Mateo 10:1-42
10 Chantá 12 discipulosninta wajyaspa, paykunaman atiyta qorqa supaykunata qharqonankupaj,+ tukuy laya* onqoyniyoj runasta, tukuy laya nanayniyoj runastapis sanoyachinankupaj.
2 Chay 12 apostolespa sutisnenqa kaykuna kanku:+ Ñaupajta Simón, pitachus Pedro+ ninku chay, chantá hermanon Andrés,+ Zebedeoj wawan Santiago, hermanon Juan,+
3 Felipe, Bartolomé,+ Tomás,+ impuestero Mateo,+ Alfeoj wawan Santiago, Tadeo,
4 Cananita* Simón, chantá Judas Iscariote, pichus aswan qhepaman Jesusta japʼicherqa chay.+
5 Jesusqa chay 12 apostolesta kacharqa kay jinata kamachispa:+ “Ama rinkichejchu nacionespa ñanninkutaqa, amallataj yaykunkichejchu Samariaj llajtasninmanpis.+
6 Astawanqa kutin kutita Israel nacionmanta chinkasqa ovejasta maskʼamuychej.+
7 Rishaspaqa willaychej: ‘Cielopi kaj Gobiernoqa qayllapiña kashan’,+ nispa.
8 Onqosqasta sanoyachiychej,+ wañusqasta kausarichiychej, lepra onqoyniyojkunata sanoyachiychej,* supaykunatapis qharqoychej. Qankunaqa mana pagaspalla japʼerqankichej, qoshaspaqa amallataj pagachikuychejchu.
9 Ama chumpiykichejpi* apaychejchu qorita, qolqeta, nitaj cobretapis.+
10 Nillataj ñanpaj apakuychejchu mikhuna wayaqata,* iskay ropasta,* waj jukʼutasta,* nillataj waj tojnutapis.+ Trabajaj runaqa mikhuchisqapuni kanqa.+
11 ”Ima llajtallamanpis ima ranchollamanpis yaykuspaqa, chaypi maskʼaychej pichus uyariyta munajta, chaypitaj qhepakuychej ripunaykichejkama.+
12 Uj wasiman yaykuspaqa, chaypi kajkunata napaykuychej.
13 Paykunachus uyariyta munasunkichej chayqa, ‘allin kausay kachun’ nisqaykichejqa paykunata yanapachun.+ Mana uyariyta munasunkichej chayqa, ‘allin kausay kachun’ nisqaykichejqa qankunaman kutinpuchun.
14 Sichus mayqen wasipipis mayqen llajtapipis mana wajyarikusonqachejchu, nitaj parlasqaykichejtapis uyarisonqachejchu chayqa, chaymanta llojsipushaspaqa chakisniykichejmanta jallpʼata thalarakuychej.+
15 Cheqatapuni niykichej: Chay llajtapaj Juicio Pʼunchayqa aswan sinchʼi kanqa, Sodoma, Gomorra+ jallpʼasmanta nisqaqa.
16 ”Ovejasta jina atojkunaj* chaupinkuta kachashaykichej. Chayrayku kataris jina sumaj yuyayniyoj kaychej, palomas jinataj mana juchachana.+
17 Allinta cuidakuychej, runasqa juzgadosman jaywaykusonqachej,+ sinagogasninkupitaj+ jasutʼisonqachej.+
18 Noqarayku apasonqachej kamachejkunaman, reyesman ima,+ paykunapis nacionesmanta kajkunapis noqamanta yachanankupaj.+
19 Jaywaykusojtiykichejqa ama llakikuychejchu imaynatachus parlanaykichejmanta chayri imatachus ninaykichejmanta. Chay ratopacha Dios yuyaychasonqachej imatachus ninaykichejta.+
20 Mana qankunallachu parlankichej, Tataykichej espiritunwan* yanapasonqachej parlanaykichejpaj.+
21 Uj runaqa hermanonta wañuchichenqa, tatapis wawanta. Wawaspis tatasninkoj contranta oqharikonqanku, wañuchichenqankutaj.+
22 Qankunaqa sutiyrayku tukuy runaspa chejninan kankichej.+ Pichus tukukuykama aguantajrí,* chaymá salvasqa kanqa.+
23 Uj llajtapi qhatiykachasunkichej chayqa, waj llajtamanñataj ayqeychej.+ Cheqatapuni niykichej: Manaraj Israelpa tukuy llajtasninpi willayta tukushajtiykichej, noqaqa* chayamusajña.
24 ”Yachakojqa mana yachachejninmanta aswan kurajchu, nillataj kamachipis patronninmanta aswan kurajchu.+
25 Yachakojqa yachachejnin jina kaspa sonqo juntʼasqa kachun, kamachipis patronnin jina kaspa sonqo juntʼasqallataj kachun.+ Wasiyojtachus Satanás*+ ninku chayqa, ¡astawanrajchá ajinata nenqanku wasinpi kajkunataqa!
