1. Dahme pahn kahrehda mour en peneinei nsenamwahu?

SIOHWA KOHT kupwurki mouren omw peneinei en nsenamwahu. Sapwellime Mahsen, Paipel, ketikihda kaweid kan ong emenemen tohnpeneinei oh kin kawehwehda pwukoa kan me Koht kupwurki emenemen en wia. Ni ahnsou me tohnpeneinei kan kin kapwaiada arail pwukoa kan nin duwen sapwellimen Koht kaweid, eri, e pahn imwila mwahu. Sises mahsanih: “Irail kan me kin rong mahsen en Koht oh kapwaiada, iei irail me paisang mehlel!”​—Luk 11:28.

2. Dahme kitail anahne pohnese pwe peneinei en kak nsenamwahu?

² Nsenamwahu en peneinei kin keieu poahsoankihda atail pohnese me peneinei tepisang rehn Siohwa, iei ih me Sises kin kamwarenki ‘Samatail.’ (Madiu 6:9) Peneinei koaros pohn sampah mie pwehki Samatail nanleng, oh e mwahngih dahme kin wiahiong mour en peneinei en nsenamwahu. (Episos 3:14, 15) Eri, dahme Paipel padahngki duwen pwukoa en emenemen tohnpeneinei?

3. Ia mwomwen Paipel eh kawehwehda tepin wiawihdahn peneinei en aramas? Ia duwen atail ese me dahme Paipel mahsanihki met me mehlel?

³ Siohwa ketin kapikada tepin aramas, Adam oh Ihp, oh ketin kapatairapene en wia ohl oh lih pwopwoud. E ketikihong ira paradais lingan ehu nin sampah, mwetuwel en Ihden, oh mahsanihong ira en naineki seri kan. Siohwa mahsanih: “Kumwa kaparaparala pwe kadaudokamwa kan pahn kousoanla wasa koaros nin sampah oh kaunda mehkoaros.” (Senesis 1:26-28; 2:18, 21-24) Met kaidehn soai mwahl ehu. Sises ketin kasalehda me dahme pwuhken Senesis mahsanih duwen tepin mour en peneineio uhdahn mehlel. (Madiu 19:4, 5) Mendahki kitail kin lelohng kahpwal tohto oh mour en ahnsou wet kaidehn iei me Koht ketin kupwurki en wiawi, ahpw kitail kilang dahme kahrehda kitail kak ahneki peneinei nsenamwahu.

4. (a) Ia duwen emenemen tohnpeneinei eh kak sewese wiahiong mour en peneinei en nsenamwahu? (b) Dahme kahrehda sukuhlki duwen mour en Sises kin wia mehkot kesempwal pwehn kak ahneki peneinei nsenamwahu?

⁴ Emenemen tohnpeneinei kak sewese wiahiong mour en peneinei en nsenamwahu ni ar pahn kahlemengih sapwellimen Koht elen limpoak. (Episos 5:1, 2) Ahpw ia duwen atail pahn kak kahlemengih Koht pwehki atail sohte kak kilang ih? Kitail kak sukuhlki duwen sapwellimen Siohwa wiewia kan pwehki e ketin kadarodo sapwellime Mesenih sang nanleng. (Sohn 1:14, 18) Ni Sises eh ketiket sampah, e kin ketin kahlemengih mwahu Seme nanleng. Ihme kahrehda en kilang oh rong Sises kin duwehte ma ke patopato rehn Siohwa oh rongorong Ih. (Sohn 14:9) Kahrehda, sang ni atail kin sukuhlki duwen limpoak me Sises ketin kasalehda oh kahlemengih, emenemen kitail kak sewese wiahiong mour en peneinei en nsenamwahu.

5, 6. (a) Ia duwen sapwellimen Sises wiewia ong mwomwohdiso eh kin wia mehn kahlemeng mwahu ong ohl pwopwoud kan? (b) Dahme emen anahne wia pwehn kak ale sapwellimen Koht mahk?

