Jesusqa Capernaumpi capitanpa kamachinta sanoyachiytawan Naín llajtaman riporqa. Chay llajtaqa Capernaummanta 30 kilometrospi jina kasharqa. Jesusqa yachachisqasninwan, waj runaspiwan risharqa. Naín llajtaman chayashaspataj, ashkha judiosta llajtamanta llojsimushajta rikorqa. Paykunaqa uj wañusqata pʼampaj apasharqanku. Chay wañusqataj uj joven karqa.

Chay jovenpa mamanqa sonqo nanayta waqasharqa. Payqa viuda karqa, chay joventaj kʼata wawan karqa. Chayrayku maytachá chay wawanta munakorqa, imajtinchus qosan wañupojtin payllawanña qhepakorqa. Chantapis ichá yuyarqa, viejayajtin wawan payta cuidananta. Jinapis wawanqa wañuporqa, mana piniyojtaj kasharqa.

Jesusqa chay viudata may phutisqata, may llakiypitaj kasqanta rikuspa, sonqonta nanachikorqa. Chayrayku chay warmita sonqochananpaj mayta khuyakuspa nerqa: “Amaña waqaychu”, nispa. Chantá Jesusqa qayllaykuspa aya apanata llankharerqa (Lucas 7:13, 14). Wañusqata pʼampaj apajkunarí chayta rikuspa chay rato sayarqanku. Ichá paykunaqa sonqonkupi nisharqanku: “¿Imaraykú ‘ama waqaychu’ nishanri? ¿Imatá ruwanqari?”, nispa.

Jesuswan khuska rejkunaqa, Jesús ashkha onqosqasta sanoyachisqanta rikorqanku. Jinapis ichá yuyasharqanku: “¿Uj wañusqata kausarichiyta atinmanchu?”, nispa. Paykunaqa yacharqanku unay tiempopi wakin runas wañuymanta kausarichisqa kasqankuta. Jinapis Jesusqa niraj pitapis wañuymanta kausaricherqachu (1 Reyes 17:17-23; 2 Reyes 4:32-37). Chay kutipitaj, Jesusqa chay joventa nerqa: “Joven, qanta niyki: Sayariy”, nispa (Lucas 7:14). Wañusqataj tiyaykamorqapacha, parlarerqataj. Chantá Jesusqa joventa mamanman qoporqa. Chay jovenpa mamanqa maytachá tʼukorqa, manchay kusisqatajchá kasharqa. Manaña sapallanchu kasharqa.

Chay joventa kausashajta rikuspa, runasqa kausayta qoj Jehová Diosta jatuncharqanku. Paykunaqa nerqanku: “Uj jatun profeta  noqanchej ukhupi rikhurin”, nispa. Wakintaj nerqanku: “Diosqa llajtanmanta yuyarikun”, nispa (Lucas 7:16). Jesús chay joventa kausarichisqanqa, tukuynin Galilea jallpʼapi uyarikorqa, Jesuspa llajtan Nazaretpipis uyarikorqachá. Imajtinchus Nazaretqa Naín llajtamanta 10 kilometrospi jinalla kasharqa. Jesuspa ruwasqanmantaqa Judeapipis uyarikullarqataj.

Chaypachaqa Juan Bautista carcelllapipuni kasharqa, Jesuspa ruwasqanmantataj mayta yachayta munarqa. Juanpa yachachisqasnenqa payman willarqanku, Jesús milagrosta ruwasqanmanta. Chayta yachaspa imatachus Juan Bautista nisqanmanta qhepanta yachasunchej.