1-3. (a) Kahpwal dah me peneinei tohto ahneki me pid mwohni oh ia duwen ekei ar song en kamwahwihala? (Menlau kilang tepin kilel.) (b) Ni ahnsou me pahpa nohno kan kin medewe me ren kohkohsang arail peneinei, dahme re kin pwunodki me pid arail pahn kakairada neirail seri kan?

 RAHN koaros, James ahn Marilyn pwoudo, kin pwangada ni eh pwurasang doadoahk. * E kin alehdi mwohni me kak itarte pwain dahme re anahne ong ehuehu rahn. Marilyn kin men sewese eh pwoud oh pil men nah pwutak, Jimmy, en naineki dipwisou kaselel kan me ienge tohnsukuhl ko kin naineki. E men sewese kisehrail kan oh pil nekidala ekis mwohni ong ahnsou kohkohdo. Kompoakepah tohto kosoulahr sahpw teikan pwe irail en kak wiahda mwohni laudsang arail wasa. Ahpw ni Marilyn eh kin medewe duwen eh pahn kohkohsang eh peneinei, e sehsehla dahme e pahn wia. Dahme kahrehda?

² Marilyn kin nsensuwed ni eh kin medewe dahme pahn kak wiawi ma e kohkohsang eh peneinei me e kesempwalki. Arail ehupene kaudokiong Siohwa wia kisehn arail mouren peneinei. Ia duwen arail kak pousehlahte wia met ma e dohsang eh peneinei? Ni ahnsowohte, e pil medemedewe duwen meteikan me kohkohsang arail peneinei, oh e mwomwen me re kin papahte Siohwa. Ia duwe, e uhdahn kak kakairada nah pwutako oh padahkihong en papah Siohwa sang ni eh doadoahngkihte Internet?​—Ep. 6:4.

³ Marilyn eri rapahki kaweid. Eh pwoudo sohte men en kohkohla,  ahpw e nda me e sohte pahn kauhdi ih ma e men kohkohla. Elder kan oh ekei nan mwomwohdiso me e kin iango padahkihong en dehr kohla doadoahk, ahpw ekei sister ko ndaiong ih: “Ma ke poakohng omw peneinei, ke pahn kohla doadoahk. Ke kak papahte Siohwa.” Mendahki mie soahng kan me e kin pwunodki, Marilyn rahnmwahihala James oh Jimmy oh kohkohla doadoahk nan ehu sahpw. E inoukihong ira, “I sohte pahn kohla werei.”

4. Dahme kahrehda aramas tohto kin kosoula ehu wasa me dohsang arail peneinei? Ihs me kin kalapw kakairada seri kan ma pahpa nohno kosoula ehu wasa?

⁴ Siohwa sohte ketin kupwurki sapwellime ladu kan en duhpek. (Mel. 37:25; Lep. Pad. 30:8) Erein poadopoad, sapwellimen Siohwa aramas akan kin kosoula ehu wasa tohrohr pwe ren dehr mihla nan kahpwal en semwehmwe. Pwe irail en dehr duhpekla, Seikop kadarala nah pwutak ko ren pwainda mwenge nan Isip. * (Sen. 42:1, 2) Ahpw rahn pwukat, aramas tohto me kin kosoula ehu wasa sohte kin duhpekla. Eri, dahme kahrehda re kosoula ehu wasa? Me tohto ahneki pweipwand laud. Ekei kin kousoan nan sahpw me semwehmwe. Pwehki arail kin men ahneki dipwisou kaselel kan oh ahneki mour nsenamwahu, re kin kohkohsang arail peneinei oh kohla wasa ehu me mengei en wiahda mwohni. Pahpa nohno kan me kohkohsang imwarail kin kalapw pwilikihdi neirail seri kan pwe meteikan, duwehte arail pwoud, neirail seri me laud, pahpa nohno kahlap, kisehrail kan de kompoakparail kan, en apwalihirailada. Mendahki e kamedek en kohkohsang arail peneinei, me tohto me kosoula ehu wasa me dohsang sapwarail kin pehm me ihte ahl wet me re kak wia.

5, 6. (a) Dahme Sises ketin padahngki duwen nsenamwahu oh sohte perki mehkot? (b) Soahng dah kan me Sises ketin padahkihong sapwellime tohnpadahk ko ren kapakapki? (c) Ia duwen Siohwa eh kin ketin kapaiada kitail?

⁵ Erein ahnsou me Sises ketiket sampah, aramas tohto kin semwehmwe. Ele re kin pehm me ma neirail mwohni pahn tohtohla, re pahn nsenamwahula oh sohla nohn perki mehkot. (Mark 14:7) Ahpw Sises sohte kupwurki ren koapworopworki soahng kan me miehki ahnsou kis. E kupwurki irail en koapworopworki Siohwa me kin ketikihda kapai kan me poatopoat. Nan sapwellime Kapahrek en Pohn Dohl, Sises ketin padahngki me nsenamwahu mehlel kin kohsang atail nanpwungmwahu rehn Siohwa, a kaidehn sang ni soahng kan me kitail kak ahneki de sang atail nanti laud.

