1. ¿Imatataj uj joven niña ruwasqachu 1935 watamantapacha?

UNAY wataspi uj familia phishqa wawasniyoj karqa. Chay familiamanta tatasqa, wawasninkuman Jehová Diosta sirviyta, Jesús jina kayta ima yachacherqanku. Paykunaqa Bibliamanta Yachaqajkuna karqanku. Jehovaj testigosnenqa chay sutiwan ñaupajta rejsisqa kaj kanchej. Chay familiaj ujnin qhari wawankoqa, 1926 watapi 18 watasniyoj bautizakorqa. Paytaj chay tiempomanta tukuy hermanos jina, sapa wata Señorpa Cenanpi tʼantata mikhoj, vinotapis ujyaj. Jinapis 1935 watapi uj discursota uyarisqanmantapacha, niña chayta ruwarqachu. Chay discursoqa sutikorqa: “May ashkha runas”. Hermano Joseph Rutherfordtaj, chayta uj jatun tantakuypi umalliricherqa. Chaytaj karqa Estados Unidosmanta Washington llajtapi. Qhepan parrafopi yachakusun, imatachus chaypi sutʼinchakusqanta.

2. ¿Imatataj hermano Rutherford discursonpi sutʼincharqa?

² Hermano Rutherfordqa, discursonpi Apocalipsis 7:9 versiculota sutʼincharqa, nerqataj pikunachus ‘may chhika runas’ kasqankuta. Unayqa paykunata ‘may ashkha runas’ nej kanku (Dios Parlapawanchej). Chay tiempomanta hermanosqa, chay ‘may ashkha runas’ cieloman rinankuta yuyaj kanku. Jinapis piensarqanku, chay cristianosqa mana Diosta tukuy imapichu kasukusqankuta. Chayraykutaj nej kanku ajllasqa cristianoswan mana kikinchu kasqankuta. Hermano Rutherfordqa, Bibliawan ajinata sutʼincharqa: “‘May chhika runasmanta’ kajkunaqa, mana cielomanchu renqanku. Paykunaqa Cristoj waj ovejasnin kanku, ‘manchay ñakʼariymantataj’ kausashaj llojsenqanku. Chaymantataj kay jallpʼapi wiñaypaj kausakonqanku”, nispa (Apo. 7:14). Jesús nerqa: “Waj ovejas tiyapullawantaj, chaykunataj mana kay kanchamantachu  kanku, chaykunatapis pusamunallaytaj tiyan, chay ovejasneyqa parlasqayta uyarenqanku, tukuyninkutaj uj tropalla kanqanku, uj michejniyojllataj kanqanku”, nispa (Juan 10:16). Chay ‘waj ovejasqa’, * Jehová Diosta tukuy sonqo sirvej cristianos kanku, kay jallpʼapitaj wiñaypaj kausakuyta suyakushanku (Mat. 25:31-33, 46). Qhepan parrafospi qhawarisun, imaynatachus hermano Rutherfordpa discurson ashkha hermanospa yuyasqankuta cambiasqanta. Chay hermanosmanta ujqa, qallariypi parlarqanchej chay joven karqa (Sal. 97:11; Pro. 4:18).

3, 4. Kay 1935 watapi asambleata uyariytawan, ¿imatataj ashkha hermanos reparakorqanku?

³ Hermano Rutherfordqa asambleapi discursota qoshaspa nerqa: “¿Sayarikuwajchejchu jallpʼapi wiñaypaj kausakuyta suyakojkuna?”, nispa. Chay discursota uyarej hermano nisqanman jina, chay tapuyta uyarispa, 20 mil hermanosmanta khuskan kurajpuni sayarikorqanku. Chantá hermano Rutherford nisqa: “¡Kaykunamin may chhika runasmanta kajkunaqa!”, nispa. Chayta uyariytawan, tukuy chay asambleapi kajkuna tʼajllarikorqanku, kusiywantaj qhaparerqanku. Chay kuteqa, ¡mana qonqanapaj jinapuni karqa! Sayasqa kashaj hermanosqa, sutʼita entienderqanku mana cieloman rinankupajchu ajllasqa kasqankuta. Qʼayantin día, chay asambleapi 840 runas bautizakorqanku. Paykunamanta casi tukuyninkutaj, waj ovejasmanta karqanku.

