1. Ia wekpeseng en dahme kitail anahne oh dahme kitail men ahneki?

 MIE soahng keite me kitail anahne pwe kitail en kin wie momour. Karasepe, kitail anahne mwenge, likou, oh wasahn kousoan. Ahpw sohte irepen soahng kan me kitail kin men ahneki. Oh aramas tohto sohte wehwehki me re sohte uhdahn anahne soahng koaros me re men ahneki.

2. Soahng dah kei me aramas kin men ahneki?

² Emen me kin kousoan nan sahpw semwehmwe ele men ahneki mehkot me uhdahn weksang dahme emen me kin mi nan sahpw kepwehpwe men ahneki. Nan ekei sahpw, aramas akan ele men naineki cell phone, waranki skuhder, de sapwaneki sahpw. Ahpw nan sahpw teikan, aramas akan ele men ahneki likou pweilaud tohto, ihmw laud, de sidohsa pweilaud. Ahpw sohte lipilipil ia wasa kitail mi ie de ia uwen mwohni me kitail naineki, kitail kakete tepida men ahneki soahng tohto me kitail sohte anahne de sohte kak pwainda.

3. Dahkot noahrok kepwe?

³ Dahkot noahrok kepwe? Iei madamadau en emen me kin nsenohki en ahneki kepwe kan laudsang eh nanpwungmwahu rehn Koht. E sohte kin itarki eh ahneki soahng kante me e anahne, ahpw e kin ahnsou koaros men ahneki tohtohsang. Pil irail kan me sohte naineki mwohni laud de sohte kin pwainda kepwe pweilaud kakete wiahla emen me kin noahrok kepwe. Re kakete sohla mwohneki mahs Wehio nan arail mour.​—Ipru 13:5.

4. Ia duwen Sehdan eh kin doadoahngki “mehkan me aramas kin kilang oh ahnehda”?

⁴ Sehdan men kitail en kamehlele me kitail kak ahneki mour nsenamwahu ihte ma kitail ahneki soahng tohto. Eri e kin doadoahngki eh sampah oh pil “mehkan me aramas kin kilang oh ahnehda” pwehn song en kahrehiong kitail en ahnsou koaros men ahneki tohtohsang. (1 Sohn 2:15-17; Sen. 3:6; Lep. Pad. 27:20) Kitail kin kalapw kilang oh rong dahme pesines kan kin kihda pwehn kahrehiong kitail en pwainda kepwe kapw kan. Mie pak ke pwainda mehkot nan sidohwa ihte pwehki e mwomw mwahu de pwehki ke kilang kilel en dipwisowo nan doaropwe kan? Ma ei, mwein ke esehda mwuhr me ke sohte uhdahn anahne dipwisowo. Ni atail kin pwurepwurehng pwainda kepwe kan me kitail sohte anahne, kitail kin pein kahpwalihala atail mour. Soahng pwukat kak kerempwa atail kin papah Siohwa oh kahrehda en sohla itar atail ahnsou ong onop Paipel, kaunopada oh iang mihting kan, oh kaukaule iang kalohk. Tamataman, wahnpoaron Sohn nda: “Sampah wet oh mehkoaros nin sampah me aramas kin inengieng kin sosohrala.”

5. Dahme kak wiawihong irail kan me kin doadoahngki pali laud en arail kehl en alehda kepwe tohto?

⁵ Sehdan men kitail en doadoahngki atail kehl pwehn wiahda mwohni laud oh alehda kepwe tohto a kaidehn en doadoahngki atail kehl ong papah Siohwa. (Mad. 6:24) Ahpw ma kitail kin nsenohkihte en alehda soahng tohto ong pein kitail, atail mour sohla pahn mie katepe. Kitail kak lelohng pwunod de kahpwal en mwohni. Suwedsang met, kitail kakete sohla pwoson Siohwa oh sapwellime Wehi. (1 Tim. 6:9, 10; Kaud. 3:17) Sises mahsanih me “soangen ineng teikan” kin duwehte dihpw tekatek me kak kasokehla werentuhke pwoat kahrehda e sohte kin wah.​—Mark 4:14, 18, 19.

