یوحنا دی اِنجیل 3:1-36
3 اِک فریسی جدا ناں نیکُدیمس سی، اوہ یہودیاں دا اِک پیشوا سی۔
2 اوہ رات نُوں یسوع کول آیا تے اوہنوں کہیا: ”اُستاد،* سانوں پتہ اے کہ تُوں خدا وَلّوں تلیم دین لئی آیا ایں کیونکہ جیہڑے معجزے تُوں کرنا ایں، اوہ اوہی بندہ کر سکدا اے جدے نال خدا ہووے۔“
3 یسوع نے اوہنوں کہیا: ”مَیں تینوں سچ کہنا واں کہ جدوں تک کوئی دُبارہ پیدا نہ ہوئے،* اوہ خدا دی بادشاہی نُوں نئیں ویکھ سکدا۔“
4 نیکُدیمس نے اوہنوں پچھیا: ”جدوں کوئی انسان وڈا ہو جاندا اے تے اوہ دُبارہ کیویں پیدا ہوسکدا اے؟ اوہ اپنی ماں دے پیٹ چ جاکے فیر توں پیدا تے نئیں ہو سکدا۔“
5 یسوع نے جواب دِتا: ”مَیں تینوں سچ کہنا واں کہ جدوں تک اِک بندہ پانی تے پاک روح نال پیدا نئیں ہوندا، اوہ خدا دی بادشاہی چ نئیں جا سکدا۔
6 جیہڑا انسان توں پیدا ہوندا اے، اوہ انسان ہوندا اے۔ پر جیہڑا پاک روح توں پیدا ہوندا اے، اوہ خدا دا پُتر ہوندا اے۔
7 میری ایس گل توں حیران نہ ہو کہ توانوں ساریاں نُوں دُبارہ پیدا ہونا پووے گا۔
8 ہوا جدھر چاہندی اے، اودھر نُوں چلدی اے۔ تُوں اوہدی بس آواز سُننا ایں پر تینوں ایہہ پتہ نئیں ہوندا کہ ایہہ کِدھروں آ رہی اے تے کِدھر جا رہی اے۔ پاک روح نال پیدا ہون والا وی ایسے طرحاں ہوندا اے۔“
9 نیکُدیمس نے اوہنوں پچھیا: ”ایہہ کیویں ہو سکدا اے؟“
10 یسوع نے اوہنوں جواب دِتا: ”اِسرائیلی لوکاں دا اُستاد ہو کے وی تینوں ایہناں گلاں بارے کجھ نئیں پتہ؟
11 مَیں تینوں سچ کہنا واں کہ جو اَسی جاننے آں، اوہدے بارے دَسنے آں تے جو اَسی ویکھیا اے، اوہدے بارے گواہی دینے آں۔ پر تُسی لوک ساڈی گواہی قبول نئیں کردے۔
12 مَیں توانوں زمین دِیاں چیزاں بارے دَسیا، پر تُسی میرا یقین نئیں کیتا۔ جے مَیں توانوں اسمان دِیاں چیزاں بارے دَساں تے تُسی میرا یقین کیویں کرو گے؟
13 ایہدے علاوہ کوئی وی انسان اسمان تے نئیں گیا سوائے اوہدے جیہڑا اسمان توں آیا اے یعنی انسان دا بیٹا۔*
14 تے جیس طرحاں موسیٰ نے ویرانے چ سَپ نُوں کھمبے تے ٹنگیا سی، اوسے طرحاں انسان دے بیٹے نُوں وی ٹنگیا جائے گا
15 تاکہ جیہڑا وی اوہدے تے ایمان لیائے، اوہ ہمیشاں دی زندگی پائے۔
16 کیونکہ خدا نُوں دُنیا نال اینی محبت اے کہ اوہنے اپنا اکلوتا پُتر* دے دِتا تاکہ جیہڑا وی اوہدے تے ایمان ظاہر کرے، اوہ ہلاک نہ ہوئے سگوں ہمیشاں دی زندگی پائے۔
17 خدا نے اپنے پُتر نُوں دُنیا چ ایس لئی نئیں گھلیا کہ اوہ دُنیا نُوں قصوروار ٹھہرائے سگوں ایس لئی گھلیا کہ دُنیا اوہدے ذریعے نجات پائے۔
18 جیہڑا اوہدے تے ایمان ظاہر کردا اے، اوہنوں قصوروار نئیں ٹھہرایا جائے گا۔ پر جیہڑا اوہدے تے ایمان ظاہر نئیں کردا، اوہنوں قصوروار ٹھہرا دِتا گیا اے کیونکہ اوہنے خدا دے اکلوتے پُتر دے ناں تے ایمان ظاہر نئیں کیتا۔
19 لوکاں نُوں قصوروار ایس بِنا تے ٹھہرایا جاندا اے کہ چانن دُنیا وچ آیا پر اوہناں نے چانن دی بجائے نھیرے نُوں پیار کیتا کیونکہ اوہناں دے کم بھیڑے سن۔
20 جیہڑا بھیڑے کم کردا رہندا اے، اوہ چانن نال نفرت کردا اے تے چانن چ نئیں آندا تاکہ اوہدے بھیڑے کم ظاہر نہ ہو جان۔*
21 پر جیہڑا چنگے کم کردا اے، اوہ چانن چ آندا اے تاکہ ایہہ ظاہر ہو جائے کہ اوہدے کم خدا دی مرضی دے مطابق نیں۔“
22 ایہدے بعد یسوع اپنے شاگرداں نال یہودیہ دے پِنڈاں چ گیا۔ اوتھے اوہ اوہناں نال تھوڑا چِر رہیا تے لوکاں نُوں بپتسمہ دِتا۔
23 پر یوحنا لوکاں نُوں عینون چ بپتسمہ دے رہیا سی جیہڑا شالیم دے نیڑے وے کیونکہ اوتھے بوہت پانی سی تے لوک اوہدے کول بپتسمہ لین لئی آندے رہے۔
24 یوحنا نُوں حالے تک قید نئیں کیتا گیا سی۔
25 فیر پاک ہون دی رویت بارے یوحنا دے شاگرداں دی اِک یہودی نال بحث ہوئی۔
26 ایس لئی اوہناں نے یوحنا کول آ کے کہیا: ”اُستاد،* اوہ آدمی جیہڑا تیرے نال دریائے یردن دے پار سی تے جدے بارے تُوں گواہی دِتی سی، ویکھ، اوہ لوکاں نُوں بپتسمہ دے رہیا اے تے سارے لوک اوہدے کول جا رہے نیں۔“
27 یوحنا نے اوہناں نُوں جواب دِتا: ”اِک بندے نُوں کوئی وی چیز اوہدوں تک نئیں مِل سکدی جدوں تک خدا اوہنوں نہ دَوے۔
28 تُسی آپ میری ایس گل دے گواہ او کہ مَیں کہیا سی: ”مَیں مسیح نئیں آں۔ پر مینوں اوہدے اَگے اَگے گھلیا گیا اے۔“
29 لاڑا اوہی ہوندا اے جدی ووہٹی ہوندی اے۔ جدوں لاڑے نال کھلوتا اوہدا دوست لاڑے دی آواز سُن دا اے تے اوہنوں بڑی خوشی ہوندی اے۔ ایسے طرحاں مَیں وی بڑا خوش آں۔
30 ایہہ بوہت ضروری اے کہ اوہ ودھدا جائے تے مَیں گھٹ دا جاواں۔“
31 جیہڑا اُتوں آیا اے، اوہدا ساریاں تے اِختیار اے۔ جیہڑا زمین توں اے، اوہ زمین دا ای اے۔ ایسے لئی اوہ زمین دِیاں چیزاں بارے گلاں کردا اے۔ جیہڑا اسمان توں آیا اے، اوہدا ساریاں تے اِختیار اے۔
32 اوہنے جو وی ویکھیا تے سُنیا اے، اوہ اوہدے بارے گواہی دیندا اے۔ پر کوئی وی اوہدی گواہی نُوں قبول نئیں کردا۔
33 جیہڑا وی اوہدی گواہی نُوں قبول کردا اے، اوہ ایمان رکھدا اے* کہ خدا سچا اے۔
34 جنہوں خدا نے گھلیا اے، اوہ خدا دِیاں گلاں کردا اے کیونکہ خدا پاک روح دین چ کنجوسی نئیں کردا۔
35 باپ اپنے پُتر نُوں پیار کردا اے تے اوہنے سب کجھ اوہدے حوالے کر دِتا اے۔
36 جیہڑا پُتر تے ایمان ظاہر کردا اے، اوہنوں ہمیشاں دی زندگی ملے گی۔ پر جیہڑا پُتر دا کہنا نئیں من دا، اوہنوں زندگی نئیں ملے گی سگوں اوہنوں خدا دے غضب دا سامنا کرنا پووے گا۔
فٹ نوٹ
^ یونانی چ: ”ربّی۔“
^ یاں شاید، ”اسمانوں پیدا نہ ہوئے۔“
^ ”لفظاں دی وضاحت“ نُوں ویکھو۔
^ یاں، ”اوہ اِکو پُتر جنہوں خدا نے آپ بنایا سی۔“
^ یونانی چ: ”تاکہ اوہدے کماں دی درستی نہ کیتی جائے۔“
^ یونانی چ: ”ربّی۔“
^ یونانی چ: ”ایس گل تے مُہر لاندا اے۔“
