Sises ketin padahngki me aramas akan en ahneki popohl rehn meteikan. Ahpw ehu ahnsowo, e mahsanihong sapwellime tohnpadahk ko: “Kumwail dehr medewe me I kodohn wahdo popohl nin sampah; kaidehkin popohl me I wa kohdo, ahpw kedlahs. Pwe I kodohn kahrehda liaktohrohr, ohl emen pahn uhwong eh pahpa, oh serepein emen pahn uhwong eh nohno, oh lih pwopwoud men pahn uhwong ahn eh pwoudo nohno.” (Mad. 10:34, 35) Ia wehwehn met?

Sises sohte kupwurki tohnpeneinei kan en tohrohrpeseng, ahpw e mwahngih me sapwellimen padahk kan pahn kakete kahrehda liaktohrohr nan ekei peneinei. Eri, irail kan me men wiahla sapwellimen Krais tohnpadahk oh papidaisla, anahne wehwehki me ekei pak arail peneinei kan sohte pahn pwungki arail pilipil. Ekei pak, arail pwoud de tohn arail peneinei teikan pahn uhwong irail oh kahrehda en apwal ong irail en lelepekohngete sapwellimen Krais padahk kan.

Paipel kangoange Kristian kan en “ahneki popohl rehn aramas koaros.” (Rom 12:18) Ahpw sapwellimen Sises padahk kan kak duwehte “kedlahs” ehu nan ekei peneinei. Met kin wiawi ni emen tohnpeneinei eh pwungki sapwellimen Sises padahk kan ahpw meteikan kin uhwong. Nan soangen irairo, tohnpeneineio kin wiahla “imwintihti” en mehmeno me sukusukuhlki padahk mehlel.​—Mad. 10:36.

Sapwellimen Krais tohnpadahk kan me kin kousoan rehn peneinei kan me iang ehu pelien lamalam tohrohr kin ekei pak anahne pilada ma irail pahn kaperenda Siohwa oh Sises de arail peneinei. Karasepe, ele tohn arail peneineio kin idingkihong irail en iang kasarawih rahnen kasarawi kan. Ni arail kin lelohng soangen kasongosongo, ihs me irail pahn kaperenda? Sises mahsanih: “Mehmen me kin poakohng seme de ine laudsang ie, e sohte warohng ie.” (Mad. 10:37) Sises sohte mahmahsanih me sapwellime tohnpadahk kan anahne uhdihsang poakohng arail pahpa nohno pwehn warohng ih. Ahpw, e ketin padapadahkihong irail ia duwen arail pahn pilada dahme keieu kesempwal nan arail mour. Ma tohn atail peneinei kin uhwong atail nannanti en kaudokiong Siohwa, kitail kin pousehlahte poakohng irail, ahpw kitail wehwehki me atail poakohng Koht kesempwalsang.

Uhwong sang peneinei kak uhdahn kansensuwed. Ahpw, sapwellimen Sises tohnpadahk kan anahne tamataman sapwellime mahsen ko: “Mehmen me sohte kapaikada eh tuhkehn kalokolok oh sohte idawehniehdo, e sohte warohng ie.” (Mad. 10:38) Met pil wehwehki me Kristian kan anahne wiahki uhwong sang peneinei kisehn kalokolok kan me sapwellimen Krais tohnpadahk kan anahne dadaur pah. Ahpw irail koapworopworki me pwehki arail wiewia mwahu kan, arail peneinei kan pahn wekidala arail madamadau oh men sukuhlki duwen Paipel.​—1 Pit. 3:1, 2.