⁵ Paipel mahsanih me ohl pwopwoud kan pahn kin apwalih arail pwoud kan ni soangen ahlohte me Sises kin ketin apwalih sapwellime tohnpadahk kan. Tehk kanahieng kaweid en Paipel wet: “Kumwail ohl pwopwoud kan, kumwail poakohng amwail werek kan duwehte Krais eh ketin poakohng mwomwohdiso oh ketin pangala pein ih . . . Ohl akan uhdahn pahn poakohng ar werek kan duwehte ar kin poakohng pein paliwararail kan. Ohl me kin poakohng eh werek, kin poakohng pein ih. (Sohte me kin kailongki pein paliwere. Pwe e kin kamwenge oh e kin kanai, duwehte Krais eh kin ketin apwalih mwomwohdiso).”​—Episos 5:23, 25-29.

⁶ Sapwellimen Sises limpoak ong mwomwohdiso me wiawihkihda sapwellime tohnpadahk kan kin kihda mehn kahlemeng unsek ehu ong ohl pwopwoud kan. Sises kin “ketin loalloale irail lel ni imwi,” meirongkihla sapwellime mour pwehki irail, mendahki irail wia aramas soh unsek kei. (Sohn 13:1; 15:13) Ni ahl me duwehte met, kaweid kohwong ohl pwopwoud kan me mahsanih: “Kumwail en poakohng amwail pwoud lih akan, oh dehr lemeiong irail.” (Kolose 3:19) Dahme pahn sewese ohl pwopwoud men en doadoahngki kaweid wet, ahpw mehlel ahnsou kan me lih pwopwoud men wia mehkot me sohte konehng? E pahn kin taman me pein ih pil kin sapwungala oh dahme e anahne wia pwehn kak ale sapwellimen Koht mahk. Dahme e anahne wia? E anahne mahkohng irail akan me kin wia dihp ong ih, oh met pil kin wehwehki eh pwoudo. Pil duwehte liho, e anahne mahkohng irail akan me kin wia dihp ong ih. (Wadek Madiu 6:12, 14, 15.) Ke wehwehki dahme  kahrehda ekei kin ndahki me pwopwoud pweida ehu, iei patpenehn aramas riemen me diren mahk?

7. Dahme Sises kin ketin tamataman duwen sapwellime tohnpadahk kan? Ia duwen ohl pwopwoud kan ar kak kahlemengih ih?

⁷ Ohl pwopwoud kan pil anahne tehk me Sises kin ketin nsenohki sapwellime tohnpadahk kan ahnsou koaros. E kin ketin tamataman arail luwet akan oh arail anahn en war akan. Ahnsou me re kin pwangada, e kin mahsanih: “Kitail kohla kalapwukala mahs nan sapwtehno, wasa kumwail kak kommoal ie.” (Mark 6:30-32) Lih pwopwoud kan pil anahne ohl akan en nsenohki oh tehk irail. Paipel kin kawehwehda me lih akan “me luwet,” ihme kahrehda ohl pwopwoud kan anahne “waunekin” irail. Dahme kahrehda? Pwehki ohl pwopwoud oh lih pwopwoud ira koaros ahneki koapworopwor en “kapaien mour.” (1 Piter 3:7) Ohl pwopwoud kan en tamataman me lelepek me kahrehiong ren keniken rehn Koht, ah kaidehn pwehki irail ohl de lih.​—Melkahka 101:6.

8. (a) Ia wehwehn ohl pwopwoud men “me kin poakohng eh werek, kin poakohng pein ih”? (b) Ia wehwehn en wia “warteieu” ong pwopwoud ehu?

