Rey Cresomanta parlarerqanchejña. Payqa uj yatirita creesqanrayku, persaswan maqanakamorqa, atipachikorqataj. Bibliarí Persia llajtapi uj gobierno rikhurinanmanta parlarqa. Imatachus nisqantaj tukuysitun juntʼakorqa.

Profeta Isaiasqa chay gobierno nacekunanpaj 200 watas faltashajtin, sutin Ciro kananta willarqa. Chantá willallarqataj, imaynatachus chay runa, atiyniyoj Babilonia llajtata atipananta.

Isaías 44:24, 27, 28 nin: “Tata Diosqa ajinata nin: [...] Noqaqa mama qochata chʼakichiyta atini, jinallataj mayusniykitapis. Rey Cirotapis nini: Qanqa michejniy kanki, ruwankitaj imatachá munasqayta, nispa. Jerusalentapis nillanitaj: Qanqa watejmanta ruwasqa kanki, nispa. Templotapis nillanitaj: Cimientosniykita churachunku, nispa”.

Unay tiempomanta runa qhelqasqanman jina, Babilonia llajtaj chaupinta Éufrates mayu pasaj. Cirowan soldadosninwantaj, uj larqʼanta chay mayuta waj ladoman kacharpasqanku. Chantá chayninta Babiloniaman yaykusqanku. Ajinapi Ciroqa chay llajtata atipaykusqa. Chantá chaypi presochasqa judiosta Jerusalenman kachapusqa, llajtankuta watejmanta sayarichinankupaj. Chay llajtaqa 70 watastaña thuñisqa kasharqa.

Isaías 45:1 nin: “Tata Diosqa ajinata nin ajllasqan Ciroman, pitachus paña makinmanta japʼerqa ñawpaqempi nacionesta kʼumuykachachinampaj, reyesmanta armasninkuta qhechunampaj, ñawpaqempi punkusta kicharinampajtaj, mana wisqʼakojta saqespa, chayman”, nispa.

Babiloniamanta runasqa, llajtankoj punkusninkuta mana wisqʼasqankuchu. Persiamanta soldadostaj, chayninta yaykusqanku. Babiloniosqa mana yacharqankuchu, enemigosninku mayunta yaykunankuta. Chayta yachaspaqa, llajtankoj punkusninta wisqʼankumanchá karqa. Qonqasqankurayku, Ciroj soldadosnenqa facilta yaykorqanku.

Diospa tukuy ima nisqanqa, tukuysitun juntʼakorqa. Rey Ciromanta parlasqanqa ujnillan kashan. a Suerteta qhawajkunaqa, mana Diospa yanapayninwanchu imatapis willanku. Bibliaj nisqantajrí Diosmanta jamun. Paytaj nin: “Qallariymantapacha qhepaman imaschus kananmanta willani. Noqaqa unaymantapacha willani, manaraj imapis kashajtin”, nispa (Isaías 46:10).

 Jehová Dioslla chayta niyta atinman. Yachayniyoj runas nisqankuman jina, Jehová suteqa niyta munan: “Pay Munayninta Juntʼachin”. Chaytaj rikuchiwanchej, imachus aswan qhepaman kananta yachasqanta, munaynintataj juntʼasqanta. Chayrayku imatachus nisqanta juntʼanqapuni.

Bibliaqa 2000 watas ñaupajtaña nerqa: “Qhepa pʼunchaykunapeqa, kausay may llakiy kanqa, maytataj sajrayanqa”, nispa. Chayta nispaqa, mana jallpʼanchej chayri runas chinkanankumantachu parlashan. Manachayqa parlashan, llakiykuna, ñakʼariykuna, problemas ima chinkananmanta. Chay llakiykunaqa unaymantapachaña tukuyta ñakʼarichishawanchej. Imatachus Biblia kay tiemponchejpaj nisqanta qhawarina.

