1, 2. Dahme emenemen kitail anahne uhdahn kamehlele? (Menlau kilang tepin kilel.)

 NIN duwen me kitail koasoiapene nan iren onop en mwoweo, Tepilo kose me Siohwa sohte ketin warohng kaunda aramas. E nda me Siohwa sohte kin ketin kaunda ni pahrek oh me aramas akan pahn peren ma re pein kaunirailda. Ia duwe, Sehdan pwung? Medewehla ma aramas akan kak pein kaunda irail oh mour kohkohlahte. Ia duwe, re pahn ahneki peren laudsang arail mi pahn kaundahn Koht? Ke pahn peren ma ke kak mour kohkohlahte oh uhtohrdahsang Koht?

² Sohte me kak sapengala peidek pwukat ong uhk. Emenemen kitail anahne medewe kanahieng duwen peidek pwukat. Eri e pahn sansalda me sapwellimen Siohwa elen kaunda me keieu mwahu oh e ketin warohng atail en utung ih ni mohngiong unsek. Kitail pahn tehkpene ia duwen Paipel eh kin kihong kitail kahrepe laud en kamehlele me Siohwa kelehpw me kak ketin kaunda nanleng oh sampah oh me sapwellime elen kaunda me keieu mwahu.

3. Dahme kahrehda Siohwa me sapwellimanki pwuhng en kaunda?

³ Siohwa kelehpw me sapwellimanki pwuhng en kaunda nanleng oh sampah pwehki ih me Koht wasa lapalahpie oh Sounkapikpatail.  (1 Kron. 29:11; Wiewia 4:24) Nan Kaudiahl 4:11, irail meh 144,000 ko me iang Krais kaunda nda: “Maing at Kaun oh at Koht! Komwi me uhdahn warohng sapwellimanki lingan, wahu, oh roson. Pwe komwi me ketin wiadahr mehkoaros, oh pwehki kupwuromwien, me mehkoaros mihmiehki oh momourki.” Siohwa ketin kapikada soahng koaros, eri e sapwellimanki pwuhng en kaunda koaros, mehnda ma nin sampah de nanleng.

4. Dahme kahrehda atail saledek en wiahda pilipil sohte kihong kitail pwuhng en uhwongada Koht?

⁴ Sehdan sohte kapikada mehkot. Eri e sohte kak ahneki pwuhng en kaunda nanleng oh sampah. Sehdan oh tepin pwopwoudo kasalehda madamadau en uhwong ni arail pelianda sapwellimen Siohwa pwuhng en kaunda. (Ser. 10:23) Ia duwe, arail saledek en wiahda pilipil me kihong irail pwuhng en soikala sapwellimen Siohwa kaunda? Soh. Ahn emen saledek kin kihong ih pwuhng en wiahda pilipil kan ahpw kaidehn en soikala Sounkapikadao, Siohwa. E sansal me ni emen eh uhwongada Koht, e kin doadoahngki ni sapwung eh saledek en wiahda pilipil. Nin duwen aramas kei, kitail anahne sapwellimen Siohwa kaunda oh kaweid.

5. Dahme kahrehda sapwellimen Koht pilipil kan kin ahnsou koaros pahrek?

⁵ Medewehla pil ehu kahrepe me Siohwa ketin sapwellimanki pwuhng en kaunda. E kin ketin doadoahngki sapwellime manaman en kaunda ni ahl me uhdahn pahrek. E ketin mahsanihong kitail: “Ei limpoak me poatopoat, oh I kin wia dahme pwung oh mehlel. Ih mepwukat me I kin kupwurperenki. Ngehi, KAUN-O, me mahmahsen.” (Ser. 9:24) Siohwa sohte ketin anahne ahn aramas kosonned kan pwehn sewese ih pilada dahme pwung. Ahpw, e kin ketin koasoanehdi dahme pwung. Oh Siohwa ketikihong aramas akan kosonned kan me poahsoankihda pein sapwellime pwung pahrek me unsek. Sounmelkahkao nda: “Sapwellimomwi wehi poahsoankihda pwungen kosonned oh pwuhng pahrek.” Eri kosonned, kaweid oh ire mehlel kan, de pilipil kan koaros me pwilisang rehn Siohwa kin pwung. (Mel. 89:14; 19:8) Sehdan kose me Siohwa kin ketin kaunda ni ahl sapahrek. Ahpw, pein Sehdan sohte kak wahdo pwung pahrek nin sampah.