⁴ Chay kutimantapacha, may chhika hermanos Señorpa Cenanpi niña tʼantata mikhorqankuchu, nitaj vinotapis ujyarqankuchu. Paykunamanta ujtaj, qallariypi parlarqanchej chay joven karqa. Uj hermano nerqa: “1935 watakama Señorpa Cenanpi tʼantata mikhorqani, vinotapis ujyarqani. Chaymantaqa niña chayta ruwarqanichu. Imaraykuchus repararqani, mana ajllasqa cristianosmantachu kasqayta. Jehová Diosqa mana cieloman rinaypaj atiyninta qowarqachu. Noqaqa kay jallpʼata uj kʼachitu paraisoman tukuchiypi yanapakuyta munarqani. Chaymantapacha kay jallpʼapi wiñaypaj kausakuyta suyakushani”, nispa. Ashkha hermanos kikillantataj yuyarqanku (Rom. 8:16, 17; 2 Cor. 1:21, 22). Chay tiempomantapacha, may chhika runasmanta kajkunaqa yapakushallankupuni, kay jallpʼapiraj kaj ajllasqa cristianoswantaj llankʼashanku.

5. Señorpa Cenanpi niña tʼantata mikhojkunata, niñataj vinotapis ujyajkunata, ¿Jehová Dios qhesachanchu?

⁵ Rikunchej jina, 1935 watamantapacha ashkha hermanos Señorpa Cenanpi niña tʼantata mikhorqankuchu, nitaj vinotapis ujyarqankuchu. ¿Jehová Dios paykunata qhesacharqachu? Mana. Kay tiempopipis, wakin hermanosqa cieloman rinankupaj ajllasqa kasqankuta yuyaspa, Señorpa Cenanpi tʼantata mikhoj kanku, vinotapis ujyaj kanku. Jinapis chaymanta reparakorqanku, mana cieloman rinankupaj ajllasqachu kasqankuta (1 Cor. 11:28). Chayrayku niña Señorpa Cenanpi tʼantata mikhunkuchu, niñataj vinotapis ujyankuchu. Jinapis Jehová Diosta tukuy sonqo sirvishallankupuni. Jehovaqa chayta ruwaj hermanosta mana qhesachanchu, astawanpis waj ovejas ukhupi kanankuta saqen. Paykunataj Señorpa Cenanman rillankupuni. Ajinamanta imatachus Jehovawan Jesuswan paykunarayku ruwasqankumanta agradecekunku.

6. ¿Imatataj Jesús angelesman kamachin?

⁶ Manchay ñakʼariy tiempoqa, manchay qayllitapiña kashan. Chayrayku may sumajpuni  kanqa, ajllasqa cristianosmanta, may chhika runasmantawan astawan yachakunanchej. Chaypajtaj Apocalipsis 7 capitulomanta wakin versiculosta estudiasunchej. Chay capitulopi Jesusqa, angelesta kamachin chinkachiy tawa wayrasta jarkʼanankuta. Paykunaqa chay wayrasta mana kacharinankuchu tiyan, tukuynin ajllasqa cristianos sellasqa kanankukama, nisunman Jehová Dios tʼinkankuta japʼinankupaj jina kasqankuta ninankama (Apo. 7:1-4). Ajllasqa cristianosqa wañupunankukama Jehová Diosta sirvisqankurayku, Cristowan khuska cielopi reyestaj, sacerdotestaj kanqanku (Apo. 20:6). Chay 144 mil cristianos cielopi premionkuta japʼejtinku, Jehová Dios, Jesús, jinallataj angelespis, mayta kusikonqanku.

7. Apocalipsis 7:9, 10 nisqanman jina, ¿pikunatataj Juan rikorqa, chanta imatá paykuna ruwasharqanku? (Kay revistaj tapanpi dibujota qhawariy).

