Mwasamwasahn Duwehte Seremaia
Mwasamwasahn Duwehte Seremaia
“I [Siohwa] kin mwasamwasahn pwe ei mahsen kan en pweida.”—SER. 1:12.
1, 2. Ia duwen Siohwa “kin mwasamwasahn” eh rasehng tuhkehn almond?
POHN dohl akan en Lepanon oh Israel, ehu soangen tuhke me eh rohs kan kin mwadang masal iei tuhkehn almond. Eh rohs kan kin poh mpwulapwul oh pwetepwet, oh ke kak kilang ar masal ni imwin January oh tepin February. Ede ni lokaiahn Ipru kin wehwehki “emen me kin pepehd.”
2 Ni ahnsou me Siohwa ketin idihada Seremaia nin duwen sapwellime soukohp, e ketin doadoahngki tuhke almond pwe en karasahda ire kesempwal ehu. Ni Seremaia eh tepida eh doadoahko, Siohwa ketin kasalehiong soukohpo kaudiahl ehu duwen ehu rahntuhkeo. Ia wehwehn met? Siohwa ketin kawehwehda: “I kin mwasamwasahn pwe ei mahsen kan en pweida.” (Ser. 1:11, 12) Rasehng tuhkehn almond pwoat eh kin ‘pirida’ mwadang, Siohwa kin ketin mwadang kadarala sapwellime soukohp kan pwe en kaweid sapwellime aramas akan duwen imwilahn arail kin sapeik. (Ser. 7:25) Oh e sohte pahn ketin kommoal, e pahn ketin “mwasamwasahn” lao sapwellime kokohp kan pahn pweida. Nan pahr 607 mwohn Krais, ni ahnsowo me Siohwa ketin koasoanehdi, sapwellime kadeik lel Wehin Suda me kin soaloalopwoat.
3. Dahme kitail kak kamehlele me pid duwen Siohwa?
3 Duwehte rahnwet, Siohwa kin ketin mwasamwasahn pwe en ketin kapwaiada kupwure. Ia duwe, Siohwa pahn ketin pohnsehsehla kapwaiada sapwellime mahsen? E uhdahn sohte kak. Ia duwen Siohwa eh kin ketin mwasamwasahn eh kin kamwakid uhk? Ke kamehlele me nan pahr wet, pahr 2011, Siohwa kin ketin “mwasamwasahn” pwe en ketin kapwaiada sapwellime inou kan? Ma kitail kin peikasalki sapwellime inou kan, met iei ahnsou en pirida sang atail meir ni karasaras. (Rom 13:11) Nin duwen sapwellimen Siohwa soukohp, Seremaia kin wie pepehd. Atail en kasawih ia duwen oh ia kahrepen Seremaia eh kin mwasamwasahn pwe en kapwaiada doadoahk me Koht ketikihong ih pahn sewese kitail en kilang ia duwen atail kak loalenohng doadoahk me Siohwa ketikihong kitail.
Rohng Karuwaru Ehu
4. Ia kahpwal kan me Seremaia ahneki ni eh kin kalohki rohngo? Dahme kahrehda rohngo karuwaru?
4 Ele Seremaia kereniong lel sounpar 25 ni ahnsou me e alehdi sang Siohwa pwukoahn sounsilasil. (Ser. 1:1, 2) Ahpw e pehm me e pwulopwulte oh sohte warohng en koasoiong me mah kan nan wehio. Ohl pwukat mahlahr oh ahneki manaman wasao. (Ser. 1:6) E anahne kedipa oh kadeik aramas akan ahpw mehlel samworo kan, soukohp likamw akan, kaun akan pil iangahki irail koaros me kin “wenlahte wiewia nsene” oh ‘sohpeisang’ Koht. (Ser. 6:13; 8:5, 6) Tehnpas sarawi en Nanmwarki Solomon me kin wia wasahn kaudok mehlel erein sounpar 400 kei, pahn kamwomwmwomwla. Serusalem oh Suda pahn tehnla oh towe kan pahn kalipilipala. E kin sansal me rohng me Seremaia pwukoahki kalohki kin uhdahn karuwaru!
5, 6. (a) Ia duwen Siohwa eh ketin doadoahngki pwihn en Seremaia wet? (b) Dahme kitail pahn tehkpene?
5 Nan atail ahnsou, Siohwa kin ketikihda ni limpoak pwihn en Kristian keidi kan pwe en wia sounsilasil kei ni karasaras pwe ren kalohki sapwellime kadeik ong sampah. Sounpar tohto, pwihn wet me duwehte Seremaia kin kangoange aramas akan en tehk duwen ahnsou me re mihmi loale. (Ser. 6:17) Paipel kasalehda ni sansal me Siohwa sohte kin ketin pwapwand. Sapwellime rahno pahn leledo ni ahnsou oh awa me aramas akan sohte kin kasik.—Sep. 3:8; Mark 13:33; 2 Pit. 3:9, 10.