6. Ia pil ehu kahrepe me Siohwa sapwellimanki pwuhng en kaunda sampah?

⁶ Pil ehu kahrepe me Siohwa sapwellimanki pwuhng en kaunda iei pwehki e sapwellimanki loalokong oh erpit en ketin apwalih lahng oh sampah. Kitail kilang duwen met ni eh ketikihong sapwellime Ohlo koahiek en kamwahwihala soumwahu kan me toahkte kan sohte kak kamwahwihala. (Mad. 4:23, 24; Mark 5:25-29) Mepwukat uhdahn kapwuriamwei ong kitail ahpw kaidehn ong Siohwa. E ketin mwahngih ia duwen paliwaratail eh kin doadoahk oh e kak ketin kamwahwihala. E pil kak ketin kaiasada me melahr akan oh kauhdi melimel, rerrer en sahpw, de iloak laud ape.

7. Ia duwen Siohwa eh ketin sapwellimanki erpit laudsang koaros nan ahn Sehdan sampah?

⁷ Sampah ehu me Sehdan kaunda sohte kak wahdo popohl, mehnda ma nan sahpw ehu de nanpwungen sahpw kan. Siohwa kelehpw me sapwellimanki erpit en ketikihda popohl nin sampah. (Ais. 2:3, 4; 54:13) Kitail pil ahneki soangen pepehmohte me wahnpoaron Pohl ahneki ni eh nda: “Ia uwen laud en sapwellimen Koht kapai kan! Ia uwen loalen sapwellime erpit oh kupwurokong! Ihs me kak kawehwehda sapwellime koasoandi kan? Ihs me kak wehwehki sapwellime wiewia kan?”​—Rom 11:33.

8. Ia omw pepehm ong sapwellimen Siohwa elen kaunda?

⁸ Nin duwen me kitail kilangehr, Paipel kasalehda ni sansal me Siohwa me sapwellimanki pwuhng en kaunda. Paipel pil kasalehda dahme kahrehda e ketin wia Kaun me keieu mwahu.  Ehu kahrepe iei e kin ketin kaunda ni limpoak. Kitail kin pehm atail karanih ih ni atail kin medewehla duwen eh kin ketin “diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel.” (Eks. 34:6) Koht kin ketin kasalehda wahu nan sapwellime wiewia kan ong kitail. E kin ketin apwalih kitail mwahusang pein atail kin apwalih kitail. Tepilo nda me Siohwa sohte kin ketikihong sapwellime ladu kan dahme mwahu ong irail, ahpw met likamw pwoat. Koht pil ketikihda sapwellime Ohlo me e ketin kesempwalki pwe kitail en kak ahneki koapworopwor en mour kohkohlahte.​—Wadek Melkahka 84:11; Rom 8:32.

9. Ia duwen atail ese me Koht kin ketin nsenohki emenemen kitail?

⁹ Siohwa ketin poakohng sapwellime aramas akan koaros nin duwen pwihn ehu. Ahpw e pil uhdahn ketin nsenohki emenemen. Medewehla dahme wiawi mahso. Erein mpen sounpar silipwuki, Siohwa ketin doadoahngki sounkopwung kan en kaweid wehin Israel me e sapwellimanki oh sewese irail en kalowehdi arail imwintihti kan. Erein met eh wiewiawi, Siohwa kin ketin tetehkte emenemen sapwellime kan. Emen rehrail iei lih emen me adaneki Rud. Kaidehn ih mehn Israel, oh e tounmeteikihla soahng tohto pwe en kak wiahla sapwellimen Siohwa tohnkaudok. Siohwa ketin katingih ni eh ketikihong eh pwoud oh pwutak men. Ahpw laudsang met, nein Rud pwutako wiahla kisehn kadaudok en peneineio me Mesaiao kohsang ie. Siohwa pil ketin ntingihediong nan Paipel duwen mouren Rud oh pil kahdaneki ehu pwuhken Paipel ko Rud. Ia omw madamadau duwen ahn Rud pepehm ni eh pahn iasada oh esehda duwen mepwukat?—Rud 4:13; Mad. 1:5, 16.

10. Dahme kahrehda kitail kak ndahki me sapwellimen Siohwa kaunda sohte kin lemei?

¹⁰ Sapwellimen Siohwa kaunda sohte kin lemei. Irail kan me kin peikiong ih kin ahneki maiau oh peren. (2 Kor. 3:17) Depit patohwan ndahki Siohwa: “Lingan oh roson kin kapilpene; manaman oh peren kin kadirehla Tehnpese.” (1 Kron. 16:7, 27) Sounmelkahkao Edan ntingihedi: “Meid pai aramas akan me kin kokoul kaudokiong komwi, me kin momour nan marain en sapwellimomwi kadek. Pwehki komwi re kin pereperen sang nimenseng lel nipwong, oh kapikapinga sapwellimomwi kalahngan lapalap.”​—Mel. 89:15, 16.