⁸ Paipel mahsanih me ohl pwopwoud men “me kin poakohng eh werek, kin poakohng pein ih.” Met pwehki ohl emen oh eh pwoud “solahr wia riemen, pwe warteieu,” nin duwen me Sises ketin kasalehda. (Madiu 19:6) Kahrehda ira en kolokol tiahk en wendipenehn pwopwoud en wiawi nanpwungara kelehpw. (Lepin Padahk 5:15-21; Ipru 13:4) Ira pahn kak wia met ma ira pahn kin medemedewe kamwahupen meteio, ah kaidehn pein ah. (1 Korint 7:3-5) Mehn kataman wet inenen kesempwal: “Sohte me kin kailongki pein paliwere. Pwe e kin kamwenge oh e kin kanai.” Ohl pwopwoud kan anahne poakohng arail pwoud lih akan duwehte arail kin poakohng pein irail ni arail kin tamataman me re pahn wehkohng arail tapwi Sises Krais duwen met.​—Episos 5:29; 1 Korint 11:3.

9. Soangen pepehm dahieu me Sises sapwellimaniki me sansalda nan Pilipai 1:8? Dahme kahrehda ohl pwopwoud kan anahne kasalehiong arail pwoud kan soangen pepehm wet?

 ⁹ Wahnpoaron Pohl koasoia duwen pepehm en ‘poakehla nin duwen me Krais Sises ketin sapwellimanki.’ (Pilipai 1:8, NW) Sapwellimen Sises pepehm en poakehla kin wia irair kansenamwahu ehu. Irair wet inenen kansenamwahu ong lih akan me wiahla sapwellime tohnpadahk. (Sohn 20:1, 11-13, 16) Lih pwopwoud kan uhdahn men arail pwoud ohl akan en kin poakepoake irail.

10. Ia duwen Sises eh ketikihda mehn kahlemeng mwahu ong lih pwopwoud kan?

¹⁰ Peneinei ehu kin wia pwihn ehu oh anahne emen en wia kaun pwehn kak tangamwahu. Sises pil kin ketin uhpahiong Meno me wia sapwellime Tapwi. Paipel mahsanih me “Koht eh tapwin Krais” oh “ohl pwopwoud eh moangen eh pwoud.” (1 Korint 11:3) Ahn Sises kin ketin uhpahiong sapwellimen Koht kaunda wia mehn kahlemeng mwahu ehu pwehki kitail koaruhsie kin mie atail tapwi me kitail anahne uhpahiong.

11. Soangen lamalam dah me lih pwopwoud men pahn kin ahneki ong eh pwoud? Dahme pahn kak imwikihla eh wiewia mwahu?

¹¹ Ohl akan kak wiahda sapwung pwehki arail soh unsek, oh pak tohto re sohte kin wia arail pwukoahn tapwin peneinei ni ahl me keieu mwahu. Eri, dahme lih pwopwoud men en wia? Liho en dehr kin mwamwahliki dahme eh pwoudo kin wia oh en dehr pil song en uhd alehda pwukoa en wia tapwin peneinei. E mwahu ong lih pwopwoud men en tamataman me ahneki irair en mpahi oh meleilei kin wia mehkot kesempwal mwohn silangin Koht. (1 Piter 3:4) Ni eh pahn kin kasalehda soangen irair wet, e pahn mengeiong ih en uhpahiong eh tapwi, mehnda ma e pil mi nan irair apwal kan. Laudsang met, Paipel mahsanih:  “Lih pwopwoud en wauneki eh pwoud.” (Episos 5:33) Ahpw ia duwen ma ohl pwopwoudo sohte kin wiahki Krais eh Tapwi? Paipel kangoangehki lih pwopwoud kan: “Kumwail peikiong amwail pwoud kan, pwe ma ekei irail sohte pwoson mahsen en Koht, re en alehkihla pwoson amwail mouren wiewia mwahu. Kumwail sohte anahne kapahrekiong irail, pwe re pahn pein kilang amwail mour mwakelekel oh duwen amwail wauneki Koht.”​—1 Piter 3:1, 2.