6 Pwihn en Seremaia wet oh iengerail sihpw teikan ese me Siohwa pahn kereniong ketikihdo sapwellime sampah kapw. Eri, irail ese me arail ahnsoun kalohk mwotomwotalahr. Re anahne mwadang padahkihong aramas akan sapwellimen Siohwa mahsen ahnsou wet. Ia duwen met eh kin kamwakid uhk? Sises ketin kasalehda me koaros anahne pilada ma re pahn uhki Wehin Koht de soh. Kitail pahn tehkpene irair siluh me sewese Seremaia en kin mwasamwasahn pwe en wia eh pwukoa. Irair pwukat pahn pil sewese kitail en wia duwehte.
Limpoak ong Aramas
7. Menlau kawehwehda ia duwen limpoak eh kin kamwakid Seremaia en kalohk mendahki kahpwal kan.
7 Dahme kin kamwakid Seremaia en kalohk mendahki kahpwal kan? Eh limpoak ong aramas. Seremaia ese me silepen sihpw likamw akan kin kahrehda pali laud en kahpwal kan me aramas ko kin lelohng. (Ser. 23:1, 2) Eh wehwehki met kin sewese ih en poakeirailla oh kasalehda limpoak ni eh kin wia eh doadoahk. E men irail en rong mahsen en Koht oh mourla. Uwen eh pwunodki kahpwal me pahn lelohng irail, e kin sengiseng. (Wadek Seremaia 8:21; 9:1.) Pwuhken Koulen Kedepwidepw kan kin kasalehda mwahu uwen laud en Seremaia eh poakohng oh nsenohki mwaren Koht oh pil aramas akan. (Koul Ked. 4:6, 9) Ni omw kin kilang aramas akan ar kin “rasehng sihpw kei me sohte silepahr,” ke sou kin men kalohkihong irail rongamwahu en Wehin Koht?—Mad. 9:36.
8. Dahme kin kasalehda me kalokolok kan sohte kin kahrehda Seremaia en lingeringerki?
8 Aramas akan me Seremaia kin men sewese kin kaloke ih. Ahpw, e sohte dupuk de kin lingeringerki met. E kin kanengamah oh kadek ong irail oh pil iangahki nanmwarki suwed Sedekaia. Mwurin Sedekaia eh ndahng aramas akan en kemehla ih, Seremaia kin pekipeki reh en peikiong Siohwa. (Ser. 38:4, 5, 19, 20) Ia duwe, atail limpoak ong aramas kin kehlail duwehte en Seremaia?
Eimah me Koht Ketikihda
9. Ia duwen atail ese me ahn Seremaia eimah kin kohsang rehn Koht?
9 Nin tepin Siohwa eh mahsanihong Seremaia en kohla kalohki duwen sapwellime kadeik, e nda me e sohte kak. Met kasalehda me Seremaia sohte ipwikihdi irair en eimah oh kehlail me e kasalehda nan eh doadoahk. Soh, soangen kehl wet uhdahn kohsang eh kin likih Koht. Mehlel, Siohwa kin ketin ieiang soukohpo duwehte emen “me roson oh manaman,” ni eh ketin utung Seremaia oh kakehlaka ih pwe en kak wia eh pwukoa. (Ser. 20:11) Irair en kommwad oh eimah me Seremaia ahneki kin uhdahn laud, kahrehda erein Sises eh ketin wia sapwellime doadoahk en kalohk nin sampah, ekei kin leme me ih Seremaia me pwurehng iasada!—Mad. 16:13, 14.
10. Dahme kahrehda kitail kak nda me luhwen me keidi kan kin mi “pohn wehi kan oh nanmwarki kan”?
10 Nin duwen “nanmwarkien wehi koaros,” Siohwa mahsanihong Seremaia en wahla kadeik ehu ong wehi kan oh nanmwarki kan. (Ser. 10:6, 7) Eri, ia wehwehn luhwen me keidi kan ar ahneki “manaman pohn nanmwarki kan oh wehi kan”? (Ser. 1:10) Duwehte soukohp en mahs menet, pwihn en Seremaia wet alehdi pwukoa ehu sang rehn Kaunen lahng oh sampah. Eri, sapwellimen Koht ladu keidi kan ahneki manaman en kadeikada wehi kan oh nanmwarki kan nan sampah pwon. Ni arail alehdi manaman wet sang rehn Koht Wasa Lapalahpie oh ar doadoahngki sapwellime mahsen mehlel, pwihn en Seremaia kin kalohki me Koht pahn ketin kamwomwala wehi kan oh nanmwarki kan en rahnwet ni sapwellime ahnsou oh ni ahl me e kupwurki. (Ser. 18:7-10; Kaud. 11:18) Pwihn en Seremaia kin koasoanehdi teng en dehr uhdi sang wia pwukoa wet me kohsang rehn Siohwa en pakairki sapwellime kadeik ong sampah pwon.