11. Ia duwen atail kak kalaudehla atail kamehlele me sapwellimen Siohwa kaunda me keieu mwahu?

¹¹ Ni atail kalaudehla atail kin doudouloale sapwellimen Siohwa kupwuramwahu, e pahn pil kalaudehla atail kamehlele me sapwellime kaunda iei me keieu mwahu. Kitail ahneki soangen pepehmohte me sounmelkahkao ahneki ni eh patohwanohng Koht: “Rahnteieu nan Tehnpasomwi Sarawio mwahusang rahn kid wasa teikan.” (Mel. 84:10) Siohwa ketin kapikada kitail, eri e mwahngih dahme uhdahn pahn kaperenda kitail. Ni kadek, e kin ketikihong kitail laudsang dahme kitail anahne. Soahng koaros me Siohwa ketin mahsanihong kitail en wia kin wia kamwahupatail. Mehnda ma kitail anahne wiahda tounmetei kan, kitail pahn ahnsou koaros peren ma kitail peikiong Siohwa.​—Wadek Aiseia 48:17.

12. Ia uhdahn kahrepeo me kitail kin utung sapwellimen Siohwa pwuhng en kaunda?

¹² Kitail sukuhlki nan Paipel me mwurin Kaundahn Krais Pahr Kido, ekei pahn uhwongada sapwellimen Siohwa pwuhng en kaunda. (Kaud. 20:7, 8) Dahme pahn kahrehiong irail en wia met? Ni ahnsowo, Tepilo ele pahn pwurehng song en kamehlelehiong aramas akan me re kak mour kohkohlahte ahpw sohte peikiong Koht. Met sohte douluhl kak mehlel. Ahpw kitail anahne pein idek rehtail, ‘I pahn kamehlele likamw wet?’ Ma kitail uhdahn poakohng Siohwa oh uhdahn kamehlele me e ketin mwahu oh sapwellimanki pwuhng en kaunda nanleng oh sampah,  eri likamw wet pahn wia mehkot kasaut ong kitail. Kitail pahn men mihte pahn sapwellimen Siohwa kaunda limpoak.

13. Ia duwen atail kin utung sapwellimen Koht pwuhng en kaunda ni atail kin kahlemengih ih?

¹³ Nin duwen me kitail kilangehr, Siohwa me sapwellimanki pwuhng en kaunda, oh sapwellime elen kaunda me keieu mwahu. E warohng kitail en utung sapwellime pwuhng en kaunda ni unsek. Kitail kin utung ni atail kin loalopwoatohng oh kahlemengih Siohwa. Ni atail kin wia uwen atail kak en mwekid pahrekiong sapwellimen Siohwa wiewia kan, kitail kin kasalehda me kitail poakohng oh utung sapwellime elen kaunda.​—Wadek Episos 5:1, 2.

14. Ia duwen elder oh tapwin peneinei kan ar kak kahlemengih Siohwa?

¹⁴ Kitail sukuhlkihsang Paipel me Siohwa kin ahnsou koaros ketin doadoahngki sapwellime manaman en kaunda ni elen limpoak. Tapwin peneinei oh elder kan me kin poakohng sapwellimen Siohwa pwuhng en kaunda pahn kahlemengih ih oh sohte lemei de men kaunda meteikan. Wahnpoaron Pohl kin nantihong laud en kahlemengih Koht oh sapwellime Ohlo. (1 Kor. 11:1) E sohte kin kanamenekih meteikan de iding irail en wia dahme pwung. Ahpw ni kadek, e kin kamwakid irail en wia dahme pwung. (Rom 12:1; Ep. 4:1; Pail. 8-10) Pohl kin kahlemengih Siohwa ni eh wia met. Ni atail kin kasalehiong meteikan limpoak, kitail kin utung sapwellimen Siohwa pwuhng en kaunda.

15. Ia duwen atail kin utung sapwellimen Siohwa kaunda sang ni atail kin wauneki irail kan me ahneki manaman?

¹⁵ Kitail pil kin utung sapwellimen Siohwa pwuhng en kaunda sang ni atail kin utung irail kan me e ketikihong manaman en kaunda. Ma kitail pil sohte nohn wehwehki de pwungki pilipil ehu, kitail kin utungte sapwellimen Siohwa wiewia kan. Met uhdahn weksang wiewiahn sampah, ahpw ih mwomwen atail wiewia ni atail pwungki Siohwa nin duwen atail Kaun. ( Ep. 5:22, 23; 6:1-3; Ipru 13:17) Kitail kin paiekihda atail wia met pwehki Koht ketin kupwurki dahme keieu mwahu ong kitail.

