1, 2. Dahme kahrehda Paipel kin kapahrekiong kisiniei ong atail koahiek en koasoi?

 NAN pahr 1871, kisiniei ehu tepida nanwel en Wisconsin, nan Amerika. E mwadangete kohpeseng oh kauwehla douluhl mpen tuhke rielik. Aramas tohtohsang 1,200 me mehla. Ni mehlel, sohte kisiniei ehu nan Amerika me kemehla uwen tohtohn aramas duwehte met. Ele kisiniei laud wet tepisang kisin dimwamwahien kisiniei kis sang kisa kan me tang daulih nanwelo. Met katamaniong kitail iren Paipel wet me mahsanih: “Kumwail pil medewe duwen lauden wahl me kisin dimwamwahien kisiniei kis kak karongehla!” (Seims 3:5) Dahme kahrehda sounnting en Paipel Seims ndahki met?

² E kawehwehda: “Lowatail kin rasehng kisiniei.” (Seims 3:6) “Lowatail” wehwehki atail koahiek en koasoi. Duwehte kisiniei, dahme kitail nda kak kahrehda kahpwal laud. Atail lokaia kan kak kamwakid laud meteikan. Paipel pil padahkihong kitail me dahme kitail nda kak kahrehda mour de mehla. (Lep. Pad. 18:21) Ahpw ia duwe, met wehwehki me kitail en dehr nda mehkot pwe kitail de ndahla mehkot sapwung? Soh. Kitail sohte pahn uhdihsang  doadoahngki kisiniei ihte pwehki kitail kakete mwasikala. Ahpw, kitail kin kanahieng mwomwen atail doadoahngki. Karasepe, kitail kak doadoahngki kisiniei pwehn kukiada kanatail mwenge, en kakarakarih kitail, oh pwehn kamarainih kitail. Ni ahlohte, ma kitail kin kanahieng mwomwen atail koasoi, kitail kak doadoahngki koahiek wet pwehn kawauwih Siohwa oh wahdo kamwahu ong meteikan.​—Mel. 19:14.

3. Soahng siluh dah kan me pahn sewese kitail en kangoange meteikan ni atail koasoi?

³ Siohwa ketikihong kitail koahiek en padahkihong meteikan dahme kitail kin medewe oh pehm sang ni atail kin koasoi de doadoahngki pehtail (sign language). Eri ia duwen atail kak doadoahngki kisakis kaselel wet pwehn kangoange meteikan? (Wadek Seims 3:9, 10.) Kitail anahne ese ahnsoun koasoi, dahme kitail pahn nda, oh ia mwomwen atail pahn ndahla.

4. Iahd me kitail en nennenla?

⁴ Ekei pak e kin mwahu kitail en dehr lokaia. Paipel mahsanih me mie “ahnsoun nennenla.” (Ekl. 3:7) Karasepe, kitail kin nennenla ni ahnsou me meteikan kin lokolokaia pwehn kasalehda atail waunekin irail. (Sohp 6:24) Kitail pil sohte kin koasoia duwen soahng kan me rir oh me meteikan sohte anahne ese. (Lep. Pad. 20:19) Oh ni emen eh kalingeringerihkitailda, e pahn wia elen loalokong ma kitail song en meleilei oh sohte nda mehkot.​—Mel. 4:4.

5. Ia duwen atail kak kasalehiong Siohwa atail kalahnganki eh ketikihong kitail koahiek en lokaia?

⁵ Ahpw pil mie ahnsou kan me mwahu en nda mehkot. (Ekl. 3:7) Mie ahnsoun kapinga Siohwa, kangoange meteikan, kasalehda ia atail pepehm, oh padahkihong meteikan dahme kitail anahne. (Mel. 51:15) Oh ma kitail doadoahngki atail koahiek en koasoi ni ahl wet, kitail kasalehiong Siohwa me kitail kin kalahnganki kisakis wet me e ketikihong kitail. Ni kompoakepatail men eh kihong kitail kisakis kaselel ehu, kitail men doadoahngki kisakiso ni ahl ehu me keieu mwahu.