⁶ Nan sapwellime kapakap, Sises sohte ketin padahkihong kitail en kapakapki mour nsenamwahu. Ahpw e ketin padahkihong kitail en kapakapkihong Koht en ‘ketikihdo rahnwet atail tungoal me itarohng kitail.’ Sises ketin padahkihong ni sansal irail kan me rongorong: “Kumwail dehr kin ngoangki kepwehpwehkihla kepwehn sampah.” E ketin doula mahsanih: “A kumwail ngoangki kepwehpwehkihla paien nanleng.” (Mad. 6:9, 11, 19, 20) Kitail kak likih me Siohwa pahn ketin kapaiada kitail nin duwen eh ketin inoukihda. Sapwellimen Koht kapai kin pidada laudsang eh ketin kupwurperenki kitail. Met kin kamehlelehiong kitail me e pahn ketikihong kitail soahng koaros me kitail uhdahn anahne. Ihte ahl en ahneki nsenamwahu mehlel iei en likih Samatail limpoak Siohwa, a kaidehn mwohni.​—Wadek Madiu 6:24, 25, 31-34.

7. (a) Ihs me Siohwa ketikihong pwukoahn kakairada seri kan? (b) Dahme kahrehda ira koaros anahne kakairada neira seri kan?

⁷ Atail wia kupwuren Koht pil pid atail kin kapwaiada atail pwukoahn apwalih atail peneinei ni ahl me Siohwa ketin kupwurki kitail en wia. Karasepe, Kosonned en Moses kin padahkihong pahpa nohno kan ren kaiahnehda neirail  seri kan pwe ren kaudokiong Siohwa. Kristian kan me kin men kaperenda Siohwa pil anahne wia met. (Wadek Deuderonomi 6:6, 7.) Koht ketikihong pahpa nohno kan pwukoa wet, ahpw kaidehn ong pahpa nohno kahlap kan de pil meteikan. Nanmwarki Solomon koasoia: “Samwa, rong mahsen en omw pahpa, oh rong kanahieng padahk en omw nohno.” (Lep. Pad. 1:8) Siohwa kin ketin kupwurki peneinei en mihmihpene pwe ira koaros, pahpa nohno en kak padahkih oh kaweid neira seri kan. (Lep. Pad. 31:10, 27, 28) Ni ahnsou me seri kan kin rong arail pahpa nohno koasoia duwen Siohwa oh pil kilang ara kin papah ih rahn koaros, re pahn kak sukuhlki en wia duwehte.

8, 9. (a) Soangen wekidekla dah kan kin kalapw wiawi ma emen pahpa de nohno sohte kin mi rehn eh peneinei? (b) Ma pahpa nohno oh seri kan sohte kin mihmihpene, ia duwen met eh kak kauwehla arail peneinei?

⁸ Aramas tohto me kin medemedewe ren mweselsang arail peneinei kin ese me arail pilipil ele pahn kahrehda kahpwal kei. Ahpw sohte emen kak uhdahn ese dahme pilipil wet pahn wiahiong eh peneinei. (Lep. Pad. 22:3) Mwurinte Marilyn eh kohkohla, e tepida loaleidki eh peneinei pwehki e dohsang irail. Pil duwehte eh pwoud oh nah pwutak. Kisin Jimmy kin idihdek reh, “Dahme ke kohkohkihsang ie?” Marilyn koasoanehdi me e pahn kohkihla doadoahk sounpwong keite, ahpw pwehki sounpar kei douwehr powe, e perki kilang eh peneinei en wekidekla. Jimmy solahr duwehte pwutak me e kin eseo. Ekisekis nah pwutako solahr kin koasoiong oh pil solahr men ehukihong eh pepehm kan. Marilyn nda, “E solahr poakohng ie.”

⁹ Ma pahpa nohno oh seri kan sohte kin mihmihpene nin duwen peneinei ehu, arail pepehm oh pil arail koasoandi ong dahme pwung oh sapwung kak ohla. * Ma seri kan tikitik oh wereisang arail pahpa nohno, met kak kahrehda kahpwal laud ong irail. Marilyn kin kawehwehiong Jimmy me e wiahda tounmetei ehu pwe en sewese ih, ahpw ong Jimmy, e mwomwen me eh nohno solahr poakohng ih. Nin tapio, e kin lingeringerki eh nohno sohte mie. Ahpw mwuhr, ni eh kin mwemweitla reh, e kin lingeringerki eh mi mwo. Duwehte seri tohto me sohte kin mi rehn arail pahpa nohno, Jimmy kamehlele me eh nohno solahr ahneki pwuhng en kasik limpoak oh peik sang reh.​—Wadek Lepin Padahk 29:15.

