IREN ONOP 29
Ke Onopadahr ong Kahn Kamakam Kowahlapo?
“Kadehdehda me kumwail onopadahr.”—MAD. 24:44.
KOUL 150 Rapahki Komourpomw Rehn Koht
AUDEPEN ONOP a
1. Dahme kahrehda e wia elen loalokong en kaunopada ong kahpwal laud kan?
MA KITAIL kin kaunopada ong soahng ehu, e kak doareikitailla. Karasepe, ni melimel laud ehu eh wiawi, aramas me kin kaunopada ong met kin pitla oh kak sewese meteikan. Pwihn ehu nan Europe me kin song en sewese aramas akan koasoia: “Kaunopada mwahu kak doarehla mour.”
2. Dahme kahrehda kitail anahne kaunopadahng kahn kamakam kowahlapo? (Madiu 24:44)
2 ‘Kamakam kowahlapo’ pahn wiawi ni atail sohte kasik. (Mad. 24:21) Ahpw, e pahn weksang kahpwal laud tohto teikan pwehki kitail ese me e pahn wiawi. Mpen sounpar 2,000 samwalahro, Sises ketin kehkehlingkihong sapwellime tohnpadahk kan ren onopadahng rahno. (Wadek Madiu 24:44.) Ma kitail kaunopada, e pahn mengeiong kitail en dadaur pahn ahnsou apwalo oh sewese meteikan en wia duwehte.—Luk 21:36.
3. Ia duwen irair en dadaurete, poakehla meteikan, oh limpoak eh pahn sewese kitail en onopadahng kahn kamakam kowahlapo?
3 Medewehla irair siluh me kak sewese kitail en onopadahng kahn kamakam kowahlapo. Dahme kitail pahn wia ma kitail ale kaweid en kalohki rongen kadeik oh mie me uhwong kitail? (Kaud. 16:21) Kitail pahn anahne dadaurete pwehn peikiong Siohwa oh likih me e pahn ketin pere kitail. Dahme kitail pahn wia ma sohla ahn riatail Kristian kan ekei kepwe de kepwe koaros? (Apak. 3:17, 18) Atail poakehla meteikan pahn kamwakid kitail en sewesehki irail dahme re anahne. Dahme kitail pahn wia ma pwihn en wehi kan uhwong kitailda oh kitail anahne kousoanpene wasa kis rehn riatail Kristian kan erein ahnsou ehu? (Esek. 38:10-12) Atail limpoak ong irail pahn anahne kehlail pwe kitail en dadaur pahn ahnsou apwalo.
4. Ia duwen Paipel eh kasalehda me kitail anahne doulahte kakairada irair en dadaurete, poakehla meteikan, oh limpoak?
4 Mahsen en Koht kangoange kitail en pousehlahte kakairada irair en dadaurete, poakehla meteikan, oh limpoak. Luk 21:19 mahsanih: “Ni amwail pahn kin dadaurete, kumwail pahn doarehla amwail mour.” Kolose 3:12 mahsanih: “Pwuhriong nan limpoak me kin mwekidki poakehla.” Oh 1 Deselonika 4:9, 10 mahsanih: “Pwe Koht ketin padahkihong kumwail en poakohng emenemen. . . . Ahpw se kangoangei kumwail, riat ko, kumwail wonlahte kalaudehla amwail kin wiewia met.” Mahsen pwukat koaros ntingdi ong tohnpadahk ko me kasalehdahr irair en dadaurete, poakehla meteikan, oh limpoak. Ahpw, irail anahne doulahte kalaudehla irair pwukat. Kitail anahne wia soahngohte. Pwehn sewesei kitail, kitail pahn koasoiapene ia duwen tepin Kristian ko ar kasalehda ehuehu irair pwukat. Mwuhr, kitail pahn kilang ia duwen atail kak alasang irail oh kadehdehda me kitail onopadahngehr kahn kamakam kowahlapo.