6. Dahme kahrehda e kesempwal en pilada ahnsou me konehng en koasoi?

⁶ Dahme kahrehda e kesempwal en pilada ahnsou me konehng en koasoi? Lepin Padahk 25:11 (NW) mahsanih: “Lokaia ehu ni ahnsou me konehng duwehte apel me wiawihkihda kohl oh kapwatkihda silper.” Apel kan me wiawihkihda kohl kin kaselel, ahpw re uhdahn pahn kaselel sang met ni ar kin kapwatkihda silper. Ni ahlohte, ele mie mehkot mwahu me kitail pahn ndahng emen. Ahpw ma kitail pilada ahnsou me konehng en koasoi, kitail kak uhdahn sewese aramaso. Ia duwen atail kak wia met?

7, 8. Ia duwen riatail ko nan Sapan ar alasang sapwellimen Sises mehn kahlemeng?

⁷ Ma kitail koasoi ni ahnsou me sohte konehng, ele aramas sohte pahn wehwehki de pwungki dahme kitail nda. (Wadek Lepin Padahk 15:23.) Karasepe, nan March pahr 2011, rerrer en sahpw oh ilok laud kauwehla kahnimw tohto nan palimese en Sapan. Aramas tohtohsang 15,000 mehla. Mendahki tohtohn arail peneinei oh kompoakparail kan mehla, Sounkadehdehn Siohwa kan men doadoahngki Paipel pwehn sewese meteikan me mi nan soangen irairohte. Ahpw re ese me tohtohn irail pwukat kin iang pelien lamalam en Buddha oh sehse Paipel. Ihme kahrehda, ni ahnsowo re sohte padahkihong aramas ako duwen kaiasada, ahpw re kamweitirailla oh kawehwehda dahme kahrehda soahng suwed pwukat kin wiawihong aramas mwahu.

⁸ Riatail ko alasang sapwellimen Sises mehn kahlemeng. Sises mwahngih ahnsoun  nennenla, ahpw e kin pil mwahngih ahnsoun lokaia. (Sohn 18:33-37; 19:8-11) Oh e kin ketin awih ahnsou me konehng en padahkihong sapwellime tohnpadahk ko soahng kei. (Sohn 16:12) Riatail ko nan Sapan awih lao ahnsou me konehng en padahkihong aramas ako duwen kaiasada. Sounpar riau elep mwurin iloak laudo, re kihong aramas akan kisin doaropwe me adaneki Me Melahr akan Kak Pwurehng Mourda? Me tohto ale kisin doaropwe wet oh re alehdi kamweit sang dahme re wadek. Kitail pil anahne medewe tiahk oh pelien lamalam en aramas akan nan atail wasahn kalohk pwe kitail en kak esehda ahnsou dah me konehng en koasoiong irail.

9. Ni soangen irair dah teikan kitail en awih ahnsou me konehng en lokaia?

⁹ Ni soangen irair dah teikan kitail en awih ahnsou me konehng en lokaia? Ele emen nda mehkot me kalingeringerkitailda. Kitail en dehr mwadangete sapeng oh nda mehkot me pweipwei. Ahpw e pahn wia elen loalokong en uhdi oh medewe: ‘Ia duwe, e uhdahn wia met pwehki e sohte kadek? I uhdahn anahne koasoiong ih duwen dahme e ndao?’ Ele e pahn keieu mwahu ma kitail sohte nda mehkot. Ahpw ma mie kahrepe mwahu en koasoiong ih, kitail anahne awih lao kitail meleileidi. (Wadek Lepin Padahk 15:28.) Mwein kitail men kangoange atail peneinei me kaidehn Sounkadehde kei ren esehla Siohwa. Kitail en kanengamah, medewe mwahu duwen dahme kitail pahn nda, oh esehda ahnsou me re pahn perenki rong.

10. (a) Dahme kahrehda kitail en kanahieng dahme kitail nda? (b) Soangen mwomwen koasoi dah kan me kitail anahne soikala?

¹⁰ Dahme kitail nda kak kansenamwahwihala de kansensuwedihala meteikan. (Wadek Lepin Padahk 12:18.) Aramas tohto nan en Sehdan sampah kin doadoahngki lokaia lemei me rasehng “arep” de “kedlahs” pwehki re men kamedekihala oh kalingeringerih meteikan. (Mel. 64:3) Me tohto sukuhlki koasoi pwukat sang nan kasdo kan me re kin kilang. Ahpw Kristian kan sohte kin nda mehkot me lemei de sohte kadek, mehnda ma re kamwante. Kamwanpene kin mwahu oh kak kahrehiong atail koasoio en kaperen. Ahpw kitail en dehpa doadoahngki kepit kamedek kan, duwehte nda mehkot me pahn kanamenekihala de pil kauwe emen pwe meteikan en kouruhrki. Paipel kehkehlikihong Kristian kan en dehr “lahlahwe.” E mahsanih: “Dehr wia koasoi me pahn kamadakahla emen. Kumwail doadoahngkihte mahsen mwahu, soangen mahsen me kin sewese oh kakairada dahme anahnepe mie, oh kin kamwahwihala me kin rong kumwail kan.”​—Ep. 4:29, 31.

