I ipwidi nan pahr 1937, wasa ehu me soumwet kan kin doadoahkpene wia mwetuwel (kolkhoz) me karanih Tokmok, Kyrgyzstan. Ngehi oh ei peneinei mehn Kyrgyz, oh se kin lokaiahki lokaiahn Kyrgyz. Ei pahpa nohno wia soumwet kei oh ira kin doadoahk nan mwahto sang ni sohrahn lel ni soutik. Soumwet kan kin kalapw ale kanarail mwenge, ahpw re kin ale pweinarail pak ehute nan sounpar ehu. Ei nohno kin doadoahk laud pwehn apwalih ngehi oh riei kisin serepeino. Mwurin ei iang sukuhl sounparte limau, I uhdi oh sohla sukuhl. I tepida iang doadoahk nan mwahto rahn koaros.

Aramas tohto uhdahn semwehmwe wasa me I kin kousoan ie, oh doadoahk laud me se kin wia pwehn apwalih at anahn kan kin kahrehiong sen uhdahn pwangada. Nin duwen mwahnakapw emen, I sohte kin medemedewe kahrepen mour de ahnsou kohkohdo. I sohte medewe me padahk mehlel kaselel kan duwen Siohwa Koht oh dahme e kupwurki pahn wekidala ei mour. Mwomwen rongamwahwo eh lel Kyrgyzstan oh kohpeseng wia poadopoad kaselel ehu. E tepida wasa me I kohsang ni paliepeng en Kyrgyzstan.

Nan pahr 1950 samwa, padahk mehlel duwen Siohwa Koht tepida nan Kyrgyzstan. Pwe met en wiawi, padahk mehlel anahne powehdi madamadau en Communist. Dahme kahrehda? Pwehki mahso, Kyrgyzstan mi pahn kaundahn Union of Soviet Socialist Republics (USSR). Sounkadehdehn Siohwa kan nan USSR kin soupoupali me pid kaundahn koperment kan. (Sohn 18:36) Re kin kamakamala nin duwen imwintihti kei nan sahpw pwukat. Ahpw  sohte palien kaunda ehu kak kauhdi Mahsen en Koht en sair irail kan me ahneki mohngiong mehlel. Ni mehlel, ehu mehn kasukuhl kesempwal me I sukuhlki erein ei mour iei me rehn Siohwa, “mehkoaros kak pweida.”​—Mark 10:27.

Kalokolok me Sounkadehdehn Siohwa kan lelohng kin kahrehiong ren tohtohla nan Kyrgyzstan. Dahme kahrehda? Pwehki Siberia iang wehi kan en USSR, oh iei wasa me imwintihti kan en koperment wet kalipilipala ie. Ni ahnsou me re saledekla, me tohto kohla Kyrgyzstan, oh ekei irail wahdo padahk mehlel. Emil Yantzen me iang kalipilipala, ipwidi Kyrgyzstan nan pahr 1919. E selidi nan imweteng oh tuhwong Sounkadehde kan wasao. E mwekidki padahk mehlel oh pwurala eh wasao nan pahr 1956. Ih eri kousoanla Sokuluk, wasa me I kohsang ie. Nan pahr 1958, tepin mwomwohdiso me wiawihda nan Kyrgyzstan mi nan Sokuluk.

Mpen sounpar ehu mwurin mwo, Victor Vinter kohla mihla Sokuluk. Brother lelepek menet kin pwurepwurehng lelohng kahpwal kan. Pak riau e anahne mi nan imweteng erein sounpar siluh pwehki eh soupoupali; mwuhr e selidi sounpar eisek oh pil kalipilipala sounpar limau. Ahpw kalokolok sohte kauhdi kohpeseng en kaudok mehlel.

Nan pahr 1963 mie mpen Sounkadehde 160 nan Kyrgyzstan. Me tohto rehrail kohsang Sehmen, Ukraine, oh Russia. Emen rehrail iei Eduard Varter, e wia emen me kalipilipala me papidaisla nan Sehmen nan pahr 1924. Nan pahr 1940 samwa, Nazi kan kadarala ih nan imweteng (concentration camp), oh sounpar kei mwuri, Communist kan nan USSR kahrehiong Eduard en kalipilipala. Nan pahr 1961, brother lelepek menet keseula nan kahnimw en Kant, me uhdahn karanih ei wasao.

