Duwehte Alex, me tohto rahnwet sohte kin perenki doadoahk laud. Emen soun wia sidohsa ede Aaron nda: “Aramas tohto kin leme me re sohte konehng wia doadoahk kan me sohte wad de sohte pweimwahu. Arail madamadau iei: ‘I kin wiahte met lao I pahn alehdi doadoahk ehu me mwahusang.’”

Dahme kahrehda me tohto leme me re sohte konehng wia doadoahk laud? Ele re kihsang madamadau wet sang palien rohng de TV me dene mour “keieu mwahu” iei en kepwehpwe oh nsenamwahu. Emen sounapwalih oh kamwahwihala kepwe kan nan wasahn doadoahk kan me adaneki Matthew nda: “Aramas kin medewe me ma ke kin doadoahk laud pwe ken mour, met wehwehki ke sohte nohn pweida mwahu.” Sounkamwakel men me adaneki Shane pil tehkada soahngohte. E nda: “Aramas akan solahr kin men wia arail doadoahk me pahrekiong uwen pweinerail ong rahn ehu.”

Ni pali teio, aramas tohto me kin pweida mwahu kin uhdahn perenki wia doadoahk laud. Daniel, me sounpar 25, me kin iang kauwada ihmw kan, koasoia: “I leme ke kak uhdahn paiekihda doadoahk laud, ahpw mehlel ma e kin uhlahng mehn akadei mwahu kan.” Andre, me sounpar 23, pil pwungki. E nda: “I kamehlele me nsenamwahu, peren oh doadoahk kin dokpene. Ma ke sohte nohn doadoahk laud de wiewia soahng kan, met sohte pahn kahrehiong uhk ken nsenamwahu ahnsou werei, ahpw e kin ihte kahrehda ken sangat.”

Ia duwen irail kan me duwehte Daniel oh Andre ar kin kakairada madamadau pwung ong doadoahk laud? Ni mwotomwot, re kin doadoahngki kaweid kan en Paipel nan arail mour. Paipel sohte kin kasohwe doadoahk laud, ahpw e kin kangoange aramas en kin pwerisek oh nantihweite mehnda ma apwal. Paipel pil wia laudsang en ihte padahkihong kitail en doadoahk. E pil kin kasalehiong kitail ia duwen atail en perenki atail doadoahk.

Mehnia kaweid en Paipel me kak sewese iuk ken perenki omw doadoahk? Se luke iuk ken tehk ekei kaweid pwukat me pahn pwarada nan oaralap en mwuhr.