Dahme me Tohto Kin Masak?
Dahme me Tohto Kin Masak?
“E sohte anahne mie omw pelien lamalam pwe ken kamehlele me kitail kohkowohng nan kahpwal.”—STEPHEN O’LEARY, SOUNPADAHK EN UNIVERSITY OF SOUTHERN CALIFORNIA. *
KE PWUNGKI dahme ntinting powe? Ire kan nan makasihn wet pahn kasalehda ekei kahrepe kan me aramas kin masak ahnsou kohkohdo. Ahpw e pahn pil kasalehda dahme kahrehda ke kak kamehlele me mour nin sampah wet sohte pahn imwisekla. Mie kahrepe mwahu ken kak ahneki koapworopwor mendahki soahng kansensuwed kan me ke pahn wadek nan parakrap kan en mwuri.
Keper en mahwen en pakudang kehlail wie lalaudte. Nan pahr 2007, ehu doaropwehn rohng en pelien sains koasoia: “Mwurinte pakudang kan pospeseng nan Hiroshima oh Nagasaki, sampah wet milahr nan keper.” (Bulletin of the Atomic Scientists) Dahme kahrehda? Doaropwehn rohngohte pil kasalehda me nan pahr 2007, mpen pakudang 27,000 wie mihmihte oh meh 2,000 “kaunopadahr en pospeseng.” Mehnda ma ekiste pakudang pwukat me pospeseng, e pahn kauwehla laud sampah wet!
Ia duwe, keper en kaposepeseng pakudang pwukat wie tikitiklahr sang ahnsowo kohdo? Ehu pwuhk kasalehda me wehi limau me naineki dipwisoun mahwen keieu laud iei China, France, Russia, United Kingdom oh Amerika, oh irail koaros “kin wiahda dipwisoun mahwen kapw kan de nda me re men wiahda dipwisou pwukat.” (SIPRI Yearbook 2009) * * Pwuhko pil koasoia me kaidehn ihte wehi pwukat me naineki soangen dipwisoun mahwen pwukat. Sounroporop kan kasalehda me nan India, Pakistan oh Israel, ehuehu wasa pwukat naineki ele pakudang 60 lel 80. Re pil nda me nin sampah pwon, pakudang 8,392 wiawihdahr oh kaunopadahng en pospeseng!
Wekideklahn nan wehwe kak kahrehda kahpwal laud. Doaropwehn rohng me kileldi mwoweo, koasoia me “Keper me kohsang wekideklahn nan wehwe kereniong duwehte keperpen pakudang kan.” Irail saintis kan me duwehte Stephen Hawking, sounpadahk en University of Cambridge, oh Martin Rees sang Trinity College at the University of Cambridge kin kasalehda duwen keper pwukat. Ira pehm me, ma aramas sohte pahn kanahieng arail doadoahngki dipwisou kan oh kauwehla sampah, e kak wekidala mour nin sampah wet de mouren aramas pahn imwisekla.
Koasoiepen imwin sampah wet kin kapwunode aramas tohto. Ma ke ntingihdi lepin lokaia pwukat, “imwin sampah” oh pahr “2012” nan Internet oh ke pahn kilang soangen koasoi tohto me kin kasalehda me imwin sampah pahn wiawi nan pahro. Dahme kahrehda? Ehu kalendar en mahs sang Maya kin kasalehda me imwi pahn wiawi nan pahr 2012. Me tohto kin masak pwe dene ih imwin mouren aramas.
Me tohto me mie arail pelien lamalam kin kamehlele me Paipel kin kasalehda me weren sampah pahn ohla. Irail kamehlele me koaros me pwoson kan pahn kohdahla nanleng a luhwe kan pahn lokolok nan sampah pingiping ehu de lekdekla nan ehl.
Ia duwe, Paipel kin uhdahn mahsanih me sampah wet pahn ohla? Wahnpoaron Sohn kihda kaweid wet: “Kumwail dehr kamehlele irail koaros me kin koasoia me Ngehn Sarawio kin ketiket rehrail.” Ahpw e padahkihong kitail en song irail pwe kitail en wehwehki ma arail koasoi kan kohsang rehn Koht. (1 Sohn 4:1) Ke dehr kamehlelete dahme aramas kin nda, ahpw ale noumw Paipel oh kilang dahme e kin padahngki duwen imwin sampah wet. Ele ke pahn pwuriamweikihla dahme Paipel pahn padahkihong uhk.
[Nting tikitik kan me mi pah]
^ Oaralap wet “Kahpwal akan me Wiawi nan Ahnsou Pwukat Kin Kahrehiong Aramas en Koasoia Dahme Pahn Wiawi Ahnsou Kohkohdo,” (lokaiahn wai) me mi nan Web site MSNBC en October 19, 2005.
^ Mesen nting pwukat SIPRI kin wehwehki Stockholm International Peace Research Institute.
^ Irail kan me ntingihdi SIPRI Yearbook 2009 iei sounroporop kei. Adarail kan iei Shannon N. Kile, Vitaly Fedchenko, oh Hans M. Kristensen.
[Credit Line 4]
Mushroom cloud: U.S. National Archives photo; hurricane photos: WHO/League of Red Cross and U.S. National Archives photo