“Wahn Sapwellimen Koht Manaman” Kin Kalinganahla Koht

“Iet duwen lingaling en Sahmo eh pahn sansalda, ma kumwail pahn kapwarehda wa tohto.”—SOHN 15:8.

1, 2. (a) Ahnsou mwahu dah kan kitail kak kangoange meteikan? (b) Kisakis dahieu me Siohwa ketikihong kitail pwe kitail en kamwahwihala atail papah ih?

MEDEWEHLA irair riau pwukat: Kristian lih men tehkada sister pwulopwul men me mwomwen pwunodki mehkot. Liho koasoanehdi en iang serepeino kalohk. Ni ara kalokalohk sang ihmw lel ihmw, serepeino tapiada koasoia dahme kapwunode ih. Mwuhr nan rahno, serepeino kapakap oh kalahngankihong Siohwa en liho nsenoh pwe ihme e anahne. A ehu wasa tohrohr, pwopwoud ehu ahpwtehn pwurasang ara doadoahk en kalohk nan ehu sahpw tohrohr. Nan ehu kisin kamadipw, ira koasoakoasoia duwen ara doadoahk nan sahpwo oh brother pwulopwul men wie rongorong. Sounpar kei mwuhr, ni eh kaukaunop ong doadoahk en kalohk nan ehu sahpw tohrohr, e tamanda pwopwoudo oh ara koasoi me kahrehiong ih en men wiahla misineri.

² Mwein irair pwukat kin katamankihong uhk duwen emen me kamwakid omw mour de emen me ke sewese. Pali laud en ahnsou, kitail sohte kak kamwakid en emen eh mour sang atail koasoiongete pak ehu, ahpw ehuehu rahn mie ahnsou mwahu en kangoange oh kakehlaka meteikan. Nna medewehla, e sou pahn mwahu ma mie mehkot me kak kakairada omw koahiek pwe ken kak sewese riomw Kristian kan oh ken kak kamwahwihala omw papah Koht? Ni mehlel, Siohwa ketikihong kitail soangen kisakis wet me iei sapwellime manaman. (Luk 11:13) Ni sapwellimen Koht manaman eh kin doadoahk nan atail mour, e pahn kahrehiong kitail pwe kitail en ahneki irair kaselel kan me kak kamwahwihala wiepe koaros en atail papah Koht. Ia uwen kaselel en kisakis wet!—Wadek Kalesia 5:22, 23. *

3. (a) Ia duwen atail kin kakairada “wahn sapwellimen Koht manaman” eh kin kalinganahla Koht? (b) Peidek dahkei kitail pahn tehkpene?

³ Irair akan me sapwellimen Koht manaman kin kapwarehda kin kasalehda soangen Koht dahmen Siohwa me kin ketikihda manaman wet. (Kol. 3:9, 10) Sises ketin kasalehda kahrepe me keieu kesempwal me Kristian akan anahne nantihong alasang Koht ni eh mahsanihong sapwellime wahnpoaron kan: “Iet duwen lingaling en Sahmo eh pahn sansalda, ma kumwail pahn kapwarehda wa tohto.” * (Sohn 15:8) Ni atail kakairada “wahn sapwellimen Koht manaman,” e pahn sansalda nan atail koasoi kan oh wiewia kan, oh met pahn wahdo kaping ong atail Koht. (Mad. 5:16) Ia duwen wahn sapwellimen Koht manaman eh kin weksang irair kan en ahn Sehdan sampah? Ia duwen atail kak kakairada wahn sapwellimen Koht manaman? Dahme kahrehda e kakete apwal en wia met? Kitail pahn tehkpene duwen peidek pwukat ni atail pahn koasoia duwen limpoak, peren oh popohl, irair siluh kan me wia kisehn wahn sapwellimen Koht manaman.

