جدوں بنی‌اِسرائیل 40 سال تک ویرانے چ رہے تے عام طور تے اوہناں دی خوراک من ای سی۔ (‏خروج 16:‏35‏)‏ دو موقعیاں تے یہوواہ نے اوہناں نُوں کھان لئی بٹیر وی دِتے۔ (‏خروج 16:‏12، 13؛‏ گنتی 11:‏31‏)‏ پر بنی‌اِسرائیل کول کھان پین دِیاں تھوڑیاں بوہتیاں دُوجیاں شیواں وی ہے سن۔‏

مثال لئی، کدی کدار یہوواہ اوہناں نُوں ایہو جہیاں تھانواں تے لے جاندا سی جتھے اوہ آرام کر سکن تے ایہناں تھانواں تے اوہناں نُوں پانی تے کھان پین دِیاں دُوجیاں شیواں وی مل جاندیاں سن۔ (‏گنتی 10:‏33‏)‏ ایہو جہی اِک جگہ دا ناں ایلیم سی جتھے پانی دے 12 چشمے تے کھجور دے 70 درخت سن۔ (‏خروج 15:‏27‏)‏ اِک کتاب چ ایہناں کھجوراں بارے دَسیا گیا اے کہ ”‏ایہناں دے درخت بوہت سارے علاقیاں چ اُگدے نیں۔ ایہناں نُوں ریگستان چ رہن والے لوک خوراک دے طور تے استمال کردے نیں۔ ایہناں توں تیل وی بن‌دا اے تے لکھاں لوک ایہناں درختاں دی چھاں چ بہندے نیں۔“‏

بنی‌اِسرائیل ایہو جہی اِک ہور جگہ تے وی رُکے سن جنہوں اَج فیران کہیا جاندا اے تے ایہہ وادئ فیران دا حصہ اے۔ ایہہ وادی 130 کلومیٹر (‏81 میل)‏ لمی اے۔ اِک کتاب چ ایہدے بارے دَسیا گیا اے کہ ”‏ایہہ وادی سینا دِیاں وادیاں وچوں سب توں لمی، خوب‌صورت تے مشہور وادی اے۔ جے تُسی ایس وادی چ سفر کردے ہوئے اوس جگہ توں 45 کلومیٹر (‏28 میل)‏ اَگے جاؤ جتھے دریا سمندر نال ملدا اے تے توانوں ایہہ جگہ ملے گی جدا ناں فیران اے۔ ایہہ سمندر توں 2000 فٹ (‏610 میٹر)‏ دی اُنچائی تے وے تے 8.‏4 کلومیٹر (‏3 میل)‏ لمی اے۔ ایہدے چ کھجور دے درخت نیں تے ایہہ اینی خوب‌صورت اے کہ ایہنوں سینا دا باغِ‌عدن کہیا جاندا اے۔ ایہدے چ موجود کھجور دے ہزاراں درختاں دی وجہ توں صدیاں توں لوک ایتھے آ کے وس رہے نیں۔“‏

جدوں بنی‌اِسرائیل مصر توں نکلے سن تے اوہ اپنے نال آٹا گُنھن لئی برتن، گُنھیا ہویا آٹا، اناج تے تیل لے کے گئے ہون گے۔ ظاہری جہی گل اے کہ ایہہ چیزاں چھیتی ای مُک گئیاں ہون گیاں۔ لوک اپنے نال بوہت ساریاں بھیڈاں بکریاں تے گاواں مجاں وی لے کے گئے۔ (‏خروج 12:‏34-‏39‏)‏ کیونکہ ویرانے چ موسم بڑا گرم تے خشک سی ایس لئی کجھ جانور مر گئے ہون گے۔ کجھ جانوراں نُوں بنی‌اِسرائیل نے کھا لیا ہوئے گا تے کجھ نُوں قربانی دے طور تے چڑھا دِتا ہوئے گا، ایتھوں تک کہ جھوٹھے دیوتاواں لئی وی۔‏ a (‏اعمال 7:‏39-‏43‏)‏ پر فیر وی بنی‌اِسرائیل کول کجھ جانور ضرور ہون گے۔ ایہہ گل یہوواہ  دی اوس گل توں پتہ چلدی اے جیہڑی اوہنے بنی‌اِسرائیل نُوں اوس ویلے کہی جدوں اوہناں نے اوہدی نافرمانی کیتی سی۔ اوہنے اوہناں نُوں کہیا:‏ تواڈے پُتر 40 سال تک ویرانے چ بھیڈاں بکریاں چران گے۔ (‏گنتی 14:‏33‏)‏ ایس لئی اَسی کہہ سکنے آں کہ بنی‌اِسرائیل نُوں اپنے جانوراں توں دودھ تے گوشت ملدا رہیا ہوئے گا۔ پر ایہہ 40 سالاں تک 30 لکھ لوکاں دا پیٹ بھرن لئی کافی نئیں سی۔‏ b

بنی‌اِسرائیل دے جانوراں نُوں خوراک تے پانی کتھوں مِلدا سی؟‏ c اوہدوں ویرانے چ اَج دے مقابلے چ زیادہ بارش ہوندی سی تے زیادہ گھاہ بُوٹی اُگدی سی۔ کتاب ‏”‏اِنسائٹ آن دی سکرپچرز“‏ چ دَسیا گیا اے کہ ”‏3500 سال پہلاں عرب چ اَج دے مقابلے چ زیادہ پانی ہوندا سی۔ ایہدا ثبوت ایہہ وے کہ ایتھے بوہت ساریاں ڈُونگیاں وادیاں نیں جیہڑیاں خشک ہو چُکیاں نیں۔ ایہدے توں پتہ چلدا اے کہ ایہہ وادیاں کسے ویلے دریا دا حصہ سن یعنی اوتھے اینیاں بارشاں ہوندیاں سن کہ ندیاں وَگن لگ پیندیاں سن۔“‏ پر ایہدے باوجود ایہہ علاقہ بنجر تے خطرناک سی۔ (‏اِستثنا 8:‏14-‏16‏)‏ جے یہوواہ معجزہ کر کے پانی نہ دیندا تے بنی‌اِسرائیل تے اوہناں دے جانور ضرور مر جاندے۔—‏خروج 15:‏22-‏25؛‏ 17:‏1-‏6؛‏ گنتی 20:‏2،‏ 11‏۔‏

موسیٰ نے بنی‌اِسرائیل نُوں کہیا کہ یہوواہ نے توانوں من ایس لئی کھوایا تاکہ اوہ توانوں سکھائے کہ انسان نُوں زندہ رہن لئی صرف روٹی دی لوڑ نئیں سگوں ہر اوس گل دی لوڑ اے جیہڑی یہوواہ دے مونہہ چوں نکلدی اے۔—‏اِستثنا 8:‏3‏۔‏