Imaynatachus kamachisqantaj may sumajpuni. Chayrayku payllata tukuy sonqo kasukuna. Ni imaraykutaj paymanta karunchakunachu. Pay munasqanman jinataj tukuy imata ruwana. Ajinamanta rikuchisunchej Jehovallata sumaj kamachejta jina qhawasqanchejta (Efesios 5:1, 2 leey).

14. ¿Imatataj tatas, ancianospis Jehová jina ruwananku kanman?

¹⁴ Biblia nin Jehovaqa munakuywan kamachisqanta. Chayrayku tatasqa, ancianospis munakuywan kamachinanku tiyan, nitaj paykunallapis kankuman jinachu imatapis ruwananku tiyan. Astawanqa Jehová Dios jina ruwananku tiyan. Apóstol Pablopis Jehová jina, Jesús jinataj ruwarqa (1 Cor. 11:1). Pabloqa, hermanosta mana kʼumuykachachejchu allin kajta ruwanankupaj, manaqa munakuywan kallpacharej (Rom. 12:1; Efe. 4:1; File. 8-10). Jehovaqa munakuywan imatapis ruwan. Chayrayku pikunachus Jehovata munakunku, kamachisqantataj sumajpaj qhawanku chaykunaqa, pay jinallataj ruwananku tiyan.

15. ¿Imaraykutaj Jehovaj churasqan kamachejkunata respetanchej?

¹⁵ Pikunamanchus Jehová kamachinawanchejpaj atiyta qorqa, chaykunata respetaspaqa, Jehovata kamachejninchejta jina qhawanchej. Chayrayku paykunata kasukunchej, imastachus kamachisqanku mana allin rijchʼawajtinchejpis. Kay sajra mundomanta runasqa, mana ajinatachu ruwanku, Diospa kamachisninrí tukuy sonqo kasukunchej (Efe. 5:22, 23; 6:1-3; Heb. 13:17). Jehová Diosta kasukusun chayqa allinninchejpaj kanqa, imaraykuchus payqa allinninchejtapuni munan.

16. Jehovaj kamachisqanta allinpaj qhawasunchej chay, ¿imatá ruwasunchej?

¹⁶ Kausayninchejpi imatapis ajllasqanchejqa,  Jehová Diosta kamachejninchejta jinachus manachus qhawasqanchejta rikuchin. Jehovaqa mana tukuy imapajpunichu leyesta churapuwanchej. Astawanqa imatachus munasqanta willawanchej. Ropamanta parlarispa, Bibliapeqa mana uj listatachu churapuwanchej imayna ropatachus churakunamanta. Astawanqa Biblia niwanchej maychus kajta pʼachallikunata, wajkunata jatunpaj qhawaspa, allin yuyaywantaj (1 Tim. 2:9, 10). Jehová Diosqa mana munanchu wajkunata pantachinanchejta, nitaj imatachus ruwasqanchejwan wajkunata parlachinanchejtapis (1 Cor. 10:31-33). Jehová imaynatachus kamachisqanta allinpaj qhawasunchej chayqa, paypa munayninman jina imatapis ruwasunchej, manataj munayninchejman jinallachu.

17, 18. ¿Imaynasmantataj qhariwarmis rikuchinkuman Jehovata kamachejninkuta jina qhawasqankuta?

¹⁷ Casarasqa cristianospis Jehovallata sumaj kamachejninkuta jina qhawasqankuta rikuchinkuman. Wakin cristianosqa mayta llakikunku, qhariwarmi kausayninku mana yuyasqankuman jinachu kasqanrayku. ¿Imatá paykuna ruwankuman? Imatachus Jehová Israel llajtawan ruwasqanpi tʼukurinkuman. Jehová Diosqa Israel llajtapaj qosanpis kanman jina karqa, Israel llajtataj warminpis kanman jina karqa (Isa. 54:5; 62:4). Israel llajtaqa mayta Jehovaj sonqonta nanacherqa. Jinapis Jehovaqa pacienciawan yanapallarqapuni. Kutin kutita israelitasta perdonarqa, paykunawan trato ruwasqanmantataj yuyarikorqa (Salmo 106:43-45 leey). Jehová Diospa munakuynin may jatun kasqanta reparaspa, ¿astawancharí payman qayllaykuyta munanchej?

¹⁸ Casarasqa cristianosqa, Jehovata munakusqankurayku pay jina ruwanankupaj kallpachakunku. Qhariwarmi kausayninkupi mana allinta kausakojtinku, mana divorciakuyta maskʼankupachachu. Yachanku Jehová khuskallapuni kanankuta munasqanta. Biblia nin jina, iskayninkumanta mayqellanpis khuchichakuy juchaman urmajtillanku divorciakuyta, wajwantaj casarakuyta atinkuman (Mat. 19:5, 6, 9). Qhariwarmi jina allinta kausakunankupaj kallpachakuspa, Jehovata kamachejninkuta jina qhawasqankuta rikuchinku.

19. Maykʼajllapis pantaspa, ¿imatá ruwananchej kanman?

¹⁹ Juchasapa kasqanchejrayku imaynallamantapis Jehovaj sonqonta nanachisunchej. Jehovaqa chayta sumajta yachan. Mayta munakuwasqanchejraykutaj, Wawanta kachamorqa juchamanta kacharichinawanchejpaj. Chayrayku maykʼajllapis pantaykuspaqa Diosmanta perdonta mañakuna (1 Juan 2:1, 2). Pantasqanchejmanta yachakuna, amataj anchata juchachakunachu. Jehovaj qayllallanpipuni kasunchej chayqa, pay perdonawasunchej. Chantapis yanapawasun ñaupajllamanpuni rinanchejpaj, qhepaman ima llakiyta atipananchejpajpis (Sal. 103:3).

20. ¿Imaraykutaj Jehovallata kamachejninchejta jina qhawananchej tiyan?

²⁰ Pisimantawan mosoj jallpʼapi Jehová Dioslla tukuyta kamachiwasunchej. Tukuytaj cheqan ñankunasninmanta yachakusunchej (Isa. 11:9). Kunanqa chaykunamanta yachakushanchejña. Pisimantawan manaña pipis Jehovaj kamachiyninman churanakonqachu. Jehová Diosta kasukuspa, tukuy sonqo payta sirvispa, pay jina ruwanapaj tukuy imapi kallpachakuspaqa, may sumaj kamachejninchejta jina qhawasqanchejta rikuchinchej.