11. Dahme pahn kak sewese kitail en pilada lokaia me konehng?

¹¹ Sises ketin padahngki me “ewen aramas kin kapwadewei audepen nan kapehde.” (Mad. 12:34) Met wehwehki me soahng kan me kitail kin nda kak kasalehda uhdahn atail pepehm. Eri ma kitail poakohng aramas oh uhdahn nsenohkin irail, kitail pahn uhdahn pilada en doadoahngki lokaia kan me konehng. Soahng kan me kitail kin koasoia pahn mwahu oh kangoange irail.

12. Dahme pil kak sewese kitail en pilada lokaia me konehng?

¹² Kitail en nantihong pwe kitail en ese mehnia lokaia me konehng kitail en nda. Mendahki Nanmwarki Solomon eh loalokong, e kin “sukuhlki lepin mahsen audapan akan oh song rapahki uwen ar mehlel.” Met pwehki dahme e ntingihdi pahn pwung oh kaperen en wadek. (Ekl. 12:9, 10) Dahme kak sewese kitail en ese dahme kitail en nda? Kitail kak kilang nan Paipel oh neitail sawaspen Paipel kan pwehn diarada  wiepe kapw me kak sewese kitail en kasalehda atail pepehm. Kitail kak sukuhlki wehwehn lepin lokaia kan me kitail sohte wehwehki. Kitail pil kak onopki sapwellimen Sises mehn kahlemeng pwehn sukuhlki ia mwomwen atail pahn lokaia ni ahl ehu me pahn kak sewese meteikan. Sises uhdahn ese dahme e pahn koasoia pwehki Siohwa ketin padahkihong ih ‘dahme e pahn patohwan, pwe en kak kakehlahda me pwangadahr akan.’ (Ais. 50:4) E pil kesempwal en medewe ia duwen atail lokaia eh pahn kamwakid meteikan. (Seims 1:19) Kitail kak pein idek rehtail: ‘Ma I nda met, aramaso pahn wehwehki dahme I songosong en ndahng? Ia pahn eh pepehm?’

13. Dahme kahrehda kitail en lokaia ni ahl ehu me mengei en wehwehki?

¹³ Mehn Israel ko kin peuk sowi pwehn kasalehda dahme pahn wiawi. Ehu mwomwen ngilen sowi ko kin wehwehki me aramas ko anahne tuhpene. Pil ehu ngihl ko kin wehwehki me sounpei kan en kohla mahwen. Nna medewehla dahme pahn wiawihong sounpei ko ma ngilen sowio sohte sansal! Paipel kin karasahiong ngilen sowi me sansal lepin lokaia kan me mengei en wehwehki. Ma kitail sohte kawehwehda mehkan ni sansal, aramas ele pahn pwonopwonkihda de kamehlele mehkot me sohte mehlel. Mehnda ma kitail men kasalehda atail pepehm kan ni sansal, kitail en kanahieng pwe atail lokaia en dehr lemei de sohte kasalehda wahun.​—Wadek 1 Korint 14:8, 9.

14. Karasaras dahieu kasalehda me Sises kin ketin padahk ni ahl me mengei en wehwehki?

¹⁴ Madiu irelaud 5 lel 7 kasalehda ehu karasepe me uhdahn mwahu duwen Sises eh kin ketin pilada lokaia me mengei en wehwehki. Nan sapwellime padahk, e sohte ketin song en kahrehiong aramas ako en wadekala uwen eh mai en padahk sang ni eh ketin doadoahngki lokaia apwal de sohte katepe. Oh e sohte ketin doadoahngki mahsen kan me pahn kamedekihala meteikan. Sises ketin padahngki soahng kan me inenen kesempwal oh loal, ahpw sapwellime mahsen kin mengei en wehwehki. Karasepe, Sises kupwurki kamehlelehiong sapwellime tohnpadahk ko me re sohte anahne pwunodki dahme re pahn kang ehuehu rahn. E kawehwehda me Siohwa kin ketin ahnsou koaros kamwenge menpihr akan. Ih eri ketin kalelapek rehrail: “Kumwail soh kesempwalsang menpihr kan?” (Mad. 6:26) Sises ketin doadoahngki lepin mahsen mengei pwukat pwehn sewese irail en wehwehki mehn kasukuhl kesempwal ehu oh pwehn kangoange irail.

