رسولاں دے اعمال 28:1-31
28 جدوں اَسی کنارے تے صحی سلامت پونچ گئے تے سانوں پتہ لگیا کہ اوس جزیرے دا ناں مالٹا اے۔
2 اوتھوں دے لوکاں نے ساڈے لئی بڑی مہربانی وکھائی۔ اوہناں نے ساڈی مہمان نوازی کیتی تے ساڈے لئی اَگ وی بالی کیونکہ بارش ہو رہی سی تے بڑی ٹھنڈ سی۔
3 پر جدوں پولُس نے لکڑاں کٹھیاں کر کے اَگ چ پائیاں تے اَگ دے سیک نال اِک زہریلا سَپ نکل آیا تے اوہدے ہتھ نال چِمبڑ گیا۔
4 جدوں جزیرے دے لوکاں نے سَپ نُوں پولُس دے ہتھ نال چِمبڑے ویکھیا تے اوہ اِک دُوجے نُوں کہن لگ پئے: ”ایس بندے نے ضرور کوئی قتل کیتا ہوئے گا۔ ایہہ طوفان توں تے بچ گیا، پر اِنصاف* نے ایہدی جان نئیں بخشی۔“
5 پر پولُس نُوں سَپ دے ڈنگ توں کجھ نہ ہویا سگوں اوہنے سَپ نُوں جھٹک کے اَگ چ سُٹ دِتا۔
6 پر فیر وی لوکاں نُوں لگ رہیا سی کہ پولُس دا سارا جسم سج جائے گا یاں فیر اوہ اچانک مر جائے گا۔ پر جدوں کافی دیر بعد وی پولُس نُوں کجھ نہ ہویا تے اوہناں نے اپنی رائے بدل لئی تے کہن لگ پئے کہ اوہ کوئی دیوتا اے۔
7 اوس جگہ دے نیڑے ای جزیرے دے سردار پُبلیُس دِیاں زمیناں سن۔ اوہ سانوں بڑی خوشی نال ملیا تے اوہنے تِن دِناں تک ساڈی مہمان نوازی کیتی۔
8 اوس ویلے پُبلیُس دا پیو منجی تے پیا ہویا سی کیونکہ اوہنوں بخار سی تے مروڑ لگے ہوئے سن۔ پولُس نے اوہدے کول جا کے دُعا کیتی تے اوہدے تے ہتھ رکھ کے اوہنوں ٹھیک کر دِتا۔
9 ایہہ ویکھ کے جزیرے دے دُوجے بیمار لوک وی پولُس کول آن لگ پئے تے اوہنے اوہناں نُوں ٹھیک کر دِتا۔
10 اوہناں لوکاں نے ساڈے لئی بڑی عزت وکھائی تے سانوں بڑے تحفے وی دِتے۔ جدوں اَسی جان لئی سمندری جہاز چ بیٹھے تے اوہناں نے سانوں ضرورت دی ہر شے دِتی۔
11 اَسی تِن مہینے اوتھے رہے تے فیر اِک جہاز تے بیٹھ گئے جدے اَگے زیوس دے پُتراں دا نشان لگیا ہویا سی۔ ایہہ جہاز شہر اِسکندریہ توں آیا سی تے سردی دا موسم ختم ہون تک اوس جزیرے تے ای کھڑا سی۔
12 جدوں اَسی شہر سِرکوسہ دی بندرگاہ تے پونچے تے اَسی اوتھے تِن دن رہے۔
13 اوتھوں اَسی شہر ریگیُم گئے۔ اگلے دن جنوب وَلّوں ہوا چلن لگ پئی سی ایس لئی اَسی دُوجے دن شہر پُتیولی پونچے۔
14 اوتھے سانوں کجھ بھین بھرا ملے۔ اوہناں نے سانوں اپنے نال ٹھہرن لئی وار وار کہیا۔ ایس لئی اَسی سَت دن تک اوتھے رُکے تے فیر روم وَل گئے۔
15 جدوں روم دے بھراواں نُوں پتہ چلیا کہ اَسی آ رہے آں تے کجھ بھرا سانوں مِلن لئی تِن سرائے* ناں دی جگہ تے آئے۔ نالے کجھ بھرا تے اپیُس دے بازار تک آئے۔* اوہناں نُوں ویکھ کے پولُس نے خدا دا شکر کیتا تے اوہنوں بڑا حوصلہ ملیا۔
16 آخر جدوں اَسی روم پونچ گئے تے پولُس نُوں اِک فوجی دی نگرانی چ کرائے دے اِک مکان چ کلّے رہن دی اجازت مِل گئی۔
17 تِن دِناں بعد پولُس نے یہودیاں دے رہنماواں نُوں اپنے کول بلایا۔ جدوں اوہ آئے تے پولُس نے کہیا: ”بھراوو، مَیں ساڈی قوم تے ساڈے پیو دادیاں دِیاں رویتاں دے خلاف کجھ نئیں کیتا۔ پر فیر وی مینوں یروشلم چ گِرفتار کر کے رومیاں دے حوالے کیتا گیا۔
