Tiahk lemei tohto me pid politik kin wiawi nan sampah pwon.

•   Nan Mexico, erein ahnsoun usuhs en pahr 2023-2024, aramas 39 me wia kandedeid kamakamalahr, met tohto sang mahs, iangahki tiahk lemei teikan me pid palien politik pil wiawi, oh aramas akan pwuriamweikihla oh masepwehkada.

•   Rahn pwukat nan Iurop, tiahk lemei tohto me pid palien politik kin wiawi, met iangahki songosong en kemehla prime minister en Slovakia nan May 15, 2024.

•   Nan United States, aramas akan uhdahn pwuriamweikihla duwen emen eh songosong en kemehla Donald Trump me wia president en mahso ni July 13, 2024.

 Dahme kahrehda tiahk lemei tohto me pid palien politik kin wiawi? E pahn sohla wiawi? Dahme Paipel mahsanih?

 Paipel kohpada me atail ahnsou iei “imwin rahn akan,” aramas tohto kin ahneki madamadau me kahrehiong irail en wia tiahk lemei oh sohte men pwungki meteikan.

•   “Ni imwin rahn akan, e pahn mie ahnsou apwal oh keper. Pwe aramas akan . . . sohte pahn kin kasapahlkalahngan, soaloalopwoat, . . . sohte men pwungki meteikan, . . . lemei, . . . re pahn kin pangala meteikan, keptakai, aklapalap.”—2 Timoty 3:1-4.

 Paipel pil kohpada me kahpwal kan me duwehte aramas akan kin uhwong koperment oh liseliping en palien politik kin kalapw wiawi erein ahnsou wet. (Luk 21:9, footnote) Ahpw tiahk lemei me pid politik oh saminimin sohte pahn mihmihte.

 Paipel kin kawehwehda me Koht pahn ketin wiliankihdi koperment en aramas koaros sapwellime koperment nanleng.

•   “Koht en nanleng pahn ketin kauwada mwehi ehu me . . . pahn kauwehla mwehi teikan koaros, oh pahn mihmi kohkohlahte.”—Daniel 2:44.

 Wehin Koht uhdahn pahn kaminiminpene aramas akan oh wiahda sampah pwon en popohl.

•   Nanmwarkien Wehin Koht, Sises Krais, kin mwarenki “Nanmwarkien Popohl,” oh e pahn ketin kamehlelehiong kitail me “popohl pahn poatopoat nan sapwellime wehi.”—Aiseia 9:6, 7.

•   Pil ahnsou wet, irail kan me wia tohn wehi wet kin sukuhlki duwen mour ni popohl. Kahrehda Paipel kin mahsanih: “Re pahn wekidohng neirail kedlahs akan ong ni mehn deipwel, oh neirail ketieu kan ong ni naipokos. Sohte ehu wehi pahn pwurehng pelianda ehu wehi, de pil kaunopada nair sounpei kan ong mahwen.”—Aiseia 2:3, 4.

 Pwehn kalaudehla omw ese met, wadek oaralap “What Will God’s Kingdom Accomplish?” oh kilang kisin kasdo Dahkot Wehin Koht?