کیہہ کدی توانوں کسے ایہو جہی مشکل دا سامنا ہویا اے جدے چ توانوں لگیا ہوئے کہ کوئی تواڈی مدد کرن لئی نئیں اے تے تُسی بالکل کلّے او؟ اَسی اِک بوہت مشکل دَور چ رہ رہے آں جدے چ سانوں ایہو جہے مسئلیاں دا سامنا کرنا پے سکدا اے جنہاں دی وجہ توں اَسی بے‌حوصلہ ہو سکنے آں تے کلّا پن محسوس کر سکنے آں۔ (‏2-‏تیمُتھیُس 3:‏1‏)‏ پر سانوں کلّے اپنے مسئلیاں نال لڑن دی ضرورت نئیں اے۔ بائبل چ دَسیا گیا اے کہ سچے دوست مصیبت دی گھڑی چ ساڈے بڑے کم آ سکدے نیں۔—‏اَمثال 17:‏17‏۔‏

جدوں پولُس نے اپنے کجھ دوستاں نال مِل کے مشنری دورے کیتے سن تے اوہدے ایہناں دوستاں نے کئی طریقیاں نال اوہدی مدد کیتی۔ (‏کُلسّیوں 4:‏7-‏11‏)‏ جدوں اوہ روم چ قید سی تے اوہدے دوستاں نے اوہدے لئی ایہو جہے کم کیتے جیہڑے اوہ آپ نئیں کر سکدا سی۔ مثال لئی، اِپَفردِتُس نے اوہنوں ضرورت دِیاں اوہ چیزاں پونچائیاں جیہڑے فِلپّی دے بھین بھراواں نے اوہدے لئی گھلیاں سن۔ (‏فِلپّیوں 4:‏18‏)‏ تے تخِکُس نے اوہدے خطاں نُوں فرق فرق کلیسیاواں تک پونچایا۔ (‏کُلسّیوں 4:‏7‏)‏ پولُس اپنے دوستاں دی مدد دی وجہ توں اوس ویلے وی یہوواہ دی خدمت کردا رہیا جدوں اوہدے گھر توں باہر جان تے پابندی سی تے جدوں اوہ قید چ سی۔ اَج تُسی سچے دوست کیویں ثابت ہو سکدے او؟‏

اَج وی ساڈے بھین بھرا ایس گل دی زندہ مثال نیں کہ اِک سچا دوست کیہو جیہا ہوندا اے۔ ذرا اِک ایہو جہی بھین دی مثال تے غور کرو جیہڑی بھین الزبتھ دی سچی دوست ثابت ہوئی۔ بھین الزبتھ ملک سپین چ اِک پہل‌کار اے۔ جدوں اوہنوں پتہ چلیا کہ اوہدی امی نُوں کینسر اے تے اوہ زیادہ دیر تک زندہ نئیں رہوے گی تے اوس بھین نے اوہدا حوصلہ ودھان لئی بوہت سارے میسج کیتے تے ایتاں گھلیاں۔ بھین الزبتھ نے دَسیا:‏ ”‏اوس بھین دے میسج پڑھ کے مینوں اپنیاں مشکلاں نال لڑن دی طاقت مِلی تے مینوں محسوس ہویا کہ مَیں کلّی نئیں آں۔“‏—‏اَمثال 18:‏24‏۔‏

جدوں اَسی یہوواہ دی خدمت کرن چ بھین بھراواں دی مدد کرنے آں تے اِنج اوہناں نال ساڈی دوستی مضبوط ہوندی اے۔ مثال لئی، جے تواڈے کول گڈی اے تے تُسی کسے وڈیرے بھین بھرا نُوں عبادت یاں مُنادی تے لے کے جا سکدے او۔ جدوں تُسی اِنج کرو گے تے اوہناں دی وجہ توں تواڈا حوصلہ تے تواڈی وجہ توں اوہناں دا حوصلہ ودھے گا۔ (‏رومیوں 1:‏12‏)‏ پر کجھ بھین بھرا اپنے گھروں باہر جا ای نئیں سکدے۔ اَسی ایہو جہے بھین بھراواں دے سچے دوست کیویں ثابت ہو سکنے آں؟‏

ساڈے کجھ ہم‌ایماناں دی صحت یاں حالات اوہناں نُوں عبادتاں تے جان دی اجازت نئیں دیندے۔ بھرا ڈیوڈ دی مثال تے غور کرو جنہوں کینسر سی۔ چھ مہینیاں تک اوہدا علاج چلدا رہیا۔ ایس سارے عرصے دے دوران اوہ تے اوہدی بیوی لڈیا ویڈیو کال دے ذریعے عبادتاں چ شامل ہوندے رہے۔‏

اوہناں دی کلیسیا دے بھین بھراواں نے اوہناں دا ساتھ کیویں دِتا؟ ہر عبادت توں بعد کجھ بھین بھرا اوہناں نال گل کردے سن۔ ایہدے علاوہ جدوں اوہناں وچوں کوئی جواب دیندا سی تے بھین بھرا میسج کر کے اوہناں نُوں دَسدے سن کہ اوہناں دے جواب توں اوہناں نُوں کِنّاں حوصلہ مِلیا اے۔ ایہدا کیہہ نتیجہ نکلیا؟ بھرا ڈیوڈ تے بھین لڈیا نُوں محسوس ہویا کہ اوہناں دے بھین بھرا اوہناں دے نال نیں۔‏

