Aramas kin soansuwedki koasoia duwen mehla. Me tohto sohte men koasoia. Ahpw ehu rahn, kitail pahn mehla de lelohng kansensuwed me mehla kin kahrehda. Mehla kin uhdahn kamedek.

Sohte mehkot kak kaunopada kitail ong mehlahn pahpa de nohno, atail pwoud, de seri men. Kahpwal ehu kak lelohng kitail ni atail sohte kasik, de kahpwalo kak wiawi erein ahnsou reirei. Sohte lipilipil mehnia, kitail sohte kak pitsang medek en mehla oh kitail sohte kak kauhdi, kahrehda e uhdahn kansensuwed.

Antonio me eh pahpao lelohng nan aksident, koasoia: “Pepehm wet kin duwehte emen eh loakehdi imwomwo pwon oh wahsang kih ko. Ke sohte kak pwurala ni imwomwo, mehnda ma kisin ahnsoukiste. Ihte me luhwe iei dahme ke kak tamanki aramaso. Ahpw met uhdahn wiawi. Mendahki ke song en medewe me kahpwalo sohte wiawi pwehki e sohte pwung, sohte mehkot ke kak wiahiong.”

Dorothy me sounpar 47 ni ahnsou me eh pwoudo mehla, pil lelohng soangen kahpwal wet oh kin nantihong diarada pasapeng kan. Nin duwen sounpadahk en sandesukuhl men, e sohte wehwehki dahme kin wiawihong emen ni eh mehla. E idek rehn eh kaun en pelien lamalamo, “Dahme kin wiahiong emen ni eh mehla?” Ohlo sapeng, “Sohte emen me uhdahn ese, kitail pahn ihte awih oh kilang.”

Mehlel me kitail sohte kak wia mehkot, ihte “awih oh kilang”? Ia duwe, mie ahl ehu me kitail kak ese ma mehla iei kaimwisekpen mehkoaros?