18 پچھگچھ کرن دے بعد رومی مینوں رِہا کرنا چاہندے سن کیونکہ مَیں موت دی سزا دے لائق کوئی کم نئیں کیتا۔
19 پر یہودیاں نُوں ایس گل تے اِعتراض سی۔ ایس لئی مَیں مجبور ہو کے درخاست کیتی کہ میرا معاملہ روم دے بادشاہ اَگے پیش کیتا جائے۔ پر میرا مقصد اپنی قوم تے کوئی اِلزام لانا نئیں اے۔
20 مَیں توانوں ایس لئی بلایا اے تاکہ توانوں دَساں کہ جدے* اُتے اِسرائیلیاں نے امید لائی ہوئی اے، مَیں اوہدی وجہ توں ای ایہناں بیڑیاں چ بنھیا ہویا واں۔“
21 اوہناں نے اوہنوں کہیا: ”سانوں نہ تے یہودیہ چوں تیرے بارے کوئی خط ملیا اے تے نہ ای اوتھوں آئے یہودی بھراواں نے تیرے خلاف کوئی گل کیتی اے۔
22 پر اَسی ساریاں نے سوچیا کہ چنگا ہوئے گا کہ اَسی ایتھے آ کے تیری گل سنیے کیونکہ سانوں پتہ چلیا اے کہ لوک ہر جگہ ایس فرقے دے خلاف گل کر رہے نیں۔“
23 اوہناں نے پولُس نُوں مِلن لئی اِک دن رکھیا تے اوس دن ہور وی لوک اوہدے گھر کٹھے ہو گئے۔ صبح توں لے کے شام تک پولُس اوہناں نُوں خدا دی بادشاہی بارے چنگی طرحاں گواہی دیندا رہیا۔ اوہنے موسیٰ دی شریعت تے نبیاں دِیاں کتاباں توں یسوع بارے دلیلاں دے کے اوہناں نُوں قائل کرن دی کوشش کیتی۔
24 کجھ لوکاں نے اوہدیاں گلاں تے یقین کر لیا۔ پر کجھ نے یقین نئیں کیتا۔
25 اوہناں دی سوچ اِکو جہی نئیں سی، ایس لئی اوہ اُٹھ کے جان لگ پئے۔ ایہہ ویکھ کے پولُس نے آخر چ کہیا:
”یسعیاہ نبی نے پاک روح دی رہنمائی چ تواڈے پیو دادیاں بارے بالکل صحی کہیا سی:
26 ”اوہناں لوکاں کول جا تے کہہ کہ ”تُسی سُنو گے، پر مطلب نئیں سمجھو گے۔ تُسی ویکھو گے، پر تواڈے پَلّے کجھ نئیں پئے گا۔
27 اوہناں لوکاں دا دل سخت ہو گیا اے۔ اوہ اپنے کناں نال سُن دے تے ہے نیں، پر کردے کجھ نئیں۔ اوہناں نے اپنیاں اَکھاں بند کر لئیاں نیں تاکہ نہ تے کدی اپنیاں اَکھاں نال ویکھن، نہ اپنے کناں نال سُنن تے نہ ای ایہناں گلاں نُوں سمجھ کے اپنے دِلاں تے اثر ہون دین تے میرے کول واپس آن تے مَیں اوہناں نُوں شفا دَواں۔““
28 ایس لئی تُسی جان لوو کہ خدا وَلّوں نجات دا پیغام غیر یہودی لوکاں نُوں سُنایا گیا اے تے اوہ ایہنوں ضرور قبول کرن گے۔“
29 ——*
30 پولُس پورے دو سالاں تک اپنے کرائے دے گھر چ رہیا۔ اوہ اوہناں لوکاں نُوں بڑی خوشی نال مِلدا سی جیہڑے اوہدے کول آندے سن۔
31 اوہ دلیری نال بِنا کسے رُکاوٹ دے اوہناں نُوں خدا دی بادشاہی بارے دَسدا سی تے مالک یسوع مسیح بارے تلیم دیندا سی۔
فٹ نوٹ
^ یونانی چ: ”دِیکے۔“ ایتھے شاید بدلہ لین والی اِنصاف دی دیوی دی گل کیتی گئی اے۔
^ ایہہ اوہ جگہ سی جِتھے مسافر آرام کرن لئی ٹھہردے تے کھاندے پیندے سن۔
^ روم توں تِن سرائے 50 کلومیٹر دُور سی تے اپیُس دا بازار 65 کلو میٹر دُور سی۔
^ یعنی مسیح۔
^ ایہہ ایت کئی پرانے نسخیاں وچ نئیں اے جدا مطلب اے کہ ایہہ اِلہامی کلام دا حصہ نئیں اے۔