 Limpoak me Duwehte Sapwellimen Koht Limpoak

4. Soangen limpoak dahieu me Sises ketin padahkihong sapwellime tohnpadahk kan ren kasalehda?

⁴ Limpoak me sapwellimen Koht manaman kin kapwarehda kin weksang soangen limpoak me aramas tohto kin ese. Ia duwen? E kin duwehte sapwellimen Koht limpoak. Sises ketin kasalehda duwen wekpeseng wet nan sapwellime Kapahrek en Pohn Dohl. (Wadek Madiu 5:43-48.) E mahsanih me me dipan akan pil kin men mwahuong meteikan me kin mwahuong irail. Soangen “limpoak” wet sohte kin kasalehda tounmetei, ahpw e kin kasalehdahte kadek ong emen me kin kadek ong ih. Ma kitail men “wiahla sapwellimen Sahm me ketiket nanleng,” kitail anahne wia laudsang met. Kitail en kilangwohng oh wiahiong meteikan nin duwen Siohwa eh kin ketin wia, ahpw kaidehn en wiahiongete irail dahme irail kin wiahiong kitail. Ahpw ia duwen atail kak poakohng atail imwintihti kan nin duwen Sises eh ketin padahngki?

5. Ia duwen atail kak kasalehda limpoak ong irail kan me kin kaloke kitail?

⁵ Medewehla karasepe wet en Paipel. Ni ara kalokalohk nan Pilipai, Pohl oh Sailas poarpoardi, wowoki, oh lekdekiong nan imweteng wasa me nehra ko selidi nin tuhke toutou kei. Silepen imwetengo ele pil kaloke ira. Ia duwe, ni ahnsou me ira saledekla pwehki rerrer en sahpw eh wiawi, ira perenkihda me re kak dupukohng me suwed ohlo? Soh. Ara kin nsenohki ih de ara limpoak en tounmetei kin kamwakid ira en mwadang sewese silepeo pwe ih oh eh peneinei pwon en pwosonla. (Wiewia 16:19-34) Riatail tohto kin pil wia met ong irail kan me kin kaloke irail.—Rom 12:14.

6. Ia duwen atail kak kasalehda limpoak en tounmetei ong riatail kan? (Menlau kilang koakon nan pali 23.)

⁶ Atail limpoak ong riatail kan kin kamwakid kitail en wia laudsang met. ‘Kitail en tounmeteikihla mouritail pwehki riatail kan.’ (Wadek 1 Sohn 3:16-18.) Ahpw kitail kak kasalehda limpoak ni ahl teikan. Karasepe, ma kitail nda de wia mehkot me kin kansensuwedihala riatail men, kitail kak kasalehda limpoak sang ni atail pahn tiengla mwowe oh kamwahwihala nanpwungatail. (Mad. 5:23, 24) Ahpw ia duwen ma emen kansensuwedihala kitail? Kitail kin mwadang mahkohng, de kitail kin ekei pak men kolokol atail nsensuwed? (Mel. 86:5) Limpoak me sapwellimen Koht manaman kin kapwarehda kak sewese kitail pwe kitail en mwadang mahkohng meteikan arail sapwung tikitik kan ‘nin duwen Kaun-o eh ketin mahkohngkitailehr.’—Kol. 3:13, 14; 1 Pit. 4:8.

7, 8. (a) Ia duwen limpoak ong Koht eh kin kamwakid atail limpoak ong aramas? (b) Ia duwen atail kak kalaudehla atail limpoak ong Siohwa?

⁷ Ia duwen atail kak kakairada limpoak en tounmetei ong riatail kan? Iei sang ni atail pahn  kalaudehla atail limpoak ong Koht. (Ep. 5:1, 2; 1 Sohn 4:9-11, 20, 21) Atail ahnsou rehn Siohwa ni atail kin wadek Paipel, doudouloale oh kapakap kin kangoange kitail oh kalaudehla atail limpoak ong Samatail nanleng. Ahpw kitail anahne koasoanehdi ahnsou en karanihala Koht.

⁸ Karasepe: Ma mie atail ahnsoukiste nan ehuehu rahn me kitail kak wadek Mahsen en Koht, doudouloale oh kapakap ong Siohwa, kitail sou pahn men perehla ahnsowo pwe mehkot en dehr kauwehla atail ahnsou rehn Siohwa? Sohte emen kak kauhdi kitail pwe kitail en kapakap ong Koht, oh pali laud en kitail kak wadek Paipel ni ahnsou me kitail mwahuki. Ahpw ele kitail anahne irehdi wiewia kan en ehuehu rahn pwe en dehr kauwehla atail ahnsou rehn Koht. Ia duwe, ke kin koasoanehdi ahnsou ni uwen omw kak nan ehuehu rahn pwe ken kak karanihala Siohwa?