2 Timoteo 3:1-5 nin: “Qhepa pʼunchaykunapeqa [...] runasqa kay jina kanqanku: paykunallata munakojkuna, qolqeta munakojkuna, may kasqankuta yuyakojkuna, jatunchakojkuna, Diospa contranpi, jinallataj wajkunaj contranpi sajrata rimajkuna, tatasninkuta mana kasojkuna, mana graciasta qoyta yachajkuna, wasanchajkuna, runa masinkuta mana munakojkuna, mana uj yuyayllaman chayayta munajkuna, qhasimanta tumpajkuna, munayninkuwan atipachikojkuna, manchay phiñas, allin kajta mana munakojkuna, amigosninkoj contranpi sayaykojkuna, kʼullu runas, runaykachajkuna, Diosta munakunankumanta nisqataj, paykunaj munaynillankuta maskʼajkuna. Chay runasqa Diosta yupaychajkunaman rijchʼakullanqanku, manataj chayman jinachu kausanqanku”, nispa.

Ichá qanpis reparanki, kay tiempomanta runas ajinapuni kasqankuta. Ashkha runas jatunchakunku, paykunallapi yuyanku, qolqemantataj wañurinku. Wakintaj kʼullus kanku, nitaj wajkunapaj imatapis ruwaripuyta munankuchu. Wawaspis niña tatankuta, mamankuta kasunkuchu. Ashkha runastaj Diosta munakunankumantaqa, munaynillankuta maskʼanku. Sapa diataj runasqa astawan sajrayashanku.

Mateo 24:6, 7 nin: “Qankunaqa uyarinkichej tukuynejpi guerras kashasqanta”. “Uj aylloqa waj aylloj contranta oqharikonqa, uj suyupis waj suyoj contranta”.

Kay 1914 watamantapacha, guerraspi, waj maqanakuykunapi ima 100 millonesmanta astawan runas wañunku. Chaytaj kanman, tukuynin Boliviapi tiyakoj runasmanta, chunka kutiswan jina. May chhika runaschá guerrasrayku waqarqanku, phutikorqanku, sufrerqanku ima. Chay jina llakiy kajtinpis, guerrasqa manapuni tukukunchu.

Mateo 24:7 nin: ‘Kaynejpi jaqaynejpitaj yarqhaykuna kanqa’, nispa.

Pisichikoj runasta mikhunawan yanapaj organización nerqa: “Jallpʼanchejqa tukuy runaspaj jina mikhunata poqochin. Jinapis 815 millones runasmanta astawan, nisunman 9 runasmanta uj, mana mikhusqa puñukapun. Kinsa runasmanta ujtaj, yarqhayrayku onqoykun”, nispa. Sapa wata, may chhika wawas yarqhaymanta wañunku.

Lucas 21:11 nin: “Kallanqataj sinchʼi jallpʼa ikhakuykuna”, nispa.

Sapa wata 50 mil terremotos kan. Chaykunamanta 100 terremotostaj ashkha wasista lajrarpanku. Chantapis sapa wata, uj jatun terremoto ashkha runasta wañuchin. Kay 1975-2000 watakama, 471 mil runas terremotospi wañorqanku.

Mateo 24:14 nin: “Diospa Gobiernonmanta sumaj willaykunapis jallpʼantinpi willakonqa tukuy laya runas yachanankupaj, chaypachamá tukukoyqa jamonqa”, nispa.

Jehovaj testigosnenqa 8 millones kurajña kanku, 240 kuraj suyuspitaj Diospa Gobiernonmanta willashanku. Paykunaqa kay mundoj tukuy kʼuchusninpiña willashanku: llajtaspi, ranchospi, montespi, orqospi ima. Ajinamanta Bibliaj nisqanta juntʼashanku. Maypachachus Diosninchej nenqa, tukuynejpiña willakusqanta, “chaypachamá tukukoyqa jamonqa”. Arí, gobiernosqa pisimantawan chinkachisqa kanqanku, Diospa Gobiernontaj kay jallpʼata kamachenqa. Qhepan yachaqanapi chayta leeriy.