Paipel kasalehda ni sansal me Sises ketin kaiasada aramas. Iasada pwukat kaidehn soai kei. Wasa kan oh ahnsou kan me mepwukat wiawi uhdahn kileldi. Karasepe, erein ahnsoun karakar en pahr 31, pokon laud ehu iang Sises mweselsang Kapernaum kohlahng Nain. Ni arail lel mwo, irail pil tuhwongada ehu pokon tohrohr. Ke kak kamehlele duwen kaiasada me wiawi mwuhr pwehki e kileldi nan Mahsen en Koht, Paipel, oh pil pwehki e wiawi mwohn sounkadehde ko koaros.​—Wadek Luk 7:11-15.

Sises pil ketin kaiasada kompoakepah Lasarus, me mehkilahr rahn pahieu. Ke kak kamehlele duwen dahme Sises wia rahno pwehki aramas tohto pil kadehde duwen met.​—Wadek Sohn 11:39-45.

Sises ketin kaiasada aramas akan pwehki e ketin poakeirailla. E pil ketin wia met pwehn kasalehda me Semeo, Sounkapikpen mour koaros, ketikihong ih manaman pohn me melahr akan.​—Wadek Sohn 5:21, 28, 29.

Kaiasada kan me Sises ketin wia kin kamehlelehiong kitail duwen sapwellime inou kan ong ahnsou kohkohdo. E pahn ketin kaiasada aramas ngedehrie, iangahki aramas suwed akan me sohte douluhl ese duwen Koht mehlelo. Ahnsou mwahu pahn kohwong irail en esehla oh poakohngala Siohwa Koht.​—Wadek Wiewia 24:15.