⁷ Apóstol Juanqa 144 mil reyesmanta parlaytawan, “may chhika runasta” rikorqa. Paykunaqa Armagedonmanta kausashaj llojsisharqanku. Chantapis chay 144 mil reyesmanta nisqa, may chhika runasqa mana yupay atina karqanku (Apocalipsis 7:9, 10 leey). Chantapis paykunaqa “yuraj qhoysu ropasniyoj” kasharqanku. Chaytaj ninakun, Satanaspa sajra mundonwan ‘mana chʼichichakusqankuwan’. Paykunaqa Jehová Diosta tukuy sonqo sirvillankupuni, Cristoj qhepantapis rillankupuni (Sant. 1:27). Juan rikusqanman jina, chay may chhika runasqa sinchʼita qhaparisharqanku: “Salvacionqa Diosninchejmanta jamun, pichus kamachina tiyanapi tiyasqa kashan, chaymanta, Corderomantawan”, nispa. Chantapis paykunaqa, palmera sachʼa ramas japʼirisqa kasharqanku. Chaytaj niyta munan, Jesusta Jehová Diospa churasqan Reyta jina qhawasqankuta (Juan 12:12, 13, kikinchay).

8. ¿Imatá Apocalipsis 7:11, 12 nin Jehová Diospa cielopi familianmanta?

⁸ (Apocalipsis 7:11, 12 leey). ¿Imatá Jehová Diospa cielopi familian ruwarqanku may chhika runasmanta kajkunata rikuspa? Juan rikusqanman jina, tukuyninku mayta kusikorqanku, Diostataj jatuncharqanku. Aswan qhepaman, may chhika runas Juan rikusqanman jina manchay ñakʼariymanta kausashaj llojsejtinku, cielopi kajkunaqa kikillantataj kusikonqanku.

9. Apocalipsis 7:13-15 nisqanman jina, ¿imatá may chhika runasmanta kajkuna ruwashanku?

⁹ (Apocalipsis 7:13-15 leey). Juanqa nerqa, may chhika runasmanta kajkuna ‘ropasninkuta Corderoj yawarninpi tʼajsaspa yurajyachisqankuta’. Chayqa niyta munan, llimphu sonqoyoj kasqankuta, Diostaj paykunata allinpaj qhawasqanta (Isa. 1:18). Paykunaqa Jehová Diosman kausayninkuta qoporqanku, bautizakorqankutaj. Chantapis Jesús paykunarayku wañusqanpi creenku, Jehová Dioswantaj sumaj amigos kanku (Juan 3:36; 1 Ped. 3:21). Chayrayku paykunaqa, Diospa kamachina tiyananpa ñaupaqenpi kashanku, “tuta pʼunchaytaj” templonpa pationpi sirvishanku. Chantapis Diospa Gobiernonta kausayninkupi ñaupajman churanku. Chayrayku chay Gobiernomanta manchay kusiywan runasman willashanku, yachachishankutaj. Chaytataj ajllasqa cristianosmanta nisqa, astawan ruwashanku (Mat. 6:33; 24:14; 28:19, 20).

10. ¿Imamantataj may chhika runas mana iskayrayankuchu, chanta imataj juntʼakonqa?

¹⁰ May chhika runasmanta kajkunaqa, mana iskayrayankuchu manchay ñakʼariy pasayta Dios paykunata yanapananmanta. Imaraykuchus ‘kamachina tiyanapi tiyasqa Kajqa, toldonta paykunaj patankuman aysarenqa’. Chantapis Bibliaj kay nisqan juntʼakonqa: Diosqa “ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj qhapariypis, nitaj nanaypis”. Waj ovejasmanta kajkunaqa, chay juntʼakunanta mayta suyakushanku (Apo. 21:3, 4).

11, 12. 1) Apocalipsis 7:16, 17 nisqanman jina, ¿ima bendicionestataj may chhika runas japʼenqanku? 2) ¿Imatataj waj ovejasmanta kajkuna ruwanku, chanta imaraykutaj?