KAKEHLAKA OMW DADAURETE
5. Ia duwen tepin Kristian ko ar dadaurete pahn arail kahpwal kan?
5 Tepin Kristian ko anahne dadaurete. (Ipru 10:36) Irail ahneki soangen kahpwal kante me pali laud en aramas akan ahnsowo ahneki. Ahpw irail pil ahneki kahpwal teikan. Tohtohn irail kin lelohng kalokolok, kaidehn sangete kaunen pelien lamalam en mehn Suhs kan oh koperment en Rom, ahpw pil sang pein arail peneinei kan. (Mad. 10:21) Oh irail anahne tehk mwahu me padahk likamw kan en irail me kesehla oh uhwongada kaudok mehlel, me kin songosong en katohrepeseng mwomwohdiso, en dehr kamwakid irail. (Wiewia 20:29, 30) Kristian ko kin dadaurete. (Kaud. 2:3) Ia duwen? Irail kin medemedewe mwahu mehn kahlemeng kan nan Paipel me pid dadaurete, me duwehte Sohp. (Seims 5:10, 11) Irail kin kapakapki kehl. (Wiewia 4:29-31) Oh irail kin tamatamante me Siohwa pahn ketin katingih irail ma re dadaurete.—Wiewia 5:41.
6. Dahme ke sukuhlkihsang dahme Merita wia pwehn dadaurete pahn uhwong?
6 Kitail pil kak dadaurete ma kitail kin kaukaule onopki mehn kahlemeng kan en dadaurete nan Mahsen en Koht oh nan neitail sawasepen Paipel kan oh doudouloale. Sang ni eh wia met, Merita, sister men nan Albania, kak dadaurete pahn uhwong laud sang peneinei. E koasoia: “Koasoipen Sohp nan Paipel uhdahn kangoange ie. E lelohng lokolok laud oh mendahki e sehse ihs me kahrehiong eh kahpwal ko, e koasoia: ‘I pahn keptakaila koasoakoasoia ei mwakelekel lao lel rahn en ei mehla.’ (Sohp 27:5) I medemedewe duwen ia uwen ahn Sohp kahpwal ko eh laudsang ahio. I ese ihs me kahrehiong ei kahpwal kan, ahpw Sohp sehse ihs me kahrehiong eh kahpwal ko.”
7. Mehnda ma sohte atail kahpwal laud ehu ahnsou wet, dahme kitail anahne sukuhlki en wia?
7 Kitail pil kak kakehlaka atail dadaurete sang ni atail kin kalapw kapakapohng Siohwa oh padahkihong atail kapwunod kan koaros. (Pil. 4:6; 1 Des. 5:17) Ele sohte omw kahpwal laud ahnsou wet. Ahpw ia duwe, ke kin peki sapwellimen Siohwa sawas ahnsou sohte lipilipil me ke kin nsensuwed, de sehsehla dahme ke pahn wia? Ma ahnsou wet ke kin kalapw kapakapkihong Siohwa omw kahpwal tikitik kan, ke sohte pahn pweiek en wia met ni omw lelohng kahpwal laud kan ni ahnsou kohkohdo. Eri, ke pahn uhdahn likih me e uhdahn ketin mwahngih iahd oh ia duwen eh pahn ketin seweseiuk.—Mel. 27:1, 3.
DADAURETE
Ehuehu kahpwal me kitail kin dadaur pah kak kaunopkitailda ong mehn mwuhr (Menlau kilang parakrap 8)
8. Ia duwen ahn Mira mehn kahlemeng eh kasalehda me en dadaurete pahn kahpwal kan rahnwet kak sewese kitail en pil dadaurete pahn kahpwal kan mwuhr? (Seims 1:2-4) (Pil kilang kilel.)
8 Ele kitail pahn kak dadaurete pahn kahn kamakam kowahlapo ma kitail kin dadaurete pahn kahpwal kan rahnwet. (Rom 5:3) Dahme kahrehda kitail kak ndahki met? Riatail Kristian tohto koasoia me ehuehu ahnsou me re kin dadaur pahn kahpwal laud ehu, met kin sewese irail en dadaurete pahn kahpwal kan mwuhr. Arail dadaurete kin kalaudehla arail pwoson me Siohwa ketin kupwurki sewese irail. Oh arail pwoson kin uhd sewese irail en dadaur pahn kahpwal en mwurio. (Wadek Seims 1:2-4.) Mira, pioneer men nan Albania, diarada me eh dadaurete pahn eh kahpwal kan mahso sewese ih en doulahte dadaurete pahn eh kahpwal kan ahnsou wet. E koasoia me ekei pak e pehm me ih kelehpw me ahneki kahpwal tohto. Ahpw e tamanda ia uwen laud en Siohwa eh ketin sewesehier ih erein sounpar 20, oh kin pein ndaiong ih: ‘Lelepekte. Dehr uhdihsang papah Siohwa ahnsou wet mwurin eh ketin seweseiuk en dadaur pahn kahpwal laud tohto.’ Ke pil kak doudouloale ia duwen Siohwa eh ketin seweseiukehr en dadaurete. Kamehlele me e ketin mwahngih ehuehu ahnsou me ke kin dadaur pahn kahpwal ehu oh me e pahn ketin katingihiuk. (Mad. 5:10-12) Eri ni ahnsou me kahn kamakam kowahlapo tepida, ke pahn eseier ia duwen omw pahn dadaurete oh pahn koasoanehdi teng en pousehlahte wia met.
