رسولاں دے اعمال 6:1-15
6 اوہناں دِناں چ جدوں شاگرداں دی تعداد ودھدی جا رہی سی تے یونانی بولن والے یہودی شاگرد، عبرانی بولن والے یہودی شاگرداں دے خلاف شکایت کرن لگ پئے۔ ایہدی وجہ ایہہ سی کہ ہر روز جدوں کھانا وَنڈیا جاندا سی تے یونانی بولن والیاں بیوہ عورتاں نُوں اوہناں دا حصہ نئیں مِلدا سی۔
2 ایس لئی 12 رسولاں نے سارے شاگرداں نُوں کٹھا کر کے کہیا: ”ایہہ چنگی گل نئیں کہ اَسی خدا دے کلام دی تلیم دینا چھڈ کے کھانا وَنڈن لگ پئیے۔
3 ایس لئی بھراوو، تُسی اپنے وچوں سَت نیک ناں بھراواں نُوں چُنو جیہڑے پاک روح تے حکمت نال بھرے ہون تاکہ اَسی ایس ضروری کم دی ذمےداری اوہناں نُوں دَئیے۔
4 پر اَسی اپنا پورا دھیان دُعا کرن تے خدا دے کلام دی تلیم دین تے رکھاں گے۔“
5 ایہہ گل شاگرداں نُوں چنگی لگی تے اوہناں نے ایہناں بھراواں نُوں چُنیا: ستفنُس جیہڑا مضبوط ایمان والا تے پاک روح نال بھریا ہویا سی، نالے فِلپّس، پروخورُس، نیکانور، تیمون، پرمِناس تے انطاکیہ دا نیکلاؤس جنہے یہودی مذہب اپنایا سی۔*
6 اوہ ایہناں بھراواں نُوں رسولاں دے کول لیائے۔ رسولاں نے دُعا کرن دے بعد اوہناں نُوں ایہہ ذمےداری دین لئی اوہناں تے ہتھ رکھے۔
7 ایس وجہ توں خدا دا کلام پھیلدا گیا تے یروشلم چ شاگرداں دی تعداد بوہت ودھدی گئی۔ نالے بوہت سارے کاہن وی ایمان لیائے۔
8 ستفنُس تے خدا دی رحمت سی تے اوہ اوہدی طاقت نال بھریا ہویا سی۔ ایس لئی اوہ لوکاں دے سامنے بڑے حیران کرن وا لے کم کردا سی تے نشانیاں وکھاندا سی۔
9 پر ”آزاد لوکاں دی عبادتگاہ“* دے کجھ بندے اپنے نال کُرینے، اِسکندریہ، کِلکیہ تے آسیہ دے کجھ بندیاں نُوں لیائے تے ستفنُس نال بحث کرن لگ پئے۔
10 پر اوہ ستفنُس دا مقابلہ نہ کر سکے کیونکہ اوہ خدا دی حکمت تے پاک روح دی مدد نال گل کر رہیا سی۔
11 فیر اوہناں نے چوری چھپے کجھ آدمیاں نُوں ایہہ کہن لئی اُکسایا: ”اَسی ایہنوں موسیٰ تے خدا دے خلاف کُفر بک دے ہوئے سُنیا اے۔“
12 اوہناں نے لوکاں، بزرگاں تے شریعت دے عالماں نُوں بھڑکایا تے اوہناں ساریاں نے اچانک ستفنُس تے حملہ کیتا تے اوہنوں زبردستی وڈی عدالت چ لے گئے۔
13 اوتھے اوہ جھوٹھے گواہ لیائے جنہاں نے کہیا: ”ایہہ بندہ ایس مُقدس ہیکل تے شریعت دے خلاف گلاں کرن توں باز نئیں آندا۔
14 اَسی آپ ایہنوں ایہہ کہندے سُنیا اے کہ یسوع ناصری آ کے ہیکل نُوں ڈھا دَوے گا تے اوہناں رویتاں نُوں بدل دَوے گا جیہڑیاں سانوں موسیٰ نے دِتیاں نیں۔“
15 وڈی عدالت چ بیٹھے سارے لوک ستفنُس نُوں بڑے غور نال ویکھن لگ پئے کیونکہ اوہدا چہرہ اِک فرشتے دے چہرے ورگا لگ رہیا سی۔
فٹ نوٹ
^ یعنی پہلاں اوہنے یہودی مذہب اپنایا سی۔ پر ہُن اوہ مسیحی بن گیا سی۔
^ شاید ایہدا اشارہ اوہناں یہودیاں تے یہودی مذہب اپنان والے لوکاں وَل اے جیہڑے غلامی یاں قید توں آزاد ہوئے سن۔
