Koht iei ngehn soh sansal emen. E ketin kapikada lahng, sampah, oh soangen mour koaros. Sohte me kapikada Koht. Met wehwehki me sohte tapwi. (Melkahka 90:2) Koht ketin kupwurki aramas kan en rapahki ih oh esehla me mehlelo duwen ih.​—Wadek Wiewia 17:24-27.

Kitail kak esehla mwaren Koht. Kitail kak esehla ekei sapwellime irair kaselel kan sang ni atail doudouloale soahng kan me e ketin kapikada. (Rom 1:20) Ahpw pwe kitail en uhdahn esehla Koht, kitail anahne onop sapwellime Mahsen, Paipel. Paipel kin padahkihong kitail duwen Koht eh ketin limpoak.​—Wadek Melkahka 103:7-10.

Sounkapikpatail, Siohwa, ketin kalahdeki wiewia sapahrek. (Deuderonomi 25:16) E pil ketin kapikada aramas akan rasehng ih. Ihme kahrehda pali laud en kitail kin tateki wiewia sapahrek. Kaidehn Koht me ketin kahrehda wiewia sapahrek me kitail kin kilang. Koht ketikihong aramas saledek en pilipil. E kansensuwed me aramas tohto sohte kin doadoahngki saledek wet ni ahl pwung oh arail wiewia kin sapahrek. Kupwuren Siohwa eri toutoukihla.​—Wadek Senesis 6:5, 6; Deuderonomi 32:4, 5.

Siohwa ketin poakohng wiewia pahrek oh e sohte pahn ketin kanengamahiong wiewia sapahrek kohkohlahte. (Melkahka 37:28, 29) Paipel inoukihda me ahnsou keren Koht pahn ketikihsang wiewia sapahrek koaros.​—Wadek 2 Piter 3:7-9, 13.