12. Dahme kahrehda e sohte sapwung lih pwopwoud men en kasalehda eh madamadau kan ni ngihl mwahu oh kamantik?

¹² Mehnda ma ahn liho pwoud iang mihmi nan pwoson de soh, liho pahn kak kasalehda ni ngihl mwahu oh kamantik eh madamadau me weksang ahn eh pwoud ohlo. Met sohte wehwehki me liho sohte kin wauneki eh pwoud. Ahn liho madamadauo kakete pwung, oh peneineio pwon kakete paiekihda ma ohlo pahn rong. Mendahte Eipraam sohte pwungki ahnsou me eh pwoud Sara kasalehda wiepen kapwungala kahpwal ehu me pwarada nan peneineio, Koht mahsanihong Eipraam: “Kapwaiada mehkoaros  me Sara pahn ndawei.” (Wadek Senesis 21:9-12.) Ahpw ni ahnsou me ohl pwopwoud men pahn piladahr mehnia koasoandi me pahn wiawi, oh ma koasoandi wet sohte uhwong kosonned en Koht, eh pwoud liho anahne utung pilipilo.​—Wiewia 5:29; Episos 5:24.

13. (a) Dahme Taitus 2:4, 5 kin kangoange lih pwopwoud kan en wia? (b) Dahme Paipel kin mahsanih duwen tohrohrpeseng oh mweipeseng?

¹³ Mie soahng tohto me lih pwopwoud men kak wia pwehn kapwaiada eh pwukoa ong peneinei. Karasepe, Paipel kasalehda me lih pwopwoud kan “en poakohng arail pwoud kan oh neirail seri kan, re en kin kanahieng pein irail pwe re en min, re en wiahla lih wiewia mwahu en nan ihmw  oh peikiong arail pwoud kan.” (Taitus 2:4, 5) Lih pwopwoud oh nohno men me pahn kapwaiada soahng pwukat pahn ale limpoak oh wahu sang rehn eh peneinei. (Wadek Lepin Padahk 31:10, 28.) Ahpw, pwehki pwopwoud ehu wia patpenehn aramas soh unsek riemen, kahpwal kan me inenen laud kak wiawi oh met kak kahrehda tohrohrpeseng oh mweipeseng en pwopwoud. Paipel kin mweidohng tohrohrpeseng en pwopwoud en wiawi pwehki soangen kahrepe keite. Ahpw tohrohrpeseng en dehr wiawi sang ni kahrepe ehu me sohte laud, pwe Paipel kaweidki: “Lih pwopwoud men sohte pahn mweisang eh pwoud; . . . oh ohl pwopwoud sohte pahn mweisang eh pwoud.” (1 Korint 7:10, 11) Oh ihte kahrepe me Paipel mweidohng mweipeseng en pwopwoud en kak wiawi iei ma emen rehra pahn wiahda tiahk samin me pid wia nsenen pwopwoud.​—Madiu 19:9.

14. Ia mwomwen sapwellimen Sises wiewia ong seri kan? Dahme seri kan anahne sang rehn pahpa oh nohno kan?

¹⁴ Sises ketikihda mehn kahlemeng unsek ehu ong pahpa oh nohno kan sang ni mwomwen eh wiewia ong seri kan. Ni ahnsou me aramas teikan song en irehdi seri kan en dehr kohla rehn Sises, e mahsanihong irail: “Kumwail pweisang kisin seri kan pwe re en kohdo rehi. Kumwail dehr ireiraildi.” Paipel mahsanih me ih eri ketin “pwoalehdi seri ko oh ketikidahng lime ko pohn emenemen irail oh kupwuramwahwihirailla.” (Mark 10:13-16) Pwehki Sises kin ketikihong seri kan sapwellime ahnsou, e sou pil konehng ken wia soahngohte ong noumw seri akan? Irail anahne ahnsou laud sang rehmw ah kaidehn ekis en omw ahnsou. Ke anahne wiahda ahnsou ong padahkih irail, pwe iei me Siohwa ketin kaweidki pahpa oh nohno kan en wia.​—Wadek Deuderonomi 6:4-9.