Elizabeth Fot, me wia sapwellimen Siohwa ladu loalopwoat, pil kin kousoan nan Kant. Pwehn pein apwalih ih, e kin deidei. Pwehki e kin samanih doadoahk wet, toahkte oh sounpadahk kan kin mwahuki oaht likou reh. Emen lih me kin oaht likou reh iei Aksamai Sultanalieva, me pwoudiki emen soundoadoahk en wasahn repen pwuhng. Aksamai kohla rehn Elizabeth pwehn oaht eh likou, ahpw e idek peidek tohto duwen kahrepen mour oh irair en me melahr akan. Elizabeth sapengala eh peidek ko sang nan Paipel. Mwuhr Aksamai wiahla sounkalohk ngoang men en rongamwahwo.

Pil erein ahnsowo, Nikolai Chimpoesh sang Moldova, idihdida nin duwen sounapwalih me kin seiloak oh wia doadoahk wet kereniong sounpar 30. Nikolai sohte kin ihte mwemweitla ni mwomwohdiso kan ahpw e pil kin koasoanehdi wiawihdahn oh kohpeseng en sawaspen Paipel kan. Kaun en koperment en wasao kin tetehkte dahme e kin wia. Eri, Eduard Vanter kangoange Nikolai oh nda: “Ma kaun en koperment kan idek rehmw peidek, ndaiong irail ni sansal me kitail kihsang neitail pwuhk kan sang poasen kaun nan Brooklyn. Kilang nan mesen pilismen en KGB-o. Ke sohte anahne masak mehkot.”​—Mad. 10:19.

Mwurin ara koasoipene, Nikolai pekederla ni poasen kaun en KGB nan Kant. E koasoiahda dahme wiawi mwuhr: “Ohlen KGB men idek ia wasa I kihsang nait pwuhk ko. I ndaiong me se kihsang Brooklyn. E sehse dahme e pahn ndahki met. E mweidala ien kohkohla oh e sohte pwurehng eker ie.” Soangen Sounkadehde eimah pwukat kin kanahieng arail pousehlahte kalohki rongamwahwo nan ei wasao nan paliepeng en Kyrgyzstan. Ni ahnsou me padahk  mehlel duwen Siohwa lella rehn at peneineio nan pahr 1980 samwa, ei pwoudo, Mairambubu, me tepin rong.

Mairambubu kohsang Naryn, kahnimw ehu nan Kyrgzstan. Ehu rahn nan August 1974, e mwemweitla ni imwen riei serepeino, wasa me se tepin tuhpene. I mwahukihda Mairambubu ahnsowohte. Se pwopwoudida rahnohte.

Nan January 1981, ni Mairambubu eh mi nan bus ehu kohkohlahng wasahn netineto, e rongada en liho koasoio me kitail koasoiapene mwoweo. Ei pwoudo men kalaudehla dahme e rongo, ih eri idek rehn liho ede oh nah adres. Liho nda me ih Apun, ahpw e anahne kanahieng pwehki ahnsowo nan pahr 1980 samwa, doadoahk en Sounkadehde kan keinapwidi. Apun sohte kihong ei pwoudo nah adreso, ahpw e ale nait adreso. Ei pwoudo uhdahn peren ni eh pwurodo imwato.

Mairambubu nda: “I rongada soahng mwahu kei. Lih emen ndaiong ie me ni ahnsou keren aramas akan solahr pahn mehla. Mahn lawalo kan pahn pil mandala.” Ong ie, met mwomwen ouraman ehu. I ndaiong, “Kita awih lao liho mwemweitdo rehta pwehn ndaiong kita oaritik kan.”

Mwurin sounpwong siluh, Apun mwemweitdo reht. E pil kin mwemweitdo mwurin mwo, me kahrehda se tuhwong ekei tepin Sounkadehde kan me wia mehn Kyrgyz kei. Sister pwukat kasalehiong kiht padahk mehlel kaselel kan duwen Siohwa oh kupwure ong aramas akan. Re wadek ong kiht pwuhko me oaralape From Paradise Lost to Paradise Regained. * Pwehki pwuhk wette me mi ni lokaiahn Tokmok, se kin pein ntingihda nait copy.

