1. Dahme wiawi nan pahr 66? (Menlau kilang tepin kilel.)

 MEDEWEHLA ma kowe emen Kristian me koukousoan nan Serusalem nan pahr 66. Soahng tohto wiewiawi. Emen kaun en mehn Rom ko me ede Florus pirapahda talent 17 sang wasahn nekid mwohni nan tehnpas sarawio. Mehn Suhs ako mwadangete lingeringerkihda. Irail kemehla sounpei en Rom tohto oh nda me re uhtohrda sang mehn Rom ko. Ahpw mehn Rom ko mwadangete pelianda. Mwotomwot sang sounpwong siluh mwurin met, Cestius Gallus kahre sounpei 30,000 oh kapilpene Serusalem. Mehn Suhs ako me uhwongada mehn Rom ko rukala nan tehnpas sarawio, ahpw sounpei ko kedekedeo lella ni mas liki en tehnpaso oh song en pedolong. Koaros me mi nan kahnimwo masepwehkada. Ia pahn omw pepehm ni omw kilang mepwukat koaros?

2. Dahme Kristian kan anahne wia ni arail kilang sounpei en Rom ko kapilpene arail kahnimwo, oh ia duwen met eh kak wiawi?

² Sounpar kei mwowe, Sises ketin padahkihong sapwellime tohnpadahk ko duwen mwekid wet oh kaweidki: “Ni amwail pahn kilang karis en sounpei kei me kapilpenehr Serusalem, kumwail pahn esehki me ahnsoun eh ohla kerendohr. Eri, ni ahnsowo irail  kan me mihmi nan Sudia, re en sopolahng pohn dohl kan; oh me mihmi nan kahnimwo, re en sopohsang loale; oh me mihmi nansapw, re dehpa pwurolong nan kahnimwo.” (Luk 21:20, 21) Ia duwen arail pahn kak peikiong sapwellimen Sises kaweid ko oh kohkohsang Serusalem ni sounpei ko ar kapilpenehier kahnimwo? Mehkot kapwuriamwei wiawi. Ni soh kasikpe, sounpei en Rom ko kohkohlahsang Serusalem! Nin duwen me Sises mahsanih, uhwongo “kamalaulaulahr.” (Mad. 24:22) Ni sounpei ko ar kohkohlahr, e wia ahnsou mwahu ong Kristian lelepek ko ren peikiong Sises oh mwadang tangalahng pohn nahna ko. * Mwuhr, nan pahr 70, ehu karis en sounpei kapw en mehn Rom pwurala Serusalem. Met re kasohrehla kahnimwo. Ahpw koaros me peikiong sapwellimen Sises kaweid ko mourla.

3. Irair dahieu me Kristian kan pahn kereniong lelohng me duwehte dahme wiawi ni mwehin tepin Kristian ko? Dahme kitail pahn koasoiapene nan iren onop wet?

³ Sapwellimen Sises kaweid ko pil kadoadoahk nan atail ahnsou. Ahnsou keren kitail pahn lelohng soangen irairohte. Sises ketin doadoahngki dahme wiawi ni mwehin tepin Kristian ko pwehn kawehwehda dahme pahn wiawi ni ahnsou me kahn kamakam kowahlapo mwadangete tepida. (Mad. 24:3, 21, 29) Duwehte eh mie Kristian lelepek kei me pitsang kasohrlahn Serusalem, e pahn pil mie pokon kalaimwun ehu me pahn pitsang kasohrlahn sampah suwed wet me kohkohdo. (Wadek Kaudiahl 7:9, 13, 14.) E uhdahn kesempwal en wehwehkihla dahme Paipel padahkihong kitail duwen mwekid pwukat me pahn wiawi ni ahnsou kohkohdo. Dahme kahrehda? Pwehki met kin pidada atail mour. Eri kitail pahn koasoiapene ia duwen mepwukat ar pahn kamwakid kitail.

