1. ¿Imaraykú may allin ima tiempopichus kausashasqanchejta reparananchej? (Patapi kaj dibujota qhawariy).

TʼUKURINA jatun tantakuy qallarinanpajña kashasqanpi. Chay paqarinpaj wakichikusqanta kamachej hermano plataformaman qayllaykun, uyarejkunatataj “allin jamusqa kankichej”, nispa nin. Churakusqan takiykunapis uyarikun. Tantakuypi kajkunataj tiyakoj rinanku kasqanta yachanku. Munankutaj kʼachitu takiykunata, umallirichiykunata ima sumajta uyariyta. Jinapis wakenqa ichá purishasqankurayku chayri amigosninkuwan parlashasqankurayku, mana reparankuchu jatun tantakuy qallarisqantaña. Sutʼita rikunchej paykuna mana reparasqankuta, chay paqarinpaj wakichikusqanta kamachej hermano plataformaman chimpasqantaña, takiykunapis uyarikushasqantaña, tukuypis tiyakushasqankutaña. Kayqa yachachiwanchej sumaj wakichisqas kananchej kasqanta. Imaraykuchus tumpamantawan uj sumaj ima qallarenqa. ¿Imamantataj parlashanchej?

2. ¿Imaraykú Jesús yachachisqasninman wakichisqa kanankuta nerqa?

² Jesucristoqa yachachisqasninman nerqa wakichisqas kanankuta ‘kay pachaj tukukuyninpaj’. Nerqataj: “Wakichisqa kaychej; ama puñurpayaychejchu, imaraykuchus mana yachankichejchu maykʼajchus chay pʼunchay chayamunanta”, nispa. Chantá, ashkha  kutista nerqa: “Ama puñuspa wakichisqapuni kaychej”, nispa (Mat. 24:3; Marcos 13:32-37 leey). Mateo libropis rikuchillantaj Jesús yachachisqasninman wakichisqas kanankuta yuyaychasqanta. Pay nerqa: “Wakichisqas suyaychej, imaraykuchus mana yachankichejchu ima pʼunchaychus Señorniykichej [ja]munanta”, nispa. Ujtawan nillarqataj: “Wakichisqa kaychej, imaraykuchus mana yuyasqaykichej horapi Runaj Churenqa [ja]monqa”, nispa. Ujtawanpis nillarqataj: “Wakichisqapuni kaychej, imaraykuchus mana yachankichejchu ima pʼunchaytachus, chayri ima horatachus [kananta]”, nispa (Mat. 24:42-44; 25:13).

3. ¿Imaraykutaj Jesuspa yuyaychasqanta kasukunanchej tiyan?

³ Jehovaj testigosnenqa Jesuspa yuyaychasqanta kasukunchej. Imaraykuchus ‘tukukuy pʼunchaykunapi’ kausashasqanchejta, tumpamantawan “manchay ñakʼariy” qallarinanta yachanchej (Dan. 12:4; Mat. 24:21). Jesús nerqa jinataj, Diospa llajtanqa Jallpʼantinpi sumaj willaykunata willashan. Chantapis tukuynejpi guerrasta, onqoykunata, jallpʼa ikhakuykunata, yarqhaykunata, maqanakuykunata ima rikunchej. Kay tiempopi religionta kamachejkunataj ni jaykʼaj jina runasta chʼaukiyashanku (Mat. 24:7, 11, 12, 14; Luc. 21:11). Mayta suyakushanchej Jesús jamunanta, Tatanpa munayninta ruwananta ima (Mar. 13:26, 27).

4. 1) ¿Imaraykú creenchej Jesús maykʼajchus Armagedón maqanakuy kananta yachasqantaña? 2) Maykʼajchus manchay ñakʼariy qallarinanta mana yachaspapis, ¿imamantá mana iskayrayanchejchu?

⁴ Jatun tantakuy paqarinpi chayri tardenpi ima horachus qallarinanta yachanchej. Chaywanpis mana yachanchejchu maykʼajchus manchay ñakʼariy tiempo qallarinanta. Kay Jallp’api kashaspa, Jesús nerqa: “Maykʼajchus, ima pʼunchaychus, ima horachus chay imas kananta mana pipis yachanchu; ni janaj pachapi angelespis, nitaj Churipis yachanchu. Tatallay chaytaqa yachan”, nispa (Mat. 24:36). Armagedón maqanakuyta Jesús ñaupajman apanqa, chayrayku ichapis payqa chay maqanaku maykʼajchus kananta yachanña (Apo. 19:11-16). Jinapis noqanchejqa mana yachanchejchu maykʼajchus, ima horachus kananta. Chayrayku wakichisqallapuni kananchejqa, ¡may sumaj! Jehovaqa yachan maykʼajchus manchay ñakʼariy tiempo qallarinanta. Chay pʼunchaytaj qayllitapiña kashan. Biblia nin jinataj “chayamonqapuni” (Habacuc 2:1-3 leey). ¿Imaraykú chaymanta mana iskayrayananchejchu tiyan?

