BIBLIAJ YUYAYCHASQAN: “Imatapis ruwanampaj kʼuchi runaj wakichisqanqa allimpuni llojsin; patan uranta wakichisqarí wajchayayman chayachin” (Proverbios 21:5).

¿IMA NIYTA MUNAN? Allin rinawanchejpajqa imastachus ruwananchejpi ñaupajmantaña piensarina, chayman jina ruwanapajtaj kallpachakuna. Imastachus rantinanchejpipis ñaupajmantaña piensarina. Ichá mana atisunchu rantiyta tukuy ima munasqanchejta. Chayrayku mana imapipis qolqenchejta gastarpanallachu.

YUYAYCHAYKUNA

• Imaspichus gastananchejta anotakuna. Imastachus rantinanchejmanta uj listata ruwakuna. Chay listapitaj anotakusunman mashkhatachus gastananchejta mikhunapi, ropapi, gasolinapi, waj imaspi ima. Chayman jinataj qolqenchejta tʼaqasunman. Gasolinapaj chayri mikhunapaj mana alcanzawajtinchejqa, waj imaspaj qolqeta tʼaqarqanchej chay qolqemanta gastasunman.

• Ama qhasita manuchakunachu. Mana manuchakunapajqa, imata rantikuyta munaspapis qolqetaraj tantakuna. Manukuspaqa killa tukukuyta pagapunapacha mana interesniyojtaj pagashanapaj. Manuña kanchej chaytaj imaynatachus, maykʼajkamachus pagapunanchejpi piensarina, chayman jinataj ruwana.

  Qolqeta manuchakuyman yachasqa runaqa, astawan gastan. Chayrayku niraj manuchakushaspa allinta piensarina.

BIBLIAJ YUYAYCHASQAN: “Llankʼana tiempo  kashajtin, qhellaqa mana llankʼanchu; cosechana tiempo chayamojtintajrí, imatapis maskʼaspaqa mana tarenqachu” (Proverbios 20:4).

¿IMA NIYTA MUNAN? Qhella runaqa wajchayan. Chayrayku trabajanapaj kallpachakuna, qolqenchejtataj mana gastarpanallachu. Ajinamanta necesitasqanchejpaj qolqenchej kallanqa.

YUYAYCHAYKUNA

• Trabajador kana. Confianapaj jina, trabajadortaj kasun chayqa, trabajonchejmanta mana wijchʼuchikusunchu. Patronesqa sumaj trabajadoresta allinpaj qhawanku.

• Honrado kana. Trabajonchejpeqa ama suwakunachu, nitaj llullakunachu. Suwas kajtinchejqa, ni pi trabajachiyta munawasunchu.

• Ama qolqeta munapayanachu. Qolqeta anchata munapayaspaqa onqoykusunman, nitaj wajkunawanpis allintachu kausakusunman. Kusisqa kanapajqa mana ashkha qolqeyojpunichu kana tiyan.

AMA TIEMPONCHEJTA, QOLQENCHEJTAPIS USUCHINACHU

“Machakojkunawan, ashkhata oqojkunawanqa wajchayanku, puñuysikispis thantaman tukunku” (PROVERBIOS 23:21).

AMA ANCHATA LLAKIKUNACHU

“Amaña kausayniykichejmanta llakikuychejchu, imatachus mikhunaykichejmanta, imatachus ujyanaykichejmanta, imatachus churakunaykichejmantapis” (MATEO 6:25).

AMA MICHʼAS KANACHU

“Michʼa runaqa usqhayllata qhapajyayta munan, manataj yachanchu paypa patanman wajchayay jamunantaqa” (PROVERBIOS 28:22).