OARALAP | IA AUDEPEN PAIPEL?
“Se Diaradahr Mesaiao!”
Mpen sounpar 700 mwurin e ntingdi, kokohp nan pwuhken Maika duwen Mesaiao pweida. Sises ketin ipwidi nan Pedleem. Kereniong sounpar 30 mwuri, nan pahr 29, pali keieu en kokohp en Daniel duwen ketidohn Mesaiao pweida. Sises ketin papidaisla oh Koht ketin keiekihdi sapwellime manaman. Mesaiao de Kadaudoko me aramas akan kin kasikasik, pwarado ni ahnsou me pahrekiong dahme kokohpdahro!
Sises ketin mwadangete tapiada sapwellime doadoahk en “kapakapahrengki Rongamwahu duwen Wehin Koht.” (Luk 8:1) Nin duwen dahme kokohpdahr, Sises ketin kasalehda me e ketin kadek oh uhdahn nsenohki duwen meteikan. Sapwellime padahk kin sawas mwahu oh limpoak oh e ketin kamwahwihala “soangen soumwahu oh luwet koaros.” Met kin kadehdehda me Koht ketin ieiang ih. (Mad. 4:23) Aramas koaros, sohte lipilipil arail sounpar, kin pokondohng Sises oh nda: “Se diaradahr Mesaiao!”—Sohn 1:41.
Sises ketin kohpada me mwohnte sapwellime Wehio pahn kaunda mehkoaros, mahwen, rerrer en sahpw oh soangen kahpwal tohto teikan pahn lelohng sampah. E ketin kangoangehki koaros ren “pepehd oh mwasamwasahn!”—Mark 13:37.
Sises ketin unsek oh kin ketin peikiong Koht ahnsou koaros, ahpw sapwellime imwintihti kan kemehla ih. Sapwellime pwoula eri wia meirong unsek me pwainda dahme Adam oh Ihp kesehla, me iei koapworopwor en mour kohkohlahte nan Paradais.
Pweidahn kokohp duwen sapwellimen Sises pwoula oh Koht eh ketin kaiasada Sises rahn siluh mwuri nin duwen ngehn manaman men uhdahn wiawi. Sises eri ketin pwarohng sapwellime tohnpadahk tohtohsang meh 500. Mwohn eh ketidahla nanleng, Sises ketin kehkehlingkihong sapwellime ko ren kalohki rongamwahu duwen ih oh sapwellime Wehio ong “tohn wehi kan koaros.” (Mad. 28:19) Ia uwen laud ar kapwaiada pwaiso?
