Madiu 9:1-38
9 Eri e ketida pohn pwohto, oh ketin seiloakla pali teio oh lella nan sapwellime kahnimwo.
2 A kilang! aramas ekei wadohng reh ohl mwoator emen me wonohn pohn roh ehu. Ni Sises eh mahsanihada arail pwoson, e ahpw mahsanihong me mwoatoro: “Eimah, nei pwutak! Dipomw kan lapwadahr.”
3 A sounkawehwehn Kosonnedo kei pein ndinda: “Ohl menet wie lahlahwe Koht.”
4 Sises, ni eh mwahngihada arail madamadau, e mahsanih: “Dahme kahrehda kumwail medemedewe soahng suwed kan nan mohngiongimwail?
5 Karasepe, mehnia me mengei en nda, ‘Dipomw kan lapwadahr,’ de nda, ‘Uhda oh alu’?
6 Ahpw, pwe kumwail en ese me Nein-aramas ahneki manaman en lapwahda dihp nin sampah—” eri e mahsanihong me mwoatoro: “Uhda, ale omw mehn roh, oh kohwei ni imwomwo.”
7 Ih eri uhda oh kohkohla ni imweo.
8 Ni pokono ar kilang met, irail masepwehkada oh kalinganahda Koht me ketikihong aramas akan soangen manaman wet.
9 Mwuri, ni Sises eh ketiketla sang wasao, e mahsanihada ohl emen me ede Madiu me mwomwohd nan ohpis en daksis, oh e mahsanihong: “Idawehniehla.” Ih eri uhda oh iangala.
10 Mwuhr ni eh sakasak* nan imwen Madiu, a kilang! sounrik daksis oh me dipan tohto kohdo rehn Sises oh sapwellime tohnpadahk ko oh tepida iang mwengemwenge.*
11 Ahpw ni Parisi ko ar kilangada met, irail ahpw ndaiong sapwellime tohnpadahk ko: “Dahme amwail sounpadahken iangki sounrik daksis oh me dipan akan mwengemwenge?”
12 Ni eh karongehda met, e mahsanih: “Aramas roson sohte anahne toahkte, ahpw irail me soumwahu me anahne.
13 Eri, kohwei oh esehla ia wehwehn met: ‘I anahne kadek kalahngan a kaidehn meirong.’ Pwe kaidehn me pwung kan me I kodohng luke, ahpw me dipan akan.”
14 Eri, nein Sohn tohnpadahk ko patohdo rehn Sises oh patohwanohng: “Dahme kahrehda kiht oh Parisi ko kin kaisihsol ahpw sapwellimomwi tohnpadahk kan sohte kin kaisihsol?”
15 Sises eri mahsanihong irail: “Sohte kahrepen kompoakepah kan en ohl kamwohdo ar pahn nsensuwed nindoken ohl kamwohdo eh mihmi rehrail, kaidehn? Ahpw rahn akan pahn kohdo me ohl kamwohdo pahn pehdsang irail, oh ih ahnsowo me irail pahn kaisihsol.
16 Sohte me kin deipinahiong ni likou mering mweinlikou kapw, pwe mweinlikou kapwo pahn teisang ni likowo oh teio pahn laudla.
17 Pil aramas sohte kin kihong wain kapw nan edin kilin mahn mering. Ma irail pahn wia met, eri edin kilin mahno pahn pospeseng oh waino wudekla oh edin kilin mahno ohla. Ahpw aramas kin kihong wain kapw nan edin kilin mahn kapw oh ira koaros pahn nekinek mwahu.”
18 Ni eh mahmahsanihong irail mepwukat, a kilang! soumas men pa leledo reh. E ahpw poaridi mwowe oh patohwanohng: “Mwein met, nei serepeino melahr, ahpw ketido oh ketikihdi limomwien powe, a e pahn mourda.”
19 Sises eri ketida oh ketin idawehnla iangahki sapwellime tohnpadahk ko.
20 A kilang! lih emen me lokolongkier soumwahu en nta pwilipwil erein sounpar 12, keilahng mpe sang mwuri oh doahke pwungipen sapwellime likou puhp,
21 pwe e kin ndindaiong pein ih: “Ma I pil doahkehte sapwellime likou puhp, I pahn mwahula.”
22 Sises ketin pirekek oh ni eh mahsanihada ih, e mahsanihong: “Ken eimah nei serepein! Omw pwoson me kamwahwihiukala.” A ni awaohte liho pa mwahula.
23 Eri, ni ahnsou me e ketilong nan imwen soumaso oh mahsanihada sounkesengki keseng pepeuk kan oh pokono ar mwoaromwoarong,
24 Sises eri mahsanih: “Kumwail pedoisang men, pwe kisin serepeinen sohte mehla, ahpw e wie memeir.” Irail ahpw tepida kouruhr en kepitki.
25 Mwurinte pokono ar pedoila likio, e ketilong oh ketin kolada pehn serepeino oh kisin serepeino eri pwourda.
26 Eri, rohng wet ahpw lohkseli wasao pwon.
27 Ni Sises eh ketiketla sang wasao, ohl maskun riemen ideidawehn oh weriwer patopatohwan: “Maing Nein Depit, komw kupwurei kiht.”
28 Mwurin eh ketilong nan ihmwo, ohl maskun ko kohdo reh oh Sises eri keinemwe rehra mahsanih: “Kumwa pwoson me I kak wia met?” A ira sapeng patohwan: “Ei maing Kaun.”
29 Ih eri ketin doahke masara ko oh mahsanih: “En wiawihong kumwa nin duwen amwa pwoson.”
30 Masara ko eri kak kilangada wasa. Sises pil ketin kalikirahdi mahsanih: “Kilang emen dehpa esehda met.”
31 Ahpw mwurin ara pedoila liki, ira lohkiseli nan wasao pwon duwen ih.
32 Ni ara mwesel kohkohla, a kilang! aramas ako wadohng ih ohl lohteng men me ngehn suwed tiada powe;
33 oh mwurin ngehn suwedo eh pekeussang reh, ohl lohtengo ahpw lokaiahda. Pokono ahpw pwuriamweikihla oh nda: “Se saikinte kilangada soahng wet nan Israel.”
34 Ahpw Parisi ko nda: “Ni manaman en kaunen ngehn suwed kan me e kin kauski ngehn suwed kan.”
35 Sises eri ketin kakahnseli nan kahnimw laud oh kisin kahnimw koaros, ketin padapadahk nan sinakoke kan oh ketin kalokalohki rongamwahu en Wehio oh pil ketin kamwahwihala soangen soumwahu oh luwet koaros.
36 Ni eh ketin mahsanihada pokon ehu, e ketin poakeirailla pwehki irail wiakaula oh sohte epwelparail* rasehng sihpw kan me sohte sileparail.
37 Ih eri mahsanihong sapwellime tohnpadahk ko: “Ei, rahket me laud, ahpw tohndoadoahk kan me malaulau.
38 Ihme kahrehda, kumwail peki rehn Soumas en rahket en ketin poaronehdo tohndoadoahk kan ong sapwellime rahk.”
Footnote kan
^ De “mwohd oh irekek ni tehpel.”
^ De “mwohd oh irekek ni tehpel.”
^ LK, “tepwasang kilirail oh re lekdekla.”