Peren Sang Sapwellimen Koht Manaman

9. Dahme peren me kohsang sapwellimen Koht manaman kin kadehdehda?

⁹ Wahn sapwellimen Koht manaman kin kak mihmi rehtail mendahki kahpwal kan. Kitail pahn koasoiapene duwen irair en peren me kin kadehdehda duwen met. Peren kin rasehng kisin tuhke pwoat me kak momour nan sapwtehn. Nan sampah pwon, sapwellimen Koht ladu tohto kin ‘alehki lokolok laud, ahpw irail perenkihda ale mahseno; eri, peren me kin sang sapwellimen Koht manaman.’ (1 Des. 1:6) Meteikan kin lelohng kahpwal kan. Ahpw Siohwa kin ketin kakehlakahki irail sapwellime manaman ‘pwe irail en kak nannanti nan apwal akan koaros ni kanengamah, oh perenki arail kapinga Koht.’ (Kol. 1:11, 12) Ia wasa me peren wet kin kohsang ie?

10. Ia poahsoanpen atail peren?

¹⁰ Weksang kepwe kan nan en Sehdan sampah me sohte kin tengeteng, pai kan me Siohwa kin ketikihong kitail kin poatopoat. (1 Tim. 6:17; Mad. 6:19, 20) E ketikihong kitail koapworopwor me kaperen oh poatopoat ong ahnsou kohkohdo. Kitail kin ahneki peren en wia kisehn pirien en Kristian nan sampah pwon. Ahpw peren me kitail kin keieu perenki kin poahsoankihda atail nanpwungmwahu rehn Koht. Kitail kin iang ahneki en Depit pepehm, pwe mendahki e kin rukurukseli nan sapwtehn, e koulkihong Siohwa kaping wet: “Sapwellimomwi limpoak poatopoat me mwahusang mour, iei me I pahn patohwan kapingahkin komwi. I pahn patohwan kapingkalahngan ong komwi erein ei mour.” (Mel. 63:3, 4) Ni atail pil kin lelohng kahpwal kan, kitail kin perenki kapinga Koht sang ni mohngiongitail.

11. Dahme kahrehda e kesempwal kitail en perenki papah Siohwa?

¹¹ Wahnpoaron Pohl kin kangoange Kristian akan: “Kumwail en pereperen ahnsou koaros nan amwail miniminiong Kaun-o. I pil pahn pwurehng koasoia: kumwail en pereperen!” (Pil. 4:4) Dahme kahrehda e kesempwal ong Kristian akan ren kin papah Siohwa ni peren? Pwehki Sehdan eh kapwarehda ire me kin pidada sapwellimen Siohwa pwuhng en kaunda. Sehdan kin dene me sohte emen kin perenki papah Koht sang ni mohngiong. (Sohp 1:9-11) Ma kitail kin papah Siohwa pwehki pepehm en pwukoahki a kaidehkin peren, atail meirong en kaping pahn sohte unsek. Eri, kitail en nantihong kapwaiada kaweid en sounmelkahkao: “Kumwail pereperen kaudokiong KAUN-O oh patohdo mwohn silangi ngisingiski amwail koul!” (Mel. 100:2) Atail perenki papah Koht sang ni mohngiong kin kalinganahda Koht.

12, 13. Dahme kitail kak wia pwe kitail en peiong madamadau sapwung kan?

¹² Ahpw pahn mie ahnsou me sapwellimen Siohwa ladu lelepek kan pahn kak mworusala oh anahne nanti laud pwe ren kak kolokol madamadau pwung. (Pil. 2:25-30) Dahme kak sewese kitail nan soangen ahnsou pwukat? Episos 5:18, 19 mahsanih: “Kumwail en kin direkihla [“sapwellimen Koht manaman,” NW]. Kumwail sawaskipene mahsen en koulen kaping kan, melkahka oh koul sarawi kan; kumwail koulki melkahka ong Kaun-o, kapikapinga nan kapehdamwail kan.” Ia duwen atail kak doadoahngki kaweid wet?