6. Dahme kitail sukuhlkihsang Paruk?

⁶ Medewehla duwen Paruk, nein soukohp Seremaia sekteri. Ahnsou me Paruk tepida “raparapahki ehu kamwahu” ong pein ih, Siohwa ketin katamankihong me Serusalem pahn kereniong sohrala. Ahpw e ketin inoukihong Paruk me e pahn ketin doarehla eh mour. (Ser. 45:1-5) Paruk sohte anahne kasik mehkot mwahusang met. Siohwa sohte pahn ketin mweidohng ahn aramas kepwe ko en mihmihte. (Ser. 20:5) Rahnwet, kitail mi ni kaimwiseklahn imwin ahn Sehdan sampah. Eri met kaidehn ahnsou en alehda kepwe tohto ong pein kitail. Oh kitail en dehr kasik me mwurin kahn kamakam kowahlapo, kitail pahn ahnekihte kepwe kan me kitail ahneki ahnsou wet, mehnda ma kepwe pwukat uhdahn kesempwal ong kitail.​—Lep. Pad. 11:4; Mad. 24:21, 22; Luk 12:15.

7. Dahme kitail pahn koasoiapene, oh dahme kahrehda?

⁷ Eri ia duwen atail kak apwalih pein kitail oh atail peneinei oh kilikilangwohngete dahme keieu kesempwal nan mour? Ia duwen atail kak soikala noahrok kepwe? Oh dahme kak sewese kitail en sohla nohn pwunodki dahme kitail kin anahne alehda? Nan sapwellime Kapahrek en Pohn Dohl, Sises ketikihda kaweid me keieu mwahu ong kitail duwen atail kak wia met. (Mad. 6:19-21) Kitail pahn wadek oh koasoiapene Madiu 6:25-34. Met pahn kamehlelehiong kitail me kitail anahne rapahki mahs Wehio, a kaidehn kepwe kan.​—Luk 12:31.

8, 9. (a) Dahme kahrehda kitail en dehr nohn pwunodki soahng kan me kitail anahne? (b) Dahme Sises ketin mwahngih duwen aramas oh pil arail anahn kan?

⁸ Wadek Madiu 6:25. Sises mwahngih me sapwellime tohnpadahk kan kin pwunodki dahme re pahn tungoale, nim, oh likawih, kahrehda nan sapwellime Kapahrek en Pohn Dohl, e mahsanihong irail: “Dehr kin pwunodki . . . mourimwail kan.” Sises kupwurki sewese irail en wehwehki dahme kahrehda ren dehr nohn pwunodki soahng pwukat koaros. E mwahngih me ma irail kin nohn pwunod, pil pwunodki soahng kan me re uhdahn anahne, re kakete manokehla dahme keieu kesempwal nan mour. Sises uhdahn ketin nsenohki sapwellime tohnpadahk kan me kahrehda e pwurehng ketin katamankihong irail duwen keper wet pak pahieu nan sapwellime kapahrek.​—Mad. 6:27, 28, 31, 34.

⁹ Ahpw dahme kahrehda Sises mahsanihong kitail en dehr pwunodki dahme kitail pahn tungoale, nim, de likawih? Kitail sou kin anahne soahng pwukat? Ei, uhdahn! Oh ma sohte itar neitail mwohni en pwainda soahng pwukat, kitail kin pwunodki. Sises mwahngih duwen met. E mwahngih dahme aramas kin anahne. E pil mwahngih me “ni imwin rahn akan,” sapwellime tohnpadahk kan pahn mi nan ahnsou ehu me uhdahn apwal. (2 Tim. 3:1) Ni mehlel, aramas tohto rahnwet sohte kak diarada doadoahk en mwohni oh pweinen kepwe kan kin wie lalaudla. Oh nan wasa tohto, aramas akan kin uhdahn semwehmwe oh sohte itar de sohte mie kanarail mwenge. Ahpw Sises pil mwahngih me mouren aramas kesempwalsang “kisin mwenge, oh paliwar . . . kesempwalsang likou.”

