متی دی اِنجیل 22:1-46
22 یسوع نے اوہناں نُوں کجھ ہور مثالاں دِتیاں تے کہیا:
2 ”اسمان دی بادشاہی اِک ایہو جہے بادشاہ ورگی اے جنہے اپنے پُتر دے ویاہ دی دعوت دِتی۔
3 اوہنے اپنے غلاماں نُوں اوہناں لوکاں نُوں بلان لئی گھلیا جنہاں نُوں ویاہ تے آن دا سّدا دِتا گیا سی۔ پر اوہ لوک نئیں آنا چاہندے سن۔
4 اوہنے اپنے کجھ ہور غلاماں نُوں ایہہ کہہ کے گھلیا کہ ”جا کے مہماناں نُوں کہوو: ”ویکھو! مَیں دعوت دا سارا اِنتظام کر لیا اے۔ موٹے تازے جانور تے بیل ذبح کرا کے کھانا تیار کر لیا اے۔ ایس لئی تُسی ویاہ دی دعوت تے آ جاؤ۔““
5 پر اوہناں نے کوئی پرواہ نہ کیتی سگوں اِک جناں اپنے کھیتاں نُوں چلا گیا تے دُوجا اپنے کمکار لئی نکل گیا
6 جد کے باقیاں نے غلاماں نُوں پھڑ کے بےعزت کیتا تے مار دِتا۔
7 ایہدی وجہ توں بادشاہ نُوں بڑا غصہ آیا تے اوہنے اپنیاں فوجاں بھیج کے اوہناں قاتلاں نُوں مار دِتا تے اوہناں دا شہر ساڑ دِتا۔
8 فیر اوہنے اپنے غلاماں نُوں کہیا: ”ویاہ دی دعوت تے تیار اے پر جنہاں نُوں بلایا گیا سی، اوہ دعوت دے لائق نئیں نکلے۔
9 ایس لئی تُسی شہر توں باہر جان والیاں سڑکاں تے جاؤ تے جیہڑا وی توانوں ملے اوہنوں ویاہ دی دعوت چ سّد لوَو۔“
10 ایس کر کے غلام سڑکاں تے گئے تے اوہناں نُوں چنگے بھیڑے جیہڑے وی لوک ملے، اوہ اوہناں ساریاں نُوں لے آئے تے ویاہ دی دعوت والا کمرہ مہماناں نال بھر گیا۔
11 جدوں بادشاہ مہماناں نُوں ویکھن آیا تے اوہنوں اِک بندہ نظر آیا جنہے دعوت دے حساب نال کپڑے نئیں پائے ہوئے سن۔
12 ایس لئی بادشاہ نے اوہنوں کہیا: ”ہاں بھئی، تُوں دعوت والے کپڑے پائے بغیر اندر کیویں وڑھ آیا ایں؟“ پر اوہ بندہ کوئی جواب نہ دے سکیا۔
13 فیر بادشاہ نے اپنے نوکراں نُوں کہیا: ”ایہدے ہتھ پیر بنھ کے ایہنوں باہر نھیرے چ سُٹ دَوو جِتھے ایہہ اپنی ماڑی حالت دی وجہ توں روئے گا تے کچیچیاں وَٹے گا۔“
14 کیونکہ سّدا تے بتھیریاں نُوں دِتا گیا اے پر چُنے تھوڑے ای گئے نیں۔“
15 فیر فریسی اوتھوں چلے گئے تے آپس چ صلاح مشورہ کرن لگ پئے کہ یسوع نُوں اوہدیاں ای گلاں وچ کیویں پھسایا جائے۔
16 ایس لئی اوہناں نے اپنے چیلیاں تے ہیرودیس دے حمایتیاں نُوں یسوع کول بھیجیا۔ اوہناں نے آ کے یسوع نُوں کہیا: ”اُستاد، سانوں پتہ اے کہ تُوں ہمیشاں سچ بولنا ایں تے خدا دی راہ دی صحی صحی تلیم دینا ایں۔ تُوں کسے انسان نُوں خوش کرن دی کوشش وی نئیں کردا کیونکہ تینوں کسے دے مرتبے نال کوئی فرق نئیں پیندا۔
17 ایس لئی سانوں دَس کہ کیہہ تیرے خیال چ بادشاہ* نُوں ٹیکس دینا چاہی دا اے یاں نئیں؟“
18 یسوع جان دا سی کہ اوہ کِنّے مکار نیں۔ ایس لئی اوہنے اوہناں نُوں کہیا: ”اَے پاکھنڈیو، تُسی مینوں کیوں اَزما رہے او؟
19 مینوں ذرا اوہ سِکّہ وکھاؤ جیہڑا تُسی ٹیکس بھرن لئی دیندے او۔“ اوہناں نے اوہنوں اِک دینار دِتا۔
20 یسوع نے اوہناں نُوں کہیا: ”ایہدے تے کدی تصویر تے کدا ناں چھپیا ہویا اے؟“
21 اوہناں نے جواب دِتا: ”بادشاہ دا۔“ فیر یسوع نے کہیا: ”جیہڑیاں چیزاں بادشاہ دِیاں نیں، اوہ بادشاہ نُوں دَوو تے جیہڑیاں چیزاں خدا دِیاں نیں، اوہ خدا نُوں دَوو۔“