KASALEHDA POAKEHLA METEIKAN
9. Ia duwen mwomwohdiso en Andiok en Siria eh poakehla meteikan?
9 Medewehla dahme wiawi ni Kristian kan nan Suda ar lelohng lehk laud. Mwurin mwomwohdiso en Andiok en Siria rong duwen met, ele irail poakehla riarail Kristian kan nan Suda. Eri irail wia mehkot pwehn sewese riarail Kristian ko. Irail “koasoanehdi me emenemen irail en kadarala sawas ni uwen me e kak ong riarail kan me koukousoan nan Sudia.” (Wiewia 11:27-30) Mendahki Kristian ko me lelohng lehk laud mi wasa doh, Kristian kan nan Andiok koasoanehdi en sewese irail.—1 Sohn 3:17, 18.
POAKEHLA METEIKAN
Kahpwal laud kan duwehte melimel ape kin wia ahnsou mwahu ong kitail en kasalehda atail poakehla meteikan (Menlau kilang parakrap 10)
10. Ni ahl dah kan me kitail kak kasalehda atail poakehla meteikan ni riatail kan ar lelohng kahpwal laud ehu? (Pil kilang kilel.)
10 Kitail pil kak kasalehda atail poakehla meteikan rahnwet ni atail kin esehda me riatail Kristian kan lelohng kahpwal laud ehu. Kitail kin mwadangete sawas sang ni atail idek rehn elder kan ma kitail kak iang sawas nan doadoahk ehu, sang ni atail kihda sawas en mwohni ong doadoahk en sampah pwon, de sang atail kapakapki irail kan me lelohng kahpwal laudo. b (Lep. Pad. 17:17) Karasepe, nan pahr 2020, Disaster Relief Committee daulih 950 idihdida nan sampah pwon pwehn apwalih irail kan me anahne sawas erein soumwahu lusulus en COVID-19. Kitail uhdahn kalahnganki riatail kan me kin wia doadoahk wet. Pwehki irail poakehla riatail kan, irail wahlahng irail kepwe kan oh sewese irail en pousehlahte papah Siohwa, oh nan ekei irair, kamwahwihala de onohnsapahlda wasahn kaudok kan.—Pil kilang 2 Korint 8:1-4.
11. Ia duwen poakehla meteikan eh kin kawauwihala Samatailo nanleng?
11 Ni atail kin kasalehda atail poakehla meteikan mwurin kahpwal laud ehu, meteikan kin kilang tounmetei kan me kitail kin wia. Karasepe, nan 2019, melimel Hurricane Dorian kauwehla Wasahn Kaudok ehu nan Bahamas. Nin doken riatail ko ar onohnsapahlih wasahn kaudoko, re idek rehn soun wie ihmw men, me kaidehn emen Sounkadehdehn Siohwa, ia uwen pweinen eh pahn wia doadoahko. E ndaiong irail: “I men toukihda . . . mehn doadoahk, tohndoadoahk oh kepwe kan. . . . I men wia met ong amwail mwomwohdiso. Amwail wiewia ong kompoakepahmwail kan me kamwakid ie.” Pali laud en aramas akan nan sampah wet sohte ese Siohwa. Ahpw me tohto irail kin tetehk Sounkadehdehn Siohwa kan. Kitail kin uhdahn perenki en ese me atail wiewia en poakehla meteikan kak kahrehiong aramas akan en men esehla Siohwa me kin ketin “diren kadek kalahngan”!—Ep. 2:4.