 ¹¹ (Apocalipsis 7:16, 17 leey). Kay tiempopi wakin hermanosninchejqa, mana qolqesituyoj kasqankurayku, chʼajwas chayri guerras kasqanrayku, mikhunamanta pisisqa kashanku. Wakintaj Diosta sirvisqankurayku carcelpi wisqʼasqa kashanku. Jinapis paykunaqa, may chhika runasmanta kasqankurayku kusisqas kashanku. Imaraykuchus yachanku, kay sajra mundo chinkachisqa kasqantawan, may chhika mikhunayoj kanankuta, Diospa yachachiyninpis ashkha kananta. Jehová Dios Satanaspa sajra mundonta chinkachishajtin, mana “ima qʼoñipis paykunata ruphanqachu”. Imaraykuchus paykunaqa, Diospa kʼajaj phiñakuyninmanta salvakonqanku. Manchay ñakʼariy pasaytataj, Jesusqa wiñay “kausay yaku” juturisman paykunata pusanqa. May chhika runasqa, manchay sumaj bendiciontapuni japʼenqanku. Kay jallpʼapi tukuynin kausaj runasmanta, ichá paykunalla wañuyta ni jaykʼaj rejsenqankuchu (Juan 11:26).

¹² Waj ovejasmanta kajkunaqa, maytapuni Jehová Diosman, Jesusmanwan agradecekunku sumaj suyakuyniyoj kasqankumanta. Jehovaqa mana paykunata cieloman rinankupaj ajllajtinpis, ajllasqa cristianosta jinallataj munakun. Chayrayku waj ovejasmanta kajkuna, jinallataj ajllasqa cristianospis, Diostawan Cristotawan jatunchanku. Chaytataj ruwanku, sapa wata Señorpa Cenanman rispa.

13, 14. ¿Imaraykutaj tukuy cristianos Jesuspa Wañuyninta Yuyarinapaj tantakuyman rinanchej tiyan?

¹³ Kay qhepa wataspeqa, Jesuspa Wañuyninta Yuyarinapaj, mundontinpi may chhika runas tantakunchej. Jinapis sapa 1.000 runasmanta, casi ujsitulla chay tantakuypi tʼantata mikhun, vinotapis ujyan. Chayrayku may chhika congregacionespi, mana pipis Señorpa Cenanpi tʼantata mikhunchu, nitaj vinotapis ujyanchu. Casi tukuy cristianos kay jallpʼapi kausakuyta suyakushanchej. Jina kajtin, ¿imaraykutaj Señorpa Cenanman rinchej? Chayta entiendenapaj, imaraykuchus matrimoniosman risqanchejpi piensarina. Uj amigonchej casarakojtenqa, payta munakusqanchejrayku, paymanta kusikusqanchejrayku ima rinchej. Waj ovejasmanta kajkunapis, chayraykullataj Señorpa Cenanman rinku. Paykunaqa Cristota, ajllasqa cristianostapis mayta munakunku, paykunawan khuskataj kusikunku. Chantapis Señorpa Cenanman  rispaqa, Jesús paykunarayku wañusqanmanta agradecekusqankuta rikuchinku. Imajtinchus paynejta kay jallpʼapi wiñay kausayta japʼenqanku.

¹⁴ Waj ovejasmanta kajkunaqa, Jesuspa kamachisqanta kasukusqankurayku Señorpa Cenanman rillankutaj. Jesusqa kay jallpʼapi kashaspa, apostolesninwan chay Cenata ruwayta qallarerqa. Chantataj paykunaman nerqa: “Kayta ruwallaychejpuni noqamanta yuyarikuspa”, nispa (1 Cor. 11:23-26). Chayrayku waj ovejasmanta kajkunaqa, ajllasqa cristianos kay jallpʼapiraj kashajtinku, Jesuspa Wañuyninta Yuyarinapaj tantakuyman rillanqankupuni. Chantapis paykunaqa, tukuy runasta chay sumaj tantakuyman wajyarinku.

15. Señorpa Cenanpi kashaspa, ¿imaynatá Diostawan Cristotawan jatunchasunman?

¹⁵ Señorpa Cenanpi kashaspaqa, Diostawan Cristotawan takispa, orakuspataj jatunchasunchej. Kay watapaj discursoqa sutikun: “Jehová Diosman Jesusmanwan imatachus noqanchejrayku ruwasqankumanta agradecekuna”. Chay discursota uyarispaqa, Tatanchej Jehovaman Cristomanwan astawan agradecekusun. Tʼantatawan vinotawan pasachishajtinkutaj, Jesuspa cuerponpi yawarninpiwan piensarisun. Chantapis yuyarikusun, Jehová Diosqa munasqa Wawanta noqanchejrayku wañunanpaj kachamusqanta. Ajinamanta noqanchej kausayniyoj kananchejpaj (Mat. 20:28). Tatanchej Jehovata, Jesustawan tukuy munakojkunaqa, Señorpa Cenanman jamonqanku.

