Arí, Diosqa uyariwanchejpuni. Bibliaj wakin versiculosnin sutʼita rikuchin Diosqa runaspa mañakusqankuta uyarisqanta. Wakin runaspa kausayninkupis rikuchin Diosqa mañakusqankuta uyarisqanta. Bibliaqa Diosmanta nin: “Payta manchachikojkunaj munarisqankuta juntʼan; yanapata mañakusqankuta uyarispa, paykunata salvan”, nispa (Salmo 145:19). Dios uyarinawanchejpajqa, munasqanman jina paymanta mañakunanchej tiyan.

Diosqa kay jinata mañakunanchejta munan

•   Diosllamanta mañakunanchej tiyan, manataj Jesusmantachu, nitaj Mariamantachu, nillataj santosmantachu, nillataj angelesmantachu mañakunanchej tiyan. Bibliaqa Jehová Diosllamanta kayta nin: “Qan uyarinki mañakususqankuta”, nispa (Salmo 65:2).

•   Diosqa mañakunanchejta munan paypa munayninman jina, kamachisqasninman jinataj, chaykunataj Bibliapi qhelqasqa kashanku (1 Juan 5:14).

•   Jesuspa sutinta oqharispa Diosmanta mañakuna tiyan, ajinamanta Jesusta jatunpaj qhawasqanchejta rikuchisun. Jesús nerqa: “Mana pipis Dios Tataman chayayta atinchu, mana noqanejta rispaqa”, nispa (Juan 14:6).

•   Diosmantaqa paypi creespapuni mañakuna tiyan. Pisi creeyniyoj kaspaqa Diosmanta mañakuna tiyan creeyninchejta yapananpaj (Mateo 21:22; Lucas 17:5).

•   Llampʼu sonqo kana, manataj puraj uyachu. Bibliapi nin: “Aswan patapipis [Jehová] Diosqa kachun, llampʼu sonqosta qhawamumpuni”, nispa (Salmo 138:6).

•   Mana saykʼuspa mañakuna tiyan. Jesús nerqa: “Mañakullaychejpuni qosonqachejtaj”, nispa (Lucas 11:9, NM).

Diosqa mana kay imasta qhawanchu

•   Maymantachus kasqanchejta, imayna rijchʼayniyojchus kasqanchejta. “Diosqa mana wakillantachu allimpaj qhawan, manachayqa mayqen nacionllamantapis pichá Diosta manchachikoj, cheqa kajtataj ruwaj runatamin Diosqa allin ñawiwan qhawan” (Hechos 10:34, 35).

•   Diosmantaqa mañakusunman: tiyaykuspa, kʼumuykukuspa, qonqoriykukuspa chayri sayaykuspa (1 Crónicas 17:16; Nehemías 8:6; Daniel 6:10; Marcos 11:25).

•   Diosmantaqa mañakullasunman jatunmanta parlaspapis chayri sonqonchej ukhullapipis. Diosqa paymanta mañakusqanchejta uyarin sonqonchej ukhullapi mañakojtinchejpis (Nehemías 2:1-6).

•   Llakiyninchej sinchʼi kajtinpis, pisilla kajtinpis payqa uyariwanchejpuni. Bibliaqa niwanchej: “Diosman saqeychej tukuy phutikuyniykichejta, imaraykuchus payqa qankunamanta dakun”, nispa (1 Pedro 5:7).