12. Ia duwen en kakairada atail poakehla meteikan rahnwet eh kin kaunopkitailda ong kahn kamakam kowahlapo? (Kaudiahl 13:16, 17)
12 Dahme kahrehda kitail anahne kasalehda atail poakehla meteikan erein kahn kamakam kowahlapo? Paipel kasalehda me irail kan me sohte kin utung koperment kan en sampah wet pahn lelohng kahpwal kan ahnsou wet oh pil erein kahn kamakam kowahlapo. (Wadek Kaudiahl 13:16, 17.) Ele riatail kan anahne sawas pwehn alehdi soahng kan me re anahne. Ni atail Nanmwarkio, Krais Sises, eh pahn ketido pwehn kadeikada aramas, kitail men en mahsanih atail poakehla meteikan oh eri luke kitail en “sohsohki Wehio.”—Mad. 25:34-40.
KAKEHLAKA OMW LIMPOAK
13. Nin duwen me Rom 15:7 mahsanih, ia duwen tepin Kristian ko ar kakehlaka arail limpoakpene?
13 Koaros ese me tepin Kristian ko koaros kin limpoakpene. Ahpw ia duwe, e mengei ong irail en wia met? Medewehla wekpeseng en aramas akan nan mwomwohdiso en Rom. Ekei irail mehn Suhs kei me sukuhlki en peikiong Kosonned en Moseso, ahpw ekei kohsang wehi teikan, oh mwomwen arail tikida wekpeseng. Ekei Kristian ko ele wia lidu kei ah meteikan soh, oh mwein ekei naineki lidu kan. Ia duwen Kristian ko ar kak pousehlahte limpoakpene mendahki soangen wekpeseng ko? Wahnpoaron Pohl kangoange irail en kin “kasamwo emenemen.” (Wadek Rom 15:7.) Ia wehwehn eh koasoio? Lepin lokaiao “kasamwo” kin wehwehki en kadekohng de kasamwolong emen nan imwomw de en wiahki ih kompoakepahmw. Karasepe, Pohl padahkihong Pailimwon ia duwen eh pahn kasamwo liduwo Onesimus me tangasang eh wasa. E koasoia: “Kasamwo ih ni kadek.” (Pail. 17) Oh Persila oh Akwila kasamwo Apolos me sohte nohn ese padahk en Kristian duwehte ira, sang ni ara “kahrehda ih.” (Wiewia 18:26) Kristian ko sohte mweidohng arail wekpeseng en kahrehda kahpwal nanpwungarail ahpw irail kin kasamwo emenemen.
LIMPOAK
Kitail anahne limpoak en riatail kan koaros (Menlau kilang parakrap 15)
14. Ia duwen Anna oh eh pwoudo ara kasalehda limpoak?
14 Kitail pil kak kasalehda atail poakohng riatail Kristian kan sang ni atail wiahkihla irail kompoakepatail. Met pahn kamwakid irail en pil kasalehiong kitail limpoak. (2 Kor. 6:11-13) Medewehla dahme wiawihong Anna oh eh pwoudo. Mwurinte ara keseula ong ara pwukoa kapw en misineri nan Palikapi en Aperika, soumwahu lusulus en COVID-19 tepida. Pwehki soumwahu lusuluso, ira sohte kak tuhwong oh esehla riara Kristian kan nan mwomwohdisou. Ia duwen pwopwoudo ara kak kasalehda ara limpoak? Ira doadoahngki videoconference pwehn koasoiong riara ko wasao oh padahkihong irail ia uwen ara men tuhwong oh eseirailla. Peneinei ko kalahnganki limpoak me misineri ko kasalehda oh kin kalapw call oh textih ira. Dahme kahrehda ira song en esehla Kristian ko? Anna koasoia, “I sohte kak manokehla limpoak me riat Kristian kan kasalehiong ie oh ei peneineio ni ahnsou mwahu oh apwal. Arail mehn kahlemeng kamwakid ie en pil kasalehda limpoak.”
