“WAWA KASHAJTIY, FAMILIAYPI QHAPARINAKOJ, SIMINAKOJTAJ KANKU”, nispa nerqa Patriciaqa. Pay nillantaj: “Imatapis ruwawajtinku mana qonqajchu kani. Chayrayku wiñarqojtiyña, pillapis sonqoyta nanachiwajtin diasta chayllapi piensaj kani, ni puñuytapis atejchu kani”, nispa. Ajinapunitaj, phiñasqallapuni kanchej chay, nitaj wajkunata perdonanchejchu chayqa, mana kusisqachu kanchej, onqoykusunmantaj. Yachayniyoj runasqa, mana perdonajkunamanta jinata ninku:

• Phiñasqallapuni kasqankurayku, mana wajkunawan allinta kausakunkuchu. Chantapis wajkunamanta karunchakunku, sapayakunkutaj.

• Rato phiñakunku, llakikunku, onqonkutaj.

• Contrankupi ruwasqankuta mana qonqasqankurayku, mana kusisqachu kausanku.

• Perdonananku kasqanta yachasqankurayku, sonqonku juchachan.

• Mayta llakikunku. Onqonkumantaj presión altawan, artritiswan, sonqomanta onqoykunawan, uma nanaywan, waj onqoykunawanpis. *

¿IMA NIYTA MUNAN PERDONAY? Perdonaspaqa manaña phiñasqachu kanchej, nitaj pagachikuyta maskʼanchejchu. Pitapis perdonanchej chayqa, mana sajrata ruwawasqanchejta allinpajchu qhawashanchej, nitaj nishanchejchu mana pantasqanta. Astawanpis juchanta qonqayta ajllanchej, paywan allinpi kayta munasqanchejrayku.

Tukuypis pantaj runas kanchej. Chayrayku parlaspapis chayri imata ruwaspapis pantasunpuni. Perdonaspataj chayta entiendesqanchejta rikuchinchej (Romanos 3:23). Biblia nin: “Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej”, nispa (Colosenses 3:13).

Wajkunata perdonanchej chayqa, munakuyniyoj kasqanchejta rikuchinchej. Imaraykuchus “munakoyqa, runasta sumajta ujchan” (Colosenses 3: 14). Clínica Mayo nisqaqa, perdonayta yachajkunamanta jinata nin:

• Wajkunawan allinta kausakunku. Imajtinchus contrankupi pantajkunamanta llakikunku, sonqonkuta nanachikunku, khuyakunkutaj.

• Kusisqa kausakunku, Dioswanpis allinpi kanku.

• Uma nanaymanta, waj llakiykunamantawan librakunku, nitaj pitapis ñakʼarichinkuchu.

• Mana sinchʼita llakikunkuchu.

AMAÑA SONQONCHEJ JUCHACHANAWANCHEJTA SAQENACHU. Uj revista nin: “Sonqonchejpi niña juchachakusunchu chayqa, mana anchata onqosunchu. Jinapis chayta ruwayqa mana atikullanchu”, nispa. ¿Imaynatá chayta ruwasunman?

• Pantaj runas kasqanchejta reparakuna. Chayrayku maykʼajllapis pantasunpuni (Eclesiastés 7:20).

• Pantaspaqa wanana tiyan.

• Pacienciakuna. Mana chay ratochu cambiasunchej (Efesios 4:23, 24).

• Sumaj amigosta maskʼakuna. Paykunaqa kʼachas, sonqochajkunataj kananku tiyan, imatapis uyanchejpi ninawanchej tiyan (Proverbios 13:20).

• Wajkunaj sonqonkuta nanachejtinchej, chay rato perdonta mañakuna. Chayta ruwaspaqa sonqo tiyasqa kasunchej (Mateo 5:23, 24).

Patriciamanta parlarerqanchejña. Paytaqa perdonayta yachananpaj Biblia yanaparqa. Pay nin: “Jaya sonqo kayta wijchʼuporqani. Wajkunawanpis niña phiñanakunichu, aswan kusisqataj kani. Diosninchejqa munakuwanchej, allinta kausakunanchejtataj munan. Chayrayku Palabranpi sumajta yuyaychawanchej”, nispa.

Bibliaqa Ron sutiyoj runatapis sonqo tiyasqa kananpaj yanaparqa. Pay nin: “Mana wajkunata imatachus yuyanankuta chayri ruwanankuta niyta atiymanchu. Jinapis sonqo tiyasqa kanayqa noqamanta kashan. Chaypajtaj mana phiñasqallapunichu kanay karqa. Phiñasqa kaywan sonqo tiyasqa kaywanqa, laqhawan kʼanchaywan jina kanku”, nispa.