Jesusqa orqopi yachachiytawan, Capernaum llajtaman rerqa. Chaypitaj judiospa wakin kurajkunanku, payman qayllaykorqanku. Paykunataqa romano soldadospa ujnin capitannin kachasqa.

Chay capitanpa munasqa kamachenqa, sinchʼita onqoykorqa, wañupunanpaj jinañataj kasharqa. Chay capitanqa mana judiochu kaspapis, Jesusmanta yanapata mañakorqa. Payqa judiospa kurajkunanwan Jesusman willacherqa: “Uywasqay suchuyapusqanrayku wasipi wijchʼurayashan, maytataj ñakʼarishan”, nispa (Mateo 8:6). Chay judiostaj Jesusta nerqanku: “Payqa yanapanaykipaj jinapuni. Suyunchejta munakun, sinagogatapis ruwachipuwayku”, nispa (Lucas 7:4, 5).

Chantá Jesusqa, paykunawan usqhayllata chay capitanpa wasinman rerqa. Chayashajtinkuñataj, capitanqa amigosninta Jesusman kacharqa, willacherqataj: “Señor, ama wasiykamaqa jamuychu, noqaqa mana wasiyman yaykunaykipaj jinachu kani”, nispa (Lucas 7:6, 7). Chay capitanqa runasta kamachiyman yachasqa kaspapis, llampʼu sonqo karqa. Payqa mana romanos jinachu kamachisninta ñakʼarichej (Mateo 8:9).

Chay capitanqa yacharqa judíos waj llajtayoj runaswan mana masichakusqankuta (Hechos 10:28). Ichapis chayrayku mana munarqachu Jesús wasinman yaykunanta. Astawanpis amigosninwan Jesusman willacherqa: “Uj simillata niy, uywasqaytaj sanoyaponqa”, nispa (Lucas 7:7).

Jesusqa chayta uyarispa tʼukorqa, nerqataj: “Ni Israelpipis kay jina jatun creeyniyoj runataqa tarinichu”, nispa (Lucas 7:9). Capitanpa amigosnenqa, wasiman kutispa chay onqosqa kamachita sanitota tariparqanku.

Jesusqa chay capitanpa kamachinta sanoyachiytawan, sutʼincharqa mana judío kajkunapis creeyninkurayku bendecisqa kanankuta. Pay nerqa: “Ashkha runas jamonqanku inti llojsimuynejmanta, inti yaykuynejmanta ima. Cielopi kaj Gobiernopitaj mikhoj tiyaykonqanku Abrahanwan, Isaacwan, Jacobwan ima”, nispa. Chanta, ¿imataj kanan karqa mana creeyniyoj judiosmanta? Jesús nerqa: “Jawa laqhaman wijchʼusqa kanqanku. Chaypitaj waqay, kiru kʼarurakuytaj kanqa”, nispa (Mateo 8:11, 12).

Diosqa judiostaraj ñaupajta wajyarerqa Gobiernonman yaykunankupaj. Jinapis mana kasukoj judiostaqa qhesacharqa. Ajinamanta mana judío kajkunaqa, ‘cielopi kaj Gobiernopi mikhoj tiyaykunankupaj’ wajyarisqa karqanku.