Jesusqa Simonpa wasinpi kashaspa wajkunata perdonanata yachacherqa. Chaymanta pisi tiemponmantaj, Galileapi watejmanta willayta qallarerqa. Payqa iskay watastaña Diosmanta willasharqa. Galileapitaj kasharqa 12 apostolesninwan, wakin warmiswan ima. “Jesusqa chay warmismanta supaykunata qharqorqa, onqoykunasninkumantapis sanoyacherqa” (Lucas 8:2). Paykuna ukhupi kasharqanku María Magdalena, Susana, Cuzaj warmin Juana ima. Cuzaqa Herodespa kuraj kamachin karqa.

Jesusmanta runas yachakusqankuman jina, runasqa astawan chʼajwarqanku. Chaytaj astawan sutʼi karqa, Jesusman supayniyoj runata pusamojtinku. Chay runaqa cieguitotaj, opitataj karqa. Jesusqa chay runamanta supayta qharqorqa. Chantá chay runaqa qhawarerqa, parlarerqataj. Tukuy chayta rikojkunaqa tʼukulla kasharqanku, ninakorqankutaj: “¿Manachu kayqa Davidpa Wawan kanman?”, nispa (Mateo 12:23).

Jesús kasharqa chay wasimanqa ashkha runas tantakamorqanku. Jesuswan yachachisqasninwantaj mana mikhuyllatapis aterqankuchu. Jinapis mana tukuy runaschu yuyarqanku Jesusqa “Davidpa Wawan” kasqanta. Wakin fariseoswan leymanta yachachejkunawanqa, Jerusalenmantapacha jamorqanku. Paykunaqa jamorqanku Jesusman churanakunankupaj, nerqankutaj: ‘Satanás kay runapi kashan, supaykunaj kurajninkuwan trabajashan’, nispa (Marcos 3:22). Jinapi Jesusrayku chʼajwa jatarerqa. Jesuspa familiantaj chayta yachaspa payta pusakapunankupaj rerqanku.

Jesuspa familiaresnenqa nerqanku: “Manaña yuyayninpichu kashan”, nispa (Marcos 3:21). Imajtinchus Jesusqa paykunawan Nazaretpi wiñakushajtin, mana runasta chʼajwachejchu. Chaypachataj hermanosnenqa niraj creerqankuchu Diospa Wawan kasqanta (Juan 7:5).

 Jinapis tukuy rikorqanku Jesús supayniyoj runata sanoyachisqanta. Chay runaqa qhawayta aterqa, parlaytapis. Leymanta yachachejkunawan fariseoswantajrí, mana imata ruwayta atispa Jesusmanta sajrata parlarqanku. Paykunaqa nerqanku: “Kay runaqa supaykunata qharqon supaykunaj kurajninku Satanaspa atiyninwan”, nispa (Mateo 12:24).

Jesustaj imatachus yuyashasqankuta yachaspa nerqa: “Mayqen nacionllapipis runas maqanakuspa tʼaqanakunku chayqa, chay nacionqa chinkapun. Chantá mayqen llajtallapipis chayri familiallapipis maqanakuspa tʼaqanakunku chayqa, chay llajtaqa jinallataj chay familiapis chinkapullantaj. Ajinallataj, Satanaschus Satanasllatataj qharqon chayqa, pay kikin tʼaqanasqa kashan. Jina kajtenqa gobiernon chinkarenqa”, nispa (Mateo 12:25, 26).

Jesuspa nisqanqa sutʼi karqa. Fariseosqa yacharqanku wakin judíos supaykunata qharqoyta yachasqankuta (Hechos 19:13). Chayrayku Jesús nerqa: “Satanaspa atiyninwanchus supaykunata qharqoni chayqa, ¿pejpa atiyninwantaj qankunaj yachachisqasniykichej supaykunata qharqonkuri?”, nispa. Sichus Jesús Supaypa atiyninwan supaykunata qharqosharqa chayqa, fariseospa yachachisqasninpis Supayllawantaj kasharqanku. Chayrayku Jesús nillarqataj: “Sichus noqa Diospa atiyninwan supaykunata qharqoni chayqa, cheqamanta Diospa Gobiernonqa taripasunkichejña”, nispa (Mateo 12:27, 28).

Jesusqa Satanasta atipananpaj atiyniyoj kasqanrayku supaykunata qharqorqa. Chayrayku nerqa: “¿Imaynatataj pipis kallpasapa runaj wasinman yaykunman, kapuynintataj apakapunmanri? ¿Manachu ñaupajtaqa kallpasapa runataraj watanan tiyan? Chaymantaraj wasinmanta kapuyninta apakapuyta atin. Pillapis mana noqawan kajqa, contraypi kashan. Runasta noqawan mana tantajpis, runasta noqamanta ayqechin”, nispa (Mateo 12:29, 30). Leymanta yachachejkunawan fariseoswanqa Jesuspa contranpi kaspa Supaywan trabajasqankuta rikucherqanku. Paykunaqa runasta Jehová Diospa Wawanmanta ayqecherqanku.

Jesusqa enemigosninman nerqa: “Runaspa tukuy juchasninku, jinallataj ima sajrata rimasqankupis perdonasqa kanqa. Chaywanpis Diospa atiyninpa contranta sajrata rimajqa, ni jaykʼaj perdonasqachu kanqa. Payqa wiñaypaj juchayoj kanqa”, nispa (Marcos 3:28, 29). Jesusqa Diospa atiyninwan supaykunata qharqorqa. Payman churanakojkunarí Satanaspa atiyninwan chayta ruwasqanta nerqanku. Chayta nispaqa Diospa atiyninpa contranpi rimasharqanku.