11. Dahme pahn sewese kitail en pousehlahte kalokalohk mendahki kitail lelohng kahpwal kan?
11 E sohte kapwuriamwei me ekei pak kitail kin mworusala ni atail kin lelohng uhwong, aramas sohte kin nsenohki atail kalohk, de ahneki kahpwal laud kan. (2 Kor. 1:8) Ahpw kitail en duwehte Seremaia me kin dadaurete. Kitail en dehr mworusala. Kitail en usehlahte kapakap ong Koht, likih ih, oh peki reh sawas pwe en ketin ‘kakehlaikitailda.’ (1 Des. 2:2) Nin duwen tohnkaudok mehlel kan, kitail anahne pousehlahte pepehd ong atail pwukoa kan me Koht ketikihong kitail. Kitail anahne koasoanehdi teng en sohte uhdi sang atail kalokalohki kamwomwalahn Kristian likamw akan me kin rasehng Serusalem me soaloalopwoat. Pwihn en Seremaia sohte pahn kalohkihte “ahnsoun ale sapwellimen Koht kupwurkalahngan,” ahpw pil rahn me Koht pahn ketin “kalowehdi ar imwintihti kan.”—Ais. 61:1, 2; 2 Kor. 6:2.
Peren Sang nan Mohngiong
12. Dahme kahrehda kitail kak medewe me Seremaia kin kolokolete eh peren? Dahme kin sewese ih en wia met?
12 Seremaia kin perenki eh doadoahk. E patohwanohng Siohwa: “Komwi ketin mahsendohng ie, I ahpw pahn kanahieng rong sapwellimomwi mahsen kan koaros. Komw ketin sapwellimankin ie, Maing Kaun, Koht Wasa Lapalahpie, iei me sapwellimomwi mahsen kan kadirehkilahr nan mohngiongi peren oh nsenamwahu.” (Ser. 15:16) Ong Seremaia, e wia pwais kaselel ehu en weliwelian Koht mehlelo oh kalohki sapwellime mahsen. E mwahu en tehk me ni ahnsou me Seremaia kin medemedewehte lokaia kan me aramas kin kauwehki ih, e solahr kin peren. Ahpw ni ahnsou me e kin medemedewehte ia uwen kaselel oh kesempwal en mahsen me e kin kalohki, e kin pwurehng perenda.—Ser. 20:8, 9.
13. Dahme kahrehda atail kin aliale padahk loal kan kin kesempwal ong atail kolokol atail peren?
13 Pwe kitail en kin perenki doadoahk en kalohk nan atail ahnsou, kitail anahne aliale padahk loal en Mahsen en Koht me rasehng “tungoal kekeluwak.” (Ipru 5:14) Atail onopki padahk loal kan kin kakehlaka atail pwoson. (Kol. 2:6, 7) E kin sewese kitail en tamataman ia duwen atail wiewia kan ar kin kamwakid kupwuren Siohwa. Ma kitail kin apwalki ahneki ahnsou en wadek oh onopki Paipel, kitail anahne pwurehng kasawih atail koasoandi kan. Mehnda ma kitail pil onopki oh doudouloale minit keite ehuehu rahn, met pahn sewese kitail en karanihala Siohwa oh ahneki ‘mohngiong peren oh nsenamwahu’ duwehte Seremaia.
14, 15. (a) Ia duwen Seremaia eh kin lelepek ong eh pwukoa eh kin pweida? (b) Dahme Sapwellimen Koht aramas akan rahnpwukat kin pohnese duwen arail doadoahk en kalohk?
14 Seremaia kin lelepek en kalohki sapwellimen Siohwa kadeik. Ahpw dahme e uhdahn perenki iei eh pwukoa en “kauwada oh padokedi.” (Ser. 1:10) Eh doadoahk en kauwada oh padokedi kin pweida. Ekei mehn Suhs kan oh pil irail kan me kaidehn mehn Israel pitsang ohlahn Serusalem nan pahr 607 mwohn Krais. Kitail kin ese duwen Rekap, Epedmelek oh Paruk. (Ser. 35:19; 39:15-18; 43:5-7) Kompoakepahn Seremaia pwukat me kin lelepek oh lemmwiki Koht kin karasahda mwahu irail kan rahnpwukat me ahneki koapworopwor nin sampah me kin kompoakepahnkihla pwihn en Seremaia. Pwihn en Seremaia kin uhdahn perenki arail kin kakehlaka pwoson en pokon kalaimwun wet. (Kaud. 7:9) Irail pwukat me wia iengen me keidi kan ni loalopwoat kin pil uhdahn perenki sewese irail me mohngiong mehlel kan en esehla padahk mehlel.
