رسولاں دے اعمال 8:1-40
8 ساؤل ستفنُس دے قتل توں خوش سی۔
اوس دن توں یروشلم دی کلیسیا تے بوہت ظلم ہون لگ پیا۔ ایس لئی رسولاں دے علاوہ باقی سارے شاگرداں نُوں یہودیہ تے سامریہ دے علاقیاں چ جانا پیا۔
2 کجھ نیک بندیاں نے ستفنُس نُوں لجا کے دفنا دِتا تے اوہناں نے اوہدی موت تے بڑا ماتم کیتا۔
3 پر ساؤل کلیسیا نُوں تباہ کرن لئی شاگرداں تے بڑا ظلم کرن لگ پیا۔ اوہ گھر گھر وڑھ کے آدمیاں تے عورتاں نُوں گھسیٹ کے باہر لیاندا سی تے اوہناں نُوں جیل چ پواندا سی۔
4 پر جیہڑے شاگرد دُوجے علاقیاں چ چلے گئے سن، اوہ ہر جگہ خدا دے کلام دی خوشخبری سُناندے رہے۔
5 فِلپّس شہر سامریہ* چلا گیا تے اوتھے لوکاں نُوں مسیح بارے خوشخبری سُنان لگ پیا۔
6 بوہت سارے لوک جمع ہوکے بڑے دھیان نال اوہدیاں گلاں سُن دے تے اوہدے معجزے ویکھدے سن۔
7 اوتھے کئی لوکاں نُوں باغی فرشتے چِمبڑے ہوئے سن جیہڑے اُچی اُچی رولا پا کے اوہناں وچوں نکل جاندے سن۔ ایہدے علاوہ کئی ایہو جہے لوک جیہڑے لنگڑے سن تے جنہاں نُوں فالج سی، اوہناں نُوں وی شفا ملی۔
8 ایس لئی اوس شہر دے لوک بڑے ای خوش سن۔
9 اوس شہر چ شمعون ناں دا اِک بندہ وی سی جیہڑا اپنے آپ نُوں بڑی وڈی ہستی سمجھدا سی۔ اوہ جادو کر کے سامریہ دے لوکاں نُوں حیران کردا سی۔
10 چھوٹے وڈے سارے لوک اوہدیاں گلاں تے کماں تے بڑا دھیان دیندے سن تے کہندے سن: ”ایس آدمی کول عظیم خدا دی طاقت اے۔“
11 اوہنے بڑے چِر توں لوکاں نُوں اپنے مغر لایا ہویا سی کیونکہ لوک اوہدی جادوگری توں بڑے حیران سن۔
12 پر جدوں فِلپّس نے خدا دی بادشاہی بارے تے یسوع مسیح دے ناں بارے خوشخبری سُنائی تے بوہت ساریاں عورتاں تے آدمی ایمان لے آئے تے اوہناں نے بپتسمہ لے لیا۔
13 شمعون آپ وی ایمان لے آیا تے اوہ بپتسمہ لین دے بعد فِلپّس دے نال نال رہیا۔ شمعون اوہدے وڈے وڈے معجزیاں تے نشانیاں توں بڑا حیران سی۔
14 جدوں یروشلم چ رسولاں نے سُنیا کہ سامریہ دے لوکاں نے خدا دے کلام نُوں قبول کر لیا اے تے اوہناں نے پطرس تے یوحنا نُوں اوتھے گھلیا۔
15 اوہناں دونواں نے اوتھے جا کے اوہناں لوکاں لئی دُعا کیتی تاکہ اوہناں نُوں پاک روح ملے۔
16 اصل چ اوہناں نے مالک یسوع دے ناں تے بپتسمہ لیا سی، پر حالے تک اوہناں وچوں کسے نُوں وی پاک روح نئیں ملی سی۔
17 فیر جدوں پطرس تے یوحنا نے اوہناں اُتے ہتھ رکھے تے اوہناں نُوں پاک روح مِلن لگ پئی۔
18 جدوں شمعون نے ویکھیا کہ لوکاں نُوں اوہدوں پاک روح مِلدی اے جدوں رسول اوہناں تے ہتھ رکھدے نیں تے اوہنے رسولاں نُوں پیسے دین دی کوشش کیتی
19 تے کہیا: ”مینوں وی ایہہ طاقت دَوو تاکہ مَیں وی جدے تے ہتھ رکھاں اوہنوں پاک روح مِل جائے۔“
20 پر پطرس نے اوہنوں کہیا: ”تُوں تے تیرے پیسے دونویں غرق ہون کیونکہ تُوں خدا دی اوس نعمت نُوں پیسے نال خریدن دی کوشش کیتی جیہڑی اوہ مُفت دیندا اے۔
21 تیرا ایس کم نال کوئی تعلق نئیں کیونکہ تیرا دل خدا دِیاں نظراں چ صاف نئیں اے۔
22 ایس لئی اپنی ایس بُرائی توں توبہ کر تے اپنی بھیڑی سوچ نُوں بدل تے یہوواہ اَگے فریاد کر کہ جے ہو سکے تے اوہ تینوں معاف کر دَوے۔