¹³ Ni atail kin pahtoukihla madamadau sapwung  kan, kitail kak nantihong kapakapohng Siohwa oh doudouloale soahng kan me kapingpe mie. (Wadek Pilipai 4:6-9.) Ekei diar me ni arail kin ngilngilen koulki koul en kaping ong Siohwa, e kin kansenamwahwih irail oh sewese irail ren kapwungala arail madamadau kan. Emen brother me lelohng kahpwal me kin kahrehiong ih en tihwohla oh mworusala nda: “Patehng ei kin kapakap, I kin wadlikihla ekei koul en kaping ong Siohwa. Ni ei kin koulki kaping kaselel pwukat ong Siohwa ni ngihl laud de ngihl tikitik, met kin kameleileiehdi. Pil pwuhko me adaneki Karanih Siohwa (Draw Close to Jehovah) ahpwtehn kohda ahnsowo. I wadek pwuhko pak riau mwurin eh kohda. Met kin rasehng leh me kin kansenamwahwihiehla. I ese me Siohwa kin ketin kapaiada ei nannanti.”

“Popohl me Kin Kaminiminkumwailpene”

14. Soangen popohl dah me sapwellimen Koht manaman kin kapwarehda?

¹⁴ Nan kapokon kan, irail kan me kohsang soangsoangen wehi kan kin perenki werekpene rehn riarail Kristian akan. Met kin kasalehda popohl me sapwellimen Koht aramas akan kin ahneki me iei atail miniminpene nan sampah pwon. Me kin tetehk kitail kin kalapw pwuriamweikihla ni ar kin kilang aramas akan me re leme me re kin imwintihtipene kin uhd ‘nantihong dadaurete en kapwaiada ehupene en madamadau nan popohl me kin kaminiminirailpene.’ (Ep. 4:3, NW) Miniminpene wet uhdahn kaselel pwe re anahne powehdi soahng tohto.

15, 16. (a) Soangen irair dahieu me Piter tikida loale? Ia duwen met eh kihong ih kahpwal? (b) Ia duwen Siohwa eh ketin sewese Piter en wekidala eh madamadau?

¹⁵ E kin apwal en kaminiminpene aramas akan me kin kohsang soangsoangen wasa kan. Kitail pahn tehk mehn kahlemeng ehu en wahnpoaron Piter pwehn sewese kitail en wehwehki dahme kitail anahne powehdi pwe kitail en ahneki soangen minimin wet. Ahn Piter  madamadau ong mehn liki kan me sohte sirkumsais kin sansalda sang eh lokaia kan: “Pein kumwail ese mwahu me at lamalam sohte kin mweidohng mehn Suhs emen en pas de patehng kumwail mehn liki kan. Ahpw Koht ketin kasalehiong ie me I sohte pahn wiahki aramas emen me samin ong kaudok oh sohte mwakelekel.” (Wiewia 10:24-29; 11:1-3) Pwehki aramas akan ar kin ahneki soangen madamadau wet ahnsowo, e sansal me Piter tikida en kamehlele me kosonnedo padahkihong ih en poakohngete ienge mehn Suhs kan. E mwomwen me e konehng ih en kilang mehn liki kan nin duwen imwintihti kan me e kin kailongki. *

¹⁶ Nna medewehla ahn Piter soansuwed ni eh pedolong nan imwen Kornilius. Ia duwe, emen me mahs ahneki madamadau sapwung duwen mehn liki kan kak miniminiong irail ni popohl? (Ep. 4:3, 16) Ei, pwe rahn kante mwowe, sapwellimen Koht manaman kamwakid Piter pwe en kak tapihada wekidala eh madamadau oh powehdi eh lipilipilki aramas. Siohwa ketikihong ih kaudiahl ehu pwe en wehwehki me sapwellime madamadau ong aramas akan sohte kin poahsoankihda ia wasa re kin kohsang ie. (Wiewia 10:10-15) Eri, Piter kak ndaiong Kornilius: “Met I wehwehkidahr me Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.” (Wiewia 10:34, 35) Piter wekidala eh madamadau, oh e tapiada uhdahn miniminiong rie Kristian kan nan sampah pwon.—1 Pit. 2:17.