10. (a) Ma pahpa nohno kin kihong neirail seri kan kisakis pwehki ara sohte kin mi rehrail, dahme kak wiawihong seri ko? (b) Dahme peneinei sohte kak wia ahnsou me pahpa de nohno dohsang irail?

¹⁰ Pwehki Marilyn kin dohsang Jimmy, e kin nantihong kamwahwihala irairo sang ni eh kin kadaralahng ih mwohni oh kisakis kan. Ahpw e diarada me e kin kadohwaneweisang ih nah pwutako. E kin padapadahkihong serio en poakohng mwohni laudsang eh peneinei de pil Siohwa. (Lep. Pad. 22:6) E kansensuwed me  Jimmy ndaiong en dehr pwurala ahpw en kin doulahte kadakadar kisakis kan. Marilyn eri diarada me e sohte kak kakairada nah pwutako ni eh kin doadoahngkihte kisinlikou kan, delepwohn de koasoipene nan Internet. E nda, “Nan Internet, ke sohte kak pwoalehdi de metik ih mwohn eh pahn meir.”

11. (a) Dahme pahn wiawihong pwopwoud ehu ma ira tohrohrpeseng pwehki doadoahk? (b) Iahd me Marilyn esehda me e anahne mi rehn eh peneinei?

¹¹ Ahn Marilyn nanpwungmwahu rehn Siohwa pil luwetala. E kin doadoahngki eh ahnsou ong mwomwohdiso pak ehu nan wihk ehu de malaulausang. Eh nanpwungmwahu rehn eh pwoud pil luwetala. E kin anahne pelianda ahn eh kaunen doadoahk eh kin men wendi reh. Oh pwehki James oh Marilyn sohte kak koasoiapene ara kahpwal kan, ira kin koasoiaiong meteikan ara pepehm oh kereniong wiahda dipen kamwahl. Marilyn esehda me mendahki ara sohte wiahda dipen kamwahl, ara mouren pwopwoud milahr nan keper. Paipel kin kaweid irail me pwopwoud kan ren apwalihala ahn arail pwoud anahn kan me pid pepehm oh wia nsenen pwopwoud. Pwehki Marilyn oh James ara kin dohpeseng, ira sohte kak ehukihpene ara ahnsou oh ara limpoak duwehte me pwopwoud ehu anahne ahnekipene. (Mel. Mel. 1:2; 1 Kor. 7:3, 5) Oh ira sohte kak ehupene kaudokiong Siohwa iangahki neira pwutako. Marilyn nda, “Ni ahnsou me I sukuhlkihdi nan mihting tohrohr ehu duwen kaukaule wia kaudok en peneinei eh kin kesempwal ong kiht pwe sen pitsang rahn lapalap en Siohwa, I wehwehkihda me I anahne pwurala rehn ei peneinei.” E anahne pwurehng kakehlakahda eh nanpwungmwahu rehn eh peneinei oh rehn Siohwa.

12. Mehnia kaweid en Paipel me kak sewese irail kan me sohte kin mi rehn arail peneinei?

¹² Ni ahnsou me Marilyn lemehda en pwurala rehn eh peneinei, ekei aramas kihong ih kaweid mwahu ahpw ekei kihong ih kaweid suwed. Elder kan nan eh mwomwohdiso kapinga ih. Meteikan kin song en kahrehiong ih en mihmi oh re ndaiong me e sohte kak wiahda mwohni me itar ma e pwurala sapweo. Re kin nda: “Ke pahn kohweite oh mwadang pwurodo.” Kristian kan en dehr wia koasoi en kamworus, ahpw re anahne “kaiahnehda peinakapw akan pwe re en poakohng arail pwoud kan oh neirail seri kan,” oh re en “wiahla lih wiewia mwahu en nan ihmw,” de apwalih mwahu pein arail peneinei. Ni ahl wet, Kristian kan sohte pahn kauwehla mwaren Koht.​—Wadek Taitus 2:3-5.

13, 14. Dahme kahrehda kitail anahne pwoson pwe kitail en kak pelianda soahng kan me peneinei men kitail en wia? Menlau kihda ehu karasaras.

¹³ Tohto me kohkohsang arail peneinei pwehki doadoahk kin tikida wasa kan me kin kawauwih tiahk oh peneinei laudsang soahng teikan, ahpw keieu ong arail pahpa nohno kan. Kristian men anahne ahneki pwoson kehlail pwe en kak  pelianda dahme eh peneineio men en wia ma soahng pwukat sohte kaperenda Siohwa.