Ehu padahk me se tepin sukuhlki iei kokohpo nan Senesis 3:15. Sises, me Koht ketin idihada nin duwen atail Nanmwarki oh Mesaia, pahn kapwaiada kokohp wet. Rohng wet uhdahn kesempwal ong aramas koaros en rong! Oh e kesempwal kitail en iang lohki rong wet. (Mad. 24:14) Sohte pwand, padahk mehlel en Paipel tepida wekidala at mour.

Brother men nan Tokmok luke kiht en kohla ni ehu kapwopwoud. Ngehi oh ei pwoudo tehkada me wiewiahn Sounkadehde ko weksang ahn meteikan. Sohte sakau en wai ni kapwopwoudo, oh arail kamadipwo soandi mwahu. Kapwopwoud wet uhdahn  weksang dahme se kin kilang ni kapwopwoud teikan me aramas ko kin kalapw sakaula, arail wiewia kan suwed, oh re kin doadoahngki lokaia suwed.

Se pil iang towehda mihting en Kristian kan nan mwomwohdisohn Tokmok. Ma irair en pahnlahng mwahu, mihting pwukat kin wiawi nanwel. Riat Kristian kan ese me pilismen kan kin tetehk dahme se kin wia, ihme kahrehda brother kan anahne kanahieng. Ni ahnsoun sinoh, se kin tuhpene ni imwen emen pwehn wia at mihting kan. Mie pak kei me pilismen kan kohdo imwato pwe re men ese dahme se wiewia. Ni ahnsou me ngehi oh Mairambubu papidaisla nan July 1982 nan pillap en Chüy, se pil anahne kanahieng. (Mad. 10:16) Riat Kristian malaulau kei kin kohdo nanwelo pwehn pokonpene. Se koulki koul en kaping ong Siohwa oh rong padahk en papidais.

Nan pahr 1987, brother men peki I en mwemweitla rehn irail kan me men esehla padahk mehlel nan kahnimw en Balykchy. Sang imwato lella wasao se kin iang kisa erein awa pahieu. Mwurin at kin pwurala kalohk pak kei nan Balykchy, se esehda me me tohto men rong padahk mehlel wasao. E sansal me met wia ahnsou mwahu en kalaudehla at doadoahk en kalohk.

Ngehi oh Mairambubu kin kalapw kohla Balykchy. Se kin mi wasao pali laud en imwin wihk kan, kohla kalohk, oh wia at mihting en Kristian. Oaht kan ong nait pwuhk kan uhdahn laudla. Se wa pwuhk ko kohsang Tokmok nan ehd ehu (mishok) me mahs se kin doadoahngki ong pedehde kan. Ehd riau me direkihla pwuhk kan ong sounpwong ehu kereniong sohte itar ong aramas ko. Se kin kak kalohk ong pahsinse kan nan kisao sang at wasao lel Balykchy.

Nan pahr 1995, mwomwohdiso ehu wiawihda nan Balykchy​—sounpar waluh mwurin at mwemweitla wasao. Nan erein sounpar pwuko, e uhdahn pweilaud en seiloakseli nanpwungen Tokmok oh Balykchy. Nait mwohnio tikitik, eri ia duwen at apwalihala met? Brother men kin kalapw kihong kiht mwohni pwehn apwalihala at anahn akan. Siohwa ketin mwahngih me se men kalaudehla at kalohk, oh e ketin ‘ritingadahng kiht dipwisou kesempwal en nanleng.’ (Mal. 3:10) Ni mehlel, mehkoaros kak pweida rehn Siohwa!