10. Ni Sises eh ketin padahkihong sapwellime tohnpadahk ko ia duwen arail en kapakap, dahme e mahsanih me pahn keieu kesempwal nan arail mour?

¹⁰ Mwoweo, Sises ketin padahkihong sapwellime tohnpadahk ko me ni arail pahn kin kapakap, re anahne peki rehn Samarailo nanleng en ketikihong irail dahme re anahne. Re kak kapakap oh patohwan: “Komw ketikihdo rahnwet at tungoal me itarohng kiht.” (Mad. 6:11) Pil ehu ahnsou, e mahsanihong irail en kapakap oh nda: “Komw ketikihdo rahn koaros kisin tungoal me se anahne.” (Luk 11:3) Ahpw met sohte wehwehki me kitail en ahnsou koaros medemedewehte atail en alehdi dahme kitail anahne. Sises mahsanihong sapwellime kan me en kapakapki Wehin Koht en ketido kin kesempwalsang en kapakapki pein atail anahn kan. (Mad. 6:10; Luk 11:2) Pwehn sewese tohnpadahk ko ren uhdihsang arail pwunod, Sises ketin kamweitirailla ni eh katamankihong irail duwen Siohwa eh kin ketin apwalih sapwellime kepikipik kan koaros.

11, 12. Dahme kitail sukuhlkihsang mwomwen Siohwa eh kin ketin apwalih menpihr en pahnlahng kan? (Menlau kilang tepin kilel.)

¹¹ Wadek Madiu 6:26. Kitail anahne “tehk mwahu menpihr en pahnlahng kan.” Mendahki re tikitik, re kin mwenge laud. Ni mehlel, ma paliweren menpihr men laud duwehte paliweren aramas, e pahn mwenge laudsang aramas. Menpihr kan kin kang wahntuhke, werentuhke, kisin mahn kan, oh mwahs kan. Ahpw re sohte kin padokedi kanarail mwenge. Siohwa kin ketikihda soahng koaros me re anahne. (Mel. 147:9) E sohte kin ketikihong nan ewen mahn ako kanarail mwenge! Re anahne pein kohla oh rapahki, pwe e miehier.

¹² Sises uhdahn kamehlele me ma Semeo kin ketin apwalih mahn akan, e pahn pil ketin apwalih aramas. ^[1] (1 Pit. 5:6, 7) Kitail en duwehte menpihr kan me sohte kin dangahnga. Kitail anahne doadoahk pwehn padokedi kanatail mwenge de koadoahkihada mwohni pwehn pwainda. Siohwa kak ketin kapaiahda atail kin nannanti. Oh ni ahnsou me sohte itar neitail mwohni de kanatail mwenge, Koht pil kak ketikihong kitail dahme kitail anahne. Karasepe, ekei ele pahn sapankihong kitail dahme re ahneki. Siohwa pil kin ketikihong menpihr kan wasa  me ren mi ie. E ketikihong menpihr kan koahiek en kauwada pasarail, oh e ketin wiahda soahng kan me menpihr kan kak doadoahngki pwehn wiahda pasarail ko. Siohwa pil kak ketin sewese kitail diarada wasa mwahu me kitail oh atail peneinei kak kousoan ie.

13. Dahme kadehdehda me kitail kesempwalsang menpihr en pahnlahng kan?

¹³ Mwurin Sises eh ketin katamankihong sapwellime tohnpadahk ko me Siohwa kin ketin kamwenge menpihr kan, e mahsanihong irail: “Kumwail inenen kesempwalsang menpihr tohto!” (Pil kilang Luk 12:6, 7.) Ni eh mahsanih met, Sises ele ketin medemedewe duwen eh pahn kereniong ketin tounmeteikihla sapwellime mour ong aramas koaros. Ei, Krais sohte ketin pwoukihla menpihr kan de mahn teikan. E ketin pwoukinkitailla pwe kitail en kak mour kohkohlahte.​—Mad. 20:28.