16. Ia duwen pilipil kan me kitail wiahda ar kak kasalehda me kitail kin utung sapwellimen Koht pwuhng en kaunda?

¹⁶ Kitail pil kak utung sapwellimen Koht pwuhng en kaunda sang ni pilipil kan me kitail kin wiahda. Siohwa sohte ketikihong kitail kaweid pisetik ong ehuehu irair nan atail mour. Ahpw, e ketin padahkihong kitail duwen sapwellime madamadau kan. Met sewese kitail en wehwehki dahme kitail anahne wia. Karasepe, Siohwa sohte ketikihong Kristian kan kaweid pisetik kan ong dahme ren likawih de dehr likawih. Ahpw, e ketin kawehwehda me kitail anahne likou ni ahl me konehng oh wahu nin duwen sapwellime Sounkadehde kan. (1 Tim. 2:9, 10) E ketin kupwurki kitail en medewe ia duwen atail pilipil kan ar kin kamwakid meteikan. (1 Kor. 10:31-33) Ni atail wiahda pilipil kan me poahsoankihda sapwellimen Siohwa elen madamadau, kitail kin kasalehda me kitail poakohng oh utung sapwellime elen kaunda.

17, 18. Ia duwen pwopwoud kan ar kak kasalehda me re kin utung sapwellimen Siohwa pwuhng en kaunda?

¹⁷ Medewehla ehu ahl me pwopwoud Kristian kan kak utung sapwellimen Siohwa pwuhng en kaunda. Ara mouren pwopwoud ele kin weksang dahme pwopwoud ehu kin medewe. Ele ira pil ahneki kahpwal laud kan. Ma ih met me wiawi, ira kak paiekihda sang ara medewe duwen sapwellimen Siohwa wiewia ong wehin Israel en mahs. Siohwa ketin karasahiong ih duwehte ohl pwopwoud men ong sapwellime aramas akan. (Ais. 54:5; 62:4) Wehi wet kin kansensuwedihala Siohwa pak tohto. Nanpwungen Siohwa oh wehi wet kin duwehte pwopwoud ehu me ahneki kahpwal. Ahpw Siohwa sohte ketin mwadangete kesehla eh nanpwungmwahu rehn Israel. E kin ketin pwurepwurehng mahkohng irail oh kolokolete sapwellime inou kan ong irail.​—Wadek Melkahka 106:43-45.

¹⁸ Pwopwoud Kristian kan me poakohng Siohwa kin song en kahlemengih ih. Mehnda ma mie kahpwal nan arail mouren pwopwoud, re sohte kin rapahki en uhdihsang arail pwopwoud ni ahl ehu me Paipel sohte kaweidki. Re ese me Siohwa kin ketin kesempwalki inou en pwopwoud oh e kupwurki ohl oh lih pwopwoud kan en “patehng” emenemen. Tiahk samin me pid wia nsenen pwopwoud iei kahrepe ehute me kileldi nan Paipel me pwopwoud kak mweipeseng oh ahneki saledek en pwurehng pwoudikihda emen tohrohr. (Mad. 19:5, 6, 9) Ni Kristian kan ar wia uwen ar kak koaros pwe arail mouren pwopwoud en pweida, re kin utungada sapwellimen Siohwa pwuhng en kaunda.

19. Dahme kitail pahn wia ni atail wiahda sapwung kan?

¹⁹ Kitail koaros sohte unsek, oh ekei pak kitail kin wia mehkan me kin kansensuwedihala Siohwa. E mwahngih duwen met, ihme kahrehda e ketikihda pweinen pweipwei sapahlo me Krais wiahda. Eri ni atail wiahda sapwung ehu, kitail anahne peki Siohwa en ketin mahkohng kitail. (1 Sohn 2:1, 2) Kitail en dehr mworuskihlahte atail sapwung kan, ahpw kitail en ale kasukuhl sang. Kitail men karanih Siohwa, me pahn ketin mahkohng kitail oh sewese kitail en mwahula oh pil pousehlahte papah ih.​—Mel. 103:3.

20. Dahme kahrehda kitail en utung sapwellimen Siohwa pwuhng en kaunda ahnsou wet?

²⁰ Nan sampah kapwo, koaros pahn mi pahn kaundahn Siohwa oh pahn sukuhlki sapwellime wiewia pwung kan. (Ais. 11:9) Ahpw ni ahnsou wet kitail pil kak kalaudehla atail esehla sapwellime madamadau oh ia duwen eh kin kupwurki kitail en apwalihala soahng kan. Ahnsou keren, sohte emen pahn peidengki sapwellimen Koht pwuhng en kaunda. Eri kitail wia uwen atail kak koaros ahnsou wet en utung sapwellimen Siohwa pwuhng en kaunda sang ni atail kin peikiong ih, papah ih ni lelepek, oh wia uwen atail kak en kahlemengih ih ni soahng koaros me kitail kin wia.