Nan pahr 1992, I idihdida oh wiahla emen elder, tepin elder en Kyrgyz. Mie wiepen doadoahk en kalohk kapw kan me kohda nan at mwomwohdiso nan Tokmok. Mie nait tohnsukuhl en Paipel pwulopwul kan sang Kyrgyz ni wasahn sukuhl kan. Rehn irail me pwulopwul pwukat me se kin onop Paipel, emen wialahr kisehn Pwihn me Kin Apwalih Ohpis en Sounkadehdehn Siohwa kan, oh riemen wiahlahr pioneer tohrohr kei. Se pil kin men sewese meteikan nan at mihting kan. Nan pahr 1990 samwa, nait pwuhk kan oh pil mihting kan kin mi ni lokaiahn Russia. Ahpw tohtohla me kin lokaiahki lokaiahn Kyrgyz nan at mwomwohdiso. Eri I kin kawehwe oh met kin sewese kalaudehla arail wehwehki padahk mehlel.

Ngehi oh Mairambubu kin soupisengki apwalih at peneinei me tohtohla. Se kin wahla nait seri kan kalohk oh ni mihting kan. Nait serepeino Gulsayra, me sounparte 12 ahnsowo, kin perenki koasoiong aramas akan pohn ahl kan duwen Paipel. Nait seri ko  perenki wadlikihala iren Paipel kan. Ni ahl wet nait seri ko oh mwuhr, neirail seri ko kin perenki iang wia doadoahk kan nan mwomwohdiso. Sang nanpwungen nait seri meh 9 ko oh neirail seri 11 ko me momourte, meh 16 kin papah Siohwa oh iang arail pahpa nohno towehda mihting kan.

Riat Kristian kan me tapiada sapwellimen Siohwa doadoahk nan at wasao nan pahr 1950 samwa, pahn uhdahn pwuriamweikihla wekidala laud kan me wiawihong kiht. Ehu pwehki, sang pahr 1990 samwa, se ahneki saledek en kalohki rongamwahwo oh me tohto kin pokonpene.

Nan pahr 1991, ngehi oh ei pwoudo pahn ehdin iang towehda mihting tohrohr ehu nan Alma-Ata, me met adaneki Almaty nan Kazakhstan. Oh nan pahr 1993, ehdin riat Kristian kan nan Kyrgyzstan wia mihting tohrohr ehu nan wasahn mwadong laud ehu (Spartak Stadium) nan Bishkek. Erein wihk ehu, sounkalohk kan kamwakelehda wasahn mwadong laudo mwohn e pahn tepida. Kaun en wasao uhdahn mwekidkihda met me kahrehiong ih en mweidohng sen doadoahngki wasao ni soh isepe.

Nan pahr 1994, mehkot laud pil wiawi ni tepin nait pwuhk kan wiawihda ni lokaiahn Kyrgyz. Ahnsou wet, pwihn en kawehwe kan nan ohpis en Sounkadehdehn Siohwa kan nan Bishkek kin kaukaule kawehwe sawasepen Paipel kan ni lokaiahn Kyrgyz. Nan pahr 1998, Kyrgyzstan kamanahla nin duwen kosonned doadoahk en Sounkadehde kan. Atail pwihn nan sahpwo kekeirda oh met sounkalohk kan dauliher meh 5,000. Rahnwet mie mwomwohdiso 83 oh pwihn en kalohk 25 ni lokaiahn wai, China, Kyrgyz, Russia, Turkey, Uighur, Uzbek oh lokaiahn Russia me doadoahngki peh. Riatail Kristian pwukat koaros kohsang soangsoangen wasa kan ahpw kin miniminpene oh pahpa Siohwa. Siohwa me ketin kahrehda wekidekla kapwuriamwei pwukat koaros en kak pweida.

Siohwa pil ketin wekidala ei mour. I tikida nan peneinei semwehmwe ehu oh I iang sukuhl sounparte limau. Ahpw, Siohwa ketin doadoahngkin ie pwehn papah nin duwen elder men oh padahki padahk mehlel kesempwal kan en Paipel ong aramas akan me ale kasukuhl laudsang ie. Ni mehlel, Siohwa kin ketin kahrehda soahng kan en wiawi ni ahl me kapwuriamwei. Dahme I lelohng kamwakid ie en pousehlahte kadehdehda duwen Siohwa, me ong ih “mehkoaros kak pweida.”​—Mad. 19:26.