17. Ia duwen minimin me sapwellimen Koht aramas akan ahneki eh kin uhdahn kaselel?

¹⁷ Dahme wiawihong Piter kin sewese kitail pwe kitail en wehwehki wekidekla laud me wiawi nanpwungen sapwellimen Koht aramas akan rahnwet. (Wadek Aiseia 2:3, 4.) Aramas rar kei me “kohsang nan wehi koaros, ni kadaudok koaros, nan sahpw koaros, oh lokaia koaros” kin wekidala arail madamadau pwe ren kapwaiada “kupwuren Koht—dahme mwahu, oh dahme e kin ketin kupwurperenki.” (Kaud. 7:9; Rom 12:2) Tohtohn irail pwukat mahs kin mwekidki kailok oh saminimin en ahn Sehdan sampah. Ahpw re sukuhlki en ‘ngoangki mehkan me kin kahrehiong irail popohl,’ sang ni ar onopki Mahsen en Koht oh ale sawas en sapwellime manaman. (Rom 14:19) Met imwikihla miniminpene me kin kapinga Koht.

18, 19. (a) Ia duwen atail kak sawas pwe popohl oh minimin en mwomwohdiso en pweida? (b) Dahme kitail pahn tehkpene nan iren onop en mwuhr?

¹⁸ Ia duwen atail kak sawas pwe popohl oh minimin en mie nanpwungen sapwellimen Koht aramas akan? Nan mwomwohdiso tohto, mie aramas akan me kin kohsang ehu wehi tohrohr. Ele arail tiahk weksang atail, de sohte kin lokaiahki atail lokaia. Kitail kin song en ese irail? Met iei kaweid en Mahsen en Koht. Pohl ntingihedi ong mwomwohdiso en Rom me mie me pwoson akan en mehn Suhs oh mehn liki kan: “Kumwail kasamwo nan mohngiongimwail riamwail . . . kan ong ni lingan en Koht, nin duwen Krais eh ketin kasamwokumwailehr nan kupwure.” (Rom 15:7) Mie emen nan omw mwomwohdiso me ke kak esehla mwahu?

¹⁹ Dahme kitail pil kak wia pwe sapwellimen Koht manaman en kamwakid atail mour? Nan iren onop en mwuhr, kitail pahn tehk peidek wet ni atail pahn koasoiapene duwen pil ekei kisehn wahn sapwellimen Koht manaman.

[Nting tikitik kan me mi pah]

Ia Duwen Omw Pahn Sapeng?

• Ia duwen atail kak kasalehda limpoak en tounmetei ong riatail kan?

• Dahme kahrehda e kesempwal kitail en papah Koht ni peren?

• Ia duwen atail kak sawas pwe popohl oh minimin en mwomwohdiso en pweida?

[Peidek en Onop]

[Koakon nan pali 23]

“Irail Pwukat Kristian Mehlel Kei”

Pwuhk ehu kasalehda dahme mwahnakapw en Suhs men koasoiahda duwen eh tepin tuhwong Sounkadehdehn Siohwa kan mwurin eh lelahng imweteng en Neuengamme:

“Ni ahnsou me kiht mehn Suhs kan sang Dachau leledo ni imwetengo, mehn Suhs teikan tepida ekihla soahng koaros me re ahneki pwe ren dehr ehukihong kiht. . . . Se kin sawaspene mwohn at selidi. Ahpw wasaht, aramas koaros kin nsenohkihte pein irail oh manokehla meteikan pwehki arail mour kin mihlahr nan keper. Ahpw medewehla dahme Tohnsukuhl en Paipel kan kin wiewia. Ahnsowo, re anahne doadoahk laud pwe ren kamwahwihala paip en pihl kan. Ahnsowo uhdahn kopou oh re kin kesikesihnen rahn ehu pwon nan pihl me uhdahn lemwulemwur. Sohte emen wehwehki ia duwen arail kak dadaurete. Re koasoia me Siohwa ketikihong irail kehl. Re uhdahn anahne kenerail pilawa duwehte kiht pwehki ar kin duhpek. Ahpw dahme irail kin wiewia? Re kihpene kenerail pilawa ko koaros, kihsang elep a elep re kihong iengerail me pwoson akan me ahpwtehn leledo sang Dachau. Oh re kasamwo oh metik irail. Mwohn ar kin mwenge, re kin kapakap. Mwurin mwo, irail koaros kin nsenamwahu oh peren. Re koasoia me re solahr men mwenge. Ih ahnsowo me I medewehda: Irail pwukat Kristian mehlel kei.”—Between Resistance and Martyrdom—Jehovah’s Witnesses in the Third Reich.

[Kilel kan nan pali 21]

Ke kin koasoanehdi ahnsou nan ehuehu rahn pwe ken karanih Siohwa?