26 Chayrayku ama paykunata manchachikuychejchu. Mana imapis pakasqa kayta atinchu mana sutʼinchakojqa, nillataj pakaypi kajpis mana yachakojqa.+
27 Imatachus laqhallapi niykichej chaytaqa sutʼipi niychej. Chhichisqallata uyarisqaykichejtapis terraza patasmanta* willaychej.+
28 Qankunata wañuchiyta atejkunataqa ama manchachikuychejchu,+ mana paykunamantachu kashan qhepaman kausarimunaykichejqa. Astawanqa pichus Hinón wayqʼopi* qankunata chinkachiyta atin, chayta manchachikuychej.+
29 Iskay pʼisqetustaqa pisi valorniyoj qolqellapi* vendenku, ¿icharí? Chaywanpis ni uj pʼisqetullapis pampaman urmanchu mana Tataykichejpa yachanantaqa.+
30 Umaykichejmanta chujchasniykichejpis tukuyninku yupasqa kashanku.
31 Chayrayku ama manchachikuychejchu, qankunaqa ashkha pʼisqetusmantapis astawanraj valenkichej.+
32 ”Sichus pipis runaspa ñaupaqenpi rejsiwasqanta nin chayqa,+ noqapis payta rejsisqayta nillasajtaj cielopi kashaj Tataypa ñaupaqenpi.+
33 Chantá sichus pipis runaspa ñaupaqenpi mana rejsiwasqanta nin chayqa, noqapis payta mana rejsisqayta nillasajtaj cielopi kashaj Tataypa ñaupaqenpi.+
34 Ama yuyaychejchu kay jallpʼaman allin kausayta apamoj jamusqayta. Mana allin kausayta apamojchu jamuni, manachayqa tʼaqanachej* jamuni.+
35 Noqaqa runasta tʼaqanachej jamuni. Qhari wawaqa tatanpa contranpi kanqa, warmi wawapis mamanpa contranpi, ñojchʼapis* suegranpa contranpi.+
36 Runaj enemigosnenqa kikin wasillanmantataj kanqanku.
37 Tatanta mamanta noqamanta astawan munakojqa, mana noqaypata kananpaj jinachu. Qhari wawanta warmi wawanta noqamanta astawan munakojpis, manallataj noqaypata kananpaj jinachu.+
38 Sichus pipis mana ñakʼarina kʼaspin* aparisqa qhepayta jamonqa chayqa, mana noqaypata kananpaj jinachu.+
39 Kausayninta salvayta munajqa wañonqa. Noqarayku wañojrí kausarimonqa.+
40 ”Qankunata wajyarikojqa, noqatapis wajyarikullawantaj. Noqata wajyarikuwajtaj, kachamuwajniytapis wajyarikullantaj.+
41 Pichus uj profetata wajyarikun, profeta kasqanrayku chayqa, profetaj tʼinkanta japʼenqa.+ Pichus cheqan runata wajyarikun, cheqan runa kasqanrayku chayqa, cheqan runaj tʼinkanta japʼenqa.
42 Cheqatapuni niykichej: Pillapis kay juchʼuykunamanta ujninman, discipuloy kasqanrayku uj vaso yakullatapis jaywarejqa tʼinkanta japʼenqapuni”.+
Sutʼinchaykunasnin
^ Chayri “tukuy rijchʼaj”.
^ Chayri “imatapis tukuy sonqo ruwarqoj”.
^ Chayri “llimphuchaychej”.
^ Chay chumpeqa qolqe churanayoj karqa.
^ Chayri “bolsata”.
^ Chayri “waj ropata”.
^ Chayri “waj abarcasta”.
^ Griego parlaypeqa nin, “lobospa”. Loboqa atojman rijchʼakun, aswan jatuntaj.
^ Chayri “sinchʼita sayajrí”.
^ Griego parlaypeqa nin, “Runaj Wawan”. Glosariopi runaj wawan nisqata leeriy.
^ Chayri “Beelzebub”. Chayqa Satanaspa ujnin sutin, supaykunaj kamachejninkojta.
^ Chayri “wasi patasmanta”.
^ Glosariopi Hinón wayqʼo nisqata leeriy.
^ Griego parlaypeqa nin, “uj asarionllapi”. Yanapa B14 nisqata leeriy.
^ Griego parlaypeqa nin, “manachayqa espadata churaj”.
^ Ñojchʼa: waj lugarespi ninku qhachuni, yerna.
^ Chayri “ñakʼarina posten”. Glosariopi ñakʼarina kʼaspi nisqata leeriy.