14. Dahme aramas emen me kin pwunod sohte kak wia?

¹⁴ Wadek Madiu 6:27. Ia wehwehn Sises eh mahsanih me kitail sohte kak kareireikihla atail mour kisin ahnsou kis pwunupwunodki atail mour? Met wehwehki me kitail sohte kak kareireila atail mour pwunupwunodki soahng kan me kitail anahne. Ma kitail kin nohn pwunod, kitail kakete soumwahuda oh pil mehla.

15, 16. (a) Dahme kitail sukuhlkihsang mwomwen Siohwa eh kin ketin apwalih kiopw en nansapw akan? (Menlau kilang tepin kilel.) (b) Peidek dah kan me kitail ele anahne pein idek rehtail, oh dahme kahrehda?

¹⁵ Wadek Madiu 6:28-30. Kitail kin peren ni atail likawih likou mwahu, ahpw keieu ni ahnsou me kitail kin kohla kalohk de towehda mihting oh mihting tohrohr kan. Ahpw ia duwe, kitail anahne “pwunodki likou”? Sises pil pwurehng katamankihong sapwellime tohnpadahk kan duwen Siohwa eh kin ketin apwalih sapwellime kepikipik  kan. Sises ketin doadoahngki karasaras en “kiopw en nansapw akan.” Ele Sises ketin medemedewe soangen rohs kaselel kan me duwehte kiopw kan. Kiopw pwukat koaros sohte kin dehkada pein arail likou. Ahpw re me inenen kaselel me kahrehda Sises mahsanih me “pil Solomon, nan eh kepwehpwe mehlel, sohte mwahn kapwatkihda likou kaselel ehu duwehte apwoat irail”!

¹⁶ Medewehla dahme Sises mahsanih mwurin met: “Koht me kin ketin kapwatahda dipwen nansapw akan . . . ia duwe, e soh pahn ketin apwalih kumwail mwahusang e kin ketin apwalih mepwukat, oh ketin kalikawihkumwailda? Kumwail meid pwoson tikitik!” Ei, Koht uhdahn pahn ketin wia met! Ahpw sapwellimen Sises tohnpadahk ko anahne kalaudehla arail pwoson. (Mad. 8:26; 14:31; 16:8; 17:20) Irail anahne likih me Siohwa ketin kupwurki apwalih irail oh me e uhdahn pahn ketin wia met. A ia duwen kitail? Kitail kamehlele me Siohwa pahn ketin apwalih kitail?

17. Dahme kakete kauwehla atail nanpwungmwahu rehn Siohwa?

¹⁷ Wadek Madiu 6:31, 32. Me tohto me sehse Siohwa kin medemedewehte en naineki mwohni laud oh ahneki kepwe tohto. Ahpw ma kitail pil wia duwehte, kitail kak kauwehla atail nanpwungmwahu reh. Kitail ese me Siohwa iei Samatail oh e kin ketin poakohng kitail. Oh kitail uhdahn kamehlele me ma kitail wia dahme e kupwurki oh mwohneki mahs sapwellime Wehio nan atail mour, e pahn ketikihong kitail soahng koaros me kitail anahne oh pil tohtohsang. Kitail pil wehwehki me en ahneki nanpwungmwahu rehn Siohwa iei me kin uhdahn kaperenda kitail, oh met kin sewese kitail en itarkihte “kisin tungoal akan oh likou” me kitail anahne.​—1 Tim. 6:6-8.