15. Dahme kahrehda kitail anahne lokaia ni kadek?

¹⁵ Mwomwen atail koasoiong meteikan kak kesempwal duwehte dahme kitail kin nda. Aramas kin perenki rong Sises pwehki e kin ketin padahk ni ahl kadek. (Luk 4:22) Ni atail kin lokaia kadek, aramas uhdahn pahn perenki rong kitail oh pwungki dahme kitail nda. (Lep. Pad. 25:15) Kitail pahn kak koasoiong meteikan ni ahl kadek ma kitail kin wauneki irail oh nsenohki arail pepehm. Ihme Sises kin ketin wia. Karasepe, ni eh mahsanihada pokon ehu me kin songosong en rong ih, e kin kupwurperenki ketiket rehrail oh padahk ong irail. (Mark 6:34) Pil ni ahnsou kan me aramas lahlahwe ih, Sises sohte kin ketin dupuk.​—1 Pit. 2:23.

16, 17. (a) Ni atail koasoiong atail peneinei oh kompoakepatail kan, ia duwen atail kak alasang Sises? (Menlau kilang tepin kilel.) (b) Ia duwen nohno men eh wia kamwahu sang ni eh lokaia kadek?

¹⁶ Mendahki kitail poakohng atail peneinei oh kompoakepatail kan, kitail kakete nda soahng kan me sohte kadek ong irail pwehki kitail uhdahn ese irail. Kitail kakete medewe  me kitail sohte anahne kanahieng mwomwen atail pahn koasoiong irail. Ahpw Sises kin ahnsou koaros ketin kasalehda kadek ni eh mahsen ong kompoakepah kan. Ni ekei irail akamaiki ihs me keieu lapalap, e ketin kapwungala irail ni kadek oh doadoahngki karasaras en kisin seri men pwehn sewese irail wekidala arail madamadau. (Mark 9:33-37) Elder kan kak alasang sapwellimen Sises mehn kahlemeng sang ni arail kaweid meteikan ni ahl kadek.​—Kal. 6:1.

¹⁷ Pil ni ahnsou kan me emen ndaiong kitail mehkot me kalineringerikitailda, e pahn wia kamwahu ehu ma kitail lokaia kadek. (Lep. Pad. 15:1) Karasepe, mie nohno kiripw men me naineki pwutak pwulopwul men me kin wiewia me suwed erein eh mwomwehda papah Siohwa. Emen sister nan mwomwohdisou poakehla nohnou oh ndaiong: “Poakehla pwe omw kaiahnehda noumw serien sohte pweida.” Nohnou eri medewehla oh nda: “Mehlel me soahng kan sohte nohn mwahu ahnsouwet, ahpw eh kaiahn kin wiawihte. Kita nek koasoi mwurin Armakedon oh esehda.” Pwehki nohnou meleilei oh kadek ong sistero, ira pousehlahte kompoakepahnki emenemen. Oh pwutako rong dahme eh nohnou nda oh esehda me eh nohnou kamehlelehte me e kak wekila. Pwutako eri uhdihsang eh iang eh werek suwed ko, papidaisla, oh mwuhr iang papah nan Pedel. Mehnda ma kitail koasoakoasoiong riatail Kristian kan, atail peneinei, de aramas me kitail sohte ese, atail lokaia anahne ahnsou koaros “en katapan oh kansenamwahu.”​—Kol. 4:6.

18. Ia duwen atail kak alasang sapwellimen Sises mehn kahlemeng ni mwomwen atail lokaia?

¹⁸ Atail koahiek en padahkihong meteikan dahme kitail medewe oh pehm uhdahn wia kisakis kaselel ehu sang Siohwa. Ma kitail kin idawehn sapwellimen Sises mehn kahlemeng, kitail pahn pilada ahnsou me konehng kitail en lokaia, kanahieng dahme kitail kin nda, oh ahnsou koaros song en kadek. Eri kitail en doadoahngki lepin lokaia kan pwehn kangoange meteikan oh kaperenda Siohwa.