متی دی اِنجیل 23:1-39
23 فیر یسوع نے لوکاں تے اپنے شاگرداں نال گل کردے ہوئیاں ایہہ کہیا:
2 ”شریعت دے عالم تے فریسی موسیٰ دی گدی تے بہہ گئے نیں۔*
3 ایس لئی جیہڑے کم اوہ توانوں کرن لئی کہندے نیں، اوہ سارے کم کرو۔ پر جیہڑے کم اوہ آپ کردے نیں، اوہ نہ کرو کیونکہ اوہ آپ ای اپنی تلیم تے عمل نئیں کردے۔
4 اوہناں دے بنائے ہوئے قانون وڈے بھار وانگوں نیں جیہڑے اوہ لوکاں دے موڈھیاں تے رکھدے نیں پر آپ اوہنوں چُکن لئی اپنی اُنگلی وی نئیں لاندے۔
5 اوہ جیہڑے وی کم کردے نیں دکھاوے لئی کردے نیں۔ اوہ اپنی حفاظت لئی دُوجیاں نالوں وڈے تعویت* پاندے نیں تے اپنے کپڑیاں اُتے دُوجیاں نالوں وڈیاں جھالراں لاندے نیں۔
6 اوہ دعوتاں چ خاص تھانواں اُتے تے عبادتگاہ چ سب توں اَگے بیٹھنا پسند کردے نیں۔
7 اوہ چاہندے نیں کہ بازاراں چ لوک اوہناں نُوں سلاماں کرن تے اوہناں نُوں اُستاد* کہہ کے بلان۔
8 پر توانوں کوئی وی اُستاد نہ کہوے کیونکہ تواڈا اُستاد اِک ای اے تے تُسی سارے آپس چ بھرا او۔
9 نالے زمین تے کسے نُوں وی اپنا باپ* نہ کہنا کیونکہ تواڈا باپ اِک ای اے جیہڑا اسمان چ وے۔
10 کوئی توانوں رہنما وی نہ کہوے کیونکہ تواڈا رہنما اِک ای اے یعنی مسیح
11 سگوں جیہڑا تواڈے وچ سب توں وڈا اے، اوہ تواڈا خادم بنے۔
12 جیہڑا اپنے آپ نُوں وڈا سمجھدا اے، اوہنوں چھوٹا کیتا جائے گا تے جیہڑا اپنے آپ نُوں چھوٹا سمجھدا اے، اوہنوں وڈا کیتا جائے گا۔
13 شریعت دے عالمو تے فریسیو، اَے پاکھنڈیو، تواڈے تے لعنت! کیونکہ تُسی لوکاں لئی اسمان دی بادشاہی دے دروازے بند کردے او۔ تُسی نہ آپ اوہدے چ جاندے او تے نہ ای اوہناں نُوں جان دیندے او جیہڑے اوہدے چ جانا چاہندے نیں۔
14 *—
15 شریعت دے عالمو تے فریسیو، اَے پاکھنڈیو، تواڈے تے لعنت! کیونکہ تُسی کسے نُوں یہودی مذہب چ لیان لئی سمندر تے زمین تے دُور دُور تک سفر کردے او پر جدوں اوہ یہودی بن جاندا اے تے تُسی اوہنوں اپنے نالوں وی دُونا ہنوم دی وادی* دی سزا دے لائق بنا دیندے او۔
16 لعنت اے تواڈے تے اَنھے رہنماؤ، تُسی کہندے او: ”جے کوئی ہیکل دی قسم کھاندا اے تے کوئی گل نئیں۔ پر جے اوہ ہیکل دے سونے دی قسم کھاندا اے تے اوہنوں اپنی قسم ضرور پوری کرنی چاہی دی اے۔“
17 بےوقوفو تے اَنھیو! کیہڑی چیز زیادہ اہم اے، سونا یاں ہیکل جدی وجہ توں سونا پاک ٹھہردا اے؟
18 نالے تُسی ایہہ وی کہندے او: ”جے کوئی قربانگاہ دی قسم کھاندا اے تے کوئی گل نئیں۔ پر جے کوئی قربانگاہ تے رکھے ہوئے نذرانے دی قسم کھاندا اے تے اوہنوں اپنی قسم ضرور پوری کرنی چاہی دی اے۔“
19 اَنھیو! کیہڑی چیز زیادہ اہم اے، نذرانہ یاں قربانگاہ جدی وجہ توں نذرانہ پاک ٹھہردا اے؟
20 اصل چ جیہڑا قربانگاہ دی قسم کھاندا اے، اوہ ایہدی تے ایہدے اُتے چڑھائے گئے نذرانیاں دی وی قسم کھاندا اے۔
21 تے جیہڑا ہیکل دی قسم کھاندا اے، اوہ ایہدی تے اوس خدا دی وی قسم کھاندا اے جدا ایہہ گھر اے۔
22 تے جیہڑا اسمان دی قسم کھاندا اے، اوہ خدا دے تخت دی تے اوہدے تے بیٹھن والے دی وی قسم کھاندا اے۔
23 شریعت دے عالمو تے فریسیو، اَے پاکھنڈیو، تواڈے تے لعنت! کیونکہ تُسی پودینے، اجوائن تے زیرے دا دسواں حصہ تے دیندے او پر شریعت دِیاں زیادہ ضروری گلاں یعنی کہ اِنصاف، رحم تے وفاداری* نُوں نظرانداز کر دیندے او۔ دَسواں حصہ تے دینا ای دینا اے پر زیادہ ضروری گلاں نُوں وی نظرانداز نہ کرو۔
24 اَنھے رہنماؤ، تُسی مچھر نُوں تے چھان کے کڈھ دیندے او پر اُونٹھ نُوں نگل جاندے او۔
25 شریعت دے عالمو تے فریسیو، اَے پاکھنڈیو، تواڈے تے لعنت! کیونکہ تُسی پیالے تے تھالی نُوں باہروں تے صاف کردے او پر اوہ اندروں لالچ* تے بےقابو خواہشاں نال بھرے ہوندے نیں۔
26 اَنھے فریسیو، پیالے تے تھالی نُوں پہلاں اندروں صاف کرو تاکہ ایہہ باہروں وی صاف ہو جان۔
27 شریعت دے عالمو تے فریسیو، اَے پاکھنڈیو، تواڈے تے لعنت! کیونکہ تُسی اوہناں قبراں وانگوں او جنہاں تے سفیدی کیتی گئی اے۔ اوہ باہروں تے سوہنیاں لگدیاں نیں پر اندروں مُردیاں دِیاں ہڈیاں تے ہر طرحاں دے گندمند نال بھریاں ہوندیاں نیں۔
28 ایسے طرحاں تُسی وی لوکاں نُوں باہروں تے نیک نظر آندے او پر اندروں پاکھنڈ تے ہر طرحاں دی بُرائی نال بھرے ہوئے او۔
29 شریعت دے عالمو تے فریسیو، اَے پاکھنڈیو، تواڈے تے لعنت! کیونکہ تُسی نبیاں دِیاں قبراں بناندے او تے نیک لوکاں دِیاں قبراں نُوں سجاندے او۔
30 نالے تُسی کہندے او: ”جے اَسی اپنے پیو دادیاں دے زمانے چ ہوندے تے اَسی اوہناں نال نبیاں نُوں قتل کرن چ کدی وی شامل نہ ہوندے۔“
31 ایس طرحاں تُسی اپنے خلاف آپ ای گواہی دیندے او کہ تُسی نبیاں دے قاتلاں دی اولاد او۔
32 تواڈے پیو دادیاں نے گُناہ کرن چ جیہڑی کسر چھڈی اے، اوہنوں ہُن تُسی پورا* کر دَوو۔
33 اَے سَپو تے زہریلے سَپولیو، تُسی ہنوم دی وادی* دی سزا توں بچ کے کتھے بھجو گے؟
34 ایس لئی مَیں تواڈے کول نبیاں،سیانیاں تے اُستاداں نُوں بھیج رہیا واں۔ اوہناں وچوں کجھ نُوں تُسی قتل کرو گے، کجھ نُوں سُولی تے ٹنگ دَوو گے تے کجھ نُوں اپنیاں عبادتگاہواں چ کوڑے مارو گے تے شہر شہر اوہناں تے ظلم کرو گے
35 تاکہ دُنیا وچ جِنّے وی نیک بندیاں دا قتل کیتا گیا اے، اوہناں ساریاں دا خون تواڈے سِر لگے یعنی نیک ہابل دے خون توں لے کے برکیاہ دے پُتر زکریاہ دے خون تک جنہوں تُسی پاک مقام تے قربانگاہ دے وچکار قتل کیتا سی۔
36 مَیں توانوں سچ کہنا واں کہ ایہناں سارے کماں دا حساب ایس پُشت کولوں لیا جائے گا۔
37 اَے یروشلیم، اَے یروشلیم، نبیاں دے قاتل، خدا نے جنہاں نُوں تیرے کول گھلیا تُوں اوہناں نُوں پتھر مار مار کے جانوں مار دِتا۔ مَیں کِنّی واری چاہیا کہ مَیں تیرے بچیاں نُوں جمع کر لوَاں جیویں کُکڑی اپنے چُوچیاں نُوں اپنے پَراں تھلے جمع کردی اے۔ پر تُوں، ایہہ نئیں چاہیا۔
38 ویکھ! خدا نے تیرے گھر* نُوں چھڈ دِتا اے۔*
39 مَیں توانوں کہنا واں کہ تُسی اَج دے بعد مینوں اوہدوں تک نئیں ویکھو گے جدوں تک ایہہ نئیں کہوو گے: ”مبارک اے اوہ جیہڑا یہوواہ* دے ناں تے آندا اے۔““
فٹ نوٹ
^ یعنی خدا دے نمائندے بن بیٹھے نیں۔
^ ایہہ چھوٹیاں چھوٹیاں ڈبیاں ہوندیاں سن جنہاں چ موسیٰ دی شریعت دِیاں ایتاں لکھ کے رکھیاں جاندیاں سن تے یہودی آدمی ایہناں نُوں اپنے متھے تے کھبی بانہہ تے بنھ دے سن۔
^ یعنی ربّی۔ (ایہہ اِک عبرانی لقب اے جیہڑا یہودی اُستاد لئی استمال ہوندا اے۔)
^ یسوع ایتھے ایہہ کہہ رہیا سی کہ کسے نُوں وی مذہبی لحاظ نال باپ دا لقب نہ دِتا جائے جیویں کہ فادر وغیرہ۔
^ متی 17:21 دے فٹنوٹ نُوں ویکھو۔
^ ”لفظاں دی وضاحت“ نُوں ویکھو۔
^ یاں، ”ایمان۔“
^ یاں، ”لُٹ دے مال۔“
^ یونانی چ: ”اپنے پیو دادیاں دا پیمانہ بھر دَوو۔“
^ ”لفظاں دی وضاحت“ نُوں ویکھو۔
^ یاں، ”ہیکل۔“
^ یاں شاید، ”تواڈے لئی اُجاڑ چھڈ دِتا گیا اے۔“
^ ”لفظاں دی وضاحت“ نُوں ویکھو۔
