4 Koht Sohte Kin Ketin Toupahrek—Mehlel Ieu Met?

Mwein ihme ke kin rongen: “Koht me ketin kaunda sampah oh soahng koaros kin wiawi pwehki kupwure. Pwehki sampah wet diren kopwung sapahrek, lipilipilki aramas oh lokolok, ihme kahrehda mwein Koht me ketin pwukoahki.”

Dahme Paipel padahngki: Kaidehn Koht me ketin kahrehda kopwung sapahrek nin sampah. Iet me Paipel mahsanihki Siohwa: “KAUN-O iei silepamwail me manaman, sapwellime wiewia kan me unsek oh pwung. Amwail Koht me loalopwoat oh mehlel, e kin ketin wiahda dahme pwung oh pahrek.”—Deuderonomi 32:4.

Koht kin ketin kadek sapan ong koaros iangahki irail kan me sohte warohng. Karasepe, e “kin ketin dakerki sapwellime ketipin pohn me suwed oh me mwahu kan, oh kin ketin kamwerehdi keteu pohn me lelepek kan oh me dipan akan.” (Madiu 5:45) Sapwellime wiewia ong aramas sang wehi de tiahk kan kin pahrek nin duwen Wiewia 10:34, 35 kasalehda: “Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.”

Eri, ia wasa kopwung sapahrek tepisang ie? Aramas tohto kin pilada ren mwekid sapahrek ni ar sohte kin idawehn sapwellimen Koht irair en pwung pahrek. (Deuderonomi 32:5) Paipel pil kasalehda me Koht kin ketin mweidohng sapwellime imwintihti Tepil en doadoahngki eh manaman nin sampah. * (1 Sohn 5:19) Ahpw kaunda sapahrek wet me Koht ketin mweidohng en wiawi pahn imwisekla ni ahnsou keren. E ketin koasoanedier dahme e pahn ketin doadoahngki pwe en “kauwehla doadoahk en Tepilo.”​—1 Sohn 3:8.

Esehla padahk mehlel kin sewese kitail: Mwein ke kin pwuriamweikihla rohng kan eh kin kalapw koasoia duwen mwersuwed, lokolok, de kapwung sapahrek. Omw esehla dahme kin kahrehda kahpwal kan pahn seweseiuk en wehwehki kahrepen koasoandi kan eh nohn suwed, oh dahme kahrehda en aramas nannanti pwe sampah en wiahla wasa mwahu ehu sohte kin kalapw pweida. (Melkahka 146:3) Kitail en dehr kihong atail kehl oh ahnsou laud pwehn wiahda wekidekla kan me pahn ongete ahnsou kis, de pil kakete sohte pweida, ahpw kitail kak ahneki koapworopwor mehlel ong ahnsou kohkohdo pwehki atail kin likih sapwellimen Koht inou kan.—Kaudiahl 21:3, 4.

Atail wehwehki ia wasa kopwung sapahrek tepisang ie kak sewese kitail ni ahnsoun kahpwal laud kan. Ni ahnsou me aramas kin wiahiong kitail me sapwung, kitail kak duwehte sapwellimen Koht ladu Apakuk me koasoia: “Kosonned solahr manaman, oh pwungen kopwung sohte kin pweida.” (Apakuk 1:4) Ni en Apakuk nda met, Koht sohte ketin engiengda. Ahpw Koht ketin kamehlelehiong Apakuk me e ketin koasoanedier ahnsou me e pahn ketin kapwungala mehkan oh sewese Apakuk en kin peren ahnsoun apwal. (Apakuk 2:2-4; 3:17, 18) Pil duwehte met, atail kin likih sapwellimen Koht inou en kapwungala irair en kopwung sapahrek kak sewese kitail en ahneki meleilei oh popohl nan sampah ehu me sohte kin toupahrek.

[Nting tikitik me mi pah]

[Blurb nan pali 7]

Ia duwe, uhdahn Koht me ketin pwukoahki lokolok oh kopwung sapahrek?

[Kilel Credit Line nan pali 7]

© Sven Torfinn/Panos Pictures