5. Jehovaj profeciasnin maychus tiemponpipuni juntʼakusqanmanta, sutʼinchay.

⁵ Jehovaj profeciasnenqa maychus tiemponpipuni juntʼakun. Tʼukurinachej maykʼajchus israelitasta Egiptomanta kacharichisqanpi. Chaytaj karqa 1513 watapi Jesús niraj jamushajtin 14 nisán pʼunchaypi. Chay pʼunchaymanta parlaspa Moisés nerqa: “Maykʼajchus tawa pachaj kinsa chunkayoj watas juntʼakorqa, chay kikin pʼunchayllataj Tata Diospa soldadosnin jina israelitasqa Egiptomanta llojsiporqanku”, nispa (Éxo. 12:40-42). Chay 430 watasqa, 1943 wata Jesús niraj jamushajtin 14 nisán pʼunchaypi qallarerqa. Nisunman Jehová Abrahamman miraynin bendecisqa kananta nisqan juntʼakuyta qallarikushajtin (Gál. 3:17, 18). Qhepamantaj Jehovaqa Abrahamman nerqa miraynin waj llajtaspi tiyakunankuta, esclavos kanankuta, “tawa pachaj watasta” ñakʼarichisqas kanankuta ima (Gén. 15:13; Hech. 7:6). Chay 400 watasqa, 1913 wata Jesús niraj jamushajtin qallarerqa, Ismael Isaacmanta ‘alqochakushajtin’. Chay watasqa Jehová israelitasta Egiptomanta kacharichishajtin tukukorqa (Gén. 21:8-10; Gál.  4:22-29). Rikunchej jina may chhika watas ñaupajta Jehová nerqaña ima pʼunchaychus llajtanta kacharichinanta.

6. ¿Imaraykutaj yachanchej Jehová kamachisninta salvanantapuni?

⁶ Josueqa, Egiptomanta llojsejkunamanta ujnin karqa. Unayninmantaj israelitasta nerqa: “Munani tukuy sonqo, tukuy alma reparanaykichejta Tata Diosqa imatachus nerqa qonasuykichejta, chay allin imasta juntʼasqanta. Ni ima nisqampis qhepakunchu mana juntʼakuspaqa”, nispa (Jos. 23:2, 14). Jehovaqa kamachisninman nin, manchay ñakʼariy tiempopi salvananta, paraisopi wiñay kausayta qonanta ima. Nisqanta juntʼananmantataj mana iskayrayanchejchu. Chayrayku paraisopi kausakuyta munanchej chayqa, wakichisqaspuni kananchej tiyan.

7, 8. 1) ¿Ima llankʼayniyojtaj karqa llajtata qhawaj runa, imatataj yachakunchej? 2) Llajtata qhawaj puñurparejtin, ¿imataj kanman karqarí? Sutʼinchay.

⁷ Ñaupa tiempo llajtasta qhawajkunamanta mayta yachakusunman. Jerusalén, waj llajtas ima, jatuchaj perqasniyoj karqanku enemigosninku mana yaykunankupaj. Qhawajkunaqa perqa pataspi qhepakoj kanku, llajtaj muyuyninpi imachus kasqanta qhawanankupaj. Wakintaj llajta punkuta qhawaj kanku. Paykunaqa tuta, pʼunchay sumaj wakichisqas kananku karqa. Enemigosninkuta rikuspataj, llajtaman willananku karqa (Isa. 62:6, 7). Qhawajkunaqa yacharqanku rijchʼarisqas kananku kasqan, imachus kashasqanmanta sumajta yachananku kasqan ima may sumaj kasqanta. Puñurparejtinkutaj, ashkha runas wañunkuman karqa (Eze. 33:6).

⁸ Kay 70 watapi, Jesús jamusqanmantaña, romano soldadosqa Jerusalenman yaykuykorqanku. ¿Imaynatá? Unay tiempomanta qhelqaj judío Josefo nisqanman jina, llajtata wakin qhawajkuna puñurparisqanku. Romanostaj yaykuykuspa templota ruphaykucherqanku, Jerusalentataj thuñerqanku. Mana jaykʼaj jinataj chay kutipi judiosqa mayta ñakʼarerqanku.

9. ¿Imatataj ashkha runas mana yachankuchu?