¹⁴ Nna medewehla dahme Carin koasoia: “Ni ahnsou me nei pwutako Don ipwidi, ngehi oh ei pwoud kin doadoahk ehu sahpw tohrohr oh I ahpwtehn tepida onopki Paipel.” Tohn eh peneinei pwon kasik Carin en kadarala Don rehn eh pahpa oh nohno lao ih oh eh pwoud kak koadoahkihada uwen mwohni me itar. Ahnsou me Carin nda me e pahn pein kakairada Don, eh peneinei iangahki eh pwoud ndahki ih me e pohnkahke oh re kin kouruhrki ih. Carin nda: “Ahnsowo, I sohte kak uhdahn wehwehki ia sapwung en ei pahn pwilikihdi Don rehn ei pahpa nohno erein sounpar kei. Ahpw I ese me Siohwa ketikihong kiht, ahn serio pahpa nohno, pwukoahn kakairada nait pwutako.” Ni ahnsou me e pwurehng liseianda, eh pwoud me sohte iang padahk mehlel ndaiong en kauwehla eh liseiano. Pilipil mwahu me Carin wiahda mwoweo kaunopada ih mwahu, kahrehda e kak wiahda pil ehu pilipil me kaperenda Siohwa. Rahnwet, ih, eh pwoud oh neira seri kan kin peren pwehki irail koaros kin mihmihpene. Ma Carin kadarala emen de nah seri ko koaros rehn meteikan pwe irail en apwalihirailada, e sohte pahn kak imwila duwehte met.

15, 16. (a) Ia duwen Vicky eh kekeirda ni eh seri? (b) Dahme kahrehda e pilada en dehr kakairada nah serepeino ni ahlohte?

¹⁵ Sounkadehde men me ede Vicky nda: “Ei nohno kahlap me kin apwalih ie erein sounpar kei, a riei serepein tikitiko kin mihmi rehn ei pahpa nohno. Ni ahnsou me I pwurala rehn ei pahpa nohno, ei pepehm ong ira wekideklahr. Riei serepeino kin saledek kasalehiong ira eh pepehm, pwoalehdi ira oh ahneki nanpwungmwahu rehra. A ngehi, I sohte kin karanih ira oh pil lella ni ei laudla, I kin apwalki kasalehiong ira uhdahn ei pepehm. Ngehi oh rieio kin kamehlelehiong at pahpa nohno me se pahn apwalih ira ni ahnsou me ira mahla. Riei serepeino pahn apwalih ira pwehki e poakohng ira, a ngehi, I pahn wiahte pwehki ei pwukoa.

¹⁶ “Met ei nohno mwahuki I en kadarala nei serepeino pwe en apwalih duwehte eh kadariehla rehn eh nohno.” Vicky soikala pekipek wet. Ih oh eh pwoud men kakairada pein neira seri pwe en poakohng Siohwa. Vicky nda: “I men ei nanpwungmwahu rehn nei serepeino en dehr ohla ahnsou kohkohdo.” E esehda me ihte elen pweida iei en poakohng Siohwa oh sapwellime kaweid kan laudsang soahng kan oh pil peneinei. Sises mahsanih ni sansal: “Sohte aramas emen kak liduwih soumas riemen,” Koht oh Kepwehn sampah.​—Mad. 6:24; Eks. 23:2.

17, 18. (a) Pilipil dahieu me Kristian kan kin ahneki ahnsou koaros? (b) Peidek dah kan me kitail pahn tehkpene nan iren onop en mwuhr?

¹⁷ Samatail Siohwa ketin inoukihda me e pahn ketikihong kitail soahng koaros me kitail uhdahn anahne ma kitail mwohneki Wehio oh sapwellime irair pwung nan atail mour. (Mad. 6:33) Pwehki inou wet, Kristian mehlel kan ahneki pilipil ahnsou koaros.  Mehnda ma kitail pil lelohng kahpwal me keieu laud, ahnsou koaros kin mie ahl en kaperenda Siohwa oh idawehn kaweid kan en Paipel. Siohwa ketin inoukihda me e pahn ketin kakehlaka kitail en pitsang atail kahpwal. (Wadek 1 Korint 10:13.) Atail kapakap kan oh peik kin kasalehiong Siohwa me kitail kin likih. (Mel. 37:5, 7) Siohwa pahn ketin mahsanih atail kin nannanti oh pahn ketikihong kitail soahng koaros me kitail anahne. E pahn ketin kahrehiong atail mour en “pweida.”​—Pil kilang Senesis 39:3.

¹⁸ Ahpw dahme kitail kak wia pwe en kamwahwihala kahpwal kan me kohsang tohrohrpeseng en peneinei? Ia duwen atail kak apwalihala anahn kan en atail peneinei ni atail sohte pahn kousoan wasa me dohsang irail? Oh ia duwen atail kak sewese meteikan ni limpoak pwe ren mihmi rehn arail peneinei? Kitail pahn tehkpene duwen peidek pwukat nan iren onop en mwuhr.