18. Dahme Siohwa ketin mwahngih duwen kitail, oh dahme e pahn ketin wia ong kitail?

¹⁸ Wadek Madiu 6:33. Ma kitail kin mwohneki mahs Wehio nan atail mour, eri Siohwa pahn ketikihda soahng koaros me kitail anahne. Sises ketin kawehwehda dahme kahrehda kitail kak kamehlele inou wet. E mahsanih: “Samamwail me ketiket nanleng ketin mwahngih duwen amwail kin anahne mepwukat koaros.” Siohwa ketin mwahngih dahme ke anahne pil mwohn omw esehda me ke anahne. (Pil. 4:19) E ketin mwahngih iahd me kitail anahne likou pwehn likawih. E pil mwahngih soangen mwenge dah me ke pahn anahne. E pil kin mwahngih me kowe oh omw peneinei anahne wasahn kousoan. Siohwa pahn ketin tehk mwahu me ke pahn ale dahme ke uhdahn anahne.

19. Dahme kahrehda kitail sohte anahne nohn pwunodki dahme kakete wiawi ahnsou kohkohdo?

¹⁹ Wadek Madiu 6:34. Sises pil pwurehng mahsanihong sapwellime tohnpadahk ko: ‘Dehr kin pwunod.’ Siohwa pahn ketikihda dahme kitail anahne ehuehu rahn. Eri kitail sohte anahne nohn pwunodki dahme kakete wiawi ahnsou kohkohdo. Ma kitail kin pwunod, kitail kak tepida koapworopworkihla pein kitail, oh met kak kauwehla atail nanpwungmwahu rehn Siohwa. Kitail anahne likih ih ni unsek.​—Lep. Pad. 3:5, 6; Pil. 4:6, 7.

20. (a) Mehn akadei dah me ele ke men wiahda nan sapwellimen Siohwa doadoahk? (b) Dahme ke kak wia pwehn kihsang soahng kan me sohte nohn kesempwal nan omw mour?

²⁰ Ia uwen kansensuwed ma atail kehl sohte kin itar en papah Siohwa ni unsek pwehki atail kin nohn songosong en alehda soahng tohto! Kitail anahne patohwanohng Siohwa dahme keieu mwahu rehtail. Karasepe, ke kak keseula ehu wasa pwehn sewese mwomwohdiso ehu me anahne sounkalohk? Ke kak iang pioneer? De ma ke wia emen pioneer, mie pak ke medewe ken audehda doaropwe pwe ken iang Sukuhl ong Sounkalohki Wehio kan? Ke kak ele doadoahngki rahn kei nan wihk ehu pwehn iang sawas nan Pedel de nan ohpis en kawehwe? De mwein ke kak wiahla emen me kin toukihda pein ih pwehn iang pwihn en wia ihmw (Local Design/Construction) oh sewese kauwada Wasahn Kaudok kan. Medewehda dahme ke kak wia pwehn kihsang soahng kan me sohte nohn kesempwal nan omw mour pwe ken kak kalaudehla omw ahnsou oh kehl ong doadoahk en Wehio. Kisin koakon me oaralape “ Ia Duwen Omw Kak Kihsang Soahng kan me Sohte Nohn Kesempwal nan Mour” kak sawas. Kapakap ong Siohwa en ketin seweseiuk en pilada dahme ke anahne wia. Kowe eri tepida wiahda wekidekla kan me anahn.

21. Dahme pahn sewese kitail en karanihala Siohwa?

²¹ Sises ketin padahkihong kitail en rapahki mahs Wehin Koht. Ni atail wia met, kitail kin soikala atail nohn pwunodki soahng kan me kitail anahne. Kitail kin karanihala Siohwa pwehki kitail likih me e pahn ketin apwalih kitail. Kitail kin sukuhlki en kaunda pein kitail oh dehr pwainda soahng koaros me kitail noahroke de soahng koaros me sampah wet kin kihda, mehnda ma kitail kak pwainda. Ma kitail kihsang soahng kan me sohte nohn kesempwal nan atail mour ahnsou wet, met pahn sewese kitail en lelepekohngete Siohwa oh kak “lelohng ni mouro me uhdahn mour mehlel” me e ketin inoukihong kitail.​—1 Tim. 6:19.