E Kesempwal en Nantihong

KAUDOK EN PENEINEI kesempwal ma seri kan pahn kekeirda ni kaiahn oh madamadau en Siohwa. (Ep. 6:4) Ahpw ma kowe pahpa de nohno men, ke kin ese me seri kan kin mwadang pwangada. Ia duwen omw kak kahrehiong seri kan ren perenki Kaudok en Peneinei? Tehk dahme ekei pahpa oh nohno kan kin wia.

George me kin mihmi California nan Amerika koasoia: “Ni ahnsou me seri kan tikitik, ngehi oh ei pwoud kin song en wiahda Kaudok en Peneinei en kin kaperen. Ekei pak se kin likouda duwehte irail kan me Paipel kin koasoia oh songada dahme wiawi ni at kin wadek pwuhken Nai Pwuhk en Poadoapoad Kan en Paipel. Se pil kin wiahda soahng kan duwehte kedlahs, nein nanmwarki sokon, kopwou oh soahng teikan. Se pil kin wia mwadong en Paipel me adaneki ‘ndahda ihs ngehi’ oh se pil kin wiahda soangsoangen peidek kan. Se pil kin wiahda soahng kan duwehte weren Noha warihmwo de ntingihada keirekdihen soahng kan me wiawi nan Paipel. Ekei pak se kin koasoanehdi ahnsoun mahlenihada irail kan me kin mi nan Paipel de soai kan. Ni ahnsou wet, se koasoanehdi sen malenihada tehtehn mahwen me kileldi nan Episos 6:11-17 oh emenemen kiht pahn kawehwehda wehwehn ehuehu dipwisou ko. Wiepe pwukat sewesei kiht en perenki at Kaudok en Peneinei.”

Nan Michigan, Amerika, emen nohno adaneki Debi koasoia: “Ngehi oh ei pwoud kin apwalki kahrehiong nait serepein me sounpar siluho en kin men rong kiht. Ehu rahno, ni at wadewadek koasoipen Aisek oh Repeka nan pwuhken Nai Pwuhk en Poadoapoad Kan en Paipel, I pwekada toahl riemen oh tepida mwomwehda sohngada Aisek oh Repeka ara koasoakoasoipene. Met e kin tamataman lepin lokaia koaros me I kin nda! Mwurin sounpwong kei, toahl riemeno wiahla soangsoangen tohn nan Paipel kei. Mwurin at kin wadek ehuehu soai nan Paipel, nait serepeino kin rapahki nan imwat mehn mwadong kan de soahng kan me se kak doadoahngki ong soaio. E kin duwehte mwadong en rapahki mehkot! E doadoahngki kakon en suht ehu oh wiahkihda imwen Reapo oh salip weitahta ieu oh wiahda sahl weitahtao. E doadoahngki sineik mehn mwadong me reireiki piht limau me pidakih tuhkehn kepenok ehu ong sineik mete me kileldi nan Nempe 21:4-9. Se kihpene mehn mwadong kan nan lapalahn ehd ehu. Se kin perenki nait serepeino eh kin mwadongki nah ehd en mwadongo. Ia uwen kaperen en kilang eh kin pein sohngada soai kan!”

Apwalihada seri sohte mengei. Pahpa oh nohno kan anahne kahrehiong irail en men inangih papah Siohwa. Irail anahne wia met rahn koaros oh ni soangsoangen ahl akan. Ahpw Kaudok en Peneinei oh onop en Paipel iei mehkot kesempwal ong pahpa oh nohno pwe ira en kak pweida. Ni mehlel, e uhdahn katapan en nannanti!