Ciudad Mante nisqa llajtitapi nacekorqani, chaytaj Tamaulipas (México) llajtapi kashan. Chay lugarmanta runasqa kʼachas kanku, qorikuytataj yachanku. Sumaj wakichisqa tʼojpas kasqankurayku mana chaypi tiyakunapaj jinallachu karqa.

Tawa hermanos kayku, noqataj kani kurajpa qhepan. Tatasneyqa Iglesia Catolicapi bautizawarqanku, chantá iglesiapi takejkunawan takej kani. Diospa munayninta ruwayta munarqani, imajtinchus mana infiernoman riyta munarqanichu.

Phishqa watayoj kashajtiy tatay saqerpariwarqayku. Chayqa mayta llakichiwarqa. Tukuyniyku tatayta munakorqayku chayrayku mana entiendellarqanichu imaraykuchus ripusqanta. Chaymantapacha mamallayña noqaykuta uywanawaykupaj mayta trabajanan karqa.

Mamay trabajaj rinankamataj escuelaman faltakuyta qallarerqani, noqamanta kuraj joveneswantaj masichakuyta qallarerqani. Paykunawan kashaspaqa millay palabrasta parlaj kani, pitaj kani, suwakoj kani, maqanakojtaj kani. Tukuyta manchachiyta munasqayraykutaj tukuy imaymanamanta maqanakuyta amañarqani, karatista kayta, armasta apaykachaytawan amañarqani. Sajra jovenmanpuni tukorqani. Ashkha kutispi baleanaku chʼajwaspi satʼikorqani. Kutin kutitataj callepi yawarpuruta, parte wañusqatataj taripawarqanku. Mamayqa chay jinata rikuwaspa mayta llakikorqa usqhayllatataj hospitalman apawaj.

Chunka sojtayoj kashajtiytaj Jorge visitariwarqayku, paywanqa wawas kashaspa amiguitos karqayku. Payqa Jehovaj testigonman tukupusqa chantá noqaykuwan parlariytapuni munarqa. Bibliawantaj imapichus creesqanta sutʼinchawarqayku. Noqaqa ni jaykʼaj Bibliata leerqanichu, jinapis gustawarqa Diospa sutinta, imatachus ruwayta munasqantataj yachayqa. Jorge, Bibliamanta yachachinawaykuta niwasqaykurayku yachakorqayku.

Bibliapeqa mana yachachinchu infiernomanta, chayta yachaytaj mayta sonqochawarqa (Salmo 146:4; Eclesiastés 9:5). Chaymanta  niña Diosta manchachikojchu kani, astawanqa wawasninta munakoj kʼacha Tatata jina qhawaj kani.

Bibliapi yachakusqayman jinataj, reparakorqani kausayniyta cambianay kasqanta. Llampʼu sonqo kanay karqa, nitaj phiñakuyniywan atipachikunaychu karqa. Mayta yanapawarqa 1 Corintios 15:33 nisqan, chaypi nin sajra runaswan pureyqa kʼacha ususta chinkachisqanta. Chayrayku kausayniyta cambianaypajqa sajra ruwayman tanqawaj runasmanta tʼaqakunay karqa. Congregacionpi kajkunawantaj masichakorqani, paykunaqa ima chʼampay kajtinpis kʼachallamanta Biblia yachachisqanman jina allinchaj kanku.

Kay Romanos 12:17-19 nisqan yanapallawarqataj, chaypi nin: “Ama pimampis sajramanta sajrallatataj kutichiychejchu. [...] Atisqaykichejman jina tukuy runaswan allimpi kausakuychej. [...] Ama ima sajramantapis pagachikuychejchu. [...] Diosmanta Qhelqasqapi nin: Noqa pagachikusaj jasutʼispa, nin Señorqa”, nispa. Chay textopitaj repararqani Jehovalla sajra ruwaykunata chinkachinanta, maykʼajchus chayta ruwanantataj. Pisimanta pisi sajra kausayniyta saqerqani.

Uj chʼisi wasiyman kutipushajtiy, ashkha jóvenes maqaj qayllaykamuwarqanku. Ñaupajta ima tʼojpamantachus karqani paykunawan, chay jovenespa tʼojpankuwan purajmanta chejninakoj kanku. Chay tʼojpata kamachejtaj wasaypi sajmaspa qhapariykuwarqa: “¡Maqanakuy ari!”, nispa. Chay rato Jehovamanta mañakorqani mana maqanakunaypaj. Maqanarqokuyta munaspapis ayqekorqani. Qʼayantintaj chay jovenwan sapallanwanña tinkorqani. Maqarpariyta munaspapis, ujtawan Jehovamanta mañakorqani mana payta maqarpanaypaj. Chay joventaj qayllaykamuwaspa jinata niwarqa: “Chʼisipi maqasusqaymanta perdonariway. Qan jina kayta munayman. Bibliata estudiayta munani”, nispa. Chayta niwasqanqa mayta tʼukuchiwarqa. Allinpuni karqa mana phiñakuyniywan atipachikusqayqa. Chayrayku paypis Bibliata estudiayta qallarerqa.

Tiemponmantaj familiayqa niña Bibliata estudiarqachu. Noqataj yacharqaniña ni imarayku Bibliata estudiayta saqenayta. Yachallarqanitaj jinamanta Diospa llajtanpi kajkunawan kaspa manaña llakikunayta, chantá uj sumaj familiayoj kanaytataj. Kausayniypi cambiallarqanipuni, jinamanta 1991 watapi Jehovaj testigon jina bautizakorqani.

Noqaqa tukuyta manchachej kani, phiñataj, sajrataj karqani. Ajina kajtiypis Diospa Palabran kausayniyta cambianaypaj yanapawarqa. Kunantaj tukuy yachakuyta munajkunaman Bibliapi sumaj willaykuna kasqanmanta parlarimuni. Iskay chunka kinsayoj watastataj Jehovapaj astawan llankʼarqani.

Uj tiempopi México suyupi Jehovaj testigosninpa sucursalninman yanaparikoj rerqani. Chaypi Claudiata rejserqani, payqa imatapis usqhayllata ruwarqoj. Paywantaj casarakorqani 1999 watapi. Jehovaman mayta agradecekuni uj kʼacha warmita qowasqanmanta.

Iskayniykutaj México suyupi señas congregacionpi yanapakushayku. Jinamanta mana uyarejkunapis Jehovata rejsinankupaj. Tiemponmantaj Belice suyuman predicaj rinaykuta niwarqayku. Kay suyupi pisi imasllawan kausakojtiykupis kusisqa tiyakuyku. Ajina kausayqa ni imawan kikinchakunchu.

Aswan qhepamantaj mamay watejmanta Bibliata estudiarqa, bautizakorqataj. Kuraj hermanoy, warmin, wawasnin ima, Jehovaj testigosnillantaj kanku. Chantá wakin ñaupa compañerosniypis Diosta sirvillankutaj, paykunamantaj predicaj kani.

Sajra runas jina kausasqankurayku familiaymanta wakin wañupunkuña. Noqapis wañupuymanchá karqa mana kausayniyta cambiaspaqa. Jehovaman mayta agradecekuni payta, llajtanta ima rejsichiwasqanmanta, chantá munakuywan, pacienciawantaj Bibliapi yachachisqanman jina kausakunaypaj yanapawasqanmanta.