23 مَیں ویکھ لیا اے کہ تیرے دل وچ زہر بھریا ہویا اے تے تُوں بُرائی دا غلام ایں۔“
24 شمعون نے اوہناں نُوں کہیا: ”مہربانی نال یہوواہ کولوں میرے لئی اِلتجا کرو کہ میرے نال اوہ سب نہ ہوئے جو تُسی کہیا اے۔“
25 فیر پطرس تے یوحنا نے اوتھے چنگی طرحاں گواہی دِتی تے یہوواہ دا کلام سُنایا۔ ایہدے بعد اوہ واپس یروشلم وَل گئے تے راہ چ سامریاں دے بوہت سارے پِنڈاں چ خوشخبری سُنائی۔
26 یہوواہ دے اِک فرشتے نے فِلپّس نُوں کہیا: ”اُٹھ تے جنوب وَل اوس سڑک تے جا جیہڑی یروشلم توں غزہ نُوں جاندی اے۔“ (ایہہ اِک ویران سڑک اے۔)
27 فرشتے دی ایہہ گل سُن کے فِلپّس ٹُر پیا۔ اوس سڑک تے اوہنوں اِک اعلیٰ افسر* ملیا جیہڑا ایتھیوپیا دی ملکہ کنداکے دے سارے خزانے دا نگران سی۔ اوہ عبادت کرن لئی یروشلم گیا سی
28 تے ہُن اپنے گھر واپس جا رہیا سی۔ اوہ اپنے رتھ تے بیٹھا یسعیاہ نبی دی کتاب اُچی آواز چ پڑھ رہیا سی۔
29 ایس لئی خدا نے پاک روح دے ذریعے فِلپّس نُوں کہیا: ”رتھ تے بیٹھے بندے کول جا۔“
30 فِلپّس رتھ دے نال نال دوڑن لگ پیا تے اوہنے سُنیا کہ اوہ بندہ اُچی آواز چ یسعیاہ نبی دی کتاب پڑھ رہیا اے۔ فِلپّس نے اوہنوں پچھیا: ”کیہہ تُوں جو پڑھ رہیا ایں، اوہ تینوں سمجھ آ رہیا اے؟“
31 اوہنے جواب دِتا: ”جدوں تک کوئی مینوں سمجھائے گا نئیں، اوہدوں تک مینوں کیویں سمجھ آئے گی؟“ ایس لئی اوہنے فِلپّس نُوں اپنے نال رتھ تے بیہن لئی کہیا۔
32 اوہ پاک کلام دا ایہہ حوالہ پڑھ رہیا سی: ”اوہنوں اِک بھیڈ وانگوں ذِبح کرن لئی لیایا گیا تے جیویں اِک میمنا اپنے وال کترن والے دے سامنے چپ رہندا اے، اوہنے وی اپنا مُونہہ نئیں کھولیا۔
33 اوہنوں بےعزت کیتا گیا تے اوہدے نال نااِنصافی ہوئی۔ اوہدی زندگی زمین توں مٹا دِتی گئی۔ ہُن کون دَسے گا کہ اوہ کدی نسل چوں آیا اے؟“
34 اوس افسر نے فِلپّس نُوں کہیا: ”مہربانی نال مینوں دَس نبی نے ایہہ گل کدے بارے کہی اے؟ اپنے بارے یاں کسے ہور بارے؟“
35 فِلپّس نے اوہنوں اوسے حوالے توں سمجھانا شروع کیتا تے اوہنوں یسوع بارے خوشخبری سُنائی۔
36 راہ چ جاندے ہوئے اوہ اِک جگہ پونچے جِتھے بوہت سارا پانی سی۔ افسر نے کہیا: ”ویکھ، ایتھے کافی پانی اے، ہُن کیہڑی گل مینوں بپتسمہ لین توں روکدی اے؟“
37 ——*
38 فیر افسر نے رتھ روکن دا حکم دِتا۔ اوہ دونویں اُتر کے پانی چ گئے تے فِلپّس نے اوہنوں بپتسمہ دِتا۔
39 جدوں اوہ پانی وچوں باہر آئے تے یہوواہ دی پاک روح دی رہنمائی چ فِلپّس فوراً اوتھوں ٹُر پیا۔ افسر نے خوشی خوشی اپنا سفر جاری رکھیا تے اوہنے فِلپّس نُوں دُبارہ نہ ویکھیا۔
40 فیر فِلپّس شہر اشدود گیا تے ایہدے بعد شہر قیصریہ جاندے ویلے اوہنے راہ چ سارے شہراں چ خوشخبری سُنائی۔
فٹ نوٹ
^ یاں شاید، ”سامریہ دے اِک شہر۔“
^ یاں، ”خواجہ سرا۔“ ایہہ بندہ نامرد نئیں سی۔ اصل چ لفظ ”خواجہ سرا“ اِک ایہو جہے بندے لئی وی استمال ہوندا سی جدے کول شاہی دربار چ اہم ذمےداریاں ہوندیاں سن۔
^ ایہہ ایت کئی پرانے نسخیاں وچ نئیں اے جدا مطلب اے کہ ایہہ اِلہامی کلام دا حصہ نئیں اے۔