16. ¿Imaspitaj ajllasqa cristianoswan waj ovejaswan kikin kanku?

¹⁶ Ajllasqa cristianospis, waj ovejasmanta kajkunapis, Jehová Diospaj may valorniyoj kanku. Payqa iskaynin gruposta mayta munakun. Chantapis iskaynin gruposta munasqa Wawanpa llawarninwan ranterqa. Ajllasqa cristianoswan waj ovejasmanta kajkunawanqa, imatachus aswan qhepaman japʼinallankupi mana kikinchu kanku. Chantapis iskaynin grupos Diosta tukuy sonqo sirvinallankupuni tiyan, Cristotapis qhatinallankupuni tiyan (Sal. 31:23). Jehová Diosqa, tukuy kamachisninman necesitasqankuman jina atiyninta qon, cieloman rinankupaj ajllasqa kajtinkupis chayri manapis.

17. ¿Imatataj ajllasqa cristianos mayta munashanku?

¹⁷ Ajllasqa cristianosqa mana cieloman riyta munaspañachu nacekunku, manaqa Jehová Dios chay munayta paykunaj sonqonkuman churan. Paykunaqa cieloman rinankupi piensanku, mañakuyninkupipis chaymanta parlarinku, maytataj cielopi premionkuta japʼiyta munashanku. Ichá paykunaqa, mana yachankuchu cieloman rispa imayna cuerpoyojchus kanankuta (Fili. 3:20, 21; 1 Juan 3:2). Jinapis anchatapuni munashanku, Jehovawan, Jesuswan, angeleswan, cielopiña kashaj ajllasqa cristianoswan  ima tinkukuyta. Mayta munashallankutaj, Diospa Gobiernonpi paykunawan kayta.

18. Waj ovejasmanta kajkuna, ¿imatataj mayta ruwayta munashanku?

¹⁸ Waj ovejasmanta kajkunaqa, kay jallpʼapi wiñay kausayta suyakushanku. Chaytaqa tukuy runas munanchej (Ecl. 3:11). Waj ovejasmanta kajkunaqa, maytapuni munashanku kay jallpʼata uj paraisoman tukuchiypi yanapakuyta. Paykunaqa mayta munashallankutaj wasista ruwakuyta, huertasta churaytapis. Chantapis wawasninkuwan khuska sanitos kausakuyta munashanku (Isa. 65:21-23). Paykunaqa kay jallpʼamanta tukuy lugaresta purimuyta munashanku. Ajinamanta lomasta, montesta, jatuchaj qochasta, Diospa tukuy ima ruwasqantawan rejsimunankupaj. Jinapis astawanqa, Jehová Diosman astawan kʼaskaykuyta munashanku.

19. ¿Imatataj tukuy cristianos Señorpa Cenanpi ruwayta atinchej, chanta maykʼajtaj chay tantakuy ruwakonqa?

¹⁹ Jehová Diosqa tukuy kamachisninpaj sumaj imasta wakichin (Jer. 29:11). Señorpa Cenanpeqa Diostawan Cristotawan jatunchayta atinchej. Imaraykuchus paykunanejta wiñay kausayta japʼisun. Jesuspa Wañuyninta Yuyarina diaqa, tukuynin cristianospaj may jatun pʼunchay kanqa. Kay 2021 watapi, chay diaqa sábado 27 de marzoman urman, inti yaykupusqantawantaj tantakusunchej. Ashkhas chay tantakuyman riyta atillasunchej. Wakintaj ichá paykunaman churanakojtinkupis, chay tantakuyman renqanku. Wakintajrí ichá carcelespi chay tantakuyta ruwanqanku. Munayku tukuy congregacionesta, gruposta, jinallataj sapa ujniykichejtapis chay tantakuypi allin risunaykichejta. Jehová Diosninchej, Jesús, ángeles, cielopiña kashaj ajllasqa cristianospis, tukuyninchejta kusiywan qhawamuwasunchej.