15. Dahme ke sukuhlkihsang ahn Vanessa mehn kahlemeng duwen en poakohng riatail kan koaros? (Pil kilang kilel.)
15 Me tohto rehtail kin iang mwomwohdiso kan me riatail kan weksang kitail oh me ahneki soangsoangen irair kan. Kitail kak kakehlaka atail limpoak ong irail koaros sang ni atail medemedewehte arail irair mwahu kan. Sister men me adaneki Vanessa, me kin papah New Zealand, kin apwalki ehuong ekei nan eh mwomwohdisou. Eri e koasoanehdi en dehr kin pohnsehsehla irail kan me arail mwekid kin kalidorih, ahpw en kalaudehla eh ahnsou ong irail. Eh wia met sewese ih en kilang dahme Siohwa kin ketin poakohngki irail. E koasoia: “Sang ahnsou me ei pwoudo wiahla emen sounapwalih me kin seiloak, se kin patehng riat Kristian tohto me arail irair kan wekpeseng, oh I diarada me met mengeiong ie en ehuong irail. Met I perenki soangen wekpeseng pwukat. E sansal me Siohwa pil ketin kupwurperenki met pwehki aramas akan me e ketin mweidohng en kaudokiong ih, koaros weksang emenemen.” Ni atail kin kilangwohng meteikan ni ahlohte me Siohwa kin ketin wia, kitail kin kadehdehda me kitail poakohng irail.—2 Kor. 8:24.
Erein kahn kamakam kowahlapo, Siohwa ketin inoukihda en pere kitail ni atail pousehlahte miniminiong riatail kan (Menlau kilang parakrap 16)
16. Dahme kahrehda limpoak pahn uhdahn kesempwal erein kahn kamakam kowahlapo? (Pil kilang kilel.)
16 Limpoak pahn uhdahn kesempwal erein kahn kamakam kowahlapo. Ni kahn kamakam kowahlapo eh pahn tepida, ia wasa kitail pahn diar ie mehn perepatail? Medewehla dahme Siohwa ketin kaweidki sapwellime aramas ako en wia ni ahnsou me mahwen wiawihong Papilon en mahso. E ketin mahsanih: “Nei aramas akan, kumwail pedolong nan imwamwail kan, oh ritingedi wenihmw. Kumwail rukula mahs lao sapwellimen Koht engieng imwisekla.” (Ais. 26:20) Mwein kitail pil pahn idawehn kaweid kohte erein kahn kamakam kowahlapo. “Imwamwail kan” ele dokedoke atail mwomwohdiso kan. Erein kahn kamakam kowahlapo, Siohwa ketin inoukihda me e pahn ketin perei kitail ma kitail pousehlahte miniminiong riatail Kristian kan. Eri, kitail en nantihong doadoahk laud ahnsou wet pwe kitail en uhdahn poakohng riatail kan. Atail pitla kakete poahsoandahsang atail wia met!
KAUNOPADA AHNSOU WET
17. Ma kitail kaunopada ahnsou wet, dahme kitail pahn kak wia erein kahn kamakam kowahlapo?
17 Rahn lapalap en Siohwa pahn wia ahnsou uhdahn apwal ehu ong aramas koaros. (Sep. 1:14, 15) Sapwellimen Siohwa aramas akan pahn pil lelohng lokolok. Ahpw ma kitail kaunopada ahnsou wet, kitail pahn kak meleilei oh sewese meteikan. Kitail pahn dadaurete pahn kahpwal sohte lipilipil. Ni ahnsou me riatail kan lelohng lokolok, kitail pahn wia uwen atail kak en sewese irail sang ni atail kasalehda poakehla meteikan oh kihda soahng kan me re anahne. Oh kitail pahn karanihete riatail kan me kitail poakohngalahr. Siohwa eri pahn ketin katingihkin kitail mour soutuk nan sampah ehu me kahpwal oh lokolok koaros pahn manokonokla.—Ais. 65:17.
KOUL 144 Tetehk Mwahu Ketingpomw!
a Kahn kamakam kowahlapo pahn kereniong tepida. Irair en dadaurete, poakehla meteikan, oh limpoak pahn sewese kitail en onopadahng ahnsou keieu apwal me aramas pahn lelohng. Tehk ia duwen tepin Kristian ko ar sukuhlki en kasalehda irair ko, ia duwen atail kak wia soahngohte rahnwet, oh ia duwen irair ko pahn kaunopkitailda ong kahn kamakam kowahlapo.
b Irail kan me men iang sawas nan soangen doadoahk pwukat anahne mahs audehda doaropwehn Local Design/Construction Volunteer (DC-50) de doaropwehn Volunteer Program (A-19) oh awih pwehn ale luhk en iang sawas.