4. Ia duwen kahn kamakam kowahlapo eh pahn tepida?

⁴ Ia duwen kahn kamakam kowahlap eh pahn tepida? E pahn tepikihda kasohrlahn kaudok likamw koaros. Paipel kahdaneki kaudok likamw “Papilon Lapalap, inen lihen netiki paliwere koaros.” (Kaud. 17:5-7) Dahme kahrehda e adaneki lihen netiki paliwere? Pwehki eh kaun akan sohte kin lelepek ong Koht. Re sohte kin utung Sises oh sapwellime Wehio ni lelepek ahpw re kin utung koperment kan en aramas oh soikala dahme Paipel padahngki pwe ren kak kalaudehla arail manaman. Arail kaudok sohte mwakelekel duwehte ahn me keidi kan arail kin kaudok. (2 Kor. 11:2; Seims 1:27; Kaud. 14:4) Ahpw ihs me pahn kasohrehla Papilon Lapalap? Siohwa pahn ketikihong “kode eisek” en ‘mahn weitahta kamasepwehko’ “dahme e ketin kupwukupwurehiong” liho. ‘Mahn weitahta kamasepwehko’ kin wehwehki palien United Nations oh “kode eisek” ko kin wehwehki koperment kan koaros me kin utungada.​—Wadek Kaudiahl 17:3, 16-18.

5, 6. Dahme kahrehda kitail nda me kasohrlahn Papilon Lapalap sohte wehwehki kamakamlahn towe kan koaros?

⁵ Ia duwe, tohn kaudok likamw koaros pahn kamakamla ahnsou me Papilon Lapalap pahn sohrala? Soh. Siohwa ketin doadoahngki soukohp Sekaraia pwehn ntingihdi dahme pahn wiawi. Ni ahnsowo, emen me mahs iang kisehn kaudok likamw pahn nda: “‘Kaidehn ngehi soukohp men. Ngehi soumwet men—I kin wie sapwasapw sang ni ei tikitik.’ Eri, ma emen pahn idek reh, ‘Dahme kauwehla nan mwaremwaromwen?’ e pahn sapengki, ‘Kompoakepahi men me wiahiong ie ni imweo.’” (Sek. 13:4-6) Eri, kaunen pelien lamalam kan pil pahn mwomwehda me re sohte kin poadidiong arail pelien lamalam oh re pahn  kahmahmkihla me re wia kisehn pelien lamalam likamw ko.

⁶ Dahme pahn wiawiong sapwellimen Koht aramas akan ni ahnsowo? Sises ketin mahsanih: “Koht eri ketin kamalaulaulahr rahn ako; eri, ma e sohte ketin wia met, sohte aramas emen pahn pitla. A pwehki sapwellime me pilipil kan me e pahn ketin kamalaulaukilahr rahn ako.” (Mad. 24:22) Ni mwehin tepin Kristian ko, apwal me lelohng Serusalem kamalaulaula. Met kahrehda “me pilipil kan,” me iei Kristian keidi ko, ren kak tangasang wasao. Ni ahlohte, mwekid me wiawi erein tepin kahn kamakam kowahlapo pahn kamalaulaula pwehki irail “me pilipil kan.” Koht sohte pahn ketin mweidohng palien koperment kan, me iei “kode eisek” ko, en kasohrehla sapwellime aramas akan. Ahpw, e pahn mie meleilei erein ahnsou mwotomwot kis mwurinte kasohrlahn Papilon Lapalap.

7, 8. Ahnsou mwahu dah me mie mwurin kasohrlahn kaudok likamw? Ia duwen sapwellimen Koht aramas akan ar pahn weksang meteikan koaros ni ahnsowo?

⁷ Dahme pahn wiawi mwurin kasohrlahn pelien lamalam likamw kan? E pahn wia ahnsou mwahu en kasalehda dahme uhdahn mi nan mohngiongitail. Ni ahnsowo, pali laud en aramas akan pahn song en ale pereparail oh sawasparail sang pwihnen aramas akan, me iei “paip akan pohn nahna kan.” (Kaud. 6:15-17) Ahpw sapwellimen Siohwa aramas akan pahn rapahki pereparail sang reh. Ni ahnsoun apwalo ni mwehin tepin Kristian ko eh kamalaulaula, e sohte wia ahnsou ehu me mehn Suhs ko koaros en mwadangete wiahla Kristian kei. Ahpw e wia ahnsou ehu ong irail ko me wialahr Kristian ren tangasang Serusalem nin duwen me Sises ketin kaweidki. Pil duwehte met, ni ahnsou kohkohdo ni uhwong me pahn wiawihong Papilon Lapalap eh pahn kamalaulaula, kitail sohte kak kasik me aramas tohto pahn mwadangete wiahla Kristian mehlel kei. Ahpw e pahn wia ahnsou ehu ong tohnkaudok mehlel koaros en kadehdehda arail limpoak ong Siohwa oh utungada me keidi kan.​—Mad. 25:34-40.

