Ehu mwurin souwas en Rahn Sarawi, Kenneth oh Filomena me kin kousoan Curaçao, kohla tuhwong pwopwoud ehu me ira kin onop Paipel rehra.

Kenneth tamanda, “Ni ahnsou me se lella mwo, ihmwo ritidi oh sidohsao sohte mie. Ahpw mehkot kamwakid ie en koahl nein liho cell phone.”

Liho eri sapeng oh nda me eh pwoudo kohla doadoahk. Ahpw, ni ahnsowohte me e esehda me Kenneth oh Filomena mihmier mwo, e kohla ni wenihmwo oh lukeiralong nan imweo.

Ni ahnsowohte ira kak kilang oh ese me e wie sengiseng. Ni ahnsou me Kenneth kapakap pwehn tapiada arail onop Paipel, liho pil pwurehng tepida sengiseng. Eri ni kamantik Kenneth oh Filomena idek reh dahme sapwung.

Liho kawehwehda me e medewedahr en kemehla pein ih ni mwurin souwaso, oh e ntingtingih nah kisinlikou ong eh pwoudo ahpw ni ahnsou me Kenneth koahl, e uhdi. E ndaiong ira me e kin wie nsensuwed, ira eri ehukihong ih ekei mahsen kansenamwahu kan sang nan Paipel. E sansal me mehn kangoang wet wia mehn komour ehu.

Kenneth nda: “Se uhdahn kalahngankihong Siohwa eh ketin mweidohng kiht en sewese lih menet me uhdahn pwunod, oh keieu ni Eh ketin kamwakid kiht, mwein ele sang sapwellime tohnleng men de sapwellime manaman pwehn koahl liho!” a

Ia duwe, Kenneth oh Filomena kak kamehlele me Koht me ketin kauhdi met, mwein ele ni eh ketin doadoahngki tohnleng men de sang sapwellime manaman? De ihte en Kenneth koahl liho ni soh kasikpe me kahrehda soahng koaros mwahu?

Kitail sohte kak nda mehnia me mehlel. Ahpw dahme kitail ese iei me Koht kin ketin doadoahngki sapwellime tohnleng kan pwehn sewesehki aramas akan me pid arail nanpwungmwahu reh. Karasepe, Paipel mahsanih me Koht ketin doadoahngki tohnleng men pwehn kamwakid sounkalohk Kristian Pilip en sewese ohlen Idiopia lapalap men me kin raparapahki kaweid sang Koht.​—Wiewia 8:26-31.

Ekei pelien lamalam akan kin kahrehiong aramas en kamehlele ngehn manaman kan, me ekei wia sapwellimen Koht sounkair kadek kei de kin wia en emen sounsilasil. Aramas tohto sohte kin kamehlelehte me tohnleng kan mie ahpw me ngehn pwukat kin kamwakid irail ni ahl mwahu kei. Ahpw, ekei aramas sohte douluhl kin kamehlele tohnleng kan.

Uhdahn mie tohnleng? Ma iei, re tepisang ia? Dahme mehlel duwen tohnleng kan? Re kak kamwakid omw mour? Kitail pahn tehkpene mehn kadehde kan.