15. Dahme pahpa oh nohno kan kak wia pwehn pere neirail seri kan?

 ¹⁵ Nin doken sampah wet eh wie susuwedla, pahpa oh nohno kan anahne pere neirail seri kan sang aramas akan me kin song en tiahk suwedih seri kan. Tehk ia duwen Sises eh kin ketin pere sapwellime tohnpadahk kan me e kin ketin poakohng oh ekerkin irail “samwa ko.” Ahnsou me sounpei kan koledi ih oh pahn kemehla ih, Sises ketin mweidohng tohnpadahk ko en kohkohla. (Sohn 13:33; 18:7-9) Nin duwen pahpa de nohno men, ke anahne tehk ia duwen Tepil eh kin song en kauwehla noumw seri kan. Ke anahne padahkihong irail dahme re anahne kanahieng mwohn arail pahn lelohng kahpwal kan. * (1 Piter 5:8) Rahnpwukat e inenen keper ong seri kan laud sang mahs me pid paliwararail, arail nanpwungmwahu rehn Koht, oh arail tiahk kan.

16. Dahme pahpa oh nohno kan kak sukuhlkihsang mwomwen Sises eh ketin kapwungala soh unsek en sapwellime tohnpadahk kan?

¹⁶ Pwongo mwohn Sises pwoula, sapwellime tohnpadahk kan akamaikihda ihs me keieu lapalap nanpwungarail. Sises sohte ketin lingeringerda pahrail, ahpw e kin ketin pousehlahte sewese irail ni limpoak sang sapwellime mahsen oh mehn kahlemeng. (Luk 22:24-27; Sohn 13:3-8) Ma kowe pahpa de nohno men, ke kakehr kilang ia duwen omw pahn kak alasang sapwellimen Sises mehn kahlemeng ong ni ahl en kapwungala noumw seri kan? Mehlel, re anahne kaiahn, ahpw met anahne wiawi “ni pwung” ah ieremen ni lingeringer. Ke dehr doadoahngki soangen lokaia kan me “rasehng kedlahs.” (Seremaia 30:11; Lepin Padahk 12:18) Kaiahn en kin kohda ni ahl ehu me noumw serio pahn kak mwuhr wehwehkihda me kaweid me ke kihong ih me konehng.​—Episos 6:4; Ipru 12:9-11.

17. Ni ahl dah kan me Sises ketikihdahr mehn kahlemeng unsek ong seri kan?

¹⁷ Ia duwe, seri kan kak sukuhl sang rehn Sises? Ei, irail kak! Sang mehn kahlemeng mwahu me e ketikihda, Sises ketin kasaledahr ia duwen seri kan ar pahn peikiong arail pahpa oh nohno kan. E mahsanih: “I kin koasoia mehkan me Sahmo ketin padahkihongieier.” E pil mahsanih me e kin “poaden wiewia mehkan me e kin ketin kupwurperenki.” (Sohn 8:28, 29) Sises kin ketin peikiong Seme nanleng, oh Paipel mahsanih ong seri kan en peikiong arail pahpa oh nohno kan. (Wadek Episos 6:1-3.) Mendahki Sises wia seri unsek men, ahpw e kin ketin peikiong eh pahpa oh nohno, Sosep oh Mery, me soh unsek. Met kin sewesehda nsenamwahu en emenemen tohn eh peneinei!​—Luk 2:4, 5, 51, 52.

18. Dahme kahrehda Sises kin ketin peikiong Seme nanleng ahnsou koaros? Ihs me kin peren ni ahnsou me seri kan kin peikiong arail pahpa oh nohno kan rahnwet?