⁸ Kitail sohte uhdahn ese dahme pahn wiawi erein ahnsoun kasongosongo. Ahpw, kitail kasik me atail mour sohte pahn mengei oh kitail pahn anahne wiahda tounmetei kan. Ni mwehin tepin Kristian ko, irail anahne pwilikihdi imwarail kan oh dadaur pahn kahpwal kan pwe irail en kak pitla. (Mark 13:15-18) Kitail en pein idek rehtail: ‘I onopadahngehr tounmeteikihla ei kepwe kan? I pahn men wia soahng koaros me anahn pwehn kolokolte ei lelepek ong Siohwa?’ Song medewehla! Ni ahnsowo, kitail kelehpw me pahn kaudokiong atail Koht sohte lipilipil dahme wiawi, duwehte me wiawiong soukohp Daniel.​—Dan. 6:10, 11.

9, 10. (a) Rohng dahieu me sapwellimen Koht aramas akan pahn kalohki erein kahn kamakam kowahlapo? (b) Dahme imwintihti en sapwellimen Koht aramas akan pahn wia?

⁹ Kahn kamakam kowahlapo sohte pahn wia ahnsoun kalohki “Rongamwahu en Wehin Koht.” Ahnsoun kalohki rongamwahwo pahn nekier. “Imwin sampah” pahn lelehr! (Mad. 24:14) Sapwellimen Koht aramas akan pahn uhd kalohki ni eimah rohng en kadeik kehlail ehu me pahn kamwakidada aramas koaros. Ele rohng wet pahn nda me ahn Sehdan sampah suwed kereniongehr sohrala douluhl. Paipel kin kapahrekiong rohng wet takai aihs ni eh mahsanih: “Takai aihs laud tohto, me toutouki paun epwiki mweredihsang nanleng mwerediong pohn aramas akan. Aramas akan ahpw lahlahwekihla Koht kalokolok en takai aihs pwukat me mweremweredihsang nanleng, pwe iei lapalahn kalokolok ehu met.”​—Kaud. 16:21.

 ¹⁰ Atail imwintihti kan pahn rong rohng kehlail wet. Siohwa ketin doadoahngki soukohp Esekiel pwehn kawehwehda dahme pwihn en wehi kan me Paipel kahdaneki Kok en Makok pahn wia: “Ih met me KAUN-O, Wasa Lapalahpie, mahsanihong Kok: ‘Ni ahnsowo eh pahn leledo, ke pahn tapihada wie lamalamki koasoandi suwed. Ke pahn koasoanehdi ke en mahweniong sahpw ehu me sohte sawasepe, me towe kan meleilei oh onepek mwahu, me kisin kahnimw kan sohte kehl oh poadoarepe. Ke pahn kulih oh adihasang en aramas akan ar dipwisou kan, aramas akan me kin koukousoan nan kahnimw kan me mahs wia mohn kahnimw kei. Re kohpene sang nan wehi kan, oh met re naineki pelinmen oh sapwasapw oh mihmi nanwerengen sahpw koaros en sampah.’” (Esek. 38:10-12) Sapwellimen Koht aramas akan pahn inenen weksang aramas teikan koaros, mwomwen me re “mihmi nanwerengen sahpw koaros en sampah.” Wehi kan solahr pahn kak kanengamahiong pein irail. Re pahn men mahweniong sapwellimen Siohwa me keidi kan oh irail ko me kin utung irail.

11. (a) Dahme kitail anahne tamataman duwen irekidi en mwekid kan me pahn wiawi erein kahn kamakam kowahlapo? (b) Dahme aramas akan pahn wia ni arail kilangada kilel kan?

¹¹ Dahme pahn wiawi mwurin met? Paipel sohte padahkihong kitail irekidi en mwekid kan ni pisetik, ahpw ekei mwekid ele pahn wiawi ahnsou tehieu. Nan sapwellimen Sises kokohpo me pid imwilahn koasoandi wet, e mahsanih: “Kilel kei pahn pwarada ni ketipin, ni maram, oh pil ni usu kan. Nin sampah, wasa koaros nan wehi kan, aramas akan pahn salohkihda ngiringirisek laud en nan madau oh kumwukumwusek laud en pwuki kan. Re pahn lipwongmaskihla ar masak ni ar pahn awiawih mehkan me pahn wiawihong sampah pokon; pwe poahsoan en pahnlahng kan pahn pingida oh rerrer. Ih ahnsowo me Nein-Aramas pahn pwarada ketiket kohdo nan depwek ehu ni roson oh lingaling lapalahpie.” (Luk 21:25-27; wadek Mark 13:24-26.) Ia duwe, pweidahn kokohp wet pahn iangete kilel oh mwekid kamasepwehk kan pahnlahng? Kitail anahne awih pwehn diarada. Ahpw, kitail ese me ni sapwellimen Koht imwintihti kan ar kilangada kilel ko, re pahn masepwehkada oh salohda.

