Tukuy runas nacekusqanchejmantapacha, juchajta wañuypatawan esclavosnin kanchej. Jehová Diostaj chaykunamanta kacharichinawanchejpaj, Wawan Jesusta kay jallpʼaman kachamorqa. Ajinamanta Jesuspa yawarninnejta juchamantawan wañuymantawan rantiwarqanchej (Efesios 1:7; 1 Pedro 1:18, 19). Chayrayku Jesús nerqa: ‘Noqaqa jamuni kausayniyta qonaypaj ashkha runas kacharichisqa kanankupaj’, nispa (Mateo 20:28).

¿Imaraykutaj kacharichisqa kayta necesitanchej?

 Diosqa ñaupaj runata ruwashaspa, mana juchayojta ruwarqa. Chay runataj Adán sutikorqa, wiñaypajtaj kausakuyta aterqa. Jinapis Diosta mana kasukusqanrayku juchallikorqa, wiñay kausaytataj pierderqa (Génesis 3:17-19). Wawasninmanpis juchata herenciata jina saqewarqanchej (Romanos 5:12). Chayrayku Bibliaqa nin, tukuyninchej juchaj esclavosnin kasqanchejta. Adanqa mana pay kikillantachu juchaman, wañuymanwan vendeykukorqa, manaqa wawasnintapis (Romanos 7:14). Tukuyninchej juchasapas kasqanchejraykutaj, ni pi kacharichiyta atiwarqanchejchu (Salmo 49:7, 8).

 Tukuy runas wañuyllataña suyakunanchej karqa. Jinapis Diosqa munakuwasqanchejrayku khuyakuwarqanchej, kʼata Wawantataj kachamorqa juchasninchejrayku wañunanpaj. Ajinamanta Diosqa juchasninchejta perdonayta atiwanchej, jamoj tiempopitaj tukuy juchamanta llimphuchawasun (Juan 3:16; Romanos 5:6-8). Chanta, ¿manachu Diosqa jinallamanta juchasninchejta perdonayta atiwarqanchej? Mana. Imaraykuchus Diosqa, cheqan kajtapuni ruwan. Juchamanta kacharichisqa kananchejpajtaj, uj precio pagakunanpuni karqa. Chaytaj karqa Jesuspa kausaynin (Salmo 89:14; Romanos 3:23-26).

¿Imaynatá Dios juchamantawan wañuymantawan kacharichiwanchej?

 Bibliaqa nin: “Diosqa preciowan rantisorqachej”, nispa (1 Corintios 6:20; 7:23). Chay preciotaj Jesuspa yawarnin. Jesusqa yawarninta jichʼaspa, Diospaj runasta ranterqa “tukuy ayllusmanta, tukuy parlaykunamanta, tukuy laya runasmanta, tukuy nacionesmantawan” (Apocalipsis 5:8, 9). Chantapis Jesuspa wañuynenqa juchamanta kacharichiwanchej (1 Corintios 1:30; Colosenses 1:14; Hebreos 9:15). Payllataj kausayninta qoyta aterqa. Imaraykuchus Jesuslla Adán jina mana juchayoj karqa (1 Corintios 15:21, 22, 45, 46). Biblia nin: “Imaynatachus uj runa [nisunman Adán] mana kasukusqanrayku ashkha runas juchayoj rikhurerqanku, ajinallatataj uj runa [nisunman Jesús] kasukusqanrayku ashkha runas cheqan runapaj qhawasqa kanqanku”, nispa (Romanos 5:19). Kaypi sutʼita niwanchej, imaraykuchus uj runaj wañuynin ashkha juchasapa runasta salvasqanta. Jesusqa kausayninta qospa maychus necesitakusqan preciota pagarqa. Ajinamanta paypa wañuyninpi tukuy creejkunata salvan (1 Timoteo 2:5, 6).