1. Jesús kausayninta qosqanrayku, ¿ima bendicionestaj kanqa?

JESUCRISTO kausayninta qosqanrayku ashkha bendiciones kan. Cheqan kajta ruwaj runasqa Diospa familianmanta kayta atenqanku. Chantapis wiñaypaj kusisqa kausakuyta atisunchej. Jinapis Jesús kausayninta qosqanqa, mana chay imasllapajchu karqa. Chay imastataj, cielopi, jinallataj kay Jallpʼapi kausajkunapis yachayta munanchej (Heb. 1:9).

2. 1) ¿Imastataj Jesús mañakunata yachacherqa? (Patapi kaj dibujota qhawariy). 2) ¿Imatataj kay yachaqanapi yachakusun?

² Jesusqa wañuchisqa kananpaj iskay watas jina faltashajtin, yachachisqasninman ajinata mañakunankuta nerqa: “Janaj pachapi kashaj Tatayku, sutiyki jatunchasqa kachun. Reinoyki jamuchun, munayniykitaj ruwasqa kachun, imaynachus janaj pachapi, ajinallatataj kay pachapipis”, nispa (Mat. 6:9, 10). Qhawarina imaynatachus Jesuspa wañuynin yanapasqanta: Jehovaj sutin llimphuchasqa kananpaj, Diospa Gobiernon kamachinanpaj, munaynin juntʼakunanpaj ima.

3. 1) ¿Imatá Jehovaj sutin paymanta rikuchin? 2) ¿Imaynatataj Diospa sutinta Satanás chʼichicharqa?

³ Jesusqa Diosmanta mañakuyta yachachishaspa, ñaupajtaqa Diospa sutin jatunchasqa chayri llimphupaj qhawasqa kananta nerqa. Jehovaj sutenqa, imaynachus pay kasqanta rikuchin. Pay jina atiyniyoj, cheqan kajtataj ruwajqa, ni maypi kanchu. Jesusqa Diosmanta nerqa: “Santo Kaj Tatáy”, nispa (Juan 17:11). Jehová santo chayri may llimphu kasqanrayku, tukuy ima ruwasqan, leyesninpis mana chʼichiyoj. Jinapis Edén huertapi, Satanasqa Dios kamachiykunata churananpaj derechoyoj kasqanta iskayrayacherqa. Payqa Jehovamanta llullakorqa, sutintataj chʼichicharqa paymanta sajrata parlaspa (Gén. 3:1-5).

4. ¿Imaynatá Jesús Diospa sutinta jatuncharqa?

⁴ Jesusqa Jehovaj sutinta mayta munakoj, tukuy atisqantataj ruwarqa Diospa sutin jatunchasqa kananpaj (Juan 17:25, 26). ¿Imaynatá chayta ruwarqa? Jesusqa kausayninwan yachachisqanwantaj, wajkunata yanaparqa Jehovaj kamachiykunasnin cheqanpuni, allinninchejpajtaj kasqanta reparanankupaj (Salmo 40:8-10 leey). Satanasqa Jesusta wañuchinankama sinchʼita ñakʼaricherqa. Jinapis Jesusqa Diosta mana wasancharqachu. Payqa rikucherqa mana pantaj runa tukuy imapi Diosta kasukuyta atisqanta.

5. ¿Imata ruwaspataj Jehovaj sutinta jatunchasunman?

⁵ ¿Imaynatá Jehovaj sutinta munakusqanchejta rikuchisunman? Kausayninchejwan. Jehovaqa llimphu kausayniyoj kananchejta munan (1 Pedro 1:15, 16 leey). Ajinata kausakuspaqa, payllata yupaychasunchej, tukuy sonqotaj kasukusunchej. Qhatiykachasqa kaspapis, Jehová kamachiwasqanchejman jina kausakunapaj kallpachakunchej. Ajinamantataj sutinta jatunchanchej (Mat. 5:14-16). Llimphu kausayniyoj kaspaqa, rikuchinchej Satanás llulla kasqanta, Diospa kamachiykunasnintaj allinninchejpaj kasqanta. Juchasapas kasqanchejrayku, imapipis pantasunpuni. Chay kajtintaj juchanchejmanta pesachikuna, tukuy atisqanchejtataj kallpachakuna Jehovaj sutinta manaña chʼichichanapaj (Sal. 79:9).