15 Sapwellimen Koht aramas akan kin pohnese me arail kalohki rongamwahu sohte kin wiahte doadoahk en sewese aramas akan me kin rong, ahpw e pil kin wia kisehn arail kaudok ong Koht. Mehnda ma aramas kin rong de soh, atail kin papah Siohwa sang atail kin kalohk kin wahdo peren laud.—Mel. 71:23; wadek Rom 1:9.
“Mwasamwasahn” Omw Pwukoa!
16, 17. Ia duwen Kaudiahl 17:10 oh Apakuk 2:3 ar kin kasalehda karuwaru en atail ahnsou?
16 Karuwaru en atail ahnsou kin sansalda ni atail kin tehk duwen kokohp nan Kaudiahl 17:10. Nanmwarki kaisimeno, me iei Wehi Kehlail en Britain oh Amerika, tepidahr kakaun. Me pid wehi wet, Paipel mahsanih: “Ni eh [kaisuh en wehi kehlail] pahn pwarodo, ahnsoutehkis me e pahn kakaunki wasa.” Ahpw ni ahnsou wet, “ahnsoutehkis” pahn kereniong imwisekla. Soukohp Apakuk kin kamehlelehiong kitail duwen imwin koasoandi wet: “E saikinte lel ahnsou me e pahn wiawi . . . ahpw awiawihete; pwe e pahn pweida ni ahnsawi; oh e sohte pahn pwand.”—Apak. 2:3.
17 Pein idek rehmw: ‘Ei mour kin uhdahn kasalehda me I pohnese karuwaru en atail ahnsou? Mwomwen ei mour kin kasalehda me I kin kasikasik imwio en mwadang leledo? De ei pilipil kan oh dahme I kin mwohneki kin kasalehda me I sohte kin kasikasik imwio en mwadang leledo, de I kin peikasalki me e pahn uhdahn wiawi?’
18, 19. Dahme kahrehda ahnsouwet kaidehn ahnsou en wawaila?
18 Doadoahk en pwihn en sounsilasil saikinte imwisekla. (Wadek Seremaia 1:17-19.) Ia uwen eh kin kaperen me irail luhwen me keidi kan kin uhda teng rasehng “uhr mete” oh “dihd prons ehu”! Re kin ‘katengehki lukeparail kan kateng en me mehlel’ ni arail kin mweidohng sapwellimen Koht Mahsen en kakehlaka irail lao arail pwukoa imwisekla. (Ep. 6:14) Duwehte me keidi kan, irail pokon kalaimwun kin pwerisek utungada pwihn en Seremaia ni arail kin kapwaiada arail pwukoa me kohsang rehn Koht.
19 Met kaidehn ahnsou en wawaila nan atail doadoahk en Wehio, ahpw iei ahnsoun tehk kesempwalpen Seremaia 12:5. (Wadek.) Kitail koaros kin lelohng kahpwal kan me kitail anahne dadaur. Kahpwal pwukat me kin kasonge atail pwoson ele kin pahrekiong “weirentang ong aramas akan.” Ahpw ni kahn kamakam kowahlap eh kerendohr, kitail kak kasik me kahpwal kan pahn wie lalaudla. (Mad. 24:21) Atail pahn nantihong powehdi kahpwal kan me apwal sang dahme kitail kin lelohng rahnpwukat ele kin rasehng “weirentang ong oahs akan.” Aramas men anahne kehl me inenen laud pwe en dadaur nan weirentang ong oahs akan. Kahrehda e wia kamwahu en dadaur nan kahpwal kan me kitail kin lelohng met, pwe ele e pahn kaunopada kitail en dadaur kahpwal kan me kohkohdo.
20. Dahme ke koasoanehdier teng en wia?
20 Kitail koaros kak alasang Seremaia oh pweida nan atail kin kapwaiada atail pwukoa en kalohk! Soangen irair kan me duwehte limpoak, eimah, oh peren kin kamwakid Seremaia en wiewia eh pwukoa erein sounpar 67 ni lelepek. Rohs kaselel en almond eh kin masal kin katamankihong kitail me Siohwa pahn ketin “mwasamwasahn” sapwellime mahsen pwe en ketin kapwaiada. Mie kahrepe mwahu kitail en pil kahlemengih ih. Seremaia kin “mwasamwasahn” oh kitail pil kak wia duwehte.
Ke Tamataman?
• Ia duwen limpoak eh kin sewese Seremaia en “mwasamwasahn” eh pwukoa?
• Dahme kahrehda kitail anahne eimah me kohsang rehn Koht?
• Dahme kin sewese Seremaia en kolokol eh peren?
• Dahme kahrehda ke men “mwasamwasahn”?
[Peidek en Onop]
[Kilel nan pali 29]
Ke pahn pousehlahte kalokalohk mendahki uhwong kan?
