Sylvia me kin doadoahk nan wasa me kin sewese me mah kan koasoia: “I iang sukuhl laud rehn me tohto me dene re kin poadidiong sarawi. Ahpw ni ahnsoun test kan, re kin pirapahda arail pasapeng kan oh doadoahngki wini en kasahliel kan. Pelien lamalam sohte kin kamwakid arail mour.”

Ohl emen ede Lionel koasoia: “Iengei tohndoadoahk kan kin likamw oh delepwohndo me dene re soumwahu ni arail sohte uhdahn soumwahu. Ong irail, pelien lamalam kin wiahte mehn kapwat.”

Pelien lamalam sohte kin kamwakid laud mour en pali moron en aramas akan me pid dahme pwung oh sapwung. Rahnwet, me tohto ‘kin liksansalamwahuki mwomwen arail pelien lamalam, ahpw re kin kahmahmki katepe.’ (2 Timoty 3:5) Arail kaun en pelien lamalam kan sohte kin wia mehn kahlemeng mwahu, re pil sohte kin kihong tohn arail sarawio kaweid kan en Paipel me anahn pwe ren mourki. Eri e sohte kapwuriamwei me me tohto kamehlele me Koht sohte kin ketin nsenohki mwomwen arail kin mourki arail mour.

Paipel kasalehda me mie sapwellimen Koht pepehm oh me atail wiewia kan kin uhdahn kesempwal ong ih. Ni mehn Israel en mahs kan ar sapeikiong Koht, re kin “kansensuwedihada!” (Melkahka 78:40) Ahpw, nanleng kin “perenkihda” ni emen eh uhdahn weksang eh wiewia sapwung kan. (Luk 15:7) Ni emen eh kesempwalikihla irair kaselel kan me Samatail nanleng sapwellimanki, eh limpoak ong Koht pahn laudla oh kamwakid ih en poakohng dahme Koht ketin poakohng oh tatki dahme Koht ketin kalahdeki.​—Eimwos 5:15.

Ehu doaropwehn nuhs koasoia me Sounkadehdehn Siohwa kan “kin sewese aramas akan ren kamwahwihala nanpwungmwahu nan peneinei, ren sewese meteikan, oh ren wiahla aramas akan me kin mehlel.” Doaropwehn nuhso doula koasoia: “Irail kin idawehn kaweid kan duwen tiahk mwakelekel. Re kamehlele me simoak, kang sakau daulihala, doadoahngki wini ong mehn kalitopw, pilein mwohni, mouren nenek, tiahk en ohl mwahuki ohl de lih mwahuki lih iei tiahk kei me kak kauwehla arail nanpwungmwahu rehn Koht.”​—Deseret News en Salt Lake City, Utah, U.S.A.

Ia duwen sukuhlki duwen Koht eh kin sewese Sounkadehdehn Siohwa kan? Sylvia, me kitail koasoia mwoweo, nda: “Mwersuwedih meteikan pwehn ale neirail mwohni nan wasa me kin sewese me mah kan kin kalapw wiawi. E pahn mengei en iang wia met. Ahpw ei wehwehki kupwuren Siohwa * duwen met kin sewese ie en wia dahme pwung. I kin nsenamwahu oh ahneki popohl.” Sylvia kamehlele me mour pahrekiong dahme eh pelien lamalamo kamehlele kin kamwahwihala eh mour.