Jurayqa niyta munan “imatapis maychus kajtapuni niy, chayrí ruwasaj nisqanchejta juntʼay. Chaytataj ruwanchej Diospa ñaupaqenpi. Chayrayku jurayqa mana pujllakuy jinachu”. Uj juramentotaqa ruwakunman parlaspa chayrí uj documentopi.

Wakenqa yuyanku uj juramentota ruway mana allinchu kasqanta, Jesús kayta nisqanrayku: “Amapuni jaykʼajpis juraychejchu”. “Parlasqaykichej kay jina kachun: ‘Arí’ nisqaykichejqa, arí kachun, ‘mana’ nisqaykichejpis, mana kachun. Chayta mana juntʼayqa Diablomanta jamun”, nispa (Mat. 5:33-37). Moisespa Leyninpi kamachikorqa israelitas wakin kutis juranankutapuni. Diosta tukuy sonqo sirvejkunapis juramentosta ruwaj kanku. Jesustaj chayta yacharqa (Gén. 14:22, 23; Éxo. 22:10, 11). Jesusqa yachallarqataj Jehová kikin juramentosta ruwasqanta (Heb. 6:13-17). Chayrayku Jesusqa mana nisharqachu ni jaykʼaj jurayta atikusqanta. Astawanqa nisharqa mana allinchu kasqanta imallamantapis juray, chayrí mana piensarispalla juray. Arí, nisqanchejtaqa juntʼananchejpuni tiyan, imaraykuchus Jehovaqa munan chayta ruwananchejta.

¿Imatá ruwasunman pillapis uj juramentota ruwananchejta niwajtinchej? Ñaupajtaqa sumajta qhawarikuna juntʼayta atinanchejtachus manachus. Mana juntʼayta atinanchejta reparanchej chayqa ama juranachu. Diospa Palabranqa kayta yuyaychawanchej: “Imatapis ruwasaj niytawan mana juntʼanayki kajtenqa, aswan allin kanman mana imatapis ninayki”, nispa (Ecl. 5:5). Chantá imapajchus jurananchejta niwasqanchejman jina, Bibliaj yuyaychaykunasninta allinta qhawaykurina, Bibliapi yachakusqanchejman jinataj ruwana. ¿Imastataj Biblia yuyaychawanchej?

Wakin juramentosqa Diospa munayninman jina kashan. Jehovaj testigosnenqa casarakushaspa uj juramentota jina ruwanku. Noviowan noviawanqa Diospa ñaupaqenpi, wajkunaj ñaupaqenpi ima ninakunku munanakunankuta, cuidanakunankuta, respetanakunankuta ima, khuska kay jallpʼapi kausakunankukama. (Ichapis wakin casarakojkunaqa mana chay palabrastapunichu oqharinku. Jinapis Diospa ñaupaqenpi uj juramentota jina ruwanku). Chaymantataj qhariwarmiña kanku, matrimonionkutaj wañupunankukama (Gén. 2:24; 1 Cor. 7:39). Casarakojkuna casarakushaspa imatachus ninakusqankoqa allillan, chantapis Diospa munayninman jina kashan.

Wakin juramentosqa Diospa munayninpa contranpi kashan. Cristianosqa mana jurankuchu uj suyuta armaswan maqanakuspa jarkʼanankupaj chayrí Diospi creesqankuta qhesachanankupaj. Chaykunapaj juraspaqa, Diospa kamachiykunasninta mana kasukushankumanchu. Cristianosqa “mana kay mundomanta runas  jinachu” kanku. Chayrayku mana kay mundopi kaj maqanakusman, chʼajwasman ima chhapukunkuchu (Juan 15:19; Isa. 2:4; Sant. 1:27).

Wakin juramentosqa sapa cristianoj conciencianman jina kashan. Wakin kutisqa niraj uj juramentota ruwashaspa, sumajta piensarinanchej tiyan Jesús kayta yuyaychasqanpi: “Cesarpata kajtaqa Cesarman qopuychej, Diospa kajtataj Diosman qopuychej” (Luc. 20:25).

Uj cristianoqa ichapis uj suyumanta kayta chayrí pasaporteta orqhoyta munanman. Chaypajtaj uj juramentota ruwanan kasqanta ninkuman. Chay juramentota ruway Diospa leyninman churanakun chayqa, mana ruwanqachu. Astawanpis Bibliapi yachakusqanman jina ruwanqa. Chayrayku ichapis gobiernoqa saqenqa waj jinamanta chay juramentota ruwananta creenciasninta respetasqanrayku.

Uj cristiano chay juramentota waj jinamanta ruwasqanqa, Romanos 13:1 yuyaychasqanman jina kashanman. Chaypi nin: “Tukuy runas autoridadesta kasuchunku”, nispa. Ajinamanta ichapis uj cristianoqa yuyanman Diospa kamachisqanta kasukuspa jurayqa, allillan kasqanta.

Chantapis Bibliapi yachakusqanchejman jinallataj ruwananchej tiyan, juranapaj imata ruwananchejta chayrí imata japʼinanchejta niwajtinchej. Ñaupa tiempopi, romanoswan monte runaswanqa espadasninkurayku juraj kanku maqanakumanta diosninkoj atiyninta mañakuspa. Chaywantaj juraj runaqa rikuchej nisqanta juntʼanantapuni. Griegostaj jurashaspaqa makinkuta pataman oqharej kanku. Chaytataj ruwaj kanku uj dios imatachus nisqankuta, ruwasqankuta ima qhawamushasqanta, paymantaj cuentata qonanku kasqanta yuyasqankurayku.

Jehovaj kamachisnenqa mana uj juramentota ruwankuchu banderata chayrí waj imata japʼispa. Imaraykuchus chaykunataqa runas diosta jina yupaychanku. Jinapis ichá uj juiciopi testigo jina sayananchejta niwasunman, makinchejta Biblia pataman churaspataj cheqa kajta ninapaj jurananchejta. Ichapis chayta ruwayta ajllasunman. Imajtinchus Bibliapeqa parlan ñaupa tiempopi Diospa kamachisninpis pejpa ñaupaqenpichus juraj kanku, chaypa piernan uraman makinta churaykuspa jurasqankumanta (Gén. 24:2, 3, 9; 47:29-31). Jurayta ajllanchej chayqa, yuyarikunanchej tiyan Diospa ñaupaqenpi cheqa kajta parlananchejpaj jurashasqanchejta. Chayrayku sumaj wakichisqa kananchej tiyan, pillapis imata tapuwajtinchej cheqa kajtapuni kutichinapaj.

Jehovawan sumaj amigos kasqanchejtaqa jatunpaj qhawanchej. Chayrayku niraj uj juramentota ruwashaspaqa orakunanchej tiyan, sumajtataj piensarinanchej tiyan. Imaraykuchus mana munanchejchu sonqonchejta chʼichichayta, Bibliaj yuyaychasqantataj pʼakiyta. Arí, uj juramentota ruwayta ajllanchej chayqa, juntʼananchejpuni tiyan (1 Ped. 2:12).