 کیہہ اَسی اپنے اوہناں بھین بھراواں نال مُنادی کر سکنے آں جیہڑے اپنے گھروں باہر نئیں جا سکدے؟ ایہدے لئی اَسی اپنے شیڈول چ تھوڑی تبدیلی کر سکنے آں۔ جدوں اَسی اِنج کراں گے تے اَسی ظاہر کراں گے کہ اَسی اوہناں بھین بھراواں نُوں بُھلے نئیں آں۔ (‏اَمثال 3:‏27‏)‏ اَسی اوہناں نال مِل کے خط تے ٹیلیفون دے ذریعے مُنادی کر سکنے آں۔ کلیسیا دے بزرگ ایہو جہے بندوبست کر سکدے نیں تاکہ ایہہ بھین بھرا ویڈیو کال دے ذریعے مُنادی دے اجلاس چ شامل ہو سکن۔ بھرا ڈیوڈ تے بھین لڈیا ایس بندوبست لئی اپنی کلیسیا دے بڑے شکرگزار نیں۔ بھرا ڈیوڈ نے کہیا:‏ ”‏مُنادی دے اجلاس چ ہون والی گل بات تے دُعا توں ساڈا بڑا حوصلہ ودھدا سی۔“‏ جیہڑے بھین بھرا اپنے گھروں باہر نئیں جا سکدے، جے اوہناں نُوں مناسب لگے تے تُسی اوہناں دے گھر کدی کدار بائبل کورس کرن والے لوکاں نُوں لجا سکدے او تاکہ تُسی ایہناں بھین بھراواں نال مِل کے اوہناں نُوں بائبل کورس کرا سکو۔‏

جدوں اَسی اوہناں بھین بھراواں نال وقت گزاراں گے جیہڑے گھروں باہر نئیں جا سکدے تے سانوں اوہناں دِیاں خوبیاں بارے پتہ چلے گا۔ ایس طرحاں ساڈی اوہناں نال پکی دوستی ہو جائے گی۔ مثال لئی، جدوں تُسی اوہناں نال مِل کے مُنادی کرو گے تے تُسی ویکھو گے کہ اوہ لوکاں دے دل تک پونچن لئی کِنّی مہارت نال خدا دے کلام نُوں استمال کردے نیں۔ ایہہ ویکھ کے تواڈے دل چ اوہناں لئی عزت ہور ودھ جائے گی۔ واقعی، جدوں اَسی یہوواہ دی خدمت کرن چ بھین بھراواں دی مدد کرنے آں تے ساڈی بوہت سارے بھین بھراواں نال دوستی ہو جاندی اے۔—‏2-‏کُرنتھیوں 6:‏13‏۔‏

جدوں پولُس مشکلاں دا سامنا کر رہیا سی تے اوہدا دوست طِطُس اوہنوں مِلن گیا۔ (‏2-‏کُرنتھیوں 7:‏5-‏7‏)‏ ایس وجہ توں پولُس نُوں بڑی تسلی مِلی۔ ایہہ گل سچ اے کہ اَسی اپنیاں گلاں توں بھین بھراواں نُوں تسلی دے سکنے آں۔ پر طِطُس دی مثال توں پتہ چلدا اے کہ اَسی اپنے ہم‌ایماناں نال وقت گزارن تے اوہناں دی مدد کرن نال وی اوہناں دا حوصلہ ودھا سکنے آں۔—‏1-‏یوحنا 3:‏18‏۔‏

روس چ رہن والے بھین بھرا مصیبت دی گھڑی چ اِک دُوجے دا ساتھ دے کے ساڈے لئی اِک بڑی ودھیا مثال قائم کر رہے نیں۔ ذرا بھرا سرگے تے اوہدی بیوی تاتیانہ دی مثال تے غور کرو۔ پولیس نے اوہناں دے گھر دی تلاشی لئی تے فیر اوہناں کولوں پچھ گچھ کرن لئی اپنے نال لے گئی۔ اوہناں نے تاتیانہ نُوں پہلاں چھڈ دِتا۔ سرگے نے کہیا:‏ ”‏جیویں ای تاتیانہ گھر پونچی تے ساڈی اِک دلیر بھین اوہنوں مِلن گئی۔ فیر چھیتی ای کجھ ہور بھین بھرا وی ساڈے گھر آئے تے گھر دی حالت ٹھیک کرن چ ساڈی مدد کیتی۔“‏

بھرا سرگے نے کہیا:‏ ”‏شروع توں ای مینوں اَمثال 17:‏17 بوہت پسند اے جتھے لکھیا اے:‏ سچا دوست ہمیشاں پیار وکھاندا اے تے مصیبت دی گھڑی چ اِک بھرا ثابت ہوندا اے۔ جدوں سانوں ظلم دا سامنا کرنا پیا تے ایس ایت چ لکھی گل مینوں ہور چنگی طرحاں سمجھ آئی۔ اوس ویلے واقعی مینوں اپنے بھین بھراواں دے ساتھ دی بڑی ضرورت سی۔ یہوواہ نے مینوں ایہو جہے دوست دِتے نیں جیہڑے بنا کسے ڈر تے خوف دے میرے نال کھلوتے رہے۔“‏

جدوں ساڈیاں مشکلاں ودھن گیاں تے سانوں اپنے دوستاں دے سہارے دی ضرورت ہوئے گی۔ تے وڈی مصیبت دے دوران تے سانوں اوہناں دے ساتھ دی ہور وی زیادہ ضرورت ہوئے گی۔ ایس لئی آؤ، اَسی ہُن توں ای اپنے ہم‌ایماناں لئی سچے دوست ثابت ہون دی پوری کوشش کرئیے۔—‏1-‏پطرس 4:‏7، 8‏۔‏