12, 13. (a) Dahme pahn wiawi ni Sises eh pahn ketiket kohdo “ni roson oh lingaling lapalahpie”? (b) Dahme sapwellimen Koht ladu kan pahn wia ahnsowo?

¹² Dahme pahn wiawi ni Sises eh pahn ketiket kohdo “ni roson oh lingaling lapalahpie”? E pahn ketin katingih irail kan me lelepek oh kaloke irail me sohte lelepek. (Mad. 24:46, 47, 50, 51; 25:19, 28-30) Sises ketin doadoahngki karasaras ehu pwehn kawehwehda met ni oaritik. E mahsanih: “Nein-Aramas lao pahn ketido duwen nanmwarki men, iangahki sapwellime tohnleng kan koaruhsie, e pahn ket nan sapwellime mwoalen kadeik lingan; oh tohn sampah koaruhsie pahn pokonpene mwowe. E ahpw pahn ketin irepeseng irail ni pwihn riau, duwehte silepen sihpw men me kin katohrepeseng nah sihpw kan sang kuht kan: e pahn kihla aramas pwung kan ni palimauni, a meteikan ni palimeingi.” (Mad. 25:31-33) Dahme pahn wiawiong sihpw oh kuht ko? Irail pahn ale kadeik. Kuht kan, de me sohte lelepek kan, “pahn kolahng lopla soutuk.” Ahpw sihpw kan, de me lelepek kan, pahn ale mour soutuk.​—Mad. 25:46, NW.

¹³ Dahme kuht kan pahn wia ni arail esehda me re pahn sohrala? Re “pahn sengiseng.” (Mad. 24:30) Ahpw dahme me keidi kan oh me kin utung irail pahn wia? Re pahn wia dahme Sises mahsanih: “Ni mepwukat eh pahn tepida wiawi, kumwail uhda oh sarada, pwe komourpamwail kerendohr.”​—Luk 21:28.

14, 15. Doadoahk en kapokonepene dahieu me pahn wiawi mwurin tepidahn uhwong sang Kok en Makok, oh ia duwen met eh pahn wiawi?

¹⁴ Dahme pahn wiawi mwurin Kok en Makok tepida mahweniong sapwellimen Koht aramas akan? Paipel mahsanih me Nein-Aramas “pahn poaronepeseng sapwellime tohnleng kan ong ni keimw pahieu en sampah pwe re en kapokonepene sapwellimen Koht pilipil kan sang ni imwin sampah koaros.” (Mark 13:27; Mad. 24:31) Doadoahk en kapokonepene wet sohte kin dokedoke ahnsou me Kristian keidi kan tepin pilipilda. Oh e pil sohte dokedoke kaimwiseklahn kileldi en me keidi kan me mihmihte sampah. (Mad. 13:37, 38) Kaimwiseklahn kileldi wet pahn wiawi mwohnte tepidahn kahn kamakam kowahlapo. (Kaud. 7:1-4) Eri, doadoahk en kapokonepene dahieu me? Ih ahnsou me me keidi kan me mihmihte sampah pahn ale ketingparail oh kohdahla nanleng. (1 Des. 4:15-17; Kaud. 14:1) Mwekid wet pahn wiawi ahnsou ehu mwurin Kok en Makok eh tepida eh uhwongo. (Esek. 38:11) Mwuhr, nin duwen me Sises mahsanih, “me lelepek kan pahn lingalingla nan Wehin Samarailo duwehte ketipin.”—Mad. 13:43. *

¹⁵ Aramas tohto nan pwihn en Kristian likamw kan kin kamehlele me ni ahnsou me Sises pahn ketido pwehn kaunda sampah, re pahn kak kilang ih oh irail koaros eri pahn kohdahla nanleng ni paliwar uduk. Ahpw Paipel kasalehda ni sansal me aramas sohte kak kilangki meserail pwarodohn Sises. E mahsanih: “Kilel en Nein-Aramas pahn pwarada pahnlahng” oh e pil mahsanih me Sises pahn ketido “pohn depwek en pahnlahng kan.” (Mad. 24:30) Paipel pil mahsanih me “soangen paliwar me wiawihdasangete uduk oh nta sohte kak iang sohsohki  Wehin Koht.” Eri, irail kan me pahn kohdahla nanleng anahne mahs “kiewekla ni ahnsoutehkis, ni marepteieu, ni ahnsou me kaimwiseklahn sowi pahn pepeuk.” * (Wadek 1 Korint 15:50-53.) Eri, luhwen me keidi kan pahn ni ahnsoutehkis kapokonpene.