⁹ Kunanpis gobiernosqa ashkha soldadosniyoj, fronterasninkuta qhawanankupajtaj kunallanraj rikhurimusqan aparatosniyoj ima kanku. Chay gobiernosqa suyunkuta enemigosninkumanta chayri imamantapis sumajta jarkʼanku. Jinapis paykunaqa mana reparankuchu cielopi may atiyniyoj uj gobierno kasqanta, chay gobiernopitaj Jesús kamachishasqanta. Tumpamantawantaj chay gobiernoqa tukuy gobiernosta chinkachenqa (Isa. 9:6, 7; 56:10; Dan. 2:44). Chay pʼunchay chayamunantataj mayta suyashanchej, munanchejtaj wakichisqas kayta. Chayrayku Bibliaj profeciasnin juntʼakushasqanta reparanchej, Jehovatataj cheqa sonqosllapuni sirvishanchej (Sal. 130:6).

10, 11. 1) ¿Imamantá allinta qhawarikunanchej tiyan, imaraykutaj? 2) ¿Imaraykutaj ninchej Satanás runasta tanqashasqanta Bibliaj profeciasninta mana uyarinankupaj?

¹⁰ Uj guardia tukuy tuta mana puñusqanpi tʼukurina. Sutʼiyaytataj may saykʼusqa, puñuywan atipachikushan. Noqanchejpis qhepa pʼunchaykunapi kausashanchej. Chayrayku sumajta qhawarikunanchej tiyan mana puñurparinapaj. ¿Imaraykú? Kay pachaj tukukuynin aswan qayllitapiña kasqanrayku, ichá mana atillasunchu rijchʼarisqa chayri wakichisqa kayta. May llakiy kanman puñurparinanchej. Kunantaj qhawarina kay pachaj tukukuyninpaj imaschus mana wakichisqa kanapaj yanapawanchejchu chay imasta.

¹¹ Satanasqa runasta chʼaukiyan. Jesusqa niraj wañupushaspa yachachisqasninman kinsa kutita “kay pachata kamachejqa” Satanás kasqanta nerqa (Juan 12:31;  14:30; 16:11). Kuraj Supayqa llulla religionesnejta runasta chʼaukiyashan. Chayrayku ashkha runas, Bibliaj profeciasnin kay pacha tumpamantawan tukukunanta nisqanta mana kasukunkuchu (Sof. 1:14). Sutʼita rikunchej, Satanás runaspa ‘yuyayninkuta laqhayachishasqanta’ (2 Cor. 4:3-6). Chayraykutaj ashkha runas, mana uyariyta munawanchejchu kay pacha tumpamantawan chinkachisqa kananta, Jesucristo kamachishasqantaña ima willajtinchej. Sapa kutitaj niwanchej: “Mana yachayta munanichu”, nispa.

12. ¿Imaraykú mana saqenachu tiyan Satanás chʼaukiyanawanchejta?

¹² Ashkha runas Bibliaj profeciasninmanta mana yachayta munankuchu. Jinapis mana saqenachu chay llakichinawanchejta. Imaraykuchus wakichisqas kananchej kasqanta yachanchej. Apóstol Pablo cristianosman nerqa: “Qankuna allinta yachankichej suwaqa mana yuyasqallamanta tutapi jamusqanta; ajinallatataj Señorpa pʼunchaynimpis mana yuyasqallamanta jamonqa”, nispa (1 Tesalonicenses 5:1-6 leey). Jesustaj nerqa: “Wakichisqas kanaykichej tiyan, imaraykuchus mana yuyasqaykichej horapi Diospa Churenqa jamonqa”, nispa (Luc. 12:39, 40). Tumpamantawan Satanasqa runasta yuyachenqa kay pachapi ‘tukuy imapis allillan, ni imamantataj llakikuna kasqanta’. Jinallapitaj Diospa pʼunchaynin jamonqa. Runastaj maytapuni mancharenqanku. Chay pʼunchaypaj wakichisqa kayta munanchej chayqa, ama Satanaswan chʼaukiyachikunachu. Pabloj nisqantataj kasukuna, pay nerqa: “Ama puñuspa qhawana. Chʼaki sonqo runas jina yuyayninchejpi kana”, nispa. Chaypajqa Bibliata sapa pʼunchay leena tiyan, Jehová niwasqanchejpitaj tʼukurina tiyan.

13. 1) ¿Imata ruwanankupajtaj kay pachaj yuyaynin runasta tanqan? 2) ¿Imatá ruwasunman kay pachaj yuyayninta qhesachanapaj?

¹³ Kay pachaj yuyaynenqa runasta mana allinta yuyanankupaj tanqan. Kay tiempopi ashkha runas Diosmanta mana yachakuyta munankuchu (Mat. 5:3). Chayraykutaj tukuy tiemponkuta, kallpankuta ima churanku kay pachapi kaj imasta maskʼanankupaj (1 Juan 2:16). Ni jaykʼaj jinataj kay tiempopi tukuy ima tiyan sonqota kusirichinapaj. Chaykunataj runasta tanqan munaynillankuta ruwanankupaj (2 Tim. 3:2-4). Chayraykutaj  aswan allin kajmanta qonqapunku, nitaj yuyankuchu Dioswan amigos kayta. ¿Imatá ruwasunman kay pachaj yuyayninta qhesachanapaj? Pablo cristianosman nerqa: “Amataj yuyaychejchu aychaj sajra munayninta sajsachiyta”, nispa. Kay yuyaychayta kasukusun chayqa, wakichisqasllapuni kasun (Rom. 13:11-14).

14. ¿Ima yuyaychaytaj Lucas 21:34, 35 versiculospi tiyan?

¹⁴ Jehovaj atiyninwan yanapachikuyta munanchej, manataj kay pachaj yuyayninwanchu. Jehovaqa atiyninwan imachus tumpamantawan kananta entiendenapaj yanapawanchej (1 Cor. 2:12). ^[1] Jinapis sumajta qhawarikunanchej tiyan, imaraykuchus sonqonchejqa anchata mikhuywan, ujyaywan ima atipachikunman (Lucas 21:34, 35 leey). Wakin runasqa qhepa pʼunchaykunapi kausashasqanchejpi creesqanchejrayku ichá wampus niwasunman (2 Ped. 3:3-7). Chaywanpis chay nisqankuta mana kasunachu. Imaraykuchus sutʼita yachanchej kay pachaj tukukuynin qayllitapiña kasqanta. Dios atiyninwan yanapanawanchejta munanchej chayqa, tantakuykunaman mana saqespa rinanchej tiyan.

15. ¿Imapí Pedro, Santiago, Juan ima rikukorqanku, imapí noqanchejpis rikukusunman?

¹⁵ Pantaj runas kasqanchejrayku wakichisqas kayta mana atillanchejchu. Jesusqa yacharqa pantaj runas kasqanchejta, juchallikusqanchejta ima. Tʼukurinataj imachus kasqanpi Jesús niraj wañupushajtin. Payqa mana pantaj runachu karqa, jinapis yacharqa cheqa sonqo kananpaj Jehovaj yanapayninta mañakunan kasqanta. Pedrota, Santiagota, Juanta ima, rijchʼarisqallapuni kanankuta nerqa, tatanmanta mañakunankama. Jinapis paykunaqa mana repararqankuchu rijchʼarisqa kananku may allin kasqanta. Saykʼusqas kasqankuraykutaj puñurparerqanku. Jesuspis saykʼusqa kasharqa, jinapis rijchʼarisqallapuni karqa tatanmanta mañakuspa. Apostolespis pay jina ruwananku karqa mana puñurpanankupaj (Mar. 14:32-41).

16. Lucas 21:36 versículo nisqanman jina, ¿imatataj Jesús nerqa ruwananchejta wakichisqallapuni kanapaj?

¹⁶ Jehovaj pʼunchayninpaj rijchʼarisqallapuni, wakichisqallapuni kanapaj, ¿imataj yanapawasun? Cheqan kajta ruwayta munananchej tiyan. ¿Imatawan ruwananchej tiyan? Jesús niraj wañupushaspa yachachisqasninman nerqa Jehovaj yanapayninta mañakunallankutapuni (Lucas 21:36 leey). Kay qhepa pʼunchaykunapi wakichisqallapuni kanapajtaj, Diospa yanapayninta mañakunallapuni tiyan (1 Ped. 4:7).

17. ¿Imatataj ruwasunman kay pachaj tukukuyninpaj wakichisqas kananchejpaj?

¹⁷ Jesusqa yachachisqasninman kay pachaj tukukuynin “mana yuyasqaykichej horapi” jamonqa nerqa (Mat. 24:44). Chayrayku tukuy tiempo wakichisqallapuni kana. Mana tiempo kanchu kay pachaj imasninta maskʼanapaj. Runasqa kay pachaj imasnin kusichinawanchejta ninku. Chay nisqankutaj mana cheqachu. Astawanpis Jehovawan, Jesuswan wakichisqas kanapaj imatachus ruwanata Biblianejta niwanchej. Chayrayku Bibliaj profeciasnin imaynatachus juntʼakushasqanta allinta reparana. Jehovaman qayllaykunallapuni, gobiernontataj kausayninchejpi ñaupajman churanallapuni. Ajinamanta kay pachaj tukukuyninpaj wakichisqas kasunchej (Apo. 22:20). Imaraykuchus kausayninchejqa wakichisqas kananchejmanta kashan.