کیہہ توانوں یاد اے؟
تُسی ضرور ایس سال دے ”مینارِنگہبانی“ رسالیاں نُوں دھیان نال پڑھیا ہوئے گا۔ کیہہ تُسی ایہناں سوالاں دے جواب دے سکدے او؟
یہوواہ عورتاں نال کیویں پیش آندا اے؟
یہوواہ مرداں تے عورتاں نال اِکو طرحاں پیش آندا اے۔ اوہ عورتاں دی گل سُن دا اے۔ اوہنوں ایس گل دی پرواہ اے کہ عورتاں نُوں کیہڑے مسئلیاں دا سامنا اے تے اوہ کیہہ محسوس کردیاں نیں۔ نالے اوہ عورتاں تے بھروسا کردا اے کہ اوہ اوہدا کم کر سکدیاں نیں۔—م24.01 ص. 15، 16۔
اَسی اِفسیوں 5:7 تے کیویں عمل کر سکنے آں جدے چ لکھیا اے: ”اوہناں دے کماں چ شامل نہ ہووو“؟
پولُس رسول نے ایہو جہے لوکاں نال دوستی کرن توں خبردار کیتا جنہاں دی وجہ توں ساڈے لئی یہوواہ دے معیاراں تے چلنا مشکل ہو سکدا اے۔ ایہناں چ اوہ لوک وی شامل نیں جنہاں نال اَسی آمنے سامنے وقت گزارنے آں تے اوہ لوک وی جنہاں دی ویڈیوز اَسی سوشل میڈیا تے ویکھنے آں یاں اوہناں نال گل کرنے آں۔—م24.03 ص. 22، 23۔
سانوں کیہڑیاں جھوٹھیاں گلاں تے دھیان نئیں دینا چاہی دا؟
سانوں اوہناں جھوٹھیاں گلاں توں دُور رہنا چاہی دا اے جیہڑیاں ساڈے بھین بھراواں دے ذریعے ساڈے تک پونچ دِیاں نیں، کوئی ایہو جہی ایمیل جدے چ یہوواہ دے گواہواں بارے کوئی دلچسپ گل دَسی گئی ہوندی اے تے اوہناں لوکاں وَلّوں مِلن والی معلومات جیہڑے بائبل دے پیغام چ دلچسپی لین دا دِکھاوا کردے نیں پر اصل چ یہوواہ توں دُور ہو گئے نیں۔—م24.04 ص. 12۔
بادشاہ سلیمان، سدوم تے عمورہ چ ہلاک ہون والے لوک تے نوح دے زمانے چ مرن والے لوکاں بارے سانوں کیہہ پتہ اے تے کیہہ نئیں؟
اَسی پورے یقین نال نئیں کہہ سکدے کہ یہوواہ نے ایہناں لوکاں نُوں ہمیشاں لئی ختم کر دِتا اے۔ پر سانوں ایہہ ضرور پتہ اے کہ یہوواہ اوہناں لوکاں بارے سب کجھ جان دا اے تے اوہ بڑا رحمدل خدا اے۔—م24.05 ص. 3، 4۔
بائبل چ یہوواہ نُوں چٹان کہیا گیا اے۔ ایہدے توں سانوں کیس گل دا یقین ہوندا اے؟ (اِستثنا 32:4)
اَسی یہوواہ چ پناہ لے سکنے آں۔ اوہ اپنا ہر وعدہ پورا کردا اے ایس لئی اوہ بھروسے دے لائق اے۔ نالے اوہ کدی نئیں بدلدا کیونکہ اوہدی ذات تے اوہدا مقصد اَج وی اوہی اے جیہڑا شروع توں سی۔—م24.06 ص. 26-28۔
تُسی نوِیں کلیسیا چ اپنی جگہ کیویں بنا سکدے او؟
یہوواہ تے بھروسا رکھو۔ جیویں ماضی چ اوہنے اپنے بندیاں دی مدد کیتی، اوہ تواڈی وی مدد کرے گا۔ اپنی نوِیں کلیسیا دا مقابلہ پرانی کلیسیا نال نہ کرو۔ نوِیں کلیسیا چ دل لا کے کم کرو تے اوتھوں دے بھین بھراواں نال دوستی کرو۔—م24.07 ص. 26-28۔
متی 25 باب چ جیہڑیاں تِن مثالاں دِتیاں گئیاں نیں، اوہناں توں اَسی کیہہ سکھنے آں؟
بھیڈاں تے بکریاں دی مثال چ ایس گل تے زور دِتا گیا اے کہ اَسی اپنے آپ نُوں وفادار ثابت کرئیے۔ سمجھدار تے بےوقوف کنواریاں دی مثال توں اَسی سکھنے آں کہ اَسی چوکس تے تیار رہیے۔ تے کاروبار کرن والے غلاماں دی مثال توں پتہ چلدا اے کہ سانوں محنتی ہونا چاہی دا اے۔—م24.09 ص. 20-24۔
سلیمان دی ہیکل چ ڈیوڑھی دی اُنچائی کِنّی سی؟
کجھ پرانے نسخیاں چ 2-تواریخ 3:4 چ لکھیا اے کہ ایہدی اُنچائی 120 ہتھ یعنی 175 فٹ سی۔ پر کجھ دُوجے بھروسےمند نسخیاں چ ایہدی اُنچائی 20 ہتھ لکھی اے جیہڑی 30 فٹ بن دی اے۔ ہیکل دِیاں دیواراں دی موٹائی توں لگدا اے کہ ڈیوڑھی 20 ہتھ یعنی 30 فٹ اُچی سی۔—م24.10 ص. 31۔
ایس گل دا کیہہ مطلب اے کہ خادماں نُوں اِک بیوی دا شوہر ہونا چاہی دا اے؟ (1-تیمُتھیُس 3:12)
ایہدا مطلب اے کہ اوہدی شادی صرف اِک ای عورت نال ہوئے تے اوہنوں زناکاری نئیں کرنی چاہی دی۔ ایہدے علاوہ اوہنوں کسے ہور عورت نال دللگی وی نئیں کرنی چاہی دی۔—م24.11 ص. 18۔
اَسی ایہہ کیوں کہہ سکنے آں کہ یسوع نے یوحنا 6:53 چ جیہڑی گل کہی، اوہدے ذریعے اوہ ایہہ نئیں دَس رہیا سی کہ اوہدی موت دی یادگیری کیویں منائی جانی چاہی دی اے؟
یوحنا 6:53 چ یسوع نے لوکاں نُوں کہیا کہ اوہ اوہدا گوشت کھان تے اوہدا خون پین۔ اوہنے ایہہ گل 32 عیسوی چ اوہناں یہودیاں نُوں کہی جنہاں نُوں اوہدے تے ایمان ظاہر کرن دی لوڑ سی۔ جد کہ اوہنے اپنی موت دی یادگیری منان دا حکم اِک سال بعد یروشلم چ دِتا۔ اوس ویلے اوہ جنہاں نال گل کر رہیا سی، اوہ اوہدے وفادار رسول سن جنہاں نے اوہدے نال اسمان تے حکومت کرنی سی۔—م24.12 ص. 10، 11۔