16, 17. Dahme anahne wiawi mwohn kapwopwoud en Sihmpwulo?

¹⁶ Ni meh 144,000 keidi ko koaros lao mihmi nanleng, kaunop ong kapwopwoud en Sihmpwulo kakehr tepida. (Kaud. 19:9) Ahpw pil mie mehkot me anahne wiawi mwohn kapwopwoud wet. Taman me Kok en Makok pahn uhwongada sapwellimen Koht aramas akan ni me keidi ko ar mihmihte sampah. (Esek. 38:16) Dahme sapwellimen Koht aramas akan pahn wia? Irail pahn peikiong kaweid pwukat: “Kumwail sohte pahn pei nan mahwen wet. Kumwail pahn koasoaneikumwaildi oh awih; kumwail ahpw pahn patohwan duwen KAUN-O eh pahn ketikihong kumwail en powehdi. . . . kumwail dehr peikasal de masepwehk.” (2 Kron. 20:17) Ahnsou ehu mwurin uhwong en Kok eh tepida, luhwen me keidi kan koaros nin sampah pahn kohdahla nanleng. Mwuhr, Kaudiahl 17:14 padahkihong kitail ia duwen nanleng eh pahn mwekidki uhwongo sang Kok. Imwintihti en sapwellimen Koht aramas akan “pahn mahweniong Sihmpwulo; ahpw re pahn lohdi pahn Sihmpwulo oh sapwellime aramas pilipil kan, me e ketin malipe, oh me loalopwoat. Pwehki Sihmpwulo eh Kaunen kaun akan oh Nanmwarkien nanmwarki kan.” Eri, Sises iangahki nanmwarki 144,000 keidi ko nanleng pahn doarehla sapwellimen Koht aramas akan nin sampah.

¹⁷ Mwekid wet pahn kahrehda mahwen en Armakedon en tepida oh e pahn kalinganahla mwaren Siohwa me sarawi. (Kaud. 16:16) Koaros me pakadeikda nin duwen kuht kei, de me sohte lelepek kan, pahn sohrala. Me suwed solahr pahn mie nin sampah oh pokon kalaimwuno pahn pitsang Armakedon. Mwuhr, ahnsou kaperen me kileldi ni kaimwiseklahn pwuhken Kaudiahl pahn kakehr wiawi, me iei kapwopwoud en Sihmpwulo! (Kaud. 21:1-4) * Koaros me pitla nin sampah pahn kenikenla rehn Koht oh paiekihda sapwellime limpoak oh sapan lapalap. Kitail uhdahn kasikasik ahnsowo. Ia uwen kaperen en kamadipw en kapwopwoudo!​—Wadek 2 Piter 3:13.

18. Ni mwekid kan me kokohpdahr ar pahn kereniong wiawi, dahme kitail anahne koasoanehdi teng en wia?

¹⁸ Ni mwekid pwukat ar pahn kereniong wiawi ni ahnsou kohkohdo, dahme emenemen kitail anahne wiewia ahnsou wet? Siohwa ketin kamwakid wahnpoaron Piter en ntingihedi: “Ma mepwukat pahn ohla nin duwe met, a ia duwen kumwail, soangen mour dah me konehng kumwail en weweidki? Amwail mour uhdahn pahn konehng en kin mwakelekel oh kasarawihong Koht, nindoken amwail kasikasik sapwellimen Koht Rahno, oh wia uwen me kumwail kak pwe en kamwadangahdo. . . . Eri, kompoakepahi ko, nindokon amwail kasikasik Rahno, kumwail wia uwen me kumwail kak pwe kumwail en kin mwakelekel oh pwung mwohn silangin Koht ni kapehd popohl.” (2 Pit. 3:11, 12, 14) Eri, kitail en koasoanehdi teng en kolokol atail kaudok en mwakelekel me sohte pidada kaudok likamw, oh utungada Nanmwarki en Popohl, Sises Krais.