¹⁸ Ia duwe, seri kan kak kilang ia mwomwen arail kak alasang Sises oh kaperenda arail pahpa oh nohno kan? Mehlel, irail me pwulopwul kan kak ekei pak diarada me e apwal ren peikiong arail pahpa oh nohno kan, ahpw iei met me Koht ketin kupwurki seri kan en wia. (Lepin Padahk 1:8; 6:20) Sises kin ketin peikiong Seme nanleng ahnsou koaros, pil ni ahnsou apwal akan. Ehu ahnsou, me Koht ketin kupwurki Sises en wia mehkot me inenen apwal, Sises patohwan: “Komw ketikihweisang ie delen lokolok wet.” Ahpw Sises ketin wia dahme Koht ketin kupwurki pwehki e patohwan ese me Semeo mwahngih dahme keieu mwahu ong ih nan irair wet. (Luk 22:42) Seri kan pahn kin kaperenda arail pahpa oh nohno kan oh Samarail nanleng sang ni arail pahn kin sukusukuhlki en peik. *​—Lepin Padahk 23:22-25.

19. (a) Ia duwen Sehdan eh kin kasonge seri kan? (b) Dahme wiewia suwed en seri kan kak wiahiong pahpa oh nohno?

 ¹⁹ Tepil kihong Sises kasongosong oh kitail en ese me Tepil pil pahn kasonge me pwulopwul kan en wia me sapwung. (Madiu 4:1-10) Sehdan me Tepil kin kasonge seri kan pwe ren men alasang seri teikan, oh met kak wia kahpwal laud ehu. Ia uwen kesempwal ong seri kan en dehr werekiong irail me kin wia tiahk suwed akan! (1 Korint 15:33) Nein Seikop serepein me ede Daina kin werekiong irail oko me sohte kin kaudokiong Siohwa, oh met imwikihla kahpwal tohto. (Senesis 34:1, 2) Medewehla ia duwen peneinei ehu ar pahn nsensuwedla ma emen tohnpeneinei iang wia tiahk samin!​—Lepin Padahk 17:21, 25.

20. Pwehn ahneki peneinei nsenamwahu, dahme emenemen tohnpeneinei anahne wia?

²⁰ E mengei en kapwungala kahpwal kan nan peneinei ma kitail pahn doadoahngki kaweid en Paipel. Doadoahngki soangen kaweid wet me keieu kesempwal pwe peneinei en ahneki nsenamwahu. Kahrehda ohl pwopwoud kan, poakohng amwail pwoud oh apwalih duwehte Sises eh kin ketin apwalih mwomwohdiso. Lih pwopwoud kan, uhpahiong amwail pwoud ni arail kin kapwaiada pwukoa en tapwi, oh alasang mehn kahlemeng en  lih koahiek me koasoiepe ntingdi nan Lepin Padahk 31:10-31. Pahpa oh nohno kan, kaiahnehda mwahu noumwail seri kan. (Lepin Padahk 22:6) Pahpa kan, ‘apwalih mwahu omw peneinei.’ (1 Timoty 3:4, 5; 5:8) Oh seri kan, peikiong amwail pahpa oh nohno kan. (Kolose 3:20) Sohte mehmen me unsek nan peneinei, koaruhsie kin kak sapwungala. Kahrehda kin lamalam karakarahk oh kin pekmahkpene nanpwungamwail.

21. Soangen koapworopwor kaselel dah me mi mwohtail? Ia duwen atail kak ahneki peneinei nsenamwahu ahnsou wet?

²¹ Mehlel, Paipel kin audaudki kaweid kesempwal tohto duwen mour en peneinei. Patehng met, e kin padahkihong kitail duwen sapwellimen Koht koasoandi kapw oh paradais nin sampah me pahn direkihla aramas peren akan me kin kaudokiong Siohwa. (Kaudiahl 21:3, 4) Ia uwen kaperen oh kaselel dahme mi mwohtail! Pil nan ahnsou wet, kitail kak ahneki mour en peneinei me nsenamwahu ni atail kin doadoahngki sapwellimen Koht kaweid akan me dierek nan sapwellime Mahsen me iei Paipel.