IREN MEHN KASUKUHL 19
Sounkadehdehn Siohwa kan Kristian Mehlel kei?
Nin duwen Sounkadehdehn Siohwa kan, se kamehlele me kiht Kristian mehlel kei. Dahme kahrehda? Tehk dahme se kin kamehlele, kahrepen at kin doadoahngki ahd wet oh duwen at kin limpoakpene.
1. Dahme Sounkadehdehn Siohwa kan kin kamehlele?
Sises mahsanih: “[Sapwellimen Koht] mahsen iei me mehlel.” (Sohn 17:17) Duwehte Sises, Sounkadehdehn Siohwa kan kin ahnsou koaros kamehlele Mahsen en Koht. Karasepe, tehk duwen poadopoad en Sounkadehdehn Siohwa kan, me nin tapio kin adaneki Tohn Sukuhl en Paipel kan. Nan pahr 1870, Tohnsukuhl en Paipel kan tepida kasawih Paipel ni keneinei. Re kin kamehlele dahme Paipel mahsanih, mehnda ma e kin weksang padahk en sarawi teikan. Irail eri tepida ehukihong meteikan padahk mehlel kan sang nan Paipel. a
2. Dahme kahrehda se kin doadoahngki ahd wet Sounkadehdehn Siohwa kan?
Siohwa kin ketin wiahki sapwellime tohnkaudok kan nin duwen sapwellime sounkadehde pwehki re kin padahngki me mehlel duwen ih. (Ipru 11:4–12:1) Karasepe, mahso, Siohwa ketin mahsanihong sapwellime aramas ako: “Kumwail me iei ei sounkadehde.” (Wadek Aiseia 43:10.) Sises mwarenki “Sounkadehde Lelepek.” (Kaudiahl 1:5) Kahrehda, nan pahr 1931 se alehda ahd wet Sounkadehdehn Siohwa kan. Se kin pohlki weuwa ahd wet.
3. Ia duwen Sounkadehdehn Siohwa kan ar kin kahlemengih sapwellimen Sises limpoak?
Sises kin uhdahn ketin poakohng sapwellime tohnpadahk kan kahrehda e kin ketin wiahkin irail sapwellime peneinei. (Wadek Mark 3:35.) Duwehte met, Sounkadehdehn Siohwa kan kin miniminpene, re wia peneinei ehu nan sampah pwon. Ihme kahrehda se kin ekerki emenemen brother oh sister. (Pailimwon 1, 2) Se pil kin peikiong kehkehliko: “Poakohng riamwail kan koaros.” (1 Piter 2:17) Sounkadehdehn Siohwa kan kin kasalehda soangen limpoak wet ni soangsoangen ahl akan, me duwehte re kin sewese riarail brother oh sister kan nan sampah pwon ni ahnsou me anahn.
KALAUDEHLA OMW ESE MET
Kalaudehla omw ese poadopoad en Sounkadehdehn Siohwa kan oh pil kilang mehn kadehde me kasalehda kiht Kristian mehlel kei.
Kristian mehlel kan kin kamehlele Paipel oh ehukihong meteikan
4. Se kin kamehlele dahme Paipel mahsanih
Siohwa ketin kohpada me atail wehwehki Paipel pahn kin sansalla. Wadek Daniel 12:4 (NW) b oh mwuri koasoiapene peidek wet:
-
Dahme pahn “tohtohla” rehn sapwellimen Koht aramas akan ni ar kin pousehlahte kasawih Paipel?
Tehk duwen pwihn en tohnsukuhl en Paipel ehu, iangahki Charles Russell, ar kin onopki Paipel. Kilang KISIN KASDO, oh koasoiapene peidek wet.
-
Nan kisin kasdou, ia duwen Charles Russell oh ienge Tohnsukuhl en Paipel kan ar kin onopki Paipel?
Ke ese met?
Ekei pak, se kin kapwungala ekei soahng kan me se kamehlele. Dahme kahrehda? Duwehte dakadahn ketipin eh kin ekisekis kasalehda audepen sahpw ehu, Koht ketin mweidohng aramas akan ren ekisekis wehwehkihla sapwellime Mahsen. (Wadek Lepin Padahk 4:18.) Paipel sohte kin wekila, ahpw ni at kin wehwehkihla mwahu duwen Paipel se kin kapwungala dahme se kin padahngki.
5. Se kin kapwaiada wehwehn adat
Dahme kahrehda se alehda ahd wet Sounkadehdehn Siohwa kan? Kilang KISIN KASDO, oh mwuri koasoiapene peidek wet.
-
Dahme kahrehda ahd wet Sounkadehdehn Siohwa kan konehng?
Dahme kahrehda Siohwa ketin pilada aramas akan ren wia sapwellime sounkadehde? Pwehki re pahn kadehdehda me ih me Koht mehlel, pwehki mie koasoi likamw tohto me pid duwen ih. Tehk meh riau sang soahng likamw ko.
Ekei pelien lamalam kan kin padahkihong tohn arail sarawi kan me Koht ketin kupwurki ren doadoahngki sansal kan nan ar kaudok. Ahpw, wadek Lipai 26:1, oh mwuri koasoiapene peidek pwukat:
-
Dahme mehlel? Ia sapwellimen Siohwa pepehm duwen dikedik kan?
Ekei kaunen pelien lamalam kan kin padahngki me Sises me Koht. Ahpw, wadek Sohn 20:17, oh mwuri koasoiapene peidek pwukat:
-
Dahme mehlel? Sises me Koht?
-
Ia omw pepehm ni omw ese me Siohwa ketin poaronehdo sapwellime Sounkadehde kan ren lohki dahme mehlel duwen ih oh sapwellime Ohlo?
6. Se kin limpoakpene
Paipel mahsanih me Kristian kan duwehte kisehn paliweren aramas me kin kakonokonpene. Wadek 1 Korint 12:25, 26, oh mwuri koasoiapene peidek pwukat:
-
Dahme Kristian mehlel kan anahne wia ni Kristian teikan ar kin lokolok?
-
Dahme ke kilangehr duwen limpoak me Sounkadehdehn Siohwa kan kin kasalehda nanpwungarail?
Ni ahnsou me Sounkadehdehn Siohwa kan kin lelohng lokolok nan ehu sahpw, iengarail Sounkadehde kan nan sampah pwon kin nantihong mwadang sewese irail. Ehu karasepe, kilang KISIN KASDO. Mwuri koasoiapene peidek wet.
-
Ia duwen sawas kan me Sounkadehdehn Siohwa kan kin kihda eh wia kasalepen limpoak?
Kristian mehlel kan kin kasalehda limpoak ong irail kan me anahne sawas
EKEI ARAMAS KIN NDA: “Sounkadehdehn Siohwa kan pelien lamalam kapw ehu.”
-
Sangete iahd me Siohwa kin ketin kahdaneki sapwellime tohnkaudok kan sounkadehde?
DAHME KE SUKUHLKIER
Sounkadehdehn Siohwa kan iei Kristian mehlel kei. Nan sampah pwon se wia peneinei en tohnkaudok kan me kin kamehlele Paipel oh kin kasalehda dahme mehlel duwen Siohwa.
Kousapahl
-
Dahme kahrehda se alehda ahd wet Sounkadehdehn Siohwa kan?
-
Ia duwen at kin kasalehda me se kin limpoakpene?
-
Ke medewe Sounkadehdehn Siohwa kan iei Kristian mehlel kei?
PIL TEHK
Kalaudehla omw ese duwen poadopoad en Sounkadehdehn Siohwa kan.
Jehovah’s Witnesses—Faith in Action, Part 1: Out of Darkness (1:00:53)
Kilang ehu karasepe me Sounkadehdehn Siohwa kan kin kadehdehda me en meteikan padahk kan likamw.
Diarada pasapengpen omw peidek kan duwen Sounkadehdehn Siohwa kan.
“Frequently Asked Questions About Jehovah’s Witnesses” (web page)
Stephen kin uhdahn kailongki keinek teikan me kahrehda e kin peiong irail. Kilang dahme e diarada sang rehn Sounkadehdehn Siohwa kan me kamwakid ih en wekila.
“My Life Was Going From Bad to Worse” (The Watchtower, July 1, 2015)
a Sangete pahr 1879, nait makasihn, Kahn Iroir, kin kaukaule kawehwehda padahk mehlel nan Paipel.
b Daniel 12:4 (NW): “A ong kowe, Daniel, kolokolete mahsen kat ni rir, oh sidampihedi pwuhko lao lel ni imwilahn ahnsou. Me tohto pahn kohkohseli, (de: ‘kasawih met [me iei, pwuhko] ni keneinei’) oh loalokong mehlel pahn tohtohla.”