6. Pantaj runas kajtinchejpis, ¿imaraykutaj Jehová cheqan runaspaj qhawawasunman?

⁶ Ajllasqa cristianosmanta chayri waj ovejasmanta kajtinchejpis, Jehovaqa Jesuspa wañuyninpi creejtinchej juchasninchejta perdonawanchej. Jehovaqa kausayninkuta payman qojkunata, payta yupaychanankupaj japʼikapun. Ajllasqa cristianostaqa cheqan runaspaj qhawan wawasnin kanankupaj, waj ovejasmanta kajkunatataj amigosnin kanankupaj (Juan 10:16; Rom. 5:1, 2; Sant. 2:21-25). Jesús kausayninta qosqanrayku, Diosman qayllaykuyta atinchej, sutinta jatunchaytapis.

7. Jesús kausayninta qosqanrayku, ¿imastaj kanqa?

⁷ Padrenuestro mañakuypi Jesús nerqa: “Reinoyki jamuchun”, nispa. ¿Imaynatá Jesuspa wañuynin Diospa Gobiernon kamachinanpaj yanapan? Diospa Gobiernonpeqa Jesuswan, 144.000 ajllasqa runaswan kamachenqanku. Chay runastaj Jesús kausayninta qosqanrayku, cieloman rinankupaj kausarichisqa kanku (Apo. 5:9, 10; 14:1). Paykunaqa reyestaj, sacerdotestaj kanqanku, kay Jallpʼatataj Jesuswan khuska waranqa watasta kamachimonqanku.  Jehovaqa Gobiernonnejta kay Jallpʼata uj paraisoman tukuchenqa, tukuy runastataj mana juchayojman. Cielopi, jinallataj Jallpʼapi Diospa kamachisnenqa, uj familialla kanqanku (Apo. 5:13; 20:6). Jesusqa Satanasta wiñaypaj chinkachenqa, jinallataj tukuy sajra ruwasqasnintapis (Gén. 3:15).

8. 1) ¿Imaynatá Jesús yachachisqasninta entiendecherqa Diospa Gobiernon kamachinanpuni kasqanta? 2) ¿Imaynatá Diospa Gobiernonpa kamachiyninpi kasqanchejta rikuchinchej?

⁸ Jesusqa yachachisqasninta yanaparqa Diospa Gobiernon kamachinanpuni kasqanta entiendenankupaj. ¿Imaynamantá? Bautizakuytawan, Jesusqa “Diospa reinonmanta evangeliota” tukuynejpi willayta qallarerqa (Luc. 4:43). Yachachisqasninmantaj nerqa: “Noqamanta testigos jina willankichej [...] tukuy kay pachaj kʼuchusninkama”, nispa (Hech. 1:6-8). Kunanpis Diospa Gobiernonmanta willakushasqanrayku, runasqa Jehová preciowan rantiwasqanchejmanta yachakuyta atinku, Gobiernonpa kamachiyninpi kaytapis. Noqanchejqa Diospa Gobiernonpa kamachiyninpi kasqanchejta rikuchinchej, ajllasqa cristianosta sumaj willaykunata willamuypi yanapakuspa (Mat. 24:14; 25:40).

9. ¿Imaraykutaj Jehovaj munaynin juntʼakunanmanta mana iskayrayanchejchu?

⁹ ¿Imatá niyta munasharqa Jesús “munayniykitaj ruwasqa kachun” nispa? Jehovaj nisqanqa juntʼakunpuni (Isa. 55:11). Satanás Jehovaj contranpi oqharikojtinpis, Jehovaqa munayninta juntʼanqapuni. Payqa munarqa Jallpʼaman Adanpa mana juchayoj wawasnin juntʼanankuta (Gén. 1:28). Sichus Dios, Adantawan Evatawan chay rato wañuchinman karqa chayqa, munaynin mana juntʼakunmanchu karqa. Chayrayku Jehovaqa wawasniyoj kanankuta saqerqa. Jesús kausayninta qosqanrayku, paypi creejkunaqa mana juchayojman tukuyta atenqanku, wiñaypajtaj kausakuyta. Jehovaqa runasta munakun. Chayrayku imaynachus qallariypi kausay karqa, ajina kausayta qoyta munawanchej.

10. ¿Imaynatá Jesuspa wañuynin wañusqasta yanapan?

¹⁰ Jehovata mana rejsispalla wañuporqanku chay runasmanta, ¿imataj kanqa? Jehovaqa munan runas kausanankuta. Chayrayku wañusqasta kausarichenqa. Chaytaj kanqa Jesús kausayninta qosqanrayku. Kausarimojkunaqa Jehovamanta yachakuyta, wiñaypajtaj kausakuyta atenqanku (Hech. 24:15). Jehovaqa “kawsay yaku juturi”, wañusqasta kausarichimuspataj paykunaj Tatankuman tukun (Sal. 36:9). Padrenuestro mañakuypi, Jesús nerqa: “Janaj pachapi kashaj Tatayku”, nispa (Mat. 6:9). Jehovaqa Jesusman atiyta qon wañusqasta kausarichimunanpaj (Juan 6:40, 44). Chayrayku Jesús nerqa: “Noqa kani kawsarimuy, kawsaytaj”, nispa (Juan 11:25).

11. ¿Imatataj Dios munan “may chhika” runasmanta kajkunapaj?

¹¹ Jesús nillarqataj: “Pichus Diospa munayninta ruwan, chaymá wawqeyqa, panaypis, mamaypis”, nispa (Mar. 3:35). Jehovaqa munan “may chhika” runas tukuy nacionesmanta, ayllusmanta, tukuy parlaykunamantawan payta yupaychanankuta. Paykunaqa mana yupay atina kanku, Jesús juchasninchejrayku wañusqanpi creenku, Diostataj kasukuyta munanku. Paykunaqa Diosta yupaychaspa ninku: “Salvacionqa Diosninchejpata, pichus kamachina tiyanapi  tiyasqa kashan, chaypata, Corderojpatawan”, nispa (Apo. 7:9, 10).

12. Padrenuestro mañakuypi, ¿ima kinsa imastataj yachakunchej?

¹² Padrenuestro mañakuypeqa Jehovamanta mayta yachakunchej, jinallataj imatachus runaspaj munasqanmantapis. Uj kaj, tukuy atisqanchejta ruwananchej tiyan, Jehovata, sutinta ima jatunchanapaj (Isa. 8:13). Jesús kausayninta qosqanqa, mana salvakunallapajchu yanapawanchej, manachayqa Diospa sutintapis jatunchan. Jesuspa sutenqa niyta munan, “Jehová Salvan”. Iskay kaj, Jehovaqa Gobiernon kamachishajtin, Jesuspa wañuyninrayku ashkha bendicionesta kasukoj runasman qonqa. Kinsa kaj, Diospa munaynin juntʼakunanmanta, mana iskayrayanchejchu (Sal. 135:6; Isa. 46:9, 10).

13. ¿Imatataj bautizakuspa rikuchinchej?

¹³ Jesús kausayninta qosqanmanta agradecekusqanchejta rikuchinchej, kausayninchejta Jehovaman qopuspa, bautizakuspa ima. Ajinamanta Jesuspa wañuyninpi creesqanchejta, Jehovajta kasqanchejta ima rikuchinchej (Rom. 14:8). Chantapis bautizakuspaqa, Jehovamanta “llimphu sonqo yuyayta” mañakunchej (1 Ped. 3:21). Jesuspa wañuynintaj yanapawanchej, Jehová chay mañakusqanchejman jina ruwananpaj. Manataj iskayrayanchejchu Jehová tukuy ima niwasqanchejta juntʼananmanta (Rom. 8:32).

14. ¿Imaraykú Jehová runa masinchejta munakunata kamachiwanchej?

¹⁴ Jehová Diosqa imatapis munakuwasqanchejrayku ruwan, munantaj payta  yupaychajkuna pay jina kanankuta, purajmantataj munanakunankuta (1 Juan 4:8-11). Runasta munakuspaqa, “janaj pachapi kashaj Tata[nchejpa] wawasnin” kayta munasqanchejta rikuchinchej (Mat. 5:43-48). Tukuy kamachiykunamanta kuraj kajqa nin: “Diosniykitaqa munakunki tukuy sonqoykiwan”, nispa. Qhepan kajtaj nin: “Runa masiykita munakunki”, nispa (Mat. 22:37-40). Runa masinchejta munakusqanchejta rikuchisunman, Diospa Gobiernonmanta sumaj willaykunata paykunaman willaspa. Jehová kamachiwasqanchejman jina wajkunata, astawanraj hermanosninchejta munakojtinchej, Diosta tukuy sonqo munakusun (1 Juan 4:12, 20).

15. 1) ¿Ima bendicionestataj Jehovamanta japʼinchej? 2) ¿Ima bendicionestataj aswan qhepaman japʼisun?

¹⁵ Jehová Diosqa Jesuspa wañuyninpi creesqanchejrayku, juchasninchej “pampachasqa” kananta nin. Payqa tukuynin juchasninchejta perdonayta atin (Hechos 3:19-21 leey). Yachakorqanchej jina, Jehovaqa Jesuspa wañuyninnejta wakin runasta wawasninpaj rejsikapuyta atin. Paykunaqa cieloman rinankupaj ajllasqa kanku (Rom. 8:15-17). Waj ovejasmanta kajkunatataj, Jallpʼapi familianmanta kanankupaj wajyarin. Paykuna mana juchayoj runasman tukusqankutawan, pruebaman churasqa kanqanku. Jehovata mana wasanchajtinkutaj, payqa wawasninpaj rejsikaponqa (Rom. 8:20, 21; Apo. 20:7-9). Jehovaqa tukuynin wawasninta munakullanqapuni. Dios preciowan rantiwasqanchejrayku wiñaypaj bendiciones kallanqapuni (Heb. 9:12). Jehovaqa chayta uj sumaj regalota jina qowanchej, nitaj pipis qhechuwasunmanchu.

16. ¿Imasmantataj Jesuspa wañuynin kacharichiwanchej?

¹⁶ Juchasninchejmanta pesachikojtinchej, Satanasqa mana imatapis ruwayta atenqachu Diospa familianmanta mana kananchejpaj. Jesusqa uj kutillata wañuspa, juchamanta wiñaypaj kacharichiwarqanchej (Heb. 9:24-26). Adanpa juchanrayku wañuyllata japʼinchej, jinapis Jesús kausayninta qosqanrayku wiñay kausayta japʼiyta atisun. Jehová preciowan rantiwasqanchejrayku, Satanaspa mundonmanta kacharisqa kanchej, wañuytataj manaña manchachikunchejchu (Heb. 2:14, 15).

17. Dios munakuwasqanchejta yachaspa, ¿imatá ruwayta munanki?

¹⁷ Dios imatachus qonawanchejta nisqanqa juntʼakonqapuni. Imaynatachus ruwasqasninpaj churasqan leyes juntʼakunpuni, ajinallatataj Jehovaj nisqasnenqa juntʼakonqapuni. Payqa kasqan jinallapuni (Mal. 3:6). Jehovaqa mana kausayllatachu qowanchej, manaqa munakullawanchejtaj. Biblia nin: “Yachanchej, creenchejtaj Dios munakuwasqanchejta. Diosqa munakuymin”, nispa (1 Juan 4:16). Jehovaj nisqasnenqa juntʼakunpuni. Pisimantawan kay Jallpʼaqa uj kʼachitu paraisoman tukonqa. Tukuy chaypi tiyakojkunaqa Jehová jina ruwanqanku, purajmantataj munanakonqanku. Chantá tukuy kamachisnin cielopi, jinallataj Jallpʼapipis nenqanku: “¡Yupaychay, jatunpaj khawaska cay, yachay, agradececuy, may sumajpaj khawaska cay, tucuy atiy, callpapis Diosninchejman cachun wiñaypa wiñayninpaj! ¡Ajina cachun!”, nispa (Apo. 7:12, Dios Parlapawanchej).