22 جدوں اوہناں نے ایہہ گل سُنی تے اوہ حیران ہو گئے تے اوہنوں چھڈ کے اوتھوں چلے گئے۔
23 اوس دن صدوقی جیہڑے من دے سن کہ مُردے زندہ نئیں ہون گے، یسوع کول آئے تے اوہنوں پچھیا:
24 ”اُستاد، موسیٰ نے کہیا سی کہ ”جے کوئی آدمی بےاولاد مر جائے تے اوہدا بھرا اپنی بھابھی نال ویاہ کر کے اپنے بھرا لئی اولاد پیدا کرے۔“
25 ساڈے ایتھے سَت بھرا سن۔ پہلے نے ویاہ کیتا تے اوہ بےاولاد مر گیا تے فیر دُوجے بھرا نے اوہدی بیوہ نال ویاہ کر لیا۔
26 پر دُوجے نال وی ایسے طرحاں ہویا۔ فیر تیجے نال وی ایسے طرحاں ہویا تے اِنج ستے ای بھرا بےاولاد مر گئے
27 تے اخیر چ اوہ عورت وی مر گئی۔
28 جدوں مُردیاں نُوں زندہ کیتا جائے گا تے اوہ عورت کدی بیوی ہوئے گی؟ کیونکہ ستاں بھراواں نے اوہدے نال ویاہ کیتا سی۔“
29 یسوع نے جواب چ اوہناں نُوں کہیا: ”تُسی غلط او کیونکہ تُسی نہ تے پاک کلام نُوں جان دے او تے نہ ای خدا دی طاقت نُوں
30 کیونکہ جدوں مُردیاں نُوں زندہ کیتا جائے گا تے اوہدوں نہ تے آدمی ویاہ کرن گے تے نہ ای عورتاں ویائیاں جان گیاں سگوں اوہ اسمان دے فرشتیاں وانگوں ہون گے۔
31 کیہہ تُسی نئیں پڑھیا کہ خدا نے مُردیاں دے زندہ ہون بارے کہیا:
32 ”مَیں ابراہام دا خدا، اِضحاق دا خدا تے یعقوب دا خدا واں“؟ اوہ مُردیاں دا نئیں سگوں زندہ لوکاں دا خدا اے۔“
33 ایہہ سُن کے لوک یسوع دی شاندار تلیم توں بڑا حیران ہوئے۔
34 جدوں فریسیاں نے سُنیا کہ اوہنے صدوقیاں دے مُونہہ بند کر دِتے سن تے اوہ* کٹھے ہو کے آئے۔
35 اوہناں وچوں اِک شریعت دا ماہر سی۔ اوہنے یسوع نُوں اَزمان لئی پچھیا:
36 ”اُستاد، شریعت چ سب توں وڈا حکم کیہڑا اے؟“
37 یسوع نے جواب دِتا: ””تُوں یہوواہ* اپنے خدا نال اپنے سارے دل، اپنی ساری جان* تے اپنی ساری عقل نال پیار کر۔“
38 ایہی سب توں وڈا تے پہلا حکم اے۔
39 ایہدے ورگا دُوجا حکم ایہہ وے: ”تُوں اپنے گوانڈھی* نال اُنج ای پیار کر جیویں تُوں اپنے آپ نال کرنا ایں۔“
40 ایہہ دونویں حکم شریعت تے نبیاں دی تلیم دی بنیاد نیں۔“
41 جدوں فریسی حالے اوتھے ای سن تے یسوع نے اوہناں نُوں پچھیا:
42 ”تُسی مسیح بارے کیہہ سوچدے او؟ اوہ کدا پُتر اے؟“ اوہناں نے جواب دِتا: ”داؤد دا۔“
43 یسوع نے پچھیا: ”تے فیر داؤد نے خدا دے الہام نال اوہنوں مالک کیوں کہیا؟ یاد اے کہ اوہنے کہیا سی
44 ”یہوواہ* نے میرے مالک نُوں کہیا: ”تُوں اوہدوں تک میرے سجے ہتھ بہہ جدوں تک مَیں تیرے دُشمناں نُوں تیرے پیراں ہیٹھاں نہ کر دونواں““؟
45 جے داؤد آپ اوہنوں مالک کہندا اے تے فیر اوہ اوہدا پُتر کیویں ہویا؟“
46 کوئی وی یسوع دی گل دا جواب نہ دے سکیا تے نہ ای اوس دن دے بعد کسے نے اوہنوں کوئی سوال پچھن دی جرأت کیتی۔
فٹ نوٹ
^ یونانی چ: ”قیصر۔“
^ یاں شاید، ”فریسی تے صدوقی کٹھے ہو کے آئے۔“
^ ”لفظاں دی وضاحت“ نُوں ویکھو۔
^ ”لفظاں دی وضاحت“ نُوں ویکھو۔
^ جیس یونانی لفظ دا ترجمہ ”گوانڈھی“ کیتا گیا اے اوہدا مطلب صرف گھر دے نال رہن والا ای نئیں اے سگوں ہر انسان اے۔
^ ”لفظاں دی وضاحت“ نُوں ویکھو۔
