65 yachachiy

Reino iskayman tʼaqakun

¿YACHANKICHU imaraykuchus kay runa pʼachanta llikʼichkan? Jehová chayta ruwananta nirqa. Payqa Ahiás Diospa profetan. ¿Imachus juk profeta chayri juk willaqa kasqanta yachankichu? Juk profetaqa, Dios qhipapaq nisqanmanta willan.

Kaypiqa Ahías Jeroboamwan parlachkan. Jeroboamqa Diospa wasinta Salomonta ruwaysirqa. Ahías Jeroboamwan ñanpi tinkuspa, musuq pʼachanta lluchʼukuspa, chunka iskayniyuqman llikʼichkan. Chantá Jeroboamman nin: ‘Qampaq kay llikʼisqaymanta chunkata japʼikuy’, nispa. ¿Imaraykutaq chunkata Jeroboamman qun?

Ahiasqa Jehová Salomonmanta reinonta qhichunanta nirqa. Chantapis 10 ayllusta Jeroboamman qunanta nillarqataq. Jinamanta, Roboam Salomonpa churinqa, Israelmanta 2 aylluqllataña reynin karqa.

Salomón chayta uyarispa mayta phiñakuspa, Jeroboamta wañuchiyta munan, paytaq Egiptoman ayqin. Chaymanta Salomonqa 40 watata kamachispa wañun, kunantaq churin Roboam kamachiyta qallarin. Jeroboam Salomón wañusqanta uyarispa, Egiptomanta Israelman kutinpun.

Roboam mana allin reychu. Salomón tatanmanta runata astawan ñakʼarichin. Jeroboam wak kuraqkuna ima Roboamwan parlamunku, kʼacha kamachiq kananpaq. Payqa mana kasukuspa, astawan saqraman tukurqa. Chayrayku Jeroboamta 10 ayllumanta reytajina akllarqanku. Roboamwantaq 2 ayllulla qhipakurqanku Benjamín ayllu, Judá ayllu ima.

Jeroboamqa runa Jerusalemman Diosta yupaychaq rinanta mana munanchu. Chayrayku qurimanta iskay uña wakasta ruwaspa, chay 10 ayllusta yupaychachin. Jinamanta llaqtaqa millay ruwayman qukurqa.

Jinallataq iskaynin aylluspis mana allintachu kawsarqanku. Roboam reyjina manaraq 5 watata kamachichkaptin, Egiptomanta rey paywan maqanakuq Jerusaleman wicharimuspa, Diospa wasinmanta qurita, phatata ima, apakapurqa. Chayrayku, kay wasiqa manaña qallariypijinachu karqa.

1 Reyes 